Tudi mua kutantamena diteta dionso!
Tudi mua kutantamena diteta dionso!
UDIKU utantamena diteta kampanda mu nsombelu webe mpindieu anyi? Udi udiumvua mutekete bikole mu mikolo kuyi ne mushindu wa kuditantamena anyi? Utuku mene minga misangu umvua buôwa bua se: lutatu luebe ndua pa bualu ne kakuena mushindu wa kulujikija anyi? Biwikala umona ne: bidi nanku, kolesha muoyo. Nansha bu mateta a mushindu kayi mua kutukuata, Bible udi utujadikila ne: Nzambi udi mua kutuambuluisha bua kuatantamena.
Bible udi uleja ne: basadidi ba Nzambi nebikale ne bua ‘kupona mu mateta a mishindu ya bungi.’ (Yakobo 1:2) Tangila miaku eyi: “mishindu ya bungi” (poi·kiʹlos mu tshiena-Gelika). Bilondeshile muvuabu bawangata kale pavuabu bakula, muaku wa tshiena-Gelika eu udi umvuija “kabukabu” anyi tshintu tshia “mekala a bungi” ne udi uleja “mateta mashilashilangane.” Mu ngakuilu wa pa tshibidilu, muaku eu utu umvuija nangananga tshintu tshia “mekala a bungi.” Nunku, “mateta a mishindu ya bungi” mmateta adi alua menze anu bu adi ne mekala a bungi. Nansha nanku, Yehowa udi utukuatshisha bua tumone mua kutantamena dionso dia kudiwu. Bua tshinyi tudi mua kuikala bajadike bualu ebu?
“Ngasa muvulangane wa Nzambi”
Mupostolo Petelo udi uleja ne: bena Kristo badi banyingalajibua “mu mateta a mishindu ya bungi.” (1 Petelo 1:6) Pashishe mu mukanda wende mufunda ku nyuma, udi wamba bua ngasa wa Nzambi ne: “muvulangane.” (1 Petelo 4:10) Muaku “muvulangane” udi ufila lungenyi lua muomumue ne lua muaku umue umue wa mu tshiena-Gelika au. Mumanyi mukuabu wa miaku ya mu Bible wakamba bua muaku eu ne: “Elu ndungenyi lule, . . . Kubikila ngasa [anyi bulenga budi kabuyi butuakanyine] bua Nzambi bu poikilos kudi kumvuija ne: kakuena nsombelu wa dikala kayi dionso udi mua kutamba ngasa wa Nzambi eu bukole to.” Mumanyi eu udi wamba kabidi ne: “Kakuena malu, lutatu, dikenga anyi dijinga dia tshimpitshimpi bidi ngasa wa Nzambi kayi mua kujikija ne kutshimuna. Kakuena bualu nansha bumue bua mu nsombelu budi ngasa wa Nzambi kayi mua kumana. Muaku eu mulenga wa poikilos udi utuma meji etu buludi ku ngasa au wa Nzambi wa mekala a bungi, udi mukumbane menemene bua kutuambuluisha bua kutantamena malu onso.”
Bulenga bua Nzambi budi butuambuluisha bua kutantamena mateta
Bilondeshile Petelo, mushindu umue udi bulenga bua Nzambi budi kabuyi butuakanyine bumueneka nku diambuluisha dia bantu bavule badi benza tshisumbu tshia bena Kristo. (1 Petelo 4:11) Musadidi yonso wa Nzambi udi ne bipedi bia mu nyuma anyi mamanya adi mua kuambuluisha bua kukankamija badi bapeta mateta. (Lomo 12:6-8) Tshilejilu, bamue bena mu tshisumbu tshia bena Kristo mbalongeshi ba Bible ba dilambu. Mêyi abu adi aleja meji matue adi asaka bakuabu bua kunanukila. (Nehemiya 8:1-4, 8, 12) Bakuabu mbalami badi baya kukumbula aba badi dijinga ne dikuatshisha ku nzubu yabu. Makumbula aa atu bikondo bia dikankamijangana, atu ‘asamba mitshima.’ (Kolosai 2:2) Patu batangidi benza makumbula aa adi akolesha ditabuja, batu bapesha bakuabu kupa kua nyuma. (Yone 21:16) Kadi banga pabu mu tshisumbu mbamanyike bua musangelu wabu, bua luse ne bulenga bidibu baleja mu malanda abu ne bena kuitabuja nabu badi babungamija kudi mateta. (Bienzedi 4:36; Lomo 12:10; Kolosai 3:10) Diditeka pa muaba wa bakuabu ne diambuluishangana ne muoyo umue bileja kudi bana betu ba balume ne ba bakaji bena dinanga ba nunku mmushindu muimpe anyi “dikala” dia bulenga bua Nzambi budi kabuyi butuakanyine.—Nsumuinu 12:25; 17:17.
“Nzambi wa busambi buonso”
Kupita bionso, Yehowa udi ufila busambi. Udi ‘Nzambi wa busambi buonso, utu watusamba mu makenga etu onso.’ (2 Kolinto 1:3, 4) Meji adi mu Dîyi dia Nzambi difundisha ku nyuma wende ne bukole budi nyuma eu ufila ke mishindu minene idi Yehowa wandamuna masambila atudi tuenza bua kumulomba diambuluisha. (Yeshaya 30:18, 21; Luka 11:13; Yone 14:16) Bualu buakalaya mupostolo Paulo ku bukole bua nyuma budi mua kutukankamija. Wakamba ne: ‘Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’—1 Kolinto 10:13.
Bushuwa, nansha diteta dikale dia “dikala” kayi anyi dia mushindu kayi, nekuikale anu “dikala” anyi mushindu wa bulenga bua Nzambi budi kabuyi butuakanyine watuambuluisha bua kuditshimuna. (Yakobo 1:17) Dikuatshisha dikumbanyine didi Yehowa ufila bua basadidi bende mu tshikondo tshiakanyine nansha mateta peshi ntatu yabu mikale mishilashilangane munyi ke tshijadiki tshimue tshia ‘meji mavule a Nzambi.’ (Efeso 3:10) Kuenaku witaba bualu ebu anyi?
[Bimfuanyi mu dibeji 31]
Yehowa udi utuambuluisha bua kutantamena mateta etu