‘Badi bapele mu mitshima yabu badi ne disanka’

PATU nyunyi ijuka mu dinda, itu yanji kuimba tusambu katupa, pashishe ibuka iya mu dikeba dia biakudia. Dilolo, itu ipingana mu masua ayi, yimba kabidi kakese tusambu ne ilala. Bimue bikondo, itu ikuatangana, yela mayi ne ikolesha bana. Nyama mikuabu itu payi yenza amu bia muomumue.

Tuetu bantu tudi bashilangane nayi. Bushuwa, tutu tudia, tulala ne tulela, kadi bantu ba bungi kabatu basue kuimanyina amu pa malu aa to. Tutu basue kumanya bua tshinyi tudi ne muoyo. Tutu tukeba tshipatshila tshia muoyo wetu. Tutu kabidi dijinga ne ditekemena bua matuku atshilualua. Majinga aa manene adi aleja tshintu tshidi bantu nkayabu natshi: dijinga dia malu a mu nyuma.

Mufuka ne tshifuanyikiji tshia Nzambi

Bible udi umvuija bua tshinyi muntu udi ne dijinga dia malu a mu nyuma wamba ne: ‘Nzambi wakafuka muntu ne tshifuanyikiji tshiende, ne wakamufuka ne tshifuanyikiji tshia Nzambi; wakabafuka mulume ne mukaji.’ (Genese 1:27) Kuikala bafukibue ‘ne tshifuanyikiji tshia Nzambi’ kudi kumvuija ne: nansha mutudi banyanga kudi mpekatu ne dipanga bupuangane, tudi ne mushindu wa kuleja imue ngikadilu ya Nzambi. (Lomo 5:12) Tshilejilu, tudi mua kuenza bintu bipiabipia. Tudi kabidi ne ndambu wa meji, lungenyi lua kuleja buakane ne tshipedi tshia kulejangana dinanga ne lungenyi lua didifila. Tudi kabidi mua kuela meji pa malu a kale ne atshilualua.​—Nsumuinu 4:7; Muambi 3:1, 11; Mika 6:8; Yone 13:34; 1 Yone 4:8.

Tshipedi tshietu tshia kunanga malu a mu nyuma tshitu tshitamba kumuenekela ku dijinga dietu dia ku tshilelelu dia kutendelela Nzambi. Amu tuetu bakumbaje bimpe dijinga dietu dia kuikala mu malanda malenga ne Mufuki wetu ke tuetu kupeta disanka dilelela ne dia musangu mule. Yezu wakamba ne: ‘Bena disanka mbadi bamanye majinga abu a mu nyuma.’ (Matayo 5:3, NW) Nunku tudi ne bua kuenza muetu  muonso bua kukumbaja dijinga adi ne malu malelela adi atangila Nzambi, mikenji yende ne tshidiye mulongoluele bantu. Kadi tudi mua kupeta malu malelela penyi? Mu Bible.

‘Dîyi diebe mbulelela’

Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija.’ (2 Timote 3:16) Mêyi a Paulo adi apetangana ne akamba Yezu pavuaye usambila Nzambi ne: ‘Dîyi diebe mbulelela.’ Lelu’eu, tudi bamanye ne: Dîyi adi mBible, Mukanda Munsantu, ne bidi bimpe bua kukonkonona malongesha atudi bitabe ni adi mu diumvuangana ne malu adi mu Bible.​—Yone 17:17.

Patudi tufuanyikija malongesha atudi bitabe ne Dîyi dia Nzambi, tudi tuidikija bena Beloya wa kale, bakakonkonona malongesha a Paulo bua kumona ni avua mu diumvuangana ne Mifundu Minsantu. Luka kakadiula bena Beloya to, kadi wakabela kalumbandi bua meji makane avuabu nawu. Wakafunda ne: ‘Bakitabuja dîyi ne mitshima mimane kulongolola; bakadi badikebela mu Mukanda wa Nzambi ku dituku ku dituku ne: Malu aa adi malelela anyi?’ (Bienzedi 17:11) Pa kumona malongesha mashilangane adiku mu malu a ntendelelu ne a bikadilu lelu, mbimpe tuidikije meji makane a bena Beloya.

Mushindu mukuabu wa kujingulula bulelela nkutangila mudibu ne bukole mu nsombelu wa bantu. (Matayo 7:17) Tshilejilu, kuikala ne nsombelu udi mu diumvuangana ne bulelela bua mu Bible kudi ne bua kufikisha muntu ku dikala mulume mulenga, tatu mulenga, mukaji mulenga anyi mamu mulenga, bivudija nanku disanka dia mu dîku ne dia mu mutshima. Yezu wakamba ne: ‘Badi bateleja dîyi dia Nzambi, badi badilama, badi ne disanka.’​—Luka 11:28.

Mêyi a Yezu aa adi atuvuluija a Tatuende wa mu diulu, wakambila bena Isalele ba kale ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu. Aka! Bu wewe mumvue mikenji yanyi, ditalala diebe divua kuikala bu musulu, ne buakane buebe buvua kuikala bu mavuala a mâyi manene!’ (Yeshaya 48:17, 18) Nunku, mêyi malenga aa kaena mua kupanga kulenga bonso badi banange buimpe ne buakane ku muoyo to.

Bamue mbasue bua ‘babafunye ku matshi’

Nzambi wakambila bena Isalele mêyi au ne muoyo mujima bualu bavua babapambuishe ne malongesha a dishima. (Musambu 106:35-40) Tuetu petu tudi ne bua kudimukila malu a dishima. Paulo wakafunda bua bena Kristo ba ku dîna ne: ‘Dinga dîba, bantu kabakuikala kabidi bateleja dilongesha dimpe, nebikale badikebela amu balongeshi bavule ba pa diabu dijinga, bikale babafunya matshi; nebele bulelela nyima.’​—2 Timote 4:3, 4, MMM.

Balombodi ba bitendelelu badi bafunya matshi a bantu pa kubuikila mêsu pa bienzedi bidi bikumbaja majinga mabi, bu mudi diangatangana dia bantu badi kabayi mu dibaka, dia bantu ba mubidi umue, nansha bunuavi. Bible udi uleja patoke ne: bantu badi banyisha malu a mushindu eu ne badi baenza ‘kabakupiana bukalenge bua Nzambi’ to.​—1 Kolinto 6:9, 10; Lomo 1:24-32.

Kakuyi mpata, bidi bikengela dikima bua kuikala ne nsombelu udi mu diumvuangana ne mêyi a mu Bible, nangananga  padibu batuseka. Kadi kudi mushindu wa tuetu kupeta dikima edi. Munkatshi mua Bantemu ba Yehowa mudi bantu bavule bavua bapika ba bintu bidi bikuata, ba-kanuayi, bena masandi, baluanganyi ba mvita, bivi ne bena dishima. Kadi bakatumikila Dîyi dia Nzambi ne kushintulula nsombelu wabu ku diambuluisha dia nyuma muimpe bua ‘kuenda mu bienzedi bidi biakanangane ne Mukalenge.’ (Kolosai 1:9, 10; 1 Kolinto 6:11) Bamane kuikala mu ditalala ne Nzambi, bakapeta kabidi ditalala dia mu mutshima ne ditekemena dilelela bua matuku atshilualua anu bu mutuabimona.

Ditekemena dia Bukalenge

Ditekemena didi mu Bible dia ditalala dia kashidi diapeta bantu bena butumike nedikumbane ku butuangaji bua Bukalenge bua Nzambi. Yezu wakamba mu disambila diende dia tshilejilu ne: ‘Bukalenge buebe bulue. Benze pa buloba muudi musue bu mudibu benza mu diulu.’ (Matayo 6:10) Eyowa, anu Bukalenge bua Nzambi ke budi mua kuenzeja disua dia Nzambi pa buloba. Bua tshinyi? Bualu Bukalenge bua mu diulu abu anyi mbulamatadi udi mu bianza bia Yezu Kristo ke mushindu udi Nzambi uleja bumfumu Buende buakane pa buloba.​—Musambu 2:7-12; Danyele 7:13, 14.

Bu mudi Yezu Kristo muikale Mukalenge wa Bukalenge bua mu diulu abu, neumbushe bantu bena butumike ku bupika, nansha bupika budi bubalamate tshilamatu bu mudi mpekatu wa Adama ne masama ne lufu bidi bifumineku. Buakabuluibua 21:3, 4 udi wamba ne: ‘Tangilayi, nzubu wa tshilulu wa Nzambi udi munkatshi mua bantu. Yeye [Yehowa Nzambi] neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’

Ditalala nedikale pa buloba bujima bua kashidi. Mbua bualu kayi butudi mua kuikala bajadike se: nebikale nanku? Mbua bualu budi butujadikila mu Yeshaya 11:9 ne: ‘[Bakokedi ba Bukalenge] kabena benzelangana bibi, kabena bashipa bakuabu, mu mukuna wanyi wa tshijila wonso; bualu bua buloba nebuikale buule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’ Bushuwa, muntu yonso pa buloba neikale ne dimanya dijalame dia Nzambi ne neamutumikile. Ditekemena edi didiku disankisha mutshima webe anyi? Bikaladi dikusankisha, edi ke dîba dia wewe kutuadija  kupeta ‘dimanya dia Yehowa’ didi ne mushinga mukole.

Neuteleje mukenji wa Bukalenge anyi?

Ku butuangaji bua Bukalenge, Nzambi neumbushe malu onso adi Satana muenze ne nealongeshe bantu njila Yende miakane. Nunku, kabiena bikemesha bua muvua Bukalenge buikale tshiena-bualu tshinene tshia dilongesha dia Yezu. Wakamba ne: ‘Bundi nabu mbua kuambila bantu lumu luimpe lua bukalenge bua Nzambi; buakantuminabu mbualu ebu.’ (Luka 4:43) Kristo wakatumina bayidi bende dîyi bua kumanyishabu bantu mukenji eu. (Matayo 28:19, 20) Wakadianjila kuamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Nshikidilu eu udi wenda usemena ne lukasa luonso. Nunku, mbia mushinga bua bantu badi ne mutshima mujalame kumvua lumu luimpe lua lupandu.

Albert utudi batele mu tshiena-bualu tshia kumpala wakumvua mukenji wa Bukalenge pavua mukajende ne muanende wa balume batuadije kulonga Bible ne Bantemu ba Yehowa. Diambedi, uvua ne mpata, kuambilaye ne mulombodi wa tshitendelelu tshivuaye bua kulua kuyukila ne mukajende ne muanende bua kuela mashimi a Bantemu patoke. Kadi mulombodi wa tshitendelelu tshiabu eu wakabenga kudibueja mu tshilumbu etshi. Ke Albert kupangadija bua kuteleja patupu diyuki diabu dia malu a mu Bible bua kuangulaye malu a dishima mu bivua Bantemu balongesha. Kunyima kua diyuki anu dimue, wakaditua pende mu dilonga dia Bible ne dijinga dikole dia kumanya bivule. Wakalua kumvuija tshivuaye mushintuluile meji ende pakambaye ne: “Etshi ke tshimvua nkeba kuonso eku.”

Ndekelu wa bionso, Albert wakatuadija kukumbaja dijinga diende dia malu a mu nyuma, ne katu muanji kunyingalala bua bualu ebu to. Bulelela bua mu Bible buakamupesha tshintu tshivuaye ukeba matuku ende onso: tshidi mua kuela tshisala ku dipangika dia buakane ne bubi bidi bitampakane mu bantu, yeye kupeta kabidi ditekemena bua matuku atshidi alua. Bulelela bua mu Bible buakamupesha ditalala dia mu mutshima. Udiku ukumbaja dijinga diebe dia malu a mu nyuma anyi? Bua tshinyi kubenga kuditekela dîba dia kubala nkonko idi mu kazubu kadi mu dibeji 6? Biwikale musue kumanya malu makuabu, Bantemu ba Yehowa nebikale ne disanka dia kukuambuluisha.

[Kazubu/​Bimfuanyi mu dibeji 6]

DIJINGA DIEBE DIA MU NYUMA NDIKUMBANE ANYI?

Utuku ukuta biakudia bia mu nyuma biudi upeta anyi? Tudi tukulomba bua kubala nkonko idi ilonda eyi ne kuenza kamanyinu pa iudi mua kuandamuna bimpe.

□ Nzambi nnganyi, ne dîna diende nnganyi?

□ Yezu Kristo nnganyi? Bua tshinyi uvua ne bua kufua? Mmunyi mudi lufu luende mua kukuambuluisha?

□ Diabolo utuku anyi? Bikalayeku, mmufumine penyi?

□ Ntshinyi tshidi tshitufikila patudi tufua?

□ Nzambi mmulongolole tshinyi bua buloba ne bua bukua-bantu?

□ Bukalenge bua Nzambi ntshinyi?

□ Mmikenji kayi ya Nzambi idi itangila bikadilu bilenga?

□ Mu dîku, ntshinyi tshidi Nzambi mufundile mulume bua kuenza, kadi mukaji pende? Ngamue mêyi kayi a mu Bible adi avudija disanka mu dîku?

Biwikala kuyi mumanye bimpe mandamuna a nkonko eyi, udi mua kulomba broshire wa Ntshinyi tshidi Nzambi utulomba? Broshire eu mupatula kudi Bantemu ba Yehowa mu miakulu mitue ku 300 udi ne malongesha a nshindamenu a mu Mukanda wa Nzambi 16 adi andamuna nkonko yonso idi kulu eku bilondeshile Bible.

[Bimfuanyi mu dibeji 4]

Bantu mbashilangane ne nyama bualu badi ne majinga a mu nyuma

[Tshimfuanyi mu dibeji 5]

‘Nebikale badikebela balongeshi bavule, bikale babafunya matshi.’​—2 Timote 4:3, MMM

[Tshimfuanyi mu dibeji 7]

Bukalenge bua Nzambi bulombola kudi Masiya ke buatuala ditalala dia kashidi