Bansonga, tumbishayi Yehowa!

‘Tumbishayi Yehowa, nuenu ba pa buloba, bansongalume ne bansongakaji kabidi.’​—MUSAMBU 148:7, 12.

1, 2. (a) Mmikandu ya mushindu kayi idi bansonga ba bungi bamanye? (b) Bua tshinyi bansonga kabena ne bua kumvua bibi padi baledi babu babelela mikandu?

 BANSONGA batu misangu mivule bamanye bimpe malu adibu kabayi banji kubanyishila bua kuenza. Ba bungi ba kudibu badi mua kukuambila ne lukasa bidimu bidibu ne bua kuikala nabi kumpala kua bobu kubanyishila bua kusambuka njila nkayabu anyi bua kushala batabale too ne dîba kampanda dia butuku peshi bua kuendesha mashinyi. Imue misangu, muana udi mua kumona ne: malu a bungi menemene adiye ulomba atu apeta diandamuna dia muomumue dia se: “Indila pawakola.”

² Nuenu bansonga ikalayi bamanye ne: baledi benu badi bamona ne: mbia meji bua kunuelela mikandu eyi, pamuapa bua kunukuba. Nudi kabidi bamanye bimpe ne: Yehowa udi usanka panudi nutumikila baledi benu. (Kolosai 3:20) Kadi nutuku nuela meji ne: bu mudibu banuelele mikandu yonso eyi, muoyo wenu mulelela kawena muanji kutuadija anyi? Mbanuambila bua kuenza malu onso a mushinga anu panuakola anyi?  Abi ki mbilelela nansha kakese! Kudi mudimu udi munkatshi mua dienzeka lelu udi ne mushinga wa bungi kupita diakalenga dikuabu dionso dinudi mua kuikala bindile. Nuenu bansonga, mbanuanyishile bua kuenza penu mudimu eu anyi? Kabena anu banuanyishile patupu to, kadi Nzambi Mutambe Bunene nkayende ke udi munubikile bua nuenu kuwenza!

3. Yehowa udi ubikila bansonga bua kupeta diakalenga kayi, ne nkonko kayi ituamona mpindieu?

³ Mmudimu kayi utudi tuamba muaba eu? Tangila miaku ya mu mvese munene wa tshiena-bualu etshi: ‘Tumbishayi Yehowa, nuenu ba pa buloba, bansongalume ne bansongakaji kabidi, bantu banunu ne bana, bamutumbishe!’ (Musambu 148:7, 12) Mu mvese eu badi bakula bua diakalenga dinene dinudi nadi dia kutumbisha Yehowa. Wewe nsonga, udiku usanka bua kuenza mudimu eu anyi? Ba bungi badi basanka bua kuwenza. Bua kujingulula tshinudi ne bua kumvuila disanka nunku, tumonayi nkonko isatu. Lua kumpala: bua tshinyi nudi ne bua kutumbisha Yehowa? Luibidi: mmunyi muudi mua kumutumbisha bimpe? Luisatu: ntshikondo kayi tshidi tshimpe bua kutuadija kutumbisha Yehowa?

Bua tshinyi kutumbisha Yehowa?

4, 5. (a) Bilondeshile Musambu wa 148, tudi mu nsombelu kayi mutambe buimpe? (b) Mmunyi mudi bifukibua bidi kabiyi biakula anyi biela meji bikale bitumbisha Yehowa?

⁴ Bualu bunene bua kutumbishila Yehowa budi se: yeye ke Mufuki. Musambu wa 148 udi utuambuluisha bua kuimanyina pa bulelela ebu. Anjibi kuela meji: Wewe mufike muaba udi bantu tshisumbu tshinene bimba musambu mulenga bapunguluja mêyi bimpe, udi mua kumvua tshinyi? Newenze tshinyi biwikala mumanye ne: mêyi a musambu au mmalelela, adi umvuija ngenyi iudi wangata ne mushinga, idi isankisha ne isanguluja? Kuakumvuaku muoyo ukusaka bua kulonga mêyi a musambu au ne kuwimba pebe anyi? Ke tshidi ba bungi ba kutudi mua kuenza. Bushuwa, Musambu wa 148 udi uleja ne: udi mu nsombelu wa muomumue, kadi webe mmutambe bulenga. Musambu au udi wakula bua tshisumbu tshinene, tshionso tshitumbisha Yehowa mu dipunguluja mêyi bimpe. Kadi wewe mubale musambu eu, neumone bualu kampanda budi kabuyi bua pa tshibidilu. Mbualu kayi abu?

⁵ Bintu bia bungi bidi bitumbisha Yehowa bidibu batele mu Musambu wa 148 kabiena mua kuakula anyi kuela meji to. Tshilejilu, tudi tubalamu ne: dîba, ngondo, mitoto, neige, lupepele, mikuna ne tukunakuna bidi bitumbisha Yehowa. Mmunyi mudi bifukibua ebi bidi kabiyi ne muoyo mua kuenza bualu bua mushindu eu? (Mvese 3, 8, 9) Bulelela, mmu mushindu wa muomumue udi mitshi, bifukibua bia mu mâyi ne nyama bimutumbisha. (Mvese wa 7, 9, 10) Ukadiku mubandile mubuelelu mulenga wa dîba anyi mutangile ngondo padiye tshitonga wenda wenda padiku mitoto mulu, peshi ukadiku museke ne disanka pauvua mumone nyama inaya anyi ukadiku mukatshile mpata kampanda mulenga? Nanku uvua anu bu udi mumvue musambu wa ditumbisha nawu Yehowa udi ufumina kudi bifukibua. Bionso bidi Yehowa muenze bidi bituvuluija ne: udi Mufuki wa bukole buonso, mmumue ne: kakuena mukuabu udi ne bukole, meji anyi dinanga bivule bu biende mu diulu ne pa buloba.​—Lomo 1:20; Buakabuluibua 4:11.

6, 7. (a) Musambu wa 148 udi wakula bua bifukibua kayi bia meji bidi bitumbisha Yehowa? (b) Bua tshinyi muoyo wetu udi ne bua kutusaka bua kutumbisha Yehowa? Fila tshilejilu.

⁶ Musambu wa 148 udi wakula kabidi bua bifukibua bia meji bidi bitumbisha Yehowa. Mu mvese 2, tudi tusangana “misumba” ya Yehowa ya mu diulu anyi banjelu bamutumbisha. Mu mvese wa 11, badi bambila bantu banene bu mudi bakalenge ne banzuji bua batumbishe pabu Yehowa. Bikala banjelu ba bukole basanka bua kutumbisha Yehowa, muntu wetu wa patupu eu udiku mua kuamba ne: udi ne mushinga wa bungi, nanku kêna mua kutumbisha Yehowa anyi? Pashishe, mu mvese wa 12 ne wa 13, badi banuambila nuenu bansonga bua nutumbishe penu Yehowa. Nudiku numvua muoyo unusaka bua kuenza bualu ebu anyi?

⁷ Tuangatabi tshilejilu. Wewe muikale ne mulunda wa pa muoyo udi ne dimanya dia dikema, pamuapa mu malu bu mudi a manaya, a dienza dia bintu bilenga anyi a dimba dia mijiki, kuakuakulaku bualu buende kudi balela bebe ne kudi balunda bakuabu anyi? Kakuyi mpata newenze nanku. Bushuwa, kulonga malu onso adi Yehowa muenze kudi mua kutusaka bua kuenza bualu bua muomumue. Tshilejilu, Musambu wa 19:1, 2  udi wamba ne: diulu dikale ne mitoto didi “diakulangana.” Buetu tuetu, patudi tuela meji bua bintu bia kukema bidi Yehowa muenze, katuena mua kudikanda bua kuambila bantu bakuabu malu a Nzambi nansha.

8, 9. Mbua malu kayi budi Yehowa musue bua tuetu kumutumbisha?

⁸ Bualu bukuabu bua pa buabu butudi tutumbishila Yehowa budi se: mmusue bua tumutumbishe. Bua tshinyi? Mbualu udi dijinga ne butumbi bua kudi bantu anyi? Tòo. Tuetu bantu tutu imue misangu mua kujinga bua batutumbishe, kadi Yehowa mmutambe bunene kutupita tuetu. (Yeshaya 55:8) Kêna ne dielakana nansha dikese pa bidi bimutangila yeye anyi ngikadilu yende. (Yeshaya 45:5) Kadi, mmusue bua tumutumbishe, ne udi usanka patudi tumutumbisha. Bua tshinyi? Tangila malu abidi. Bua kumpala, mmumanye ne: tudi tumvua muoyo wa kumutumbisha. Wakatuenza ne dijinga dia mu nyuma, dijinga dia kutendelela. (Matayo 5:3) Yehowa udi usanka padiye utumona tukumbaja dijinga edi anu mutubi bisankisha baledi bebe padibu bakumona udia biakudia bidibu bamanye ne: mbimpe buebe wewe.​—Yone 4:34.

⁹ Bualu buibidi, Yehowa mmumanye ne: bantu bakuabu mbasue kutumvua tumutumbisha. Mupostolo Paulo wakafundila nsonga Timote mêyi aa: ‘Wikale mudimuke ku malu ebe ne ku diyisha diebe. Unanukile kushala mu malu aa; bua pawenza nunku, neudisungile wewe ne bobu kabidi badi bumvue mêyi ebe.’ (1 Timote 4:16) Bulelela, paudi ulongesha bakuabu malu a Yehowa Nzambi ne umutumbisha, badi mua kufika ku dimumanya pabu. Dimanya edi didi mua kubafikisha ku dipeta lupandu lua tshiendelele!​—Yone 17:3.

10. Bua tshinyi tudi tudiumvua basakibue bua kutumbisha Nzambi wetu?

¹⁰ Kudi bualu bukuabu kabidi butudi ne bua kutumbishila Yehowa. Vuluka tshilejilu tshia mulunda webe au wa dimanya dia pa buadi. Wewe mumvue bantu bakuabu bamushiminyina malu, banyanga lumu luende luimpe, kuakuangataku dipangadika dia kumuangisha kudi bantu anyi? Bia muomumue, miaba yonso pa buloba badi bashiminyina Yehowa malu. (Yone 8:44; Buakabuluibua 12:9) Nunku aba badi bamunange badi badimona basakibue bua kuamba bulelela bua bualu buende, bua kululamija malu. Udiku pebe musue bua kuleja dinanga diebe ne dianyisha kudi Yehowa ne kuleja ne: udi musue bua ikale Mukokeshi webe pamutu pa muluishi wende munene Satana anyi? Udi mua kuenza bionso abi mu ditumbisha Yehowa. Lukonko ludi lulonda mpindieu ndua se: mmunyi muudi mua kumutumbisha.

Mushindu udi bamue bansonga batumbisha Yehowa

11. Mbilejilu kayi bia mu Bible bidi bileja ne: bansonga badi mua kutumbisha Yehowa bimpe menemene?

¹¹ Bible udi uleja ne: bansonga batu misangu mivule bamanye mua kutumbisha Yehowa bimpe. Tshilejilu, kuvua muana wa bakaji muena Isalele uvuabu bakuate ku bupika kudi bena Sulia. Wakambila mamuende wa mudimu ne dikima dionso malu avua atangila Elisha muprofete wa Yehowa. Mêyi ende akafikisha ku tshishima, ne lumu lunene lua Yehowa luakenda bikole. (2 Bakelenge 5:1-17) Yezu pende wakayisha ne dikima dionso patshivuaye muana. Ku mianda yonso ya ku buana buende ivuabu mua kufunda mu Mukanda wa Nzambi, Yehowa wakasungula umue wa tshikondo tshivua Yezu ne bidimu 12 muele  balongeshi nkonko ne dikima dionso mu ntempelo wa mu Yelushalema ne mubashiye bakatshila bua ngumvuilu uvuaye nende wa njila ya Yehowa.​—Luka 2:46-49.

12, 13. (a) Ntshinyi tshiakenza Yezu mu ntempelo matuku makese kumpala kua lufu luende, ne tshiakasaka bantu ku dienza tshinyi? (b) Ntshinyi tshiakumvua Yezu bua mêyi a butumbi akamba bana?

¹² Pakakola Yezu, wakafikisha kabidi bana ku ditumbisha Yehowa. Tshilejilu, matuku makese kumpala kua Yezu kufua, wakashala mêba ndambu ku ntempelo mu Yelushalema. Bible udi wamba ne: wakenzaku “malu a kukema.” Wakipata bantu bavua bavuije muaba wa tshijila au nzubu wa bivi. Wakondapa kabidi bafofo ne balema. Bantu bonso bavua muaba au, nangananga balombodi ba ntendelelu, bavua ne bua kuikala badiumvue basakibue bua kutumbisha Yehowa bua Muanende Masiya. Kadi bia dibungama, ba bungi mu matuku au kabakamba mêyi a butumbi a nanku to. Bavua bamanye ne: Yezu uvua mutumibue kudi Nzambi, kadi bavua batshina balombodi ba ntendelelu. Kadi tshisumbu tshikuabu tshia bantu tshiakakula tshiotshi ne dikima. Udi mubamanye anyi? Bible udi wamba ne: ‘Pakamona bakuidi banene ba Nzambi ne bafundi malu a kukema akenza [Yezu], pakamonabu kabidi bana bakadi bela mbila mu ntempelo ne: Hosana ikale kudi muana wa Davidi [anyi ne: ‘Pandisha, tudi tukulomba, Muana wa Davidi!’], bakadi ne tshiji, bakakonka Yezu ne: Udi umvua mêyi adi bana aba bamba anyi?’​—Matayo 21:15, 16; Yone 12:42.

¹³ Bakuidi abu bavua bela meji ne: Yezu uvua mua kupuwisha bana bavua bamutumbisha abu. Ke tshiakenzaye anyi? Nansha kakese! Yezu wakandamuna bakuidi abu ne: ‘Ee, ndi ngumvua, kadi nuenu kanuakubala ne: Wewe wakajadika butumbi buebe mukana mua bana bakese ne mua badi bamua mabele?’ Kabiyi mpata, Yezu ne Tatuende bakasanka bua mêyi a butumbi a bana abu. Bavua benza bualu buvua bantu bakole bonso ne bua kuikala benza. Mu lungenyi luabu, bana aba bavua ne bua kuikala bamone bualu ebu bimpe. Bavua bamone muntu eu wenza malu a kukema, wakula ne dikima ne ditabuja ne uleja dinanga dikole bua Nzambi ne bua bantu bende. Uvua tshivuaye wamba: Masiya “Muana wa Davidi” uvuabu balaye. Bu dibenesha bua ditabuja diabu, bana aba bakapeta diakalenga dia kukumbaja mulayi.​—Musambu 8:2.

14. Mmunyi mudi bipedi bidi nabi bansonga bibapaya bua kutumbisha Nzambi?

¹⁴ Ntshinyi tshidi bilejilu ebi mua kutulongesha? Bidi bitulongesha ne: bansonga badi mua kutumbisha Yehowa bimpe menemene. Batu misangu mivule ne tshipedi tshia kumona bulelela bimpe ne mu mushindu mutoke, ne kujikula ditabuja diabu ne muoyo mujima ne lukunukunu. Batu kabidi ne tshipedi tshidibu bambe mu Nsumuinu 20:29 ne: “Butumbi bua bansongalume mbukole buabo.” Bushuwa, nuenu bansonga nudi ne bukole ne dikanda, bintu bia mushinga bidi binuambuluisha bua kutumbisha Yehowa. Kadi mmu mushindu kayi musunguluke munudi mua kukuata mudimu ne bipedi ebi?

Mmunyi munudi mua kutumbisha Yehowa?

15. Ntshinyi tshidi tshikengedibua bua kutumbisha Yehowa bimpe?

¹⁵ Ditumbisha Yehowa bimpe didi dituadijila mu mutshima. Kanuena mua kutumbisha Yehowa bimpe binuikala numutumbisha anu bualu bakuabu mbasue bua nuenze nanku. Vuluka mukenji mutambe mikuabu yonso wa se: ‘Sua Mukalenge Nzambi webe ne mutshima webe wonso ne  muoyo webe wonso ne lungenyi luebe luonso.’ (Matayo 22:37) Udiku mufike ku didimanyina Yehowa wewe nkayebe mu dilonga diebe nkayebe dia Dîyi diende anyi? Tshipeta tshimpe tshia dilonga edi tshidi se: udi udiumvua munange Yehowa. Mushindu muimpe wa kuleja dinanga adi ngua kumutumbisha. Diakamue padi meji aa adi akusaka bua kutumbisha Yehowa mikale mimpe ne makole, udi pabuipi bua kumutumbisha ne disanka dionso.

16, 17. Ngikadilu udi ne mushinga kayi mu ditumbisha Yehowa? Fila tshilejilu.

¹⁶ Mpindieu, kumpala mene kua wewe kuela meji bua tshiwikala mua kuamba, anji tangila tshiwenza. Bu muana wa bakaji muena Isalele au wa mu tshikondo tshia Elisha muikale muena malu makole, kayi ne kanemu anyi kayi wamba bulelela, udi wela meji ne: bena Sulia bavua bamukuate bavua mua kuikala bateleje malu akambaye bua muprofete wa Yehowa anyi? Pamuapa kabavua mua kumuteleja to. Bia muomumue, bantu batu basue kuteleja bimpe muntu padibu bamona ne: udi ne kanemu, utu wamba malu malelela ne udi ne ngikadilu muimpe. (Lomo 2:21) Angata tshilejilu etshi.

¹⁷ Bavua bele muana wa bakaji mukuabu wa bidimu 11 wa mu Portugal mutoyi bua yeye kuenza misekelelu ivua ibengangana ne kondo kende ka muoyo kalongesha kudi Bible. Wakumvuija mulongeshi wabu ne kanemu tshivuaye ubengela, kadi mulongeshi au wakamuseka. Mu bungi bua matuku, mulongeshi eu wakamufuisha kabidi bundu njila ne njila, umuseka bua tshitendelelu tshiabu. Kadi nsonga eu wakashala anu ne kanemu. Kunyima kua bidimu, muanetu wa bakaji au uvua wenza mudimu wa bumpanda-njila bua pa tshibidilu, muambi wa lumu luimpe wa ku dîba ne ku dîba. Mu mpungilu kampanda, wakamona bantu batambula ne yeye kumanya umue wa kudibu. Uvua mulongeshi wabu au! Bobu bamane kupukilangana ne binsonji, mamu eu ukavua muntu mukole wakambila nsongakaji au ne: kavuaku muanji kupua muoyo ngikadilu wa kanemu wa mulongi wende mukuabu wa bakaji. Ntemu kampanda uvua mumuyishe, ne mulongeshi eu kumuambilaye bua ngikadilu wa mulongi wende wa bakaji au. Nanku dilonga dia Bible diakatuadija, ne mamu eu wakitaba bulelela bua mu Bible. Bushuwa, ngikadilu webe udi mua kuikala mushindu muimpe menemene wa kutumbisha Yehowa!

18. Ntshinyi tshidi nsonga mua kuenza bikalaye welakana bua kutuadija kuyikila ne bantu malu a Bible ne a Yehowa Nzambi?

¹⁸ Utuku imue misangu umona bikole bua kutuadija kuyikila ne bantu mu kalasa bua ditabuja diebe anyi? Ki ng’anu wewe nkayebe utu umvua nanku to. Kadi udi mua kuenza bua se: bakuabu bakuebeje malu adi atangila ditabuja diebe. Tshilejilu, bikalabi bianyishibue bua kuya ne mikanda idi yakula malu a Bible mu kalasa ne bua kuyibala dîba dia dikisha anyi mu mêba makuabu, bua tshinyi kubenga kuenza nanku? Balongi benu badi mua kukuela nkonko bua biudi ubala. Paudi ubandamuna ne ubambila malu mimpe audi mupete mu tshiena-bualu anyi mu mukanda uudi ubala, udi mua kumona ne: diyuki dilenga ndituadije kuyi mumanye to. Vuluka bua kuela nkonko bua kumanya malu adi balongi benu bitabuja. Ubateleje ne kanemu, ubamanyishe malu audi mulonge mu Bible. Anu mudi malu malonda mu dibeji dia 29 aleja, bansonga ba bungi badi batumbisha Nzambi mu kalasa. Bualu ebu budi bubapesha disanka divule ne buambuluisha bantu ba bungi bua kufika ku dimanya Yehowa.

19. Mmunyi mudi bansonga mua kupiluka bikole mu mudimu wa ku nzubu ne ku nzubu?

¹⁹ Mudimu wa ku nzubu ne ku nzubu ke mushindu mutambe buimpe wa kutumbisha Yehowa. Biwikala kuyi muanji kuutuadija, bua tshinyi kubenga kudifundila tshipatshila atshi? Biwikala  ukadi uwenza, kudiku bipatshila bikuabu biudi mua kudifundila anyi? Tshilejilu, pamutu pa kuamba anu bualu bumue bumue ku tshiibi tshionso, keba mishindu ya kulengeja, ulombe baledi bebe ne bakulumpe bakuabu bapiluke ngenyi idi mua kukuambuluisha. Longa mua kuyisha bikole ne Bible, mua kupinganyina bantu bimpe anyi mua kutuadija dilonga dia Bible. (1 Timote 4:15) Wewe utumbisha Yehowa bikole mu mishindu eyi, neulue kupiluka bikole, ne neupete disanka dia bungi mu mudimu webe wa buambi.

Ntshikondo kayi tshiudi ne bua kutuadija kutumbisha Yehowa?

20. Bua tshinyi bansonga kabena ne bua kuela meji ne: kabena mua kutumbisha Yehowa bualu batshidi bana?

²⁰ Ku nkonko isatu idi mu tshiena-bualu etshi, diandamuna dia lua ndekelu elu ke didi ditekete be. Tangila diandamuna didi Bible ufila diakamue: ‘Uvuluke Mufuki webe [mpindieu] mu matuku a bunsongalume buebe.’ (Muambi 12:1) Bulelela, mpindieu ke tshikondo tshia kutuadija kutumbisha Yehowa. Mbipepele bua kuamba ne: “Ntshidi muana be, tshiena mua kutumbisha Yehowa to. Tshiena mumanye tshintu. Ndi ngindila too ne pangakola.” Kuakuikala nkayebe bua kuela meji mushindu au to. Tshilejilu, nsonga Yelemiya wakambila Yehowa ne: ‘Aka, Mukalenge Yehowa! Mona, tshiena mua kuakula bimpe, bualu bua ntshidi anu muana.’ Yehowa wakamujadikila ne: kavua ne bua kutshina to. (Yelemiya 1:6, 7) Bia muomumue, katuena ne bua kutshina tshintu nansha tshimue patudi tutumbisha Yehowa. Kakuena bualu bubi budi mua kutufikila budi Yehowa kayi mua kujikija kashidi.​—Musambu 118:6.

21, 22. Bua tshinyi badi bafuanyikija bansonga badi batumbisha Yehowa ne mume, ne bua tshinyi dibafuanyikija nunku didi dikankamija?

²¹ Nunku tudi tunubela nuenu bansonga ne: kanuelakanyi bua kutumbisha Yehowa! Mpindieu unutshidi bansonga ke tshikondo tshitambe buimpe tshia nuenu kuenza penu mudimu wa mushinga udi wenzeka pa buloba bujima lelu. Panudi nuenza mudimu eu, nudi nubuela mu dîku dinene dienza ne ba mu diulu ne ba pa buloba badi batumbisha Yehowa. Yehowa udi usanka padiye unumona mu dîku edi. Tangilayi mêyi aa mafundisha ku nyuma avua mufundi wa Misambu muambile Yehowa: ‘Bantu bebe badi badifila kuudi ne disanka mu dituku diudi ukungija misumba ya masalayi ebe. Bansongalume bebe badi balua kuudi bu mume, baluate biabu bilenga bia tshijila, bapatuke munda mua lunkelu.’​—Musambu 110:3.

²² Mume anyi lumuma lutu luimpe kumona padilu luengelela mu dinda ne nsese ya dîba, ki mmuomu anyi? Ludi lukolesha, lubalakana ne kakuena muntu udi mua kulubala. Au ke mushindu udi Yehowa unumona nuenu bansonga badi bamutumbisha ne lulamatu mu bikondo ebi bikole. Bulelela, dipangadika dienu dia kutumbisha Yehowa didi disankisha mutshima wende. (Nsumuinu 27:11) Nunku mu mishindu yonso, nuenu bansonga, tumbishayi Yehowa!

Newandamune munyi?

• Ngamue malu kayi a mushinga adi atusaka bua kutumbisha Yehowa?

• Mbilejilu kayi bia mu Bible bidi bileja ne: bansonga badi mua kutumbisha Yehowa bimpe menemene?

• Mmunyi mudi bansonga mua kutumbisha Yehowa lelu?

• Ntshikondo kayi tshidi bansonga ne bua kutuadija kutumbisha Yehowa, ne mbua tshinyi?

[Nkonko ya dilonga]

[Bimfuanyi mu dibeji 25]

Bikala mulunda webe ne dimanya dia pa buadi, kuakuambilaku bakuabu bualu ebu anyi?

[Tshimfuanyi mu dibeji 27]

Balongi benu badi mua kujinga bua kumanya mayisha enu

[Tshimfuanyi mu dibeji 28]

Wewe musue kulengeja mudimu webe wa buambi, lomba ngenyi kudi Bantemu bapiluke