Bantu badi mua kujikija bupele anyi?

BANTU ba bungi menemene mbakole kabayi bamanye bupele to. Kabatu banji kulala ne nzala anyi kuzakala ne mashika to. Nansha nanku, ba bungi ba ku bantu aba batu bumvuila bapele luse ne batu benza muabu muonso bua kubambuluisha.

Bupele butu butatshisha bikole bantu badi miaba idi mvita, idi mâyi mapasalale, idi minanga mienzeke anyi idi ntatu mikuabu. Malu aa atu atamba kutatshisha babidime ba mu Afrike. Bamue mbenzejibue bua kushiya nzubu yabu bua kuya kusombela mu bimenga binene anyi bua kulua bena tshimuangi mu ditunga dikuabu. Bakuabu badi ku misoko batu bamuangala bua kuya kupeta nsombelu mulenga mu bimenga binene.

Bupele butu busasa anu bu buowa mu bimenga bidi ne bantu bapite bungi. Mu bimenga ebi mutu anu muaba mukese menemene wa kukuna biakudia, anyi mene kautumu to. Bitu bikole bua kupetamu mudimu. Bua kupanga tshia kuenza ba bungi batu batuadija kuenza buenzavi. Bena mu bimenga batu balomba diambuluisha, kadi mbulamatadi ya bantu kayena mua kujikija bupele budi buenda anu buvula ebu to. Tshikandakanda tshikuabu tshia mu Londres tshiakatela luapolo lua Bulongolodi bua Matunga Masanga luakapatuka mu Kasuabanga 2003, tshiamba ne: “Bantu badi ne nzala badi benda anu bavula pa buloba.” (The Independent) Tshiakamba kabidi ne: “Bantu batue ku miliyo 842 pa buloba bujima badi badia bibi, ne bungi ebu budi buenda buvula ku tshidimu tshionso ne bantu miliyo 5 badi balala ne nzala.”

Biro bia Bantemu ba Yehowa bia mu Afrique du Sud bitu bipeta misangu mikuabu mikanda mibafundila kudi bapele. Tshilejilu, muntu mukuabu wa mu Bloemfontein wakafunda ne: “Tshiena ne mudimu to; ntu ngiba muaba onso undi mpeta mushindu wa kuiba mu tshimenga. Meme tshiyi muibe, tudi tulala ne nzala matuku a bungi, katuyi tubala mashika makole atuku. Kakuena mudimu nansha mukese wa kuenza. Bantu ba bungi badi batambakana mu njila bakeba mudimu ne tshiakudia. Ndi mumanye bakuabu batu bakeba biakudia miaba itubu bimansha bintu bia bukoya. Bakuabu batu badishipa. Ba bungi badi bu meme mbabungame ne mbashikile. Bidi bimueneka ne: kakuena ditekemena nansha dimue bua matuku atshilualua to. Nzambi uvua mutufuke ne dijinga dia kudia ne dia kuvuala kêna umonaku malu aa anyi?”

Kudi mandamuna malenga bua malu adi matonde muntu eu. Anu mualeja tshiena-bualu tshidi tshilonda, mandamuna aa adi mu Dîyi dia Nzambi.