Njiwu idi imueneka

OWEN, muana wa balume wa bidimu bibidi ne tshitupa, uvua unaya mu tshiowedi tshia mu nzubu wabu. Wakadienzeja, yeye kubanda kulu kuvua kabadi ka manga, muaba uvua baledi bende kabayi bela meji ne: uvua mua kufikaku to. Mu bintu bivua munda muaku, wakamona mulangi kampanda umusankisha. Wakaukangula ne kunua mâyi avua munda muawu. Njiwu e kumueneka.

Diakabi, bu muvua mulangi au muikale ne aside munda, Owen wakafua. Mutshima wa baledi bende wakasama bikole. Tatuende Percy wakaya kukeba busambi mu tshitendelelu tshiabu. Wakakonka mulombodi wa tshitendelelu tshiabu atshi ne: “Bua tshinyi bualu ebu mbungenzekele?” Yeye kumuandamuna ne: “Nzambi uvua dijinga ne muanjelu mukuabu wa kana mu diulu.” Muledi eu uvua ne kanyinganyinga kakole bua lufu lua muanende wakamona ne: abi kabivua mua kuenzeka nansha kakese. Nzambi uvua bushuwa ujinga bua dikenga dia mushindu au dimukuate anyi? Bualu abu buakatekesha Percy mu mikolo, yeye kupatuka mu tshitendelelu tshivuaye atshi.

Pavua Percy utuma meji ku tshivua tshienzeke atshi, uvua udikonka ne: ‘Muananyi wa balume mukese utshidi anu ukenga anyi? Nemmumoneku tshiakabidi anyi?’

Wewe pebe udi mua kuikala mudiebeje tshidi tshienzekela bantu badi bafua ne ni kuikala mushindu wa kumonangana nabu tshiakabidi matuku adi kumpala. Bible, Dîyi dia Nzambi, udi wandamuna nkonko eyi. Munda muende mudi mandamuna matoke adi akolesha ku muoyo bua bonso badi bapete makenga a muomumue. Bualu bukuabu bua mushinga mukole mbua se: udi wakula bua ditekemena kampanda dilenga didi Nzambi mulaye: dibika dia ku lufu.

Suaku ubale tshiena-bualu tshidi tshilonda bua kumanya bia bungi pa bidi bitangila ditekemena dilenga edi.