Buloba budi kabuyi bupele bukadi pabuipi

BIMFUANYI bia Mparadizu, bu etshi tshidi pa tshizubu tshia tshibejibeji etshi, bitu bisankisha bapele bikole. Mparadizu uvua bualu bulelela bua bantu ba kumpala, Adama ne Eva. Bavua basombele mu budimi bua Edene. (Genese 2:7-23) Nansha muvua Mparadizu au mujimine, kuitaba ne: nekuikale mparadizu anyi buloba bupiabupia budi kabuyi ne bupele mu matuku atshilualua ki mmianu ya tshianana to. Ditabuja edi ndishindamene pa malu adi Nzambi mulaye mu Bible.

Tshilejilu, tangila tshivua Yezu Kristo mulaye dituku diende dia ndekelu pa buloba. Umue wa ku bantu babi bavua bafue pamue ne Yezu wakaleja muvuaye witabuja ne: Nzambi udi ne bukokeshi bua kujikija ntatu ya bantu. Wakamba ne: ‘Yezu, pawabuela mu bukalenge buebe, umvuluke.’ Mêyi aa adi aleja ne: muntu mubi au uvua witabuja ne: Yezu uvua ne bua kulua Mukalenge ne bantu bavua ne bua kubika ku lufu. Yezu wakamuandamuna ne: ‘Bulelela, ndi nkuambila lelu ne: wewe newikale nanyi mu Mparadizu.’​—Luka 23:42, 43.

Bible udi wamba bua aba basomba mu Mparadizu ne: ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi.’ (Yeshaya 65:21) Eyowa, ‘nebashikame, muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa; bualu bua mukana mua Yehowa wa misumba muakuamba nunku.’​—Mika 4:4.

Kadi bua tshinyi Nzambi mmulekele bupele too ne mpindieu? Mmushindu kayi udi Nzambi wambuluisha bapele? Bupele nebujike dîba kayi?

Bua tshinyi Nzambi mmulekele bupele?

Mparadizu uvua Adama ne Eva basombele wakajimina bualu Satana Diabolo wakabasaka bua kutombokela Nzambi. Satana wakakuila mukana mua nyoka bua kusaka Eva ku dishipa mukenji wa Nzambi uvua ukandika didia dia tshimuma tshia mutshi kampanda. Wakamudinga pakamufikishaye ku diela meji ne: uvua mua kuikala ne nsombelu muimpe mutambe bu yeye kayi ku bukokeshi bua Nzambi. Pakalua Eva kupesha Adama tshimuma tshivuabu bakandike, yeye pende wakadia, kuelaye Nzambi nyima bua mukajende.​—Genese 3:1-6; 1 Timote 2:14.

Bakipata bantu babidi abu mu Mparadizu, ne kubangila anu dîba adi bakatuadija kudituta eku ne kuaka bua kupeta biakudia. Too ne lelu, Yehowa mmulekele Satana ukokesha bantu bapange bupuangane, bua kuleja patoke malu mabi adi mafumine ku ditombokela Nzambi. Mianda ya panu mmijadike mudi bantu kabayi mua kuvuija buloba Mparadizu. (Yelemiya 10:23) Kadi kubenga  kukokela Nzambi nkulele ntatu mikole, pamue ne bupele.​—Muambi 8:9.

Kadi bapele ki mbapange diambuluisha pa buloba ebu budi buule ne ndululu. Dîyi didi Nzambi mufundishe ku nyuma wende didi ne mibelu milenga idi ibatangila.

‘Kanutambi kuelangana meji’

Pavua Yezu ulongesha musumba munene wa bantu uvua ne bapele ba bungi, wakamba ne: ‘Monayi nyunyu ya mu diulu, kayitu ikuna maminu, kayitu ipuola, kayitu isangisha bintu mu mayeba, kadi Tatu wenu udi mu diulu utu uyidisha. Nuenu kanuena bayitambe anyi? Kanutambi kuelangana meji ne: netudie tshinyi? Netunue tshinyi? Netudiluatshishe tshinyi? Bisamba bia bende bidi bikeba bintu ebi bionso; Tatu wenu udi mu diulu udi mumanye ne: Nudi ne bintu ebi bionso bualu. Kadi diambedi kebayi bukalenge buende ne buakane buende, nunku nebanupe bintu ebi bionso.’​—Matayo 6:26-33.

Muntu mupele kêna ne bua kuiba to. (Nsumuinu 6:30, 31) Neapete bidiye nabi dijinga yeye muteke Nzambi pa muaba wa kumpala mu nsombelu wende. Angata tshilejilu tshia Tukiso, muntu kampanda wa mu ditunga dia Lesotho, mu Afrike wa ku sud. Mu 1998, biluilu bia ditunga dikuabu biakabuela mu Lesotho bua kujikija buntomboji buvuabu bajudile mbulamatadi. Mu mvita ayi bakapawula magazen a bungi, bantu bakajimija midimu yabu ne biakudia biakakepa bikole.

Tukiso uvua musombele mu tshitupa tshia bapele tshia mu tshimamuende wa bukalenge. Bena mutumba nende ba bungi bavua bapawule pabu magazen bua kupeta biakudia. Pakapingana Tukiso ku nzubu wende uvua ne mushiku umuepele patupu, wakasangana ne: Maseiso, mukaji uvuabu basombe nende uvua mupawule bintu bia bungi. Tukiso wakamumvuija ne: bilondeshile mikenji ya Nzambi kuiba nkubi ne wakamuambila ne: “Imansha bintu ebi pambelu.” Maseiso wakatumikila. Bena mutumba bakabaseka ne kuambulabu biakudia abi.

Tukiso wakangata dipangadika edi bua malu avuaye mulonge mu Bible ne Bantemu ba Yehowa. Ditumikila mikenji ya Nzambi diakamupangisha biakudia anyi? Tòo. Matuku makese panyima, bakulu ba mu tshisumbu tshia Bantemu ba Yehowa tshivuaye ubuela bakalua kumumona ne kumutuadilabu biakudia. Bulelela, Bantemu ba Yehowa ba mu Afrique du Sud bakatuma bintu tone mipite pa ibidi bua bana babu bena Kristo ba mu Lesotho. Ditumikila dia Tukiso dia mikenji ya Nzambi ne dikuatshisha dia tshisumbu biakalenga Maseiso bikole. Yeye pende wakatuadija kulonga Bible. Ndekelu wa bionso, bonso babidi bakafundisha dibaka kua mbulamatadi ne nunku kukumbajabu malu malomba bua kutambulabu ne kulua Bantemu ba Yehowa. Batshidi benzela Nzambi mudimu ne lulamatu.

 Yehowa Nzambi utu utabalela bapele. (Bala malu adi mu kazubu kadi ne tshiena-bualu tshia “Mmunyi mutu Nzambi umona bapele?”) Mmulongolole malu bua kuambuluisha bantu bakuabu badi bu Tukiso ne Maseiso bua kulonga malu adi amutangila. Mu Dîyi diende mmufile kabidi mibelu idi ikuatshisha mu nsombelu wa ku dituku ne ku dituku.

Dilongolola dilenga

Bantemu ba Yehowa batu bakeba misangu yonso bua kuidikija mushindu utu Nzambi uditatshisha bua bapele. (Galatia 2:10) Misangu mivule patu bipupu bienzeka mu ditunga kampanda ne bilenga bena Kristo balelela, batu balongolola bua kubambuluisha. Tshidi ne mushinga ntshia se: Bantemu batu baditatshisha bua majinga a mu nyuma a bantu bonso, ne a bapele kabidi. (Matayo 9:36-38) Mu bidimu 60 biashadi ebi, bena Kristo binunu ne binunu balongesha mudimu bimpe mbadifile bua kuenza mudimu wa bumisionere mu matunga a ku ba bende. Tshilejilu, mulume kampanda ne mukajende bamisionere bafumine mu ditunga dia Finlande ke bakalongesha Tukiso ne Maseiso bua kulua bayidi ba Yezu, kunyima kua bobu bamane kulonga muakulu wa Sesotho. (Matayo 28:19, 20) Mudimu eu wa bumisionere utu ulomba bua kushiya nsombelu mulenga wa mu ditunga dibanji ne kuya kusombela mu ditunga dipele.

Bena Kristo kabena ne bua kuiba bua kupeta tshiakudia to. Kadi badi ne ditabuja dia se: Yehowa Nzambi neabapeshe bidibu nabi dijinga. (Ebelu 13:5, 6) Mushindu umue utu Yehowa ukumbaja majinga a basadidi bende nku diambuluisha dia bulongolodi bua pa buloba bua batendeledi bende batu batabalelangana.

Mushindu mukuabu utu Yehowa wambuluisha bapele mpadiye ubapesha mibelu idi ibakuatshisha  bua nsombelu wa ku dituku ne ku dituku. Tshilejilu Bible udi wamba ne: ‘Muntu wakuiba, alekele kuiba; kadi akuate mudimu, enze budi buimpe ne bianza biende, bua yeye ikale ne tshia kupaye udi utshikengela.’ (Efeso 4:28) Bantu ba bungi badi mu bulofu batu badienzela midimu yabu nkayabu, benza mudimu mukole bu mudi wa kukuna bisekiseki. Bible udi kabidi wambuluisha bapele bua kulama mfranga padiye ubalongesha bua kulekela bibidilu bibi bu mudi dikuatshika dia maluvu.​—Efeso 5:18.

Buloba budi kabuyi bupele nebuikaleku dîba kayi?

Bible udi uleja ne: tudi mu ‘matuku a ku nshikidilu’ a bukokeshi bua Satana. (2 Timote 3:1) Mu katupa kîpi emu, Yehowa Nzambi neatume Yezu Kristo bua kulumbuluisha bantu. Ntshinyi tshienzeka dîba adi? Yezu wakandamuna mu mufuanu wende kampanda. Wakamba ne: ‘Palua Muana wa muntu mu butumbi buende ne banjelo bonso, neashikame mu nkuasa wa butumbi buende; bisamba bionso nebisangakane kumpala kuende, yeye neabatapulule bu mudi mulami utapulula mikoko ne mbuji.’​—Matayo 25:31-33.

Mikoko ya mu mufuanu emu mbantu badi bakokela bumfumu bua Yezu. Yezu wakabafuanyikija ne mikoko bualu badi bamulonda bu Mulami wabu. (Yone 10:16) Bantu aba badi bafuane mikoko nebapete muoyo mu bukokeshi bupuangane bua Yezu. Newikale muoyo wa disanka mu buloba bupiabupia muikala kamuyi bupele. Nebabutule bua kashidi bantu badi bafuane mbuji, badi babenga bukokeshi bua Yezu.​—Matayo 25:46.

Bukalenge bua Nzambi nebujikije malu mabi onso. Tshikondo atshi, bupele kabuakuikalaku kabidi to. Kadi bantu badi banangangane ne badi batabalelangana ke basomba pa buloba. Tudi bajadike ne: buloba bupiabupia bua nunku nebuikalaku patudi tumona dinanga dia Bantemu ba Yehowa ba pa buloba bujima, bualu Yezu wakamba ne: ‘Bua bualu ebu bantu bonso nebamanye ne: Nudi bayidi banyi, binuanangangana nunku.’​—Yone 13:35.

[Kazubu/​Bimfuanyi mu mabeji 6, 7]

MMUNYI MUTU NZAMBI UMONA BAPELE?

Bible udi wamba bua Mufuki wa bantu ne: ‘Udi upesha badi ne nzala biakudia.’ (Musambu 146:7) Udi ne mvese mipite pa lukama idi ileja mudi Nzambi uditatshisha bua bapele.

Tshilejilu, pavua Yehowa mupeshe tshisamba tshia Isalele wa kale Mikenji yende, wakambila babidime ba mu Isalele bua kubenga kunowa bintu bionso bivua ku mielelu ya madimi abu. Kabavua ne bua kupinganyina musangu muibidi bimuma bivua bishale ku mutshi wa olive anyi mionji ya tumuma tua mvinyo. Mikenji eyi ivua miela bua kuambuluisha benyi, bana ba nshiya, bakaji bakamba ne bakengi bakuabu.​—Lewitiki 19:9, 10; Dutelonome 24:19-21.

Nzambi wakambila kabidi bena Isalele ne: ‘Kanukengeshi bakaji ba mu lufuila anyi bana ba nshiya. Biwabakengesha ne biadilabu kundi, meme nengumvuile muadi wabu; ne tshiji tshianyi netshitambe bukole, nennushipe ne muele wa mvita; ne bakaji benu nebikale bakaji ba mu lufuila ne bana benu nebikale bana ba nshiya.’ (Ekesode 22:22-24) Diakabi, bena Isalele ba bungi babanji kabakatumikila mêyi aa to. Bua bualu ebu ne bua mibi mikuabu, Yehowa Nzambi wakadimuija bena Isalele misangu ya bungi mukana mua baprofete bende. (Yeshaya 10:1, 2; Yelemiya 5:28; Amosa 4:1-3) Ndekelu wa bionso, Nzambi wakenza bua bena Ashû ne pashishe bena Babulona banyenge buloba bua bena Isalele. Bakashipa bena Isalele ba bungi ne bakaya ne bavua bapanduke mu bupika mu matunga makuabu.

Yezu Kristo, Muana munanga wa Nzambi, uvua uditatshisha pende bua bapele anu bu Tatuende. Yezu wakumvuija tshipatshila tshia mudimu wende pakambaye ne: ‘Nyuma wa Nzambi udi pambidi panyi, bualu bua yeye wakangela manyi pa mutu ne: Ambila bantu bapele lumu luimpe.’ (Luka 4:18) Kabiena biumvuija ne: Yezu wakayisha anu bapele to. Wakambuluisha kabidi babanji ne dinanga. Kadi nansha pavuaye ubambuluisha apu, misangu mivule uvua uleja muvuaye uditatshisha bua bapele. Tshilejilu, wakabela mfumu mubanji kampanda nunku: ‘Upane biudi nabi bionso, ubiabanyine bantu bapele, newikale ne bintu mu tshibutshilu mu diulu; ulue kundonda meme.’​—Luka 14:1, 12-14; 18:18, 22; 19:1-10.

Yehowa Nzambi ne Muanende badi baditatshisha bikole bua bapele. (Mâko 12:41-44; Yakobo 2:1-6) Bua kuleja mudiye uditatshisha bua bapele, Yehowa mmulame mu lungenyi luende bapele miliyo ne miliyo bakadi bafue. Neabishe bantu bonso ba mushindu eu mu buloba bupiabupia muikala kamuyi bupele kabidi.​—Bienzedi 24:15.

[Bimfuanyi]

Dinanga dia Bantemu ba Yehowa ba pa buloba bujima didi dileja ne: buloba bupiabupia nebuikalaku

[Tshimfuanyi mu dibeji 5]

Tukiso ne Maseiso ne misionere uvua mulonge Bible ne Tukiso

[Tshimfuanyi mu dibeji 5]

Maseiso ku tshibi tshia nzubu wende ne misionere uvua mulonge nende Bible