Bena dikima padibu babaluisha

TSHISUMBU tshikuabu tshia bantu bavua ne tshiji tshikole tshiakabueja benzejanganyi ba mudimu ne Paulo babidi (Gayo ne Alistâko) ku bukole muaba wa dibandidila manaya wa mu Efeso. Bantu abu bakela mbila muaba au munkatshi mua mêba abidi ne: ‘Atemise wa bena Efeso ke udi munene!’ (Bienzedi 19:28, 29, 34) Benzejanganyi ba mudimu ne Paulo abu bakashala anu bashindame pakabaluishabu apu anyi? Ntshinyi tshiakakebesha bualu abu?

Kukavua kupite bidimu bu bisatu pavua Paulo muyishe mu tshimenga tshia Efeso ne mupatule bipeta bimpe, benamu ba bungi kulekelabu ditendelela mpingu. (Bienzedi 19:26; 20:31) Tshimue tshintu tshivuabu batendelela tshivua kazubu ka tshiamu ka Atemise, nzambi-mukaji wa buledi, muena ntempelo munene uvua umueneka mu tshimenga tshijima. Bantu bavua bavuala bifuanyikijilu bia mu bukese bia ntempelo au bu bijimba ne babilamika mu nzubu yabu. Bushuwa, bena Kristo kabavua ne bua kusumba mpingu ayi to.​—1 Yone 5:21.

Demetelio, umue wa ku bansenda wakamona ne: mudimu wa Paulo uvua umunyangila wende mudimu uvua umupetesha makuta. Wakamba anu tshitupa tshia bulelela ne kunekesha malu, kufikishaye bansenda nende ku ditaba ne: bantu bavua bafuane kulekela kutendelela Atemise mu Asia Mukese mujima. Diakamue, bansenda bakafika tshiji tshikole, kutuadijabu kuela mbila ya ditumbisha nayi Atemise, diyoyo dia bungi kujukadi ne tshimenga tshijima kujukila kulu.​—Bienzedi 19:24-29.

Bantu binunu bivule bavua badisangishe muaba wa manaya au uvua bantu 25 000 mua kukumbana. Paulo wakajinga kuyukila ne tshisumbu tshia bantu bena diyoyo abu, kadi banene bakuabu bena bulela bakamukanda. Ndekelu wa bionso, mufundi wa musoko wakapolesha tshisumbu tshia bantu atshi, nunku Gayo ne Alistâko kunyemabu kabayi bapete njiwu.​—Bienzedi 19:35-41.

Lelu eu, bantu ba Nzambi batu pabu batuilangana ne buluishi anyi mene mayoyo patubu benza mudimu wa buambi. Pa tshibidilu, batu bayisha lumu luimpe miaba itu lungenyi lua ditendelela dia mpingu, buendenda anyi tshikisu bitape bu meshi. Nansha nanku, badi balonda tshilejilu tshia mupostolo Paulo ne dikima dionso, yeye kavua ‘mutshine bua kuyisha pavua bantu bunguile, ne ku nzubu ne ku nzubu’ mu tshimenga tshia Efeso. (Bienzedi 20:20) Badi kabidi basanka padibu bamona ‘dîyi dia Nzambi didiundadiunda bikole, ditamba.’​—Bienzedi 19:20.

[Tshimfuanyi mu dibeji 30]

Bikulu bia muaba wa dibandidila manaya mu Efeso