Dibika dia bafue nditekemena dilenga

DITEKEMENA dia dibika dia bafue nditangalake buloba bujima. Mu mukanda munsantu wa ba-Mizilman (Coran) mudi nshapita mujima udi wakula bua dibika dia bafue. Tshitupa tshia surate wa 75 tshidi tshiamba ne: “Ndi nditshipa mu dîna dia Dituku dia Dibika . . . Muntu udi wela meji ne: katuena mua kusangisha mifuba yende kaba kamue anyi? . . . Udi ukonka ne: ‘Dituku dia Dibishibua didi dîba kayi?’ Yeye (muntu umue umue eu) kêna ne bukole bua kufila muoyo kudi bafue anyi?”​—Surate 75:1-6, 40.

Mukanda kampanda udi wamba ne: “Ntendelelu wa Zoroastre udi ulongesha ditabuja dia ditshimuna dia ndekelu dia Mubi, dibika dia bantu bonso, Dilumbuluisha dia Ndekelu ne dipingajilula dia buloba bukezuke ne buakane.”​—The New Encyclopædia Britannica.

Tshibungu tshikuabu tshidi tshiumvuija dibika dia ku lufu bu “ditabuja dia se: ndekelu wa bionso bafue nebapetulule muoyo bikale ne mibidi, ne nebasombe pa buloba tshiakabidi.” Mukanda eu udi wamba kabidi ne: dilongesha diakabuejabu mu Buena-Yuda dia se: muntu udi ne anyima udi kayi ufua didi disamisha meji. Udi wamba ne: “Bulelela, malongesha abidi aa mmabengangane: dibishibua ne dibenga kufua dia anyima.”​—The Encyclopaedia Judaica.

Ntendelelu wa ba-Hindu udi ulongesha ne: muntu udi uledibua mu mishindu mikuabu peshi ubuela mu mibidi mikuabu misangu ne misangu. Bua bualu ebu kuikalabu bulelela, muntu udi ne bua kuikala ne anyima udi ushala ne muoyo padiye ufua. Mukanda wa tshijila wa ba-Hindu udi wamba ne: “Anyima udi ukumbana mu mubidi mujima kêna mua kubutuka to. Muntu nansha umue kêna ne bukole bua kubutula anyima udi kayi mua kujimina to.”​—Bhagavad Gita.

Buena-Buddha mbushilangane ne Buena-Hindu bualu budi bubenga dikalaku dia anyima udi kayi ufua. Nansha nanku, lelu bena Buddha ba bungi ba ku Asia wa ku Est badi bitabuja ditentemuka dia anyima udi kayi ufua mu mibidi kabukabu. *

Dibuejakaja malu pa bidi bitangila dilongesha dia dibika

Masangisha atubu benza mu Bukua-buena-Kristo kumpala kua kujika bafue atu misangu mivule aleja mudi anyima ushala ne muoyo kunyima kua lufu ne ulua kubishibua. Tshilejilu, bansaserdose ba mu tshitendelelu tshia Anglikane batu pa tshibidilu bambulula mêyi aa ku muoyo: “Bu muvuabi disua dia Nzambi Wa-Bukole-Buonso mu luse luende lunene bua kuangataye anyima wa muanetu munanga udi mufue eu, nunku tudi tujika mubidi wende mu buloba; buloba ku buloba, butu ku butu, lupuishi ku lupuishi; mu ditekemena dilelela ne dishindame dia Dibishibua bua kupeta muoyo wa tshiendelele, ku butuangaji bua Mukalenge wetu Yezu Kristo.”​—The Book of Common Prayer.

Mêyi aa adi mua kusaka muntu ku didiebeja bua kumanya bikala Bible ulongesha anyi kayi ulongesha dibika dia bafue peshi dilongesha dia  se: anyima katu ufua. Kadi mona mêyi akamba Oscar Cullmann, Mulongeshi muena Mishonyi wa mu ditunga dia France. Wakafunda mu mukanda wende kampanda ne: “Kudi dishilangana ditambe bunene pankatshi pa ditekemena dia bena Kristo dia dibika ku lufu ne ditabuja dia bena Grèce dia se: anyima katu ufua. . . . Nansha muakalua Buena-Kristo kusuikakaja malongesha aa abidi, ne mudi lelu bena Kristo mu kabujima bikale baabuejakaja bikole, tshiena mmona bualu bua kusokokela tshindi meme ne bamanyi ba bungi tumona tshikale bulelela. . . . Ditabuja dia dibishibua didi dimueneka mu nsombelu ne mu lungenyi lujima bia mu Dipungila Dipiadipia. . . . Muntu mujima udi mufue bulelela udi upeta muoyo tshiakabidi padi Nzambi umufukulula.”

Kabiena bikemesha padi bantu mu kabujima babuejakaja malu pa bidi bitangila lufu ne dibishibua to. Bua kuepuka dibuejakaja dia malu edi, tudi ne bua kutangila mu Bible, udi uleja malu malelela adi masokolola kudi Yehowa Nzambi, Mufuki wa muntu. Bible udi wakula bua bantu bavule bakabishibua ku lufu. Tukonkononayi miyuki inayi ya bantu abu ne tumone tshidiyi ileja.

‘Bakaji bakangata bafue babu ku dibisha dia ku lufu’

Mu mukanda uvua mupostolo Paulo mufundile bena Yuda bavua balue bena Kristo, wakamba ne: bakaji ba ditabuja ‘bakangata bafue babu ku dibisha dia ku lufu.’ (Ebelu 11:35) Umue wa ku bakaji abu uvua musombele mu Salefata, musoko wa bena Foinike uvua pabuipi ne Sidona ku muelelu wa mbuu wa Mediterane. Uvua mukaji wa mu lufuila wakakidila Eliya muprofete wa Nzambi bimpe ne kumupesha biakudia too ne mu tshikondo tshia nzala mikole. Diakabi, muana wa balume wa mukaji eu wakasama ne kufuaye. Eliya wakaya ne muana eu diakamue mu nzubu wa kulu kuvuaye musombele ne kulombaye Nzambi bua apingajile muana au muoyo. Tshishima tshiakenzeka: muana wa balume au “wakafululuka.” Eliya wakamupingaja kudi mamuende, kuambaye ne: “Tangila, muana webe udi ne muoyo.” Mukaji au wakenza tshinyi? Wakamba ne disanka dionso ne: ‘Katataka ndi mumanye ne: Wewe udi muntu wa Nzambi ne dîyi dia Yehowa didi mukana muebe didi dilelela.’​—1 Bakelenge 17:22-24.

Mu mutantshi wa kilometre pabuipi ne 100 ku Sud kua Salefata kuvua bamue bena dibaka babidi bena kalolo bavua bambuluisha muprofete Elisha uvua mupingane Eliya. Mukaji au uvua mumanyike bikole mu musoko wabu wa Shunema. Yeye ne bayende bakanyisha bua kupesha Elisha muaba wa kulala kulu kua nzubu wabu. Kanyinganyinga kabu ka muvuabu kabayi ne bana kakandamuka disanka pakalela mukaji au muana wa balume. Pavua muana au wenda ukola, uvua ne tshibidilu tshia kulonda tatuende mu budimi pamue ne banowi. Dimue edi, diakabi e kubakuata. Muana au wakadila ne: mutu uvua umusama. Muena mudimu wakapingana nende ku nzubu lubilu. Mamuende e kumuambula, kadi ndekelu wa bionso, muana au kufuaye. Mamuende uvua ulubakana mu lungenyi wakabikila Elisha bua alue kumuambuluisha. Mukaji eu ne muena mudimu wende bakaya ku mukuna wa Kâmele, muaba uvua Elisha musombele.

Muprofete Elisha umona nanku e kutuma muena mudimu wende Gehazi kumpala, yeye kusangana ne: muana au uvua mufue bulelela. Elisha ne mukaji au bakalonda, kadi ntshinyi  tshiakenzeka pakafikabu mu Shunema amu? Muyuki udi mu 2 Bakelenge 4:32-37 udi ulonda ne: ‘Pakabuela Elisha mu nzubu, wakasangana muana mufue muladika pa bulalu buende. Yeye wakabuela mu nzubu, wakadinjidila tshibi, bubidi buabu pa nkayabu, wakatendelela Yehowa. Wakaya ku bulalu, wakalala pambidi pa muana, wakateka mukana muende pa mukana mua muana, ne mêsu ende pa mêsu ende ne bianza biende pa bianza biende, wakadinana pambidi pende; mubidi wa muana wakakuata luya. Wakajuka, wakendakana mu nzubu, wakabanda kabidi, wakadinana pambidi pa muana; muana wakela nyashi misangu muanda mutekete, wakabulula mêsu ende. Wakabikila Gehazi, wakamuambila ne: Bikila muena Shunema. Yeye wakamubikila. Pakabuelaye kudiye, yeye wakamuambila ne: Ambula muanebe. Pashishe yeye wakabuela, wakapona ku makasa ende, wakatua mpala wende panshi, wakambula muanende, wakaya.’

Anu bu mukaji wa mu lufuila wa mu Salefata, mukaji wa ku Shunema uvua pende mumanye ne: malu au avua menzeke ku bukole bua Nzambi. Bakaji babidi aba bakapeta disanka dinene pavua Nzambi mupingaje muoyo kudi bana babu balela bavuabu banange bikole.

Bantu bakabishibua mu mudimu wa Yezu

Kunyima kua bidimu bitue ku 900, muntu kampanda wakabika ku lufu pabuipi ne musoko wa Shunema, pambelu pa musoko wa Naina. Pavua Yezu Kristo ne bayidi bende mu njila bumbukila ku Kapenuma ne basemena pabuipi ne tshiibi tshia musoko wa Naina, bakasangila ne bantu baya ku nkita, Yezu kumona mukaji mukamba mukuabu uvua mufuishe muanende wa balume umuepele. Wakamulekesha muadi. Munganga Luka wakalua kumvuija tshiakenzeka pashishe ne: ‘[Yezu] wakalua pabuipi, wakalenga tshituadilu tshia tshitalu tshianza; batuadi batshi bakimana. Yezu wakamba ne: Nsongalume, ndi nkuambila ne: Bika. Wakadi mufue wakabika, wakashikama, wakabanga kuakula, Yezu wakamufila kudi mamuende.’ (Luka 7:14, 15) Bantu bakamona tshishima atshi bakatumbisha Nzambi. Lumu lua dibishibua ku lufu elu luakatampakana mu Yudaya ne mu bitupa abi bionso. Bayidi ba Yone Mubatiji bakumvua pabu bualu bua tshishima atshi, bobu kutshilondela Yone. Nunku wakabatuma bua bamonangane ne Yezu ne bamuebeje ni Uvua Masiya mutekemena. Yezu wakabambila ne: ‘Yayi bienu, nuambile Yone malu anuakumona ne anuakumvua ne: Bafofo badi batabala, balema badi benda, bena nsudi badi balengejibua, bena mapapa badi bumvua, bafue badi babishibua ku lufu, badi bambila bapele lumu luimpe.’​—Luka 7:22.

Tshishima tshitambe kumanyika bikole tshia ku bishima bia dibisha bantu tshivua Yezu muenze ngetshi tshiakenzaye pakabishaye Lazalo, mulunda wende wa pa muoyo. Musangu au, Yezu uvua mufike mu dîku dia ba Lazalo,  kadi Lazalo mumane kufua. Ndekelu wa bionso, pakafika Yezu mu Betania, Lazalo ukavua mufue kupite matuku anayi. Pakatuma Yezu dîyi bua bumbushe dibue divua ku mushiku wa lukita, Mâta wakelakana wamba ne: ‘Mukalenge, yeye ukadi ununka katataka, ukadimu matuku anayi.’ (Yone 11:39) Kadi nansha mukavua mubidi wa Lazalo mubole, wakabishibua. Yezu wakatuma dîyi, ‘wakadi mufue wakalopoka, munyengela bilulu ku bianza ne ku makasa. Kumpala kuende kuakadi kunyengela tshitambala.’ Malu akalua baluishi ba Yezu kuenza pashishe adi ajadika ne: Lazalo ke uvua mubike ku lufu bulelela.​—Yone 11:43, 44; 12:1, 9-11.

Ntshinyi tshitudi mua kuamba bilondeshile miyuki inayi eyi ya dibishibua ku lufu? Bantu bonso bakabika ku lufu bakapetulula muoyo anu mushindu uvuabu kumpala au. Bantu bakabamanya, nansha balela babu. Nansha umue wa kudibu kakakula bua tshivua tshienzeke mu tshikondo tshikese tshivuabu bafue atshi to. Nansha umue wa kudibu kakalonda muvuaye muye muaba mukuabu to. Bidi bimueneka ne: buonso buabu bakapetulula muoyo bikale ne bukole bua mubidi. Buabu bobu, bivua anu bu se: bavua balale tulu kakese ne balue kubika, anu bu muakabileja Yezu. (Yone 11:11) Nansha nanku, kunyima kua tshikondo kampanda yonso wa kudibu wakalua kufua kabidi.

Dipetangana tshiakabidi ne bananga betu badi bafue nditekemena dimpe be

Matuku makese kunyima kua lufu lubi lua Owen utuvua batele mu tshiena-bualu tshia ntuadijilu, tatuende wakaya kuendakana kua muena mutumba kampanda. Wakamonaku kabeji kakuabu nunku pa mêsa kavua kakula bua muyuki wa patoke uvua Bantemu ba Yehowa balongolole. Tshiena-bualu tshia kabeji aku tshia se: “Bafue badi penyi?” tshiakamusankisha. Alu luvua lukonko luvua lumutatshisha bikole mu lungenyi. Wakaya kuteleja muyuki au ne kupeta busambi bulelela bua mu Bible. Wakumvua ne: bafue kabatu bakenga to. Bafue bonso, nansha Owen, kabena bakenga mu inferno anyi babangata kudi Nzambi bua kuluabu banjelu mu diulu to, kadi mbindile mu nkita too ne pakumbana tshikondo tshiabishibuabu ku lufu.​—Muambi 9:5, 10; Yehezekele 18:4.

Njiwu mmikukuate wewe peshi dîku dienu anyi? Anu bu tatuende wa Owen, udiku udiebeja bua kumanya muaba udi bananga bebe badi bafue mpindieu ne mushindu uudiku mua kubamona tshiakabidi anyi? Bikalabi nanku, tudi tukulomba bua ukonkonone tshidi Bible ulongesha kabidi pa bidi bitangila dibika dia bantu ku lufu. Pamuapa udi udiebeja ne: ‘Dibishibua ku lufu nedienzeke dîba kayi? Nnganyi menemene wabishibua?’ Suaku ubale biena-bualu bidi bilonda ebi bua kupeta mandamuna a nkonko eyi ne mikuabu.

[Mêyi adi kuinshi]

[Tshimfuanyi mu dibeji 5]

Yehowa wakenza mudimu ne Elisha bua kubisha muana wa mukaji wa mu Shunema

[Tshimfuanyi mu dibeji 5]

Eliya wakasambila Yehowa bua apingajile muana wa balume muoyo

[Tshimfuanyi mu dibeji 6]

Yezu wakabisha muana wa mukaji mukamba wa mu Naina

[Tshimfuanyi mu dibeji 7]

Dibika dia ku lufu nedituangaje balela ne bananga babu tshiakabidi