Nkonko ya babadi

Pakamba mupostolo Paulo kumpala kua bena ku Sanedren ne: “Ndi bianyi Mufalese,” kavua mulekele ditabuja diende dia bena Kristo anyi?

Bua kumvua mêyi a Paulo adi mu Bienzedi 23:6 bimpe, tudi ne bua kuanji kukonkonona nsombelu uvuaku pakaambaye.

Kunyima kua musumba wa bena Yuda mumane kuenza Paulo tshimvundu tshikole mu Yelushalema, wakakula kumpala kuabu. Wakabambila muvuaye ‘mukolele mu [Yelushalema] ku makasa a Gamaliele, muyishibue bu muvua tshilele mene tshia mikenji ya bankambua babu.’ Nansha muakamuteleja bantu aba mutantshi pavuaye udibingisha, ku ndekelu pakafikabu munda, kamanda ka masalayi wakaya ne Paulo ku nzubu wa basalayi. Pakavuabu bakeba kuela Paulo mfimbu, wakamba ne: ‘Nudi ne bukenji bua kukuma muntu udi muena Lomo, kabayi banji kumupisha anyi?’​—Bienzedi 21:27–22:29.

Dituku diakalonda, kamanda ka masalayi wakaya ne Paulo kumpala kua Sanedren, tshilumbuluidi tshinene tshia bena Yuda. Paulo wakabatangila talalaa ne yeye kumona ne: banzuji ba ku tshilumbuluidi atshi bavua bamue Basadoke bakuabu Bafalese. Ke yeye kubambila ne: “Bana betu, ndia bianyi Mufalese, ndi muana wa Mufalese; badi bandumbuluishila bua ditekemena dia dibika dia bafue.” Nunku dikokangana dikole diakajuka pankatshi pa Bafalese ne Basadoke, ‘bualu Basadoke bavua bamba ne: kakuena dibika dia bafue anyi muanjelo anyi nyuma; kadi Bafalese bavua bitabuja ne: malu aa onso adiku.’ Bamue ba ku luseke lua Bafalese bakatayika ne tshiji tshikole bamba ne: “Katuena bamone muntu eu ne bualu” to.​—Bienzedi 23:6-10.

Bu muvua Paulo mumanyike bu muena Kristo wa lukunukunu, kavua mua kutuisha bena ku Sanedren ne: uvua Mufalese mulelela to. Bafalese bavua muaba au kabavua mua kuitaba Mufalese yonso uvua uvila ditabuja anyi uvua kayi witaba malongesha abu onso. Nanku mêyi a Paulo a se: uvua Mufalese avua ne bua kuikala ne ngumvuilu musunguluke, ne Bafalese bavuapu bavua ne bua kuikala bumvue mêyi a Paulo mu ngumvuilu au.

Pakamba Paulo ne: bavua bamulumbuluisha bua ditekemena dia dibika dia bafue, uvua umvuija patoke ne: uvua mufuanangane ne Bafalese mu muanda eu. Mu dikokangana dionso pa tshilumbu etshi, bavua ne bua kuteka Paulo ku luseke lumue ne Bafalese, kadi ki nku luseke lua Basadoke bavua kabayi bitaba dibika dia bafue to.

Malongesha a bena Kristo avua Paulo witabuja kaavua abengangana ne mayisha a Bafalese mu mianda bu mudi dibika dia bafue, banjelo ne malu makuabu a mu Mikenji ya Mose nansha. (Filipoi 3:5) Nunku mu malu aa masunguluke ke muvua Paulo mua kuikala muditeke ku luseke lumue ne Bafalese, ne mu ngumvuilu eu ke muvua bantu bavua ku tshilumbuluidi atshi bumvue mêyi ende. Wakatela nsombelu wende wa kale bua kumona mua kumbusha meji mabi avuabu bamuelela kudi bena ku kabadi kakulu ka bena Yuda.

Kadi, tshijadiki tshitambe bunene tshia muvua Paulo kayi mulekele ditabuja diende tshidi tshimuenekela ku mushindu wakatungunuka Yehowa ne kumuanyisha. Butuku bua kunyima kua dituku divua Paulo muambe mêyi mine aa, Yezu wakamuambila ne: ‘Kolesha mutshima webe; bu muwakuamba bualu buanyi mu Yelushalema, nunku buudi nabu mbua kubuamba mu Lomo kabidi.’ Bu muvua Nzambi muanyishe Paulo, tudi tuamba tushindika ne: Paulo kavua muvile ditabuja diende dia bena Kristo nansha.​—Bienzedi 23:11.