Tshintu tshidi tshiambuluisha bua kukudimuna mikanda

MUFUNDISHI wa Bible, Yehowa Nzambi, mmusue bua lumu luimpe lua Bukalenge buende lumanyishibue “kudi ditunga dionso ne tshisamba tshionso ne muaku wonso ne bantu bonso.” (Buakabuluibua 14:6) Mmusue bua bantu bonso bapete bipepele Dîyi didiye mufundishe. Bua kukumbaja tshipatshila atshi, mbakudimune Bible mu miakulu ya bungi kupita mikanda mikuabu yonso idi pa buloba. Bakudimunyi binunu bivule mbafile dîba diabu ne makanda abu bua kuandamuna ngenyi ya Nzambi mu muakulu mukuabu.

Kadi Bible kêna anu mukanda udibu bakudimune patupu to. Misangu mivule mbamuangate bu tshintu tshidi tshiambuluisha bua kukudimuna minga mikanda. Bakudimunyi ba bungi mbafuanyikije mushindu udibu bakudimune miaku ya mu Bible mu miakulu ya bungi bua kufika ku dikudimuna imue miaku bimpe. Mpindieu badi benza kabidi mudimu ne Bible mu dikudimuna dia mikanda idi ordinatere ukudimuna.

Mbikole menemene bua ordinatere kukudimuna. Bamue bamanyi mbele mene meji ne: dikudimuna ntshintu tshidi ordinatere kayi mua kuenza to. Bua tshinyi? Muakulu kautu muenza anu ne miaku patupu to. Muakulu wonso utu ne yawu ndamakajilu ya miaku, yawu mikenji, yawu miaba idi mikenji eyi kayiyi ikumbana, tuawu tusumu ne yawu mishindu ya diakula mu mipinganyi. Mudimu wa kulongesha ordinatere bionso ebi kautu muanji kupatula bualu bua nsongo menemene to. Mikanda mivule mikudimuna kudi ordinatere nkayende itu mikole menemene bua kuyumvua.

Kadi bilondeshile bidibu bamba kudi Franz Josef Och, mushikuluji munene wa malu a dikudimuna ne ordinatere, mpindieu bamanyi ba ordinatere badi bakonkonona mishindu mikuabu ya kukudimuna. Fuanyikijabi ne: udi musue kukudimuna mukanda wa mu muakulu wa Hindi (wa mu Inde) mu Anglais. Tshia kumpala, angata imue mikanda ikadiku mu miakulu ibidi eyi uyibueje mu ordinatere. Ordinatere udi ufuanyikija miaku ya miakulu eyi. Tshilejilu, padi ordinatere upeta muaku umue umue wa mu Hindi miaba ya bungi ne uupeta misangu yonso mu tshiambilu mudiye upeta muaku wa mu Anglais “house (nzubu),” ordinatere udi udiambila musangu umue ne: muaku wa mu Hindi au ke udibu bakudimune ne: “house.” Ne bidi mua kuenzeka ne: miaku idi pabuipi mmifidi mileji ngikadilu bu mudi “munene,” “mukese,” “wa kale” anyi “mupiamupia.” Mpindieu ordinatere udi wenza tshibadilu tshia  miaku idi ipetangana ne tshia ndamakajilu ya miaku. Kunyima kua dienza tshibadilu tshia miaku bungi bukumbane tshidi mua kumuangata anu matuku anyi mbingu mikese patupu, ordinatere udi mua kuenza bidibu bamulongeshe bua kukudimuna mikanda mipiamipia. Nansha mudi mukanda mukudimuna nunku mua kuikala kauyi ulonda mikenji ne mfundilu wa muakulu, pa tshibidilu utu anu umvuika ne ufila patupu lungenyi ne malu adi ne mushinga.

Buimpe bua mukanda mukudimuna mbusuikila nangananga ku bungi ne buimpe bua miaku ivuabu badianjile kubueja mu ordinatere. Ne muaba eu ke udi Bible umueneka ne mushinga wa pa buawu. Batu bamudikumune bimpe menemene mu miakulu ya bungi, ne kabidi udi upeteka bipepele ne udi ne miaku mipite bungi. Nenku Bible ke mukanda wa kumpala wakasungula bakebuludi pavuabu balongesha ordinatere muakulu mupiamupia.