Mua kuenza bua dituku dionso dikale ne mushinga

‘UTUYISHE mua kubala matuku etu onso ne dibala edi nunku bua tuetu kudipetela mutshima udi ne meji.’ (Musambu 90:12) Edi ndisambila divua Mose, umue wa ku bafundi ba Bible, muenze. Ntshinyi menemene tshivuaye ulomba? Tudi ne bua kuenza disambila dia muomumue anyi?

Mu mvese wa 10, Mose wakadila bua buîpi bua muoyo wa muntu. Musangu mukuabu kabidi wakafunda mêyi avua Yobo muambe aa: ‘Muntu udi muledibue kudi mukaji udi ne matuku makese a muoyo wende ne udi muule tente ne ntatu.’ (Yobo 14:1) Bushuwa, Mose uvua mumanye bimpe buîpi bua matuku a muoyo wa muntu mupange bupuangane. Ke bualu kayi, uvua wangata dituku dionso bu tshintu tshia mushinga mukole. Pakadilaye kudi Nzambi, wakaleja dijinga diende dia kuenda ne meji mu matuku ende a muoyo avua mashale mu mushindu uvua mua kusankisha Mufuki wende. Tuetu petu katuenaku mua kuenza bua dituku dietu dionso dia muoyo dikale ne mushinga anyi? Netudienzeje nanku bituikala basue kuanyishibua kudi Nzambi mpindieu.

Kuvua bualu bukuabu buakasaka Mose ne Yobo ku diamba mêyi aa, ne budi ne bua kutusaka petu. Bantu ba Nzambi babidi aba bavua batekemene difutu dia muoyo pa buloba mu nsombelu muimpe mu matuku avua alua kumpala. (Yobo 14:14, 15; Ebelu 11:26) Mu tshikondo atshi, malu mimpe adi muntu wenza kaakuikala ne ndekelu to. Mufuki wetu mmulongolole bua bena lulamatu bikale ne muoyo wa kashidi pa buloba bukudimuna mparadizu. (Yeshaya 65:21-24; Buakabuluibua 21:3, 4) Edi didi mua kuikala ditekemena diebe pebe ‘biwabala matuku ebe onso ne dibala edi nunku bua wewe kudipetela mutshima udi ne meji.’