Malu a mu nsombelu

Nansha mundi mutekete, ndi ne bukole

MALONDA KUDI LEOPOLD ENGLEITNER

Musalayi wa bena SS wakapatula tshingoma, kutshintuaye ku mutu ne kungebejaye ne: “Udi mudilongolole bua kufua anyi? Ndi nkuasa tshingoma mpindieu bualu udi muntu mujimine.” Ngakamuandamuna ne: “Ndi mudilongolole,” kadi ngenza muanyi muonso bua kubenga kuzakeja dîyi. Ngakakolesha muoyo, meme kubuita ku mêsu ne kuindila bua akume tshingoma, kadi bualu nansha bumue kabuakenzeka to. Pakumbushaye tshingoma tshivuaye muntekele anu mu ditshi, wakela dîyi ne: “Bua butatakane buebe bupite, tshiena nansha mua kukushipa to!” Mmunyi mungakafika ku dikala mu njiwu ya nunku?

MVUA muledibue mu dia 23 Kashipu 1905, mu tshimenga tshia Aigen-Voglhub, ku Mikuna ya mu ditunga dia Autriche. Mvua muana wa kumpala kuetu, Tatu uvua wenza mudimu mu tshiapu tshia mabaya ne mamu uvua muana wa tshidime. Baledi banyi bavua bapele kadi benji ba mudimu. Ku buana buanyi tuvua basombele mu tshimenga tshia Bad Ischl, pabuipi ne Salzburg, munkatshi mua majiba mimpe kumona ne mikuna mile.

Pantshivua muana, mvua misangu mivule ngela meji bua ntatu ya mu nsombelu, kabiyi anu bualu dîku dietu divua dia bapele, kadi bualu mvua kabidi muledibue ne muongo mukonyangale. Disama dia nyima divua bulema ebu bunkebele divua dimpangisha bua kuimana kulu mululame bimpe. Mu kalasa, bavua bankandike bua kuenza jimnastike, ke bualu kayi balongi betu bavua banseka.

Ku ndekelu kua Mvita ya Kumpala ya Buloba bujima, matuku makese kumpala kua meme kukumbaja bidimu 14, ngakapangadika bua kubanga kukeba mudimu bua kumona mua kuepuka bupele. Wanyi mulunda munene uvua nzala mikole, ne bikondo bikuabu mvua nteketa bua mubidi kapia kakole mukebesha kudi disama dia gripe wa bena Espagne uvua mushipeshe bantu miliyo mivule. Pamvua ndomba bua bangangate ku mudimu, bena madimi ba bungi bavua bangandamuna ne:  “Mmudimu kayi utuakupesha wewe muntu muteketangane nunku?” Nansha nanku, muena budimi mukuabu wa muoyo muimpe wakangangata ku mudimu.

Ndi ndonga dinanga dia Nzambi

Nansha muvua Mamu muikale muena Katolike wa dilambu, mvua nya mu misa ku mpukapuka, tshia kumpala bualu Tatu kavua wenzejangana malu ku bukole mu muanda eu to. Ntendelelu wa mpingu ne bimfuanyi udi mutampakane bikole mu Ekeleziya Katolike wa bena Lomo kavua unsankisha to.

Dimue dituku mu Kasuamansense 1931, mulunda wanyi mukuabu wakandomba bua meme kuya kumufila mu tshisangilu tshia malu a Nzambi tshia Balongi ba Bible, ke muvuabu babikila Bantemu ba Yehowa. Bakampeshamu mandamuna a mu Bible a nkonko ya mushinga bu mudi: Kutendelela mpingu ne bimfuanyi kudi kusankisha Nzambi anyi? (Ekesode 20:4, 5) Inferno wa kapia utuku anyi? (Muambi 9:5) Bafue nebabike anyi?​—Yone 5:28, 29.

Tshiakatamba kundenga bikole tshivua se: Nzambi katu wanyisha mvita ya bantu idi yelesha mashi mavule panshi, nansha bobu bamba mudibu bayiluangana mu dîna diende Yeye. Ngakalonga ne: “Nzambi udi dinanga” ne udi ne dîna dia butumbi dia Yehowa. (1 Yone 4:8; Musambu 83:18) Mvua ne disanka dia kumanya ne: ku diambuluisha dia Bukalenge bua Yehowa, bantu nebapete mushindu wa kuikala ne muoyo tshiendelele mu disanka pa buloba bukudimuna mparadizu. Ngakalonga kabidi ne: kudi ditekemena dilenga dipesha bamue bantu bapange bupuangane badi Nzambi musungule bua kusadila pamue ne Yezu mu Bukalenge bua Nzambi bua mu diulu. Mvua mudiakaje bua kufila bianyi bionso bua Bukalenge abu. Nunku mu Lumungulu 1932, ngakatambula ne meme kulua Ntemu wa Yehowa. Tshidia atshi tshivua tshilomba dikima, bualu lungenyi lua dibenga bitendelelu bikuabu luvua lutangalake mu Autriche muvua bena Katolike ba bungi tshikondo atshi.

Badi bampetula ne banduisha

Baledi banyi bakabungama bikole pangakapatuka mu ekeleziya wabu, ne nsaserdose wakamanyisha dipatuka dianyi adi lukasa lukasa ku tshialtare. Pavua bena mutumba bammona bavua batuila mate panshi bua kumpetula. Nansha nanku, mvua mudisuike bua kubuela mu mudimu wa ku dîba ne ku dîba, meme kutuadija bumpanda-njila mu Tshiongo 1934.

Nsombelu wa malu a tshididi wakatamba kukola bualu tshisumbu tshia bena Nazi tshivua tshienda tshitangalaka mu provense wetu. Mu matuku amvua mpanda-njila mu Tshibanda tshia Enns tshia mu tshimenga tshia Styria, bampulushi bavua anu benda bankeba, ne mvua ne bua kuikala ne “budimu bu bua nyoka.” (Matayo 10:16) Kubangila mu 1934 too ne mu 1938, bavua bankengesha dituku dionso. Nansha mumvua mulofu, bavua bampala mfranga ivuabu bapesha balofu, ne bakamfundila bibawu bivule bia buloko bua matuku makese ne bikuabu binayi bia buloko bua matuku mavule bualu mvua ngenza mudimu wa kuyisha.

Biluilu bia Hitler bidi bikuata Autriche

Mu Luabanya 1938, biluilu bia Hitler biakakuata Autriche. Mu matuku makese patupu, bantu bapite pa 90 000, tuambe ne: pabuipi ne bantu bakole 2 pa lukama, bakakuatshibua ne kuedibua mu maloko makese ne manene, bababanda muvuabu baluisha bukokeshi bua bena Nazi. Bantemu ba Yehowa bakavua anu bu badilongolole bua malu au avua alua kumpala. Mu muvu wa été wa mu 1937, bana betu bavule ba mu tshisumbu tshianyi tshia nzanzanza bakenza luendu lua kilometre 350 batangile mu tshimenga tshia Prague ku makalu bua kubuela mu mpungilu wa bantu bafumine mu matunga a bungi. Mu mpungilu au bakumvua bakula bua malu a tshikisu avuabu benzela bana betu ba mu ditunga dia Allemagne. Bushuwa, mpindieu tshikondo tshietu tshia kutukengeshabu tshivua tshikumbane.

Kubangila ku dituku diakakuatabu Autriche kudi biluilu bia Hitler, Bantemu ba Yehowa bakadimona benzejibue bua kuikala benza bisangilu ne mudimu wa buambi mu musokoko. Nansha muvuabu babuejila mikanda ya malu a mu Bible ku mikalu ya ditunga dia Suisse mu musokoko, mikanda eyi kayivua ikumbana bantu bonso to. Ke bualu kayi bana betu bena Kristo ba mu tshimenga tshia Vienne bavua bapatula mikanda ku biamu mu musokoko. Misangu mivule mvua ngenza mudimu wa kuya kuabanyina Bantemu mikanda.

 Mu buloko bunene

Mu dia 4 Tshisanga 1939, bakatukuata meme ne bana betu bena Kristo basatu kudi bena Gestapo patuvua munkatshi mua dienza Tshivulukilu tshia lufu lua Kristo mu Bad Ischl. Bakatuambula tuetu bonso mu mashinyi too ne ku biro binene bia bampulushi bia mu tshimenga tshia Linz. Au uvua musangu wanyi wa kumpala ungakabanda mu mashinyi, kadi kabivua mua kunsankisha ne dilubakana dimvua nadi to. Mu Linz, bakangela makonka akampanda mutu, kadi tshiakalekela ditabuja dianyi nansha. Kunyima kua ngondo itanu, bakaya nanyi kumpala kua nzuji mu Haute-Autriche. Kabiyi bitekemena, bakalekela kundumbuluisha bua malu mabi avuabu bambanda nawu; kadi atshi katshivua ndekelu wa makenga anyi to. Pabi, bakavua batume bana betu basatu bakuabu abu mu maloko manene muakayabu kufuila, bamane kushala ne lulamatu too ne ku ndekelu.

Bakashala anu bankuate, ne mu dia 5 Kasuamansense 1939, bakamfundila ne: bavua ne bua kuya nanyi mu buloko bunene bua mu Buchenwald, mu Allemagne. Kuvua kawulu ka pa buaku kavua katuindile tuetu bena buloko ku gare wa mu Linz. Makadika avua ne tuzubu tua maloko a kuela bantu balume babidi babidi. Muntu utuvua nende mu kazubu kamue ka buloko uvua ngovena wa kale wa mu Haute-Autriche, Doktere Heinrich Gleissner.

Meme ne Doktere Gleissner tuakabanga kuyukila bimpe. Bivua bimutonde bikole bua lutatu lukole lumvua nalu, wakabungama bua muvua Bantemu ba Yehowa bapete bilumbu bivule ku tubadi mu provense uvuaye ulombola. Wakangambila ne kanyinganyinga ku muoyo ne: “Mukalenge Engleitner, tshiena mua kulongolola tshilema tshikadi tshienzeke to, tshidibi, ndi nkulomba luse lua bungi. Bidi bimueneka ne: mbulamatadi wetu uvua mupangile bua kulumbuluisha biakane. Biwikala dijinga ne diambuluisha, nengikale ne disanka dia bungi bua kuenza tshionso tshidi tshikengela kuenza bua kukuambuluisha.” Tuakapetangana kabidi nende kunyima kua mvita. Wakangambuluisha bua kupeta difutu dia pansio dia bantu bavuabu bakengeshe kudi bena Nazi.

“Ndi nkuasa tshingoma”

Mu dia 9 Kasuamansense 1939, ngakafika mu buloko bunene bua mu Buchenwald. Kunyima kua matuku makese, bakamanyisha mulami wa ku buloko ne: Ntemu kansanga uvua munkatshi mua bapiabapia bavua bafike, yeye kuntua mutu bikole. Uvua unkuma kakuyi luse to. Nunku, kunyima kua yeye mumane kumona ne: kavua mua kundekesha ditabuja dianyi, wakamba ne: “Engleitner, ndi nkuasa tshingoma. Kadi kumpala kua meme kukuasa, ndi nkulekela ufundile baledi bebe mukanda wa dibalaya nawu.” Ngakela meji bua mêyi a busambi amvua mua kufundila baledi banyi, kadi dîba dionso dimvua ntua bike pa dibeji bua kufunda, uvua unkuma tshintu ku lukengibua lua balume, umpangisha bua kufunda bimpe. Wakamba ne dîyi dia kunsendeka nadi ne: “Mona tshiluwa etshi! Katshiena nansha mua kufunda milongo ibidi milulame. Kadi abi kabiena bitshipangisha bua kubala Bible to, ki mmuomu anyi, wewe?”

Pashishe mulami wa buloko au wakangata tshingoma, kutshintuaye ku mutu, ne kumfikishaye ku diela meji ne: uvua usua kungasa, anu mumvua mulonde ku ntuadijilu amu. Pashishe wakansakila  mu kazubu kakese ka buloko kavua kapate ne bantu munda. Mvua ne bua kushalamu butuku bujima muimane anu kulu. Kadi tshivua ne mushindu wa kulala to, bualu mubidi wanyi wonso uvua usama. Mêyi a busambi bua mafi avua bena buloko nanyi bangambila avua anu a se: “Kufua bua tshitendelelu kampanda tshia budingidingi nunku nkupanga tshia kuenza!” Doktere Gleissner uvua mu kasho kavua pabuipi ne kamvua meme. Wakumvua bivua bienzeke ne kuambaye ne kanyinganyinga konso ne: “Dikengesha bena Kristo edi didi dienda dikola kabidi!”

Mu muvu wa été wa 1940, bakambila bena buloko bonso bua kuya kuenza mudimu wa kuambula mabue mu Dia lumingu, nansha mutuvua misangu mivule katuyi tuenza mudimu mu Dia lumingu. Edi divua dipangadika divuabu bangate bua kunyoka bamue bena buloko nanyi bavua “babunde bilumbu bivua kabiyi binene.” Bavua batuambile bua kuambula mabue manene kumbukila muaba uvuawu too ne ku buloko. Bena buloko babidi bakapatata bua kungambika dibue dinene panyima, meme kusua kudishinda bua bujitu buadi. Kadi Arthur Rödl, mutangidi wa buloko uvuabu batshina bikole wakangakuila, bualu bumvua tshiyi muelele meji. Pakamonaye muvuabi binkolele bua kuambula dibue adi, wakangambila ne: “Kuena mua kukumbana bua kupingana ku buloko ne dibue adi panyima pebe to! Diela panshi diakamue!” Adi divua dîyi dingakatumikila bua kupeta disulakana. Pashishe Rödl wakafunkuna munu ku dibue dishadile ku bunene, kungambilaye ne: “Ambula diadia uye nadi ku buloko. Ndipepele bua kudiambula!” Kunyima, wakatangila kudi uvua ulombola midimu ayi ne kumuambilaye ne: “Lekela Balongi ba Bible bapingane ku nzubu yabu ya bena buloko. Mudimu ukadibu benze lelu mmukumbane!”

Ku ndekelu kua dituku dionso dia mudimu, mvua ne disanka misangu yonso dia kudisangisha ne dîku dietu dia mu nyuma. Tuakalongolola diabanya dia biakudia bia mu nyuma. Muanetu wa balume umue uvua ufunda mvese kampanda pa katupa ka dibeji ukapitshisha kudi bakuabu. Bavua babueje kabidi Bible umue mu buloko mu musokoko. Bakamutapulula mu bitupa mu bitupa bilondeshile mikanda. Bakampesha mukanda wa Yobo munkatshi mua ngondo isatu. Mvua ngusokoka mu nsheshete yanyi. Muyuki wa Yobo wakangambuluisha bua kushala mushindame.

Ndekelu wa bionso, mu dia 7 Luabanya 1941, ngakabuela mu tshisumbu tshia bantu ba bungi bavuabu batume ku buloko bunene bua Niederhagen. Nsombelu wanyi uvua wenda unyanguka bikole ku dituku ne ku dituku. Dimue edi, bakatuambila meme ne bana betu babidi ba balume bua kupaya biamu mu mishete. Kunyima kua dienza mudimu au, tuakapingana pamue ne tshisumbu tshia bena buloko bakuabu ku nzubu yetu ya buloko. Muena SS mukuabu wakamona ne: mvua ngenda mushadile kunyima kua bakuabu. Wakafika munda bikole ne kunkumaye museba panyima tshiyi mumanye, kunsamabi bikole. Biakansama bikole be, kadi nansha nanku, ngakaya ku mudimu dituku diakalonda.

Dipatuka mu buloko kadiyi ditekemena

Mu Tshisanga 1943, bakalua kupatula bantu bonso bavua mu buloko bunene bua Niederhagen. Pashishe, bakantuma ku buloko buvuabu bashipa  bantu bikole, ku Ravensbrück. Kunyima, mu Kabalashipu 1943, bakampetesha mushindu wa kumbuka mu buloko bunene, bualu bumvua tshiyi muelele meji to. Musangu eu, kabivua bikengela meme kuvila ditabuja dianyi bua kushishabu kundekela nansha. Mvua anu ne bua kuitaba bua kuenza midimu mikole ku madimi matuku anyi onso a muoyo avua mashale. Mvua muitabe bua kuenza nanku bua kubenga kumona mabika ne mala a mu buloko bunene. Ngakaya kudi doktere wa mu buloko bunene abu bua kuntetaye musangu wa ndekelu. Doktere au wakapapuka pakammonaye. Wakakema wamba ne: “Kaka, utshidi anu Ntemu wa Yehowa!” Ngakamuandamuna ne: “Eyowa, Mukalenge Doktere.” Wakamba ne: “Nanku, tshiena mmona mushinga wa tuetu kukumbusha mu buloko ebu to. Kabidi nebifile disulakana dia bungi bua kujimija tshifukibua tshibi nunku bu wewe.”

Kavua muele kalele pakambaye mêyi aa to. Tshivua bimpe to. Tuishi tuvua tuenda tudia mubidi wanyi pale pale, mitutu ivua minshiye ne ditshi dimue kadiyi diumvua, ne mubidi wanyi wonso uvua ne mputa miule ne tufina munda. Kunyima kua ngondo 46 ya dinkengesha, ya nzala kayiyi ne ndekelu ne ya midimu mikole, ngakashala ne kilo 28 patupu. Mu nsombelu au, bakampatula mu buloko bua Ravensbrück mu dia 15 Kashipu 1943.

Bakampingaja mu tshimenga tshietu ku kawulu tshiyi ne musalayi uvua mundame to, meme kuya kudileja ku biro binene bia bena Gestapo mu Linz. Mutangidi wa bena Gestapo wakampesha mikanda ivua ileja dipatuka dianyi mu buloko ne kungambilaye ne: “Biwikala wela meji ne: tudi tukupatula mu buloko bua wewe kutungunuka ne mudimu webe wa muinshimuinshi au, udi udishima tshianana! Bituakujikila uyisha, Nzambi akuambuluishe.”

Ndekelu wa bionso ngakafika kuetu! Mamu kavua mushintulule tshintu nansha tshimue mu nzubu muanyi katshia anu pavuabu bankuate musangu wa kumpala mu dia 4 Tshisanga 1939. Nansha Bible wanyi uvua mushale mubulula pa mêsa avua pabuipi ne bulalu! Ngakatua binu panshi, meme kuenza disambila ne muoyo mujima bua kuela Nzambi tuasakidila.

Bakantuma diakamue bua kuenza mudimu ku budimi bunene bua ku mukuna. Muena budimi abu uvua mulunda wanyi wa ku buana, uvua mene umpesha difutu dikese nansha muvuaye kayi muenzejibue bua kudimpesha. Kumpala kua mvita, mulunda eu uvua munganyishile bua kusokoka imue mikanda ya malu a mu Bible mu nzubu yende ya mudimu. Mvua ne disanka bua kulama bimpe depo au mukese wa mikanda bua kupeta makanda a mu nyuma. Majinga anyi onso avua akumbana, ne mvua mudisuike bua kutungunuka ne mudimu wa ku budimi abu too ne pavua mvita ne bua kujika.

Ndi nsokoma ku mikuna

Kadi matuku au a ditalala ne budikadidi kaakanenga to. Munkatshi mua ngondo wa Tshimungu 1943, bakangambila bua kuya kudi doktere wa basalayi bua yeye kungenzaye mateta. Tshia kumpala, wakamba ne: tshivua mukumbane bua kuenza busalayi to, bualu nyima wanyi uvua usama. Kadi, kunyima kua lumingu lumue, anu doktere umue au wakashintulula dipangadika diende ne kufundaye ne: “Mmukumbane bua kuya ku mvita.” Ngakajimina ku mêsu kua basalayi munkatshi mua tshikondo kampanda, kadi mu dia 17 Tshisanga 1945, kakese kumpala kua ndekelu wa mvita, bakampeta ndekelu wa bionso. Bakangambila bua kuya ku mvita.

Muikale amu ne biakudia bikese pamue ne Bible, ngakaya kusokoma ku mikuna ivua pabuipi apu. Kumpala mvua nkokesha bua kulala pambelu, kadi mashika akalua makole ne neje yakaloka kufikayi too ne mu binu. Mubidi wanyi wonso wakabola ne mâyi. Ngakaya mu kazubu kakuabu kavua kulu kua mukuna wa bule bua metre 1 200. Bu mumvua nkanka ne mashika, ngakatemeshamu kapia, meme kumonaku mua kuota ne kumisha bilamba. Bua dipungi, ngakalala pa tshibasa tshivua kumpala kua kapia aku. Mutantshi eu, meme kumvua  bisama bikole ne kujuka diakamue ku tulu. Bilamba bianyi bivua bikuate kapia! Ngakabunguluka panshi bua kujima ndimi ya kapia. Panyima panyi ponso pavua mabuba.

Mufuane kukuatshibua, ngakapingana ku budimi mu musokoko pa bitala, kadi mukaji wa muena budimi abu wakumvua buôwa, kumpingajaye wamba ne: kuvua bantu benda bankeba bua kunkuata. Nunku ngakaya ku nzubu kua baledi banyi. Kumpala, too ne baledi banyi bine bakabenga kumbueja mu nzubu, kadi ndekelu wa bionso bakanyisha bua meme kulala kulu ku tshisasa, ne Mamu wakangondapa mputa. Kadi kunyima kua matuku abidi, bu muvua baledi banyi bine kabayi ne dikisha bua mumvua kumbelu, ngakamona ne: bivua bimpe bua meme kuya kusokoma ku mikuna tshiakabidi.

Mu dia 5 Lumungulu 1945, mutoyi mukole wakanjula ku tulu. Ngakamona ndeke ya basalayi ya matunga avua madisange ipitshila lua panshi panshi. Dîba adi meme kumanya ne: bukalenge bua Hitler bukavua butonkoke! Nyuma wa Yehowa uvua munkoleshe bua kutantamena makenga au kaayi kutua diulu. Mvua mumone bulelela bua mêyi adi mu Musambu 55:22 avua mansambe bikole menemene ku ntuadijilu kua mateta anyi. Mvua ‘muteke bujitu buanyi pambidi pa Yehowa,’ ne nansha mumvua mutekete ku mubidi, uvua munkuatshishe pamvua ngenda mu ‘lupongo lua mundidimbi wa lufu.’​—Musambu 23:4.

Bukole bua Yehowa ‘budi bukumbajibua tshishiki mu butekete’

Kunyima kua mvita, nsombelu wakalongoloka ku kakese ku kakese. Kumpala, mvua muangata ku mudimu mu budimi bua pa mukuna bua mulunda wanyi au. Anu pakalua basalayi ba bena Amerike mu Tshisanga 1946 ke pakangumbushabu ku bukenji bua kuenza midimu mikole ya kudima imvua ne bua kuenza mu matuku anyi makuabu onso a muoyo.

Kunyima kua mvita ayi, bana betu bena Kristo ba mu Bad Ischl ne ba mu distrike divua pabuipi apu bakabanga kuenza bisangilu pa tshibidilu. Bakabanga kuyisha ne bukole bupiabupia. Bakampesha mudimu wa bunsentedi mu tshiapu kampanda, meme kupeta mushindu wa kutungunuka ne bumpanda-njila. Ndekelu wa bionso, ngakasombela mu tshimenga tshia Saint-Wolfgang, ne mu 1949, ngakasela Theresia Kurz, ukavua mulele muana wa bakaji ku dibaka dikuabu. Tuakasomba pamue bidimu 32, too ne pakafua mukajanyi munanga au mu 1981. Mvua mumulame pavuaye usama bidimu bipite pa muanda mutekete.

Kunyima kua lufu lua Theresia, ngakangata kabidi mudimu wa bumpanda-njila wakangambuluisha bua kupua lufu luende muoyo ndambu. Mpindieu ndi mpanda-njila ne mukulu mu tshisumbu tshia mu Bad Ischl. Bu mundi amu mu dikalu dia balema, ntu mfila mikanda ya malu a mu Bible ne ngakula ne bantu bua ditekemena dia Bukalenge mu lupangu lua dikishila lua mu Bad Ischl anyi kumpala kua nzubu wanyi. Malu mimpe a mu Bible antu nyikila ne bantu atu ampetesha disanka dia bungi.

Pandi mvuluka bivua bimfikile kale, ndi njadika ne: malu makuate buôwa amvua muenzejibue bua kutantamena kaakamfikisha munda to. Bushuwa, kuvua bikondo bimvua mbungama bua mateta amvua mpeta. Kadi bua malanda masheme amvua mudie ne Yehowa, ngakatshimuna meji au. Mêyi avua Mukalenge muambile Paulo a se: ‘Bukole buanyi budi bukumbajibua tshishiki mu butekete’ akankumbanyina panyi. Mpindieu undi ne bidimu pabuipi ne 100, ndi mua kuamba bu mupostolo Paulo ne: ‘Ndi ne disanka mu matekete ne mu bipendu ne mu malu adi angenzeja ku bukole ne mu makenga ne mu kanyinganyinga bua bualu bua Kristo; bua pangikala mutekete mpandi ne bukole.’​—2 Kolinto 12:9, 10.

[Bimfuanyi mu dibeji 25]

Mukanda wa bibawu wa bena Gestapo, mu Lumungulu 1939

Mukuata kudi bena Gestapo mu Tshisanga 1939

[Mêyi a dianyisha]

Bimfuanyi bionso bibidi: Privatarchiv; B. Rammerstorfer

[Tshimfuanyi mu dibeji 26]

Ngakasokoma ku mikuna ya pabuipi apu

[Mêyi a dianyisha bua tshimfuanyi mu dibeji 23]

Foto Hofer, Bad Ischl, Autriche