Nkonko ya babadi

Pakumvua bayidi ne: Petelo uvua mu buloko uvua ku tshiibi, bua tshinyi bakamba ne: ‘Mmuanjelu wende’?​—Bienzedi 12:15.

Bayidi bavua mua kuikala batupakane mu diela meji ne: muanjelu mutuadi wa mukenji uvua uleja mpala wa Petelo ke uvua ku tshiibi. Tangila muvuabi bienzeke.

Bakavua bakuate Petelo kudi Helode ukavua mushipe Yakobo. Nunku bualu ebu buvua bushindikila bayidi aba ne: Petelo uvua ne bua kushipibua pende. Bakavua bamuele mu buloko, bamusuike ne nkanu ne bamulame kudi tusumbu tunayi tua basalayi banayi banayi ku kasumbu konso tuvua tushintulukangana. Butuku bukuabu, muanjelu umue wakasungila Petelo mu tshishima ne kumupatulaye mu buloko. Pakajingulula Petelo tshivua tshienzeke, wakamba ne: ‘Bulelela, ndi mumanye katataka ne: Mukalenge wakutuma muanjelu wende, wakunsungila mu bianza bia Helode.’​—Bienzedi 12:1-11.

Diakamue Petelo wakaya ku nzubu kua Mariya mamuende wa Yone Mâko, kuvua bayidi ba bungi badikungije. Pakakokolaye ku tshiibi tshia ku lupangu, muena mudimu mukaji diende Loda wakaya kuitaba. Pakumvuaye dîyi dia Petelo, wakaya lubilu kuambila bakuabu kayi nansha mumubueje mu lupangu to! Kumpala, bayidi kabavua mua kuitaba ne: Petelo ke uvua ku tshiibi tshia lupangu to. Kadi bakatupakana bela meji ne: ‘Mmuanjelu wende.’​—Bienzedi 12:12-15.

Bayidi bakelaku meji ne: bakavua bamane kushipa Petelo, ne mukishi wende ke uvua ku tshiibi anyi? Kabivua mua kuikala nanku to, bualu bayidi ba Yezu bavua bamanye bulelela bua mu Bible pa tshilumbu tshia bafue, bua se: “kabena bamanye bualu [nansha] bumue.” (Muambi 9:5, 10) Nunku, ntshinyi tshivua bayidi basue kumvuija pakambabu ne: ‘Mmuanjelu wende’?

Bayidi ba Yezu bavua bamanye ne: mu bikondo bia kale banjelu bakambuluisha bantu ba Nzambi mpala ne mpala. Tshilejilu, Yakoba wakakula bua ‘muanjelu wakamupikula ku malu mabi onso.’ (Genese 48:16) Ne Yezu wakambila bayidi bende bua muana mukese uvua munkatshi muabu ne: ‘Nudimuke, kanulenguludi muana umue wa mu bana aba bakese; ndi nnuambila ne: mu diulu matuku onso banjelu babu batu batangila Tatu wanyi wa mu diulu ku mêsu.’​—Matayo 18:10.

Bible mukuabu udi ukudimuna muaku agʹge·los (“muanjelu”) bu “mutuadi wa mukenji.” (Young’s Literal Translation of the Holy Bible) Bidi bimueneka ne: bamue bena Yuda bavua bamanye ne: musadidi yonso wa Nzambi utu ne wende muanjelu, mbuena kuamba ne: “muanjelu mulami.” Bushuwa, Dîyi dia Nzambi kadiena dilongesha buludiludi malu mushindu eu to. Kadi bidi mua kuikala se: pakamba bayidi ne: ‘Mmuanjelu wende,’ bavua bela meji ne: muanjelu mutuadi wa mukenji uvua uleja mpala wa Petelo ke uvua muimane ku tshiibi.