Badi bayisha mu ditunga muvua Buena-Kristo butangalake kumpala

ITALIE, tshitupa tshia buloba tshidi tshienze bu tshisabata tshia mu dikafu tshidi tshibuele mu Mbuu wa Méditeranée mmuaba uvua malu a ntendelelu ne a mamanya a bantu adi mashintulule dilondangana dia mianda ya pa buloba. Bendakanyi miliyo mivule batu bayamu bua kumona bintu bilenga bidi mu buloba buamu, bua kubandila bintu bia dikema bienza ku bianza bia bantu ne bua kudia biakudia bisheme bidimu. Mu ditunga edi kabidi dilongeshangana malu a mu Bible didi dienda diya kumpala.

Buena-Kristo bulelela buvua mua kuikala bubuele kumpala mu Lomo, tshimenga tshikulu tshia bukalenge bunene bua buloba bujima bua tshikondo atshi, pavua bena Yuda ne bantu bavua bitabe Buena-Yuda balue bena Kristo mu dia Pentekoste wa mu 33 bikondo bietu ebi bapingane kuabu, bafumina ku Yelushalema. Pabuipi ne tshidimu tshia 59 bikondo bietu ebi, mupostolo Paulo wakakumbula ditunga dia Italie bua musangu wa kumpala. Pakafikaye mu Potiolo ku muelelu wa mâyi, ‘wakasangana bana babu’ mu ditabuja.​—Bienzedi 2:5-11; 28:11-16.

Anu muvua Yezu ne bapostolo baleje, kumpala kua ndekelu wa bidimu lukama bia kumpala, bisumbu bia batontolodi biakapatuka ku kakese ku kakese munkatshi mua bena Kristo balelela. Kadi, kumpala kua ndongoluelu mubi wa malu eu kutuaye ku ndekelu, bayidi balelela ba Yezu mbaditue mu diyisha dia lumu luimpe buloba bujima, too ne mu Italie.​—Matayo 13:36-43; Bienzedi 20:29, 30; 2 Tesalonike 2:3-8; 2 Petelo 2:1-3.

Ntuadijilu uvua utekesha mu mikolo

Mu 1891, Charles Taze Russell uvua ulombola mudimu wa kuyisha buloba bujima wa Balongi ba Bible (muvuabu babikila Bantemu ba Yehowa tshikondo atshi), wakakumbula bimue bimenga bia mu Italie bua musangu wa kumpala. Wakafika ku dimona ne: mudimu wende wa kuyisha muaba au kauvua umueneka bu uvua mua kupatula bipeta bimpe menemene pakambaye ne: “Katuvua bamone tshintu nansha tshimue tshivua mua kutukankamija bua kutekemena bia kunowa nansha bikese mu Italie.” Mu muvu wa printemps wa 1910, muanetu Russel wakapingana mu Italie ne kuenzaye muyuki wa mu Bible mu nzubu kampanda wa dibidijila mubidi, munkatshi mua Lomo. Bipeta bivua tshinyi? Wakamba ne: “Mu kabujima, tshisangilu atshi tshivua bualu buvua butekesha ku muoyo bikole.”

Ku ntuadijilu, mudimu wa diyisha lumu luimpe mu Italie uvua wenda bitekete bualu bavua bakengesha bamue Bantemu ba Yehowa kudi batshikokesha nkaya ba ba-faciste. Tshikondo atshi, kakuvua Bantemu ba Yehowa bapite pa 150 mu ditunga edi to, bualu bavule ba kudibu bavua balongele bulelela kudi balela babu ne balunda babu ba mu matunga makuabu.

Didiunda dia dikema

Kunyima kua Mvita Mibidi ya Buloba bujima, bakatuma bamisionere ndambu mu Italie. Kadi anu mudi mukanda musangana mu bintu bia kale bia mbulamatadi uleja, bantu ba mianzu minene ba mu banene ba Vatican bakalomba mbulamatadi bua kuipata bamisionere abu. Pa kumbusha bamisionere bakese, bakenzeja bavule bua kumbuka mu ditunga.

 Nansha muvuaku bipumbishi, bantu bavule ba mu Italie bakabanga kupuila ku “mukuna” wa ntendelelu wa Yehowa. (Yeshaya 2:2-4) Divula dia Bantemu ndimueneke patoke. Mu 2004 muvua bamanyishi ba lumu luimpe 233 527, mumanyishi umue bua bena ditunga 248, ne bantu 433 242 bakabuela mu Tshivulukilu tshia lufu lua Kristo. Muvua bisumbu bia Bantemu ba Yehowa 3 049 bivua bidisangisha mu Nzubu ya Bukalenge mimpe. Matuku mashale aa, bimue bisumbu bia bantu mbipete didiunda divule.

Diyisha mu miakulu mivule

Bantu bavule bafumine mu Afrike, mu Asia ne ku Mputu wa ku Est batu balua mu Italie bua kukeba midimu anyi nsombelu muimpe peshi bua kuepuka imue ntatu. Mmunyi mudi miliyo ya bantu eyi mua kupeta diambuluisha dia mu nyuma?

Bantemu bavule ba mu Italie mbitabe lutatu lua kulonga miakulu mikole bu mudi wa Bengali, Cinghalais, Punjabi, Tagalog, tshi-Chinois, tshiena-Albanie, tshiena-Amhara ne tshiena-Arabe. Kubangila mu 2001, bakalongolola malongesha a miakulu bua kulongesha bavua basue kuyisha mu miakulu mienyi. Mu bidimu bisatu bishale ebi, Bantemu 3 711 bakabuela mu tulasa 79 tuvuabu balongolole mu miakulu 17. Ebi mbiambuluishe bua kuenza ne kukolesha bisumbu binene 146 ne bikese 274, bionso bia miakulu 25. Nunku bena muoyo muimpe bavule mbumvue lumu luimpe ne batuadije kulonga Bible. Misangu mivule, bipeta bimpe bitu bimueneka.

Ntemu wa Yehowa kampanda wakambila George malu a mu Bible. George eu uvua muakudi wa muakulu wa Malayalam, uvua mufumine mu ditunga dia Inde. Nansha muvuaye ne ntatu mikole bua kupeta mudimu, wakitaba ne disanka dionso bua kulonga Bible. Kunyima kua matuku makese, Gil mulunda wa George, muena muakulu wa Punjabi wa mu Inde wakaya ku Nzubu wa Bukalenge, ne bakatuadija kulonga nende Bible. Gil wakafikisha David wa mu Inde, muena muakulu wa Telugu kudi Bantemu. Diakamue, David wakatuadija kulonga Bible. Bena mu Inde bakuabu babidi, Sonny ne Shubash bavua basombele mu nzubu umue ne Davidi. Bubidi buabu bakatuadija pabu kulonga Bible.

Kunyima kua mbingu ndambu, bakela Bantemu nshinga kudi Dalip, muena muakulu wa Marathi. Wakamba ne: “Ndi mulunda wa George. Nudiku mua kundongesha Bible anyi?” Pashishe, Sumit muena muakulu wa Tamil wakalua pende. Ndekelu wa bionso, mulunda mukuabu wa George wakela nshinga, kulombeshaye dilonga dia Bible. Nunku George wakaya ne nsongalume mukuabu, Max, ku nzubu wa Bukalenge. Yeye pende wakalombesha dilonga dia Bible. Lelu eu, badi balombola malonga a Bible asambombo ne balongolola bua kutuadija makuabu anayi. Adi enzeka mu Anglais nansha mudibu bakuata kabidi mudimu ne mikanda ya mu miakulu bu mudi wa Hindi, Malayalam, Marathi, Punjabi, Tamil, Telugu ne Urdu.

Tumama tudi “tumvua” lumu luimpe

Mu Italie mudi tumama tupite pa 90 000. Mu bidimu bia 1970, Bantemu bakabanga kutabalela diyisha tumama bulelela. Kumpala, bamue Bantemu bavua tumama bakalongesha Bantemu nabu bavua basue kuyisha tumama muakulu wa tumama wa mu Italie. Pashishe tumama tua bungi tuakatuadija kusankidila malu a mu Bible. Lelu eu, bantu bapite pa 1 400 badi bamanye muakulu wa tumama eu batu babuela mu bisangilu bia bena Kristo. Bisumbu binene 15 ne bisumbu bikese 52 bitu bienza bisangilu mu muakulu wa tumama.

Kumpala, Bantemu bavua bayisha tumama bilondeshile muvua muntu ne muntu mulongolole malu pa nkayende. Kadi mu 1978, biro bia filiale bia Bantemu ba Yehowa bia mu Italie biakabanga kulongolola mpungilu bua tumama. Mu ngondo muitanu wa tshidimu atshi, bakamanyisha  ne: mu mpungilu wa bantu bafumine mu matunga mavule uvua ne bua kuenzeka mu Milan bavua ne bua kuenzamu kabidi miyuki mu muakulu wa tumama. Mpuilu wa tshijengu wa tumama wa kumpala bakamuenza mu Nzubu wa Mpuilu mu Milan mu ngondo muibidi wa 1979.

Katshia apu, biro bia filiale bitu bitabalela bikole didia dia mu nyuma dia tumama pa kukankamija bamanyishi ba lumu luimpe bavule bua kulengeja dimanya dia muakulu eu. Kutuadija mu 1995, mbatume bampanda-njila ba pa buabu (bena mudimu ba ku dîba ne ku dîba) mu bimue bisumbu bikese bua kulongesha Bantemu badi tumama mu mudimu wa buambi ne bua kulongolola bisangilu bia bena Kristo. Mu Nzubu isatu ya Mpuilu eyi mudi biamu bia buena lelu bia ditangila nabi bimfuanyi mu mushindu mulenga. Ne tusete tua video tutudi bapatule tudiku bua kufila biakudia bia mu nyuma kudi tumama.

Babandidi mbafike ku dimona ne: Bantemu batu batabalela bimpe majinga a mu nyuma a tumama. Tshibejibeji kampanda tshipatula kudi kumpanyi wa malu a tumama wa mu Italie tshiakafunda miaku ya mu mukanda uvua muepiskopo kansanga wa bena Katolike muambe ne: “Kuikala kamama ndutatu bualu muntu udi kamama bitu bikengela kumutabalela misangu yonso. Tshilejilu, udi ufika ku nzubu wa Mvidi Mukulu nkayende kakuyi lutatu, kadi udi dijinga ne diambuluisha dia muntu udi mua kumukudimuina bionso bidibu babala, bamba anyi bimba mu misambu mu misa.” Tshibejibeji etshi tshiakamba kabidi ne: muepiskopo eu “udi ujadika ne: diakabi, ki mbanji kulongolola mu ekeleziya tshia kuenzela badi ne bulema, ne udi wamba ne: tumama tua bungi batu batutabalela bimpe mu Nzubu ya Bukalenge ya Bantemu ba Yehowa kupita mu nzubu ya Mvidi Mukulu.”​—P@role & Segni.

Badi bayisha lumu luimpe kudi bena buloko

Muntu udi mua kuikala ne budikadidi eku mutshikale mu buloko anyi? Eyowa, bualu Dîyi dia Nzambi didi ne bukole bua ‘kupikula’ badi baditaba ne baditumikila mu nsombelu  wabu. Mukenji uvua Yezu mumanyishe “bena lukanu” uvua wa dipikudibua ku mpekatu ne ku ntendelelu wa dishima. (Yone 8:32, MMM; Luka 4:16-19) Mu Italie, bipeta bimpe bidi bienda bimueneka mu mudimu wa diyisha mu maloko. Mbanyishile Bantemu ba Yehowa pabuipi ne 400 kudi Mbulamatadi bua kukumbula bena buloko ne kubapesha diambuluisha dia mu nyuma. Bantemu ba Yehowa bavua ba kumpala ba ku bantu badi kabayi bena Katolike bakalomba dianyisha adi ne kudipeta.

Mukenji wa mu Bible udi mua kumuangalaka mu mishindu kayiyi midianjila kumanya. Bena buloko batu bayukila ne bena buloko nabu bua mudimu wa dilongesha Bible wa Bantemu ba Yehowa. Nunku, bamue ba ku bena buloko nabu aba mbalombe bua kuikalabu balua kubatangila kudi Ntemu kampanda. Anyi bena mu mêku abu badi batuadije kulonga Bible batu bakankamija bena buloko bua kulomba bua Bantemu bikale balua kubamona. Bamue bena buloko badibu bafundile buloko bua kashidi bualu bavua bashipangane peshi bua bilumbu bikuabu binene mbanyingalale bua mibi yabu, bayilekele ne bashintulule nsombelu wabu bikole. Ebi bidi bibavuija bakumbane bua kudilambula kudi Yehowa Nzambi ne bua kutambula batismo.

Mu maloko a bungi, mbalongolole bua kuenza miyuki ya patoke mishindamene pa biena-bualu bia mu Bible, bua kuenza Tshivulukilu tshia lufu lua Yezu ne bua kuleja filme ya malu a mu Bible mipatula kudi Bantemu ba Yehowa. Misangu mivule, bena buloko ba bungi batu babuela mu bisangilu ebi.

Bua kuambuluisha bena buloko mu mishindu mimpe, Bantemu mbabanye bikole bibejibeji bidi ne biena-bualu bikala mua kusankisha bena buloko. Réveillez-vous! wa dia 8 Lumungulu 2001 (tshimue tshia ku bibejibeji abi) uvua ne tshiena-bualu tshia se: “Un détenu peut-il se réformer?” Eu wa dia 8 Tshisanga 2003 uvua yeye ne tshiena-bualu etshi: “Votre enfant se drogue: que faire?” Mbabanyine bena buloko binunu ne binunu bia tshibejibeji etshi. Ke bualu kayi badi balombola malonga a Bible mavule mpindieu. Bamue balami ba buloko mbaleje pabu dijinga dia kumanya bia bungi mu mukenji wa mu Bible.

Muena buloko mukuabu diende Costantino mumane kupeta dianyisha dia pa buadi dia kudi bamfumu, wakatambula mu Nzubu wa Bukalenge kampanda wa mu San Remo, ne Bantemu 138 ba muaba au bavuapu. Costantino wakamba ne disanka dionso kunyima kua batismo wende ne: “Mvua ndiumvua bu mubuikila meme yonso ne dinanga.” Tshikandakanda tshikuabu tshiakaleja mêyi akamba mulami wa buloko mukuabu ne: “Tuvua ne disanka dia bungi . . . patuakafila dianyisha adi. Tshintu tshionso tshidi mua kuambuluisha muena buloko bua kulengeja nsombelu wende, bumuntu buende ne malanda ende ne Nzambi tshidi ne bua kuikala ne mushinga.” Mukaji wa Costantino ne muanende wa bakaji bakakema bikole bua mushindu uvua dimanya dilelela dia Bible dilengeje nsombelu wa Costantino, kuambabu ne: “Udi utusankisha bua mushindu udiye mushintuluke. Mmulue muena ditalala, ne ditutabalela diende didi dienda divula. Tudi bafike ku dimueyemena ne ku dimunemeka tshiakabidi.” Bobu pabu bakadi batuadije kulonga Bible ne kubuela mu bisangilu bia bena Kristo.

Sergio, uvuabu bakuate bua buivi ne dibuelelangana mu nzubu ne bingoma, bua dipana dia bintu bidi bikuata ne bua dishipangana, bakamufundila bua kuenza buloko too ne mu 2024. Kunyima kua yeye mumane kukonkonona Mifundu munkatshi mua bidimu bisatu ne mushintulule nsombelu wende, wakangata dipangadika dia kutambula. Mmuena lukanu wa 15 wa mu buloko bua Porto Azzuro, mu tshidiila tshia Elbe, wakatambula ne kulua Ntemu wa Yehowa. Wakatambula  kumpala kua bena buloko nende bavule, mu dilongo dinene dia mâyi dia mu tshipalu tshia manaya tshia buloko abu.

Leonardo udibu bafundile buloko bua bidimu 20 wakapeta dianyisha dia pa buadi dia kubatijibua mu Nzubu wa Bukalenge mu Parme. Pakamukudikabu nkonko kudi bena tshikandakanda kampanda, Leonardo wakamba ne: uvua musue “kuleja patoke ne: uvua mupangadike bua kulua Ntemu wa Yehowa, ki mbua kumona mua kupatuka mu buloko, kadi mbua kukumbaja dijinga diende dikole dia mu nyuma divuaye nadi.” Leonardo wakamba ne: “Ndi muenze bilema bia bungi mu nsombelu wanyi, kadi ndi mubilekele. Ndi mushintuluke, kadi ki ndiakamue to. Ndi musue kutungunuka ne kuikala muntu muakane.”

Salvatore, uvuabu bakuate bua dishipangana, udi mu buloko bua Spoleto budibu balame bikole menemene. Batismo wende wakenzeka mu buloko wakakemesha bantu bavule. Mulami wa buloko wakamba ne: “Bidi bikengela kutuma kumpala mushinga wa mu nsombelu wa malu adi muntu usungula adi amufikisha ku dikala ne tshikadilu tshilenga kudi bonso, bua diakalenga dia badi mu buloko ne bua bantu bonso.” Bua mushindu udi Salvatore mushintuluke, mukajende ne muanende wa bakaji badi mpindieu babuela mu bisangilu bia Bantemu ba Yehowa. Muena buloko uvua Salvatore muyishe wakatambula ne kulua musadidi wa Yehowa mudilambule kudiye.

Ndambu wa didiunda dia Buena-Kristo dia ntuadijilu wakenzekela mu Italie. (Bienzedi 2:10; Lomo 1:7) Mu tshikondo etshi tshia dinowa, didiunda dia mu nyuma nditungunuke ne kuenzeka miaba imue imue ivua Paulo ne bena Kristo nende benze mudimu mukole bua kuyisha lumu luimpe.​—Bienzedi 23:11; 28:14-16.

[Karte mu dibeji 13]

(Bua kumona malu bimpe, tangila mu mukanda)

ITALIE

Lomo

[Bimfuanyi mu dibeji 15]

Nzubu wa Mpuilu wa mu Bitonto ne tshisumbu tshia muakulu wa tumama wa mu Italie mu Lomo

[Tshimfuanyi mu dibeji 16]

Bulelela bua mu Bible budi buenda ‘bupikula’ bena buloko

[Bimfuanyi mu dibeji 17]

Didiunda dia mu nyuma nditungunuke miaba ivua Buena-Kristo butangalake kumpala