Udi wibakila pa tshishimikidi kayi?

ILALA dia nzubu matuku a bungi didi dilondeshila bukole bua tshishimikidi. Imue misangu Bible utu wenza mudimu ne dîyi edi mu ngakuilu wa mu tshimfuanyi.

Tshilejilu, muprofete Yeshaya udi wakula bua Yehowa Nzambi bu eu “wakajadika bishimikidi bia buloba.” (Yeshaya 51:13) Tshishimikidi etshi tshia mu tshimfuanyi tshidi tshileja mikenji ya Nzambi idi kayiyi mua kushintuluka idi ilombola dinyunguluka dia buloba ne ibuambuluisha bua kushalabu pa muaba wabu. (Musambu 104:5) Dîyi dia Nzambi didi diakula kabidi bua “bishimikidi” bia bantu. Bishimikidi ebi mbuakane, mikenji ne bulongame. Padibu ‘babishimbula’ anyi babinyanga kudi kansungasunga, mbuejilu ne tshinyangu, nsombelu wa bantu udi unyanguka.​—Musambu 11:2-6; Nsumuinu 29:4.

Dîyi edi didi dikumbanyina kabidi nsombelu wa muntu pa nkayende. Ku ndekelu kua Muyuki wende muende lumu wakenzaye pa Mukuna, Yezu Kristo wakamba ne: ‘Muntu yonso udi mumvue mêyi anyi aa ne utu waatumikila neikale bu muena meji, wakibaka nzubu wende pa mutu pa dibue. Mvula yakaloka, misulu yakuula, bipupu biakalua, biakakuma ku nzubu, kadi nzubu kakupuka, bua yeye wakadi muibaka pa dibue. Muntu yonso udi mumvue mêyi anyi aa, kayi uatumikila, udi biende bu muntu mupote, wakibaka nzubu wende pa lusenga. Mvula yakaloka, misulu yakuula, bipupu biakalua, biakakuma ku nzubu, nzubu wakupuka; kupuka kuende kuakadi kunene.’​—Matayo 7:24-27.

Nsombelu webe mmuibakila pa tshishimikidi kayi? Udi mumuibakile pa lusenga lua bena nkindi mibi ya bantu idi itenkakana, ikala mua kupuka anyi? Peshi udi mumuibakile pa dibue, didi diumvuija kutumikila bidi Yezu Kristo wamba, diakuambuluisha bua kupanduka ku tshipepele tshikole tshia mu tshimfuanyi mu nsombelu webe anyi?