Bantu bena bululame badi batumbisha Yehowa
Malu malonda kudi bamanyishi ba Bukalenge
Bantu bena bululame badi batumbisha Yehowa
MU BULOBA bujima, Bantemu ba Yehowa bana ne bakole mbamanyike bua bululame buabu. Tangila bilejilu bidi bifumina mu bitupa bisatu bishilangane bia buloba.
Dimue dituku, Olusola, nsongakaji wa bidimu 17 udi musombele mu ditunga dia Nigeria uvua upingana kumbelu ufumina mu kalasa, yeye kuangula kabuta ka makuta panshi. Wakaya naku kudi mulombodi wa tulasa tuabu, mulombodi eu kubala makuta avua munda muaku ne kusanganamu naira 6 200 (dolare mitue ku 45). Mulombodi au e kupingaja kabuta aku kudi mulongeshi uvua mukajimije. Bua mulongeshi au kuleja dianyisha diende, wakapesha Olusola naira 1 000 (dolare mitue ku 7) ne kumuambilaye bua ayifute mu kalasa. Pakumvua balongi bakuabu tshivua tshienzeke, bakaseka Olusola. Kunyima kua mbingu ndambu, mulongi mukuabu wakamanyisha ne: bavua bibe makuta ende, nunku bakambila balongeshi bua kukala balongi bonso. Mulongeshi wakambila Olusola ne: “Wewe imana apa, ndi mumanye ne: bu muudi Ntemu wa Yehowa, kuena mua kuiba to.” Bakasangana makuta kudi bansonga babidi bavua baseke Olusola abu, bobu kubanyoka bikole. Olusola wakafunda ne: “Ndi ne disanka dia bungi bua mundi mumanyike bu Ntemu wa Yehowa, wikala kayi mua kuiba nansha kakese, mpesha nunku Yehowa butumbi.”
Dimue dituku pavua Marcelo muena mu ditunga dia Argentine umbuka kuende, wakasangana tshibuta panshi mutantshi mukese ne tshiibi tshiende tshia kumfundu. Pakabuelaye ne tshibuta atshi mu nzubu, yeye ne mukajende bakatshikangula ne mbabi yonso. Bualu bua dikema, bakasanganamu mukafu munene wa makuta, tubeji tua kusumba natu bintu ne sheke ya bungi mimana kutua biala, umue wa kudiyi muikale wa muliyo mujima wa peso (euro 250 000). Bakasangana nimero kampanda ya telefone pa kabeji kavua munda mua tshibuta atshi. Bakabikila muena tshibuta atshi ne bobu kumvuangana bua kumupingajilatshi ne bionso bivuamu ku mudimu kua ba Marcelo. Pakafika muena bintu abi, uvua anu bu uvua ulubakana. Mfumu wa mudimu wakamuambila bua kutukija, bualu Marcelo uvua Ntemu wa Yehowa. Bu difutu bua muvuabu bamuanguile tshibuta tshiende, wakapesha Marcelo peso 20 patupu (dolare mitue ku 6). Bualu ebu buakafikisha mfumu wa mudimu tshiji bualu bululame bua Marcelo buvua bumukemeshe bikole be. Nunku Marcelo wakapeta mushindu wa kumvuija bantu ne: mmusue kuikala ne bululame misangu yonso bualu udi Ntemu wa Yehowa.
Bualu buenzeke budi bulonda ebu budi bufumina mu ditunga dia Kirghizistan. Rinat, muana wa balume wa bidimu bisambombo wakangula kabuta ka makuta ka muntu mukaji mukuabu uvua musombele pamue nabu. Mu kabuta aku muvua som 1 100 (dolare mitue ku 25). Pakapingaja Rinat kabuta kavua kajimine aku kudi muntu mukaji au, wakabala makuta ne pashishe kuambilaye mamuende wa Rinat ne: som 200 (dolare mitue ku 5) kayivuamu to. Rinat wakamba ne: kavua muangate makuta au to. Nunku bonso bakaya kukeba makuta avua majimine au ne kuasanganabu pabuipi ne muaba uvuabu bangule kabuta aku. Mukaji au wakakema. Wakaleja dianyisha diende kudi Rinat ne mamuende, tshia kumpala, bua muvuabu bapingaje makuta avua majimine, ne tshibidi, bua mudi mamuende wa Rinat umulongesha bua kuikala muena Kristo.