Lekela Dîyi dia Nzambi ditokeshe njila webe
Lekela Dîyi dia Nzambi ditokeshe njila webe
‘Dîyi diebe didi munya muteme mu njila wanyi.’—MUSAMBU 119:105.
1, 2. Bidi bikengela tshinyi bua dîyi dia Yehowa kutokeshadi njila wetu?
DÎYI dia Yehowa neditokeshe njila wetu patudi tudilekela bua kumutokeshadi. Bua tuetu kupeta butoke bua mu nyuma ebu, tudi ne bua kuikala balongi ba tshisumi ba Dîyi didi Nzambi mufundishe ne kutumikila mibelu idimu. Anu tuetu benze nanku ke tuetu kupeta meji a buena a mufundi wa Misambu wakamba ne: ‘Dîyi diebe didi muendu ku makasa anyi ne munya muteme mu njila wanyi.’—Musambu 119:105.
2 Mpindieu tukonkononayi Musambu 119:89-176. Malu mapite bungi adi mu mvese eyi idi mikosolola mu bitupa 11. Malu aa adi mua kutuambuluisha bua kushala mu njila udi ufikisha ku muoyo wa tshiendelele.—Matayo 7:13, 14.
Bua tshinyi kunanga Dîyi dia Nzambi?
3. Mmunyi mudi Musambu 119:89, 90 uleja ne: tudi mua kueyemena dîyi dia Nzambi?
3 Kunanga kua dîyi dia Yehowa kudi kufikisha ku dikala bashindame mu nyuma. (Musambu 119:89-96) Mufundi wa Misambu wakimba ne: ‘Yehowa, dîyi diebe didi dishindame mu diulu tshiendelele. Wewe wakujadika buloba, ne budi bushindama.’ (Musambu 119:89, 90) Ku dîyi dia Nzambi anyi ‘mikenji idiye muelele bintu bia mu diulu,’ dîba, ngondo ne mitoto bidi bienda bimpe menemene mu njila yabi eku buloba pabu bujadika bimpe muaba wabu bua kashidi. (Yobo 38:31-33; Musambu 104:5) Tudi mua kueyemena dîyi dionso didi dipatuka mukana mua Yehowa; dîyi didi Nzambi wamba nedikale ne bua ‘kujikija’ disua diende kudikumbaja.—Yeshaya 55:8-11.
4. Mmunyi mudi dinanga dia dîyi dia Nzambi diambuluisha basadidi bende badi bakenga?
4 Mufundi wa Misambu uvua mua ‘kujimina mu makenga ende bu mikenji ya Nzambi kayiyi mikale disanka diende.’ (Musambu 119:92) Kabavua bamukengesha kudi bantu ba ku ba bende to; bena Isalele bashipi ba mikenji ke bavua bamukine. (Lewitiki 19:17) Kadi kabiakamusamisha mutu nansha, bualu uvua munange mikenji ya Nzambi ivua imukuatshisha. Mu Kolinto, mupostolo Paulo uvua mu ‘njiwu ya kudi bantu bakadinga ne: bavua bana babu,’ pamuapa munkatshi muabu muvua bavua badiangata bu ‘bapostolo bavua batambe bonso bunene’ bavua bakeba bualu bua kumubanda nabu. (2 Kolinto 11:5, 12-14, 26) Kadi Paulo wakapanduka mu nyuma bualu uvua munange dîyi dia Nzambi. Bu mutudi banange Dîyi didi Yehowa mufundishe ne tutumikila tshididi diamba, tudi banange bana betu. (1 Yone 3:15) Nansha lukuna ludi nalu bena panu kutudi kaluena lutupangisha bua kuvuluka mikenji ya Nzambi nansha kakese. Tudi tutungunuka ne kuenza disua diende mu buobumue ne dinanga ne bana betu, bindile dîba dituikala mua kusadila Yehowa ne disanka ne muoyo wa tshiendelele.—Musambu 119:93.
5. Mmunyi muvua Mukalenge Asa mukebe Yehowa?
5 Bua kuleja lulamatu luetu kudi Yehowa tudi mua kusambila ne: ‘Meme ndi webe, unsungile, bualu bua ngakukeba kumanya mêyi ebe awakungambila.’ (Musambu 119:94) Mukalenge Asa wakakeba Nzambi e kumbushaye butontolodi mu Yuda. Mu tshisangilu tshinene tshia mu tshidimu tshia 15 tshia bukokeshi bua Asa (963 K.B.B.), bantu ba mu Yuda ‘bakapunga tshipungidi bua kukebabu Yehowa.’ Nzambi wakenza bua ‘bobu bamupete’ ne wakatungunuka ne ‘kubapa ditalala ku nseke yonso.’ (2 Kulondolola 15:10-15) Tshilejilu etshi tshidi ne bua kukankamija aba bonso badi bumbuke mu tshisumbu tshia bena Kristo bua kukebulula Nzambi tshiakabidi. Neabeneshe badi batuadija kudisangisha tshiakabidi ne bantu bende ne neabakube.
6. Ntshinyi tshikala mua kutukuba ku njiwu ya mu nyuma?
6 Dîyi dia Yehowa didi ditupesha meji adi mua kutukuba ku njiwu ya mu nyuma. (Musambu 119:97-104) Mikenji ya Nzambi idi ituvuija bena meji kupita baluishi betu. Kuteleja mêyi adiye utuvuluija kudi kutupesha dijingulula dia malu, ne ‘kulama kua mêyi akutuambilaye kudi kutuvuija bapite bantu banunu ku dijingulula dia malu.’ (Musambu 119:98-100) Bikala mêyi a Yehowa ‘mashemakane patudi tualabula, mapite buitshi kushemakana mukana muetu,’ netukine ‘njila yonso ya mashimi,’ ne netuyepuke. (Musambu 119:103, 104) Ebi nebitukube ku njiwu ya mu nyuma patudi tutuilangana ne bantu babi badi badibandisha, badi ne luonji mu matuku a ku nshikidilu aa.—2 Timote 3:1-5.
Muendu ku makasa etu
7, 8. Ntshinyi tshitudi ne bua kuenza bua kukumbaja Musambu wa 119:105?
7 Dîyi dia Nzambi didi mpokolo wa butoke bua mu nyuma budi kabuyi bujimina. (Musambu 119:105-112) Nansha tuetu bena Kristo bela manyi anyi balunda babu ba mu ‘mikoko mikuabu,’ tudi tuamba ne: ‘Dîyi diebe didi muendu ku makasa anyi ne munya muteme mu njila wanyi.’ (Yone 10:16; Musambu 119:105) Dîyi dia Nzambi didi bu muendu udi ututokeshila njila wetu bua katutetuki tuadishinda mu nyuma. (Nsumuinu 6:23) Nanku, yonso wa kutudi udi ne bua kulekela dîyi dia Yehowa ditema bu muendu ku makasa ende.
8 Tudi ne bua kuikala badisuike bu mufundi wa Musambu 119. Uvua muangate dipangadika dia kubenga kusesuka ku mikenji ya Nzambi. Wakamba ne: ‘Ngakuditshipa, nengenze mungakuditshipa ne: Nentumikile mêyi ebe [a Yehowa] makane majalame.’ (Musambu 119:106) Katupepeji mushinga wa kulonga kua Bible pa tshibidilu ne wa kubuela mu bisangilu bia bena Kristo nansha kakese.
9, 10. Ntshinyi tshidi tshituleja ne: bantu badi badilambule kudi Yehowa badi mua kusesuka ‘ku mêyi akabambilaye,’ kadi mmunyi mutudi mua kuepuka bualu ebu?
9 Mufundi wa Misambu kakasesuka anyi ‘kuepuka ku mêyi akamuambila Nzambi’ nansha, kadi bidi mua kuenzekela muntu udi mudilambule kudi Yehowa. (Musambu 119:110) Nansha muvua Mukalenge Solomo muikale wa mu tshisamba tshidilambule kudi Yehowa ne muenze ku ntuadijilu malu avua mu umvuangana ne meji avua Nzambi mumupeshe, wakalua kusesuka. ‘Kadi bakaji ba bende bakamuenzeja yeye mene malu mabi’ pakamufikishabu ku ditendelela nzambi ya dishima.—Nehemiya 13:26; 1 Bakelenge 11:1-6.
10 Satana udi “tshilembi tshia nyunyu” utu wela mateyi a bungi. (Musambu 91:3) Tshilejilu, muntu uvua kumpala muena Kristo netu udi mua kukeba bua kutufikisha ku disesuka mu njila wa butoke bua mu nyuma bua kutubueja mu mîdima ya butontolodi. Munkatshi mua bena Kristo ba ku Tuatila muvua ‘mukaji [diende] Izebele,’ uvua muikale pamuapa tshisumbu tshia bakaji bavua balongesha bakuabu bua kutendelela mpingu ne kuenda masandi. Yezu kakalengulula malu mabi a nunku to, nunku tuetu petu katuena ne bua kualengulula nansha. (Buakabuluibua 2:18-22; Yuda 3, 4) Nunku tulombayi Yehowa diambuluisha bua katusesuki ku mêyi adiye utuambila, kadi tushale mu butoke budi bufumina mu Dîyi diende.—Musambu 119:111, 112.
Dîyi dia Nzambi didi ditukuatshisha
11. Bilondeshile Musambu wa 119:119, mmunyi mudi Nzambi umona bantu babi?
11 Nzambi neatukuatshishe bituikala katuyi tusesuka ku mikenji yende mifunda. (Musambu 119:113-120) Katuena basue “bena mitshima ibidi,” anu mudi Yezu lelu’eu ukina badi tshiuyuya kadi badiamba mudibu bena Kristo. (Musambu 119:113; Buakabuluibua 3:16) Bu mutudi tusadila Yehowa ne mutshima mujima, yeye udi ‘tshisokomenu tshietu’ ne neatukuatshishe. Yeye ‘nealengulule bonso badi bepuka mikenji yende mifunda’ badifila mu malu a mashimi adibu badingangana nawu a patupu. (Musambu 119:114, 117, 118; Nsumuinu 3:32) Udi umona bantu babi aba bu ‘bikanganya,’ bunyingunyingu anyi bivinguvingu bia tshiamu bitubu bumbusha pambidi pa biamu bia mushinga bu mudi argent ne or. (Musambu 119:119; Nsumuinu 17:3) Tunangayi mêyi adi Nzambi utuvuluija misangu yonso, bualu katuena basue bua kutusangabu pamue ne bantu babi bu mushiki wa tumvi tua biamu waluabu kubutula nansha kakese!
12. Bua tshinyi ditshina dia Yehowa didi ne mushinga?
12 Mufundi wa Misambu wakambila Yehowa ne: “Mubidi wanyi udi uzakala bua dikutshina dianyi.” (Musambu 119:120) Tudi ne bua kuikala ne ditshina dimpe dia Nzambi didi dimuenekela ku diepuka dia malu adiye mukine bituikala basue bua kutukuatshishaye bu basadidi bende. Ditshina Yehowa ne kanemu diakasaka Yobo bua kuikala ne nsombelu muakane. (Yobo 1:1; 23:15) Ditshina dia Nzambi didi mua kutuambuluisha bua kunanukila mu njila udi Nzambi musue nansha tuetu mua kupeta ntatu ya mushindu kayi. Kadi bua kutantamena malu aa bidi bikengela kuikala kusambila ne muoyo mujima ne ditabuja.—Yakobo 5:15.
Sambila ne ditabuja
13-15. (a) Bua tshinyi tudi ne bua kuikala ne ditabuja dia se: Yehowa neandamune masambila etu? (b) Ntshinyi tshidi mua kuenzeka bituikala katuyi bamanye tshia kuamba mu disambila? (c) Umvuija mudi Musambu 119:121-128 mua kupetangana ne ‘mikemu yetu idi kayiyi mua kuambibua’ mu disambila?
13 Tudi ne bua kusambila ne ditabuja dia se: Nzambi neatuambuluishe. (Musambu 119:121-128) Anu bu mufundi wa Misambu, tudi bajadike ne: neandamune masambila etu. Bua tshinyi? Bualu tudi banange mikenji yende ‘kupita tshiamu tshia or; or mufula mu ditanda.’ Kabidi, ‘mêyi a Nzambi onso adiye utuambila tudi tuabala ne: adi makane.’—Musambu 119:127, 128.
14 Yehowa udi uteleja milombu yetu bualu tudi tusambila ne ditabuja, kabidi tudi tutumikila mikenji yende bimpe menemene. (Musambu 65:2) Kadi tshia kuenza ntshinyi bituikala imue misangu ne malu adi matupite mu mutu katuyi nansha tumanya kabidi tshia kuamba mu disambila? Dîba adi ‘nyuma muine udi utuakuila ne mikemu idi kayiyi mua kuambibua.’ (Lomo 8:26, 27) Mu bikondo bia nunku, mêyi akavuabu bafunde mu Dîyi diende au Nzambi udi uitaba bu masambila adi aleja majinga etu.
15 Bible mmuwule tente ne masambila ne ngenyi bidi bipetangana ne ‘mikemu yetu idi kayiyi mua kuambibua.’ Tshilejilu, tangila Musambu wa 119:121-128. Mushindu udibu bambe malu mu Musambu eu udi mua kukumbanyina pamuapa nsombelu wetu. Tshilejilu, bituikala tutshina bua kabulu kutuiba, tudi mua kulomba Nzambi diambuluisha muvua mufundi wa Misambu mumulombadi. (Mvese wa 121-123) Tufuanyikijabi ne: tudi basue kuangata dipangadika dipite bukole. Si tudi mua kulomba Yehowa bua nyuma wende atuambuluishe bua kuvuluka mêyi ende adiye utuvuluija ne kuatumikila. (Mvese wa 124, 125) Nansha mutudi ‘bakine njila yonso wa mashimi,’ tudi kabidi mua kulomba Nzambi bua kutuambuluishaye bua katuponyi mu diteta dia bafuane kushipa mikenji yende. (Mvese wa 126-128) Tuetu tubala Bible dituku dionso, mvese mimpe bu mudi eyi idi mua kutuvuila mu meji patudi tulomba Yehowa nunku.
Mêyi adi Yehowa utuvuluija adi atuambuluisha
16, 17. (a) Bua tshinyi tudi dijinga ne mêyi adi Nzambi utuvuluija, ne mmunyi mutudi ne bua kuamona? (b) Mmunyi mudi bakuabu mua kutuangata, kadi ntshinyi menemene tshidi ne mushinga?
16 Tudi ne bua kuteleja mêyi adi Yehowa utuvuluija bituasua bua kutelejaye disambila dietu ne kutuanyishaye. (Musambu 119:129-136) Bu mutudi bena bipua muoyo, tudi dijinga ne mêyi malenga adi Yehowa utuvuluija adi apingaja meji etu ku mibelu yende ne mikenji yende. Bushuwa, tudi ne dianyisha bua butoke bua mu nyuma butudi tupeta bua ngumvuilu yonso mupiamupia wa mêyi a Nzambi. (Musambu 119:129, 130) Tudi kabidi ne dianyisha bua mudi Yehowa ‘mututemeshile mpala wende’ wa butoke utuanyisha nansha mudi ‘mêsu etu apatula binsonji bu misulu ya mâyi’ bua padi bakuabu bashipa mikenji yende.—Musambu 119:135, 136; Nomba 6:25.
17 Nzambi neatungunuke ne kutuanyisha bituatumikila mêyi ende makane adiye utuvuluija. (Musambu 119:137-144) Bu mutudi basadidi ba Yehowa, tudi tuitaba ne: Yeye udi ne bukenji bua kutuvuluija mêyi ende makane ne bua kututekelawu bu mikenji itudi ne bua kutumikila. (Musambu 119:138) Bu muvua mufundi wa Misambu utumikila mikenji ya Nzambi, bua tshinyi wakamba ne: ‘Ndi muntu wa patupu, ne ndi mupetudibue’? (Musambu 119:141) Mbimueneke ne: uvua usua kuleja mushindu uvua baluishi bende bamuangata. Patudi tushala anu bakandamane balamate ku buakane, bantu bakuabu badi mua kutupetula. Nansha nanku, tshidi nangananga ne mushinga kutudi ntshia se: Yehowa udi utuanyisha bu mutudi tulonda mêyi ende.
Bakubibue mu ditalala
18, 19. Ntshinyi tshitudi tupeta patudi tutumikila mêyi adi Nzambi utuvuluija?
18 Kutumikila mêyi adi Yehowa utuvuluija kudi kutusemeja pabuipi nende. (Musambu 119:145-152) Bu mutudi tuteleja mêyi ende adiye utuvuluija, katuena ne lutatu bua kumubikila ne mutshima wetu mujima, kabidi tudi mua kutekemena ne: neatuteleje. Tudi mua kubika “butuku kabuyi buanji kutshia” ne kumulomba bua kutuambuluisha. Edi ke dîba dimpe dia kusambila, ki mmuomu anyi? (Musambu 119:145-147) Nzambi udi pabuipi netu petu bualu tudi tuepuka bienzedi bia bundu ne tuangata dîyi diende bu bulelela anu muvua Yezu udiangata. (Musambu 119:150, 151; Yone 17:17) Malanda etu ne Yehowa adi atukuatshisha mu buloba budi ne ntatu ebu ne neatupandishe ku mvita yende minene ya Armagedone.—Buakabuluibua 7:9, 14; 16:13-16.
19 Tudi ne bukubi bua bushuwa bua mutudi tunemeka dîyi dia Nzambi bimpe menemene. (Musambu 119:153-160) Tudi bashilangane ne bantu babi bualu ‘katuena bepuke mikenji ya Yehowa’ to. Tudi banange mêyi adi Nzambi utuambila, ke bualu kayi tudi tupeta bupole ku luse luende lujalame. (Musambu 119:157-159) Mêyi adi Yehowa utuvuluija adi akolesha meji etu bua tuetu kuvuluka malu adiye utulomba patudi mu nsombelu kampanda anyi kansanga. Kadi bua mêyi adi Nzambi utuambila, owu adi atulombola, bualu tudi tuitaba ne muoyo mujima ne: Mufuki wetu ke udi ne bukenji bua kutulombola. Bu mutudi bamanye ne: ‘Dîyi dia Nzambi mbushuwa’ ne katuena mua kudilombola tuetu nkayetu yeye kayiku, tudi tuitaba bulombodi bua Nzambi ne disanka dionso.—Musambu 119:160; Yelemiya 10:23.
20. Bua tshinyi tudi ne “ditalala dinene”?
20 Dinanga dia mikenji ya Yehowa didi ditupetesha ditalala divule. (Musambu 119:161-168) Ditukengesha kadiena ditupangisha “ditalala dia Nzambi” dikena kuelekeja nansha. (Filipoi 4:6, 7) Tudi ne dianyisha dikole menemene bua mêyi makane a Yehowa adi majalame, bitusaka ne bua kumutumbisha bua bualu buawu misangu mivule, nansha “misangu muanda mutekete ku dituku.” (Musambu 119:161-164) Mufundi wa Misambu wakimba ne: ‘Badi banange mikenji yebe badi ne ditalala dinene; kakuena tshidi mua kubalenduisha.’ (Musambu 119:165) Bikala yonso wa kutudi munange mikenji ya Yehowa ne uyitumikila, kabakumulenduisha mu nyuma kudi bualu budi muntu mukuabu wenza anyi kudi bualu bukuabu kayi buonso nansha.
21. Mbilejilu kayi bia mu Bible bidi bileja ne: katuena ne bua kulenduka padi ntatu ijuka mu tshisumbu?
21 Bantu ba bungi badibu batele mu Bible kabakalekela tshintu nansha tshimue tshibalenduisha bua kashidi nansha. Tshilejilu, Gayo (uvua pende muena Kristo) kakitaba bua kumulenduishabu nansha, kadi wakatungunuka ne ‘kuenda mu bushuwa’ nansha muvuaku Diotelefe uvua ne bikadilu bibi. (3 Yone 1-3, 9, 10) Paulo wakasengelela Ewodia ne Suntuke bavua bakaji bena Kristo ‘bua kuikalabu ne meji amue mu Mukalenge,’ pamuapa mbua ntatu ivua mijuke pankatshi pabu. Bidi bimueneka ne: bakabambuluisha bobu kujikija tshilumbu tshiabu e kutungunukabu ne kuenzela Yehowa mudimu ne lulamatu. (Filipoi 4:2, 3) Nenku katuena ne bua kulenduka padi imue ntatu ijuka munda mua tshisumbu to. Tushalayi bateke meji etu anu ku ditumikila dia mikenji ya Yehowa, bavuluke ne: ‘Njila yetu yonso idi kumpala kuende.’ (Musambu 119:168; Nsumuinu 15:3) Dîba adi tshintu nansha tshimue katupangisha “ditalala dinene” ditudi nadi bua kashidi nansha.
22. (a) Ndiakalenga kayi ditudi mua kupeta patudi tutumikila Nzambi? (b) Mmunyi mutudi ne bua kumona badi bapambuke mu tshisumbu tshia bena Kristo?
22 Tuetu tutumikila Yehowa misangu yonso, netupete diakalenga dia kutungunuka ne kumutumbisha. (Musambu 119:169-176) Patudi tulonda mikenji ya Nzambi, tudi tushala bapole mu bukubi bua mu nyuma, kabidi ‘mishiku yetu [neitungunuke ne] kutumbisha Yehowa.’ (Musambu 119:169-171, 174) Edi ke diakalenga dimuepele dinene ditudi nadi mu matuku aa a ku nshikidilu. Mufundi wa Misambu uvua musue kushala ne muoyo bua kutumbisha Yehowa, kadi ‘wakapambuka bu mukoko mujimine’ mu mushindu udibu kabayi batuleje muaba eu. (Musambu 119:175, 176) Bamue badi bapambuke bumbuke mu tshisumbu tshia bena Kristo batshidi anu mua kuikala banange Nzambi ne bajinga pamuapa bua kumutumbisha. Nunku tuenzayi muetu muonso bua kubambuluisha bua bapetulule bukubi bua mu nyuma ne disanka dia kutumbisha Yehowa pamue ne bantu bende.—Ebelu 13:15; 1 Petelo 5:6, 7.
Butoke bua kashidi mu njila wetu
23, 24. Mmalu mimpe kayi audi mupete mu Musambu wa 119?
23 Musambu 119 udi mua kutuambuluisha mu malu a bungi. Tshilejilu, udi mua kutufikisha ku ditamba kueyemena Nzambi, bualu udi uleja ne: disanka dia bushuwa didi difumina ku ‘dilonda mikenji ya Yehowa.’ (Musambu 119:1) Mufundi wa Misambu udi utuvuluija ne: ‘Dîyi dia Nzambi mbushuwa.’ (Musambu 119:160) Bualu ebu budi ne bua kukolesha dianyisha dietu bua Dîyi dia Nzambi mu kabujima kadi. Kuelangana meji a Musambu 119 kudi ne bua kutusaka bua kulonga Mifundu ne tshisumi. Mufundi wa Misambu wakasengelela Nzambi njila ne njila ne: “Unyishe mikenji yebe mifunda.” (Musambu 119:12, 68, 135) Wakamutendekena kabidi ne: ‘Unyishe dijingulula dimpe dia malu ne meji, bualu bua ngakueyemena mikenji yebe.’ (Musambu 119:66) Tudi ne bua kusambila petu mushindu wa muomumue.
24 Malongesha a Yehowa adi atupesha njila wa kudia nende malanda masheme. Njila ne njila mufundi wa Misambu uvua udibikila ne: muena mudimu wa Nzambi. Bushuwa, udi wambila Yehowa mêyi adi alenga ku muoyo ne: “Meme ndi webe.” (Musambu 119:17, 65, 94, 122, 125; Lomo 14:8) Ndiakalenga dinene dia dikema bua kusadila ne Yehowa kumutumbisha bu umue wa mu Bantemu bende! (Musambu 119:7) Utu usadila Nzambi ne disanka pa kuikala mumanyishi wa Bukalenge anyi? Bikalabi nanku, ikala mujadike ne: Yehowa neatungunuke ne kukukuatshisha ne kukubenesha mu mudimu eu mulenga biweyemena dîyi diende misangu yonso ne biwalekela bua diodi kukutokeshila njila webe.
Mmunyi muwandamuna?
• Bua tshinyi tudi ne bua kunanga dîyi dia Nzambi?
• Mmunyi mudi dîyi dia Nzambi ditukuatshisha?
• Mmu malu kayi mudi mêyi adi Yehowa utuvuluija atuambuluisha?
• Bua tshinyi bantu ba Yehowa badi ne bukubi ne ditalala?
[Nkonko ya dilonga]
[Tshimfuanyi mu dibeji 16]
Dîyi dia Nzambi didi mpokolo wa butoke bua mu nyuma
[Tshimfuanyi mu dibeji 17]
Tuetu banange mêyi adi Yehowa utuvuluija, kakutuangata bu “tshikanganya” nansha
[Bimfuanyi mu dibeji 18]
Tuetu tubala Bible dituku dionso, mvese mimpe idi mua kutuvuila diakamue mu meji patudi tusambila