Badi badifila ku budisuile

“BANTU bebe badi badifila kûdi ne disanka.” (Musambu 110:3) Mêyi aa adi ne diumvuija dia pa buadi bua balongi 46 ba mu kalasa ka 118 ka Gilada, Tshilongelu tshia Bible tshia Watchtower. Mmunyi muvuabu badilongolole bua kubuela mu tshilongelu etshi tshidi tshilongesha badi ne bua kulua bamisionere bua kuambuluisha bantu ba mu matunga menyi mu nyuma? Mike ne Stacie bavua pabu mu kalasa ka 118 bakumvuija ne: “Dipangadika dietu dia kuikala ne nsombelu mupepele diakatuambuluisha bua kulengulula malu adi mua kutupa ditanaji ne kuteka bipatshila bia mu nyuma pa muaba wa kumpala. Tuvua badisuike bua kubenga kulekela diya kumpala mu dikeba dia makuta ditusaka bua kulengulula bipatshila bia mu nyuma.” Anu bu Mike ne Stacie, balongi bakuabu ba mu kalasa aka bakadifila ku budisuile ne badi mpindieu basadila bu bamanyishi ba Bukalenge mu matunga mashilangane.

Mu Disambombo dia 12 Luabanya 2005, bantu 6 843 bakateleja ne disanka dionso ndongamu wa difila mapoloma. Theodore Jaracz, muena mu Kasumbu Kaludiki ka Bantemu ba Yehowa ke uvua mulombole ndongamu au. Kunyima kua yeye mumane kujingila benyi ba mu matunga 28 bavua muaba au difika dilenga, wakaleja mushinga wa dilonga Bible. Ngamba-malu eu wakatela miaku ya Lyon Phelps, mulongeshi mupiluke wa mu Amerike, wamba ne: “Mbiakanyine kubikila muntu yonso udi ne dimanya divule dia mu Bible ne: mmuntu mulonge.” Nansha mudi dimanya dia malu a panu mua kuikala ne mushinga, dimanya dia Bible ndipite bionso. Didi diambuluisha bantu bua kupeta dimanya dia Nzambi didi difikisha ku muoyo wa tshiendelele. (Yone 17:3) Muanetu Jaracz wakela balongi kalumbandi bua dijinga diabu dia kudifila bikole mu ndongamu wa dilongesha Bible udi wenda wenzeka mu bisumbu bia Bantemu ba Yehowa bipite pa 98 000 pa buloba bujima.

Dikankamija diakanyine balongi

Kunyima kua mêyi a ntuadijilu a mulombodi wa ndongamu, William Samuelson wakenza muyuki uvua ne tshiena-bualu tshia se: “Mushindu unudi mua kuikala bu mutshi wa olive udi usampila mu nzubu wa Nzambi,” muangatshila mu Musambu 52:8. Wakaleja ne: mutshi wa olive mmuangata mu tshimfuanyi bua kuleja dikuama dia bimuma bivule, bulenga ne bunême. (Yelemiya 11:16) Ngamba-malu eu wakafuanyikija balongi ne mitshi ya olive, kuambaye ne: “Yehowa neanulengeje ne neanupe bunême panudi nutungunuka ne kukumbaja mudimu wenu wa diyisha Bukalenge ne lulamatu luonso miaba idibu banutuma bu bamisionere.” Anu mutu mutshi wa olive dijinga ne miji mialabale bua kubenga kufubidila mu tshikondo tshia minanga, balongi badi ne bua kukolesha miji yabu ya mu nyuma bua  kumona mua kutantamena kalengu, buluishi anyi ntatu mikuabu idibu mua kupeta mu mudimu wabu wa kubabende.​—Matayo 13:21; Kolosai 2:6, 7.

John Barr, umue wa ku basatu ba mu Kasumbu Kaludiki bavua benze miyuki mu ndongamu eu, wakakuila pa tshiena-bualu tshia se: “Nudi luepu lua buloba.” (Matayo 5:13) Wakaleja ne: anu mutu luepu lulama biakudia bua kabinyanguki, mudimu wa diyisha Bukalenge wenzabu kudi bamisionere newambuluishe badi bateleja bua kupeta muoyo, neubakube ku dinyanguka mu bienzedi ne mu nyuma. Pashishe, muanetu Barr wakambila balongi ne dîyi dia butatu bua ‘kuikala mu ditalala’ ne bantu nabu. (Mâko 9:50) Ngamba-malu eu wakababela ne: “Nukuame mamuma a nyuma ne nuenze bua ngikadilu ne ngakuilu wenu bikale misangu yonso bimpe.”

Wallace Liverance, umue wa ku balongeshi ba mu Gilada wakenza muyuki uvua ne tshiena-bualu tshia se: “Shalayi mu buatu pamutu pa mâyi mondoke.” Anu mudi mazuwa adi endela mu mâyi mondoke mua kuya luseke luimpe, kumvua “malu male a Nzambi” anyi bulelela budi butangila dilongolola Diende ne mushindu wakumbanadi bidi mua kuambuluisha muntu bua kukola mu nyuma. (1 Kolinto 2:10) Dishala muimane mu mâyi mîpi pa kusanka amu bua ‘mayisha a kumudilu a tshibangidilu tshia mêyi mamba kudi Nzambi’ didi ditupangisha bua kukola ne didi mene mua kutufikisha ku ‘dinyanguka mu ditabuja dietu bu mudi mazuwa matshibuke mu mâyi.’ (Ebelu 5:12, 13; 1 Timote 1:19) Muanetu Liverance wakajikija ne mêyi aa: “Nuenze bua ‘ndondo wa bubanji bua meji ne lungenyi bia Nzambi’ binukoleshe miaba yanutumabu bu bamisionere.”​—Lomo 11:33.

Mark Noumair, mulongeshi mukuabu wa mu Gilada wakenza muyuki uvua wamba ne: “Nenuikale ne nsombelu udi upetangana ne bumpianyi buenu anyi?” Munkatshi mua bidimu bipite pa 60, Gilada, tshilongelu tshia Bible tshia Watchtower ntshilue tshia kueyemena ne bantu batu batshianyisha bua ‘mushiki’ wa lumu luimpe udi balongi badi bajikijemu bayishe. (Genese 31:48) Mbasambulujile balongi ba kalasa ka 118 bumpianyi ebu. Muanetu Noumair wakakankamija balongi bua kuidikija bena Tekoa ba kale ba mu tshikondo tshia Nehemiya ne kuenza mudimu ne budipuekeshi mu diumvuangana ne tshisumbu tshiabu ne bamisionere bakuabu. Bakababela bua kuepuka ngikadilu wa ‘bantu banene’ bena lutambishi badi Nehemiya mutele, ne kuitaba bua kuenza mudimu mu ditalala, kabayi ne lungenyi lua batumone batuambe.​—Nehemiya 3:5.

Malu mamona ne dielangana nkonko bidi bikolesha

Muyuki mukuabu wa ndongamu au uvua ne tshiena-bualu tshia se: “Dîyi dia Nzambi diakadiundadiunda.” (Bienzedi 6:7) Ku bulombodi bua Lawrence Bowen, mulongeshi wa mu Gilada, balongi bakaleja mu manaya malu avuabu bamone mu mudimu wa buambi pavuabu mu kalasa. Malu avuabu bamone au akaleja ne: balongi bavua bamanyishe Dîyi dia Nzambi ne lukunukunu, ne Yehowa uvua mubeneshe mudimu wabu.

Richard Ashe wakela bana betu ba mu dîku dia Betele bavua bambuluishangane ne bena mu kalasa aku nkonko. Mandamuna abu akaleja patoke mushindu utu dîku dia Betele diambuluisha balongi ba mu Gilada bua kulongabu bimpe. Pashishe, Geoffrey Jackson wakakula ne bamue balongi ba mu Gilada ba kale. Bakatela mishindu kabukabu itu nayi bamisionere bua kutumbisha Yehowa ne kumunemeka. Umue wa kudibu wakamba ne: “Bantu batu batangila bionso bidi bamisionere benza. Batu bateleja, batangila ne bavuluka.” Ke bualu kayi, bakakankamija balongi bua kufila tshilejilu tshimpe kudi bakuabu dîba dionso. Kabiyi mpata, mubelu muimpe eu newikale ne mushinga mu matuku adi kumpala.

Stephen Lett, muena mu Kasumbu Kaludiki wakenza muyuki wa ndekelu uvua ne tshiena-bualu etshi: “Ndayi nuenu badi ne ‘mâyi a muoyo.’” (Yone 7:38) Wakamba ne: mu ngondo itanu ivua mipite, balongi bavua bapete mabenesha mavule pa kunua mâyi a bungi a Dîyi dia Nzambi dia bulelela. Kadi ntshinyi tshikala bamisionere bapiabapia aba ne bua kuenza ne malu adibu balonge? Muanetu Lett wakabela balongi bua kupesha bakuabu mâyi a mu nyuma aa ne muoyo muimpe bua bafike  pabu ku dipeta “mpokolo wa mayi adi apetesha muoyo wa kashidi” munda muabu. (Yone 4:14, MMM) Ngamba-malu eu wakasakidila ne: “Kanupu muoyo bua kupesha Yehowa, ‘mushimi wa mâyi a muoyo’ kanemu ne butumbi bidi bimuakanyine. Ikalayi ne muoyo mule kudi badi bapatuke mu tshiyole tshikole tshia mu Babulona Munene.” (Yelemiya 2:13) Muanetu Lett wakajikija pa kukankamija balongi bua kuidikija ne musangelu wonso nyuma ne mukaji musela ne kutungunuka ne kuamba ne: ‘Lua. Ne udi ne nyota, alue biende; udi musue angate mâyi a muoyo tshianana.’​—Buakabuluibua 22:17.

Muanetu Jaracz wakatua tshisala ku ndongamu au pa kuela balongi mioyo ivua mifumine mu matunga mashilashilangane. Pashishe umue wa ku balongi ba kalasa aku wakabala mukanda uvua uleja dianyisha divuabu nadi.

Udiku pebe mua kudifila ku budisuile bua kusadila muaba udibu dijinga ne bamanyishi ba bungi anyi? Bikalabi nanku, londa bipatshila bia mu nyuma anu mudi balongi aba benze. Ikala ne disanka didi muntu upeta padiye udifila ne muoyo mujima mu mudimu wa Nzambi nansha wewe muikale misionere mu ditunga dikuabu peshi pabuipi ne kuenu.

[Kazubu mu dibeji 13]

MALU ADI ATANGILA BALONGI

Bungi bua matunga: 8

Bungi bua matunga adibu babatume: 19

Bungi bua balongi: 46

Muayene wa bidimu: 33

Muayene wa bidimu bienza mu bulelela: 16,5

Muayene wa bidimu mu mudimu wa ku dîba ne ku dîba: 12,9

[Tshimfuanyi mu dibeji 15]

Kalasa ka 118 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo batuadijile kumpala baya batangile panyima; mbafunde mêna babangile ku dia bakaji batangile ku dia balume mu mulongo wonso.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.