Lumu luimpe bua bantu ba bisamba bionso

‘Nenuikale bamanyi banyi too ne kumfudilu kua buloba.’​—BIENZEDI 1:8.

1. Mmalu kayi atudi tutabalela patudi tulongesha Bible, ne mbua tshinyi?

 BALONGESHI bimpe batu batabalela ki nganu bidibu bambila balongi, kadi ne mushindu udibu babambilabi kabidi. Tuetu balongehsi ba bulelela bua mu Bible tudi tuenza petu nunku. Tudi tutabalela mukenji utudi tuyisha ne ndongeshilu yetu. Mukenji wetu utudi tuyisha wa lumu luimpe lua Bukalenge bua Nzambi kawena wowu ushintuluka to, kadi tutu imue misangu tushintulula ndongeshilu yetu mu minga nsombelu. Bua tshinyi? Bua lufike kudi bantu ba bungi menemene.

2. Patudi tuakaja nyishilu yetu bua ikumbanyine imue nsombelu, nnganyi utudi tuidikija?

² Patudi tuenza bua ndongeshilu yetu ipetangane ne imue nsombelu, tudi tuidikija basadidi ba Nzambi ba kale. Angata tshilejilu tshia mupostolo Paulo. Wakamba ne: ‘Kudi Bayuda ngakalua Muyuda; kudi bakadi kunyima kua mikenji ngakalua kunyima kua mikenji. Kudi batekete ngakalua mutekete, bua meme kupeta mioyo ya batekete; kudi bonso ngakulua muena malu onso, bua meme kumanya mua kusungila bakuabu.’ (1 Kolinto 9:19-23) Paulo uvua upatula bipeta bimpe pavuaye wenza bua ndongeshilu wende apetangane ne nsombelu wa muntu ne muntu. Tuetu petu netupete bipeta bimpe bituikala tuakaja nyishilu wetu bua akumbanyine bantu batudi tuyikila nabu.

Too ne ‘kumfudilu kua buloba’

3. (a) Ndutatu kayi lutudi tupeta mu mudimu wa diyisha? (b) Mmunyi mudi mêyi a mu Yeshaya 45:22 akumbana lelu eu?

³ Lutatu lunene ludibu bapete kudi aba badi bayisha lumu luimpe mbungi bua bantu badibu bayisha: ‘bantu bonso ba pa buloba.’ (Matayo 24:14) Munkatshi mua bidimu lukama bishale ebi, basadidi bavule ba Yehowa bakenza mudimu wa bungi bua kufika mu matunga makuabu bua kutangalajamu lumu luimpe. Ntshipeta kayi tshiakapatuka? Didiunda dia dikema pa buloba bujima. Ku ntuadijilu kua bidimu bia 1900, bavua  bayisha anu matunga makese patupu, kadi mpindieu Bantemu ba Yehowa badi bayisha mu matunga 235! Bulelela, lumu luimpe lua Bukalenge ludi lumanyishibua too ne ‘kumfudilu kua buloba.’​—Yeshaya 45:22.

4, 5. (a) Mbanganyi badi benze mudimu munene mu dimuangalaja dia lumu luimpe? (b) Ntshinyi tshidi bimue biro bietu biambe bua bana betu ba ku babende badi benza mudimu mu tshipapu tshidibi bitangila?

⁴ Ntshinyi tshienzeja didiunda edi? Malu a bungi. Bamisionere balongesha ku Gilada, Tshilongelu tshia Bible tshia Bantemu ba Yehowa, ne bantu batue ku 20 000 badi bajikije mu Kalasa ka Dilonga Mudimu matuku mashale aa mbambuluishe pabu bikole. Mbambuluishe kabidi kudi Bantemu bavule badi batula mfranga yabu nkayabu bua kuya mu matunga mudibu dijinga ne bamanyishi ba Bukalenge ba bungi. Bena Kristo aba ba lungenyi lua didifila, balume ne bakaji, bana ne bakole, bajike ne badi mu dibaka badi benza mudimu munene mu diyisha mukenji wa Bukalenge pa buloba bujima. (Musambu 110:3; Lomo 10:18) Tudi tubela kalumbandi. Tangila tshidi bimue biro bia Bantemu ba Yehowa bifunde bua bana betu aba badi bafume ku mabu ne badi benza mudimu muaba udibu dijinga ne bamanyishi ba bungi mu tshipapu tshidi biro biabu bitangila.

⁵ “Bantemu basuibue aba badi bantunga-mulongo mu diyisha miaba idi kayiyi Bantemu, badi bambuluisha bua kuenza bisumbu bipiabipia ne bambuluisha bua bana betu ba balume ne ba bakaji ba miaba ayi balubuluke mu nyuma.” (Équateur) “Bu nkama mivule ya benyi aba badi benza mudimu muaba eu mua kumbuka, bisumbu kabiakushala kabidi bishindame to. Kuikala ne bana betu aba ndibenesha.” (République dominicaine) “Mu bisumbu bivule bietu mudi bana betu ba bakaji ba bungi, imue misangu bafike too ne ku 70 pa bantu 100. (Musambu 68:11) Bavule ba kudibu batshidi bapiabapia mu bulelela, kadi bana betu ba bakaji bampanda-njila bajike badi bafumine mu matunga makuabu badi bambuluisha bikole menemene bua kulongesha bapiabapia aba. Bana betu ba bakaji aba badi bafume ku  babende badi dipa dilelela ditupesha!” (Dimue dia ku matunga a ku Mputu wa ku est) Ukadiku muele meji bua kuya kuenzela Yehowa mudimu mu ditunga dikuabu anyi? *​—Bienzedi 16:9, 10.

“Bantu dikumi ba mu muaku ne muaku”

6. Mmunyi mudi Zekâya 8:23 uleja lutatu ludi lutangila miakulu mu mudimu wetu wa diyisha?

⁶ Lutatu lukuabu lunene ndua se: kudi miakulu mishilashilangane idibu bakula pa buloba. Dîyi dia Nzambi divua dimanyishe ne: ‘Mu matuku au bantu dikumi ba mu muaku ne mu muaku nebakuate ku luzemba lua tshivualu tshia muena Yuda, bamuambila ne: Tudi basue kuya nebe, bualu bua tuakumvua ne: Nzambi udi nebe.’ (Zekâya 8:23) Mu dikumbana dia mulayi eu mu tshikondo tshietu etshi, bantu dikumi mmuomumue ne: musumba munene, mudianjila kutela mu Buakabuluibua 7:9. Kadi tangila ne: bilondeshile mulayi wa Zekâya, “bantu dikumi” kabavua anu ne bua kufumina mu bisamba bionso patupu to, kadi ne “mu muaku ne mu muaku” kabidi. Tudiku bamone dikumbana dia tshitupa etshi tshia mushinga tshia mulayi eu anyi? Eyowa.

7. Mbishiferi kayi bidi bileja ne: lumu luimpe ludi lufika kudi bantu ‘ba mu muaku ne mu muaku’?

⁷ Tangila bimue bishiferi. Kukadi bidimu 50, mikanda yetu ivua ipatuka mu miakulu 90. Lelu eu, idi ipatuka mu miakulu mipite pa 400. “Mupika wa lulamatu ne wa budimu” mmuenze mudimu mukole bua kupatula mikanda nansha mu imue miakulu idibu bakula kudi bantu bakese. (Matayo 24:45, NW) Tshilejilu, mikanda ya malu a mu Bible idiku mpindieu mu muakulu wa mu Groenlandais (udibu bakula kudi bantu 47 000), mu Palau (udibu bakula kudi bantu 15 000) ne mu Yap (udibu bakula kudi bantu bashadile ku 7 000).

“Tshibi tshinene” tshifikisha ku mpunga mipiamipia

8, 9. Mbualu kayi budi butunzuluile “tshibi tshinene,” ne ntshinyi tshidi Bantemu binunu bivule benza bua bualu ebu?

⁸ Kadi matuku etu aa kabiena anu bikengela tuetu kuya ku babende bua kumanyisha bantu ba miakulu yonso lumu luimpe to. Mu bidimu bidi panshi ebi, difika dia benyi ne bena tshimuangi miliyo mivule mu matunga a bubanji bua bungi ndipatule bitupa kabukabu bia benyi badi bakula miakulu ya bungi. Tshilejilu, mu tshimenga tshia Paris, mu France, badi bakula miakulu mishilangane mitue ku 100. Mu tshimenga tshia Toronto, mu Canada, badi bakula miakulu 125; ne mu tshimenga tshia Londres, mu Angleterre, badi bakulamu miakulu mienyi mipite pa 300! Dikala dia bantu aba badi bafume mu matunga makuabu mu bipapu bia bisumbu bivule didi diunzulula “tshibi tshinene” tshidi tshifikisha ku mpunga mipiamipia bua kumanyisha bantu ba bisamba bionso lumu luimpe.​—1 Kolinto 16:9.

⁹ Bantemu binunu bivule badi bakungama lutatu elu pa kulonga muakulu mukuabu. Bua ba bungi ba kudibu, ebu mbualu bukole; nansha nanku lutatu elu badi balujimija kudi disanka didibu bapeta padibu bambuluisha benyi ne bena tshimuangi bua kulonga bulelela bua mu Dîyi dia Nzambi. Mu tshidimu tshishale etshi, bantu pabuipi ne 40 pa lukama ba ku bavua batambule mu  mpungilu ya distrike mu dimue ditunga dia ku Mputu wa ku Ouest bavua bafumine mu ditunga dikuabu.

10. Mmunyi muudi muenze mudimu ne kakanda ka Lumu luimpe bua bantu ba bisamba bionso? (Bala kazubu ka “Malu adi mu kakanda ka Une bonne nouvelle pour les gens de toutes nations,” mu dibeji dia 26.)

¹⁰ Bulelela, bavule ba kutudi kabena ne mushindu wa kulonga muakulu wa ku babende to. Nansha nanku, tudi mua kuenza petu mudimu wa kuambuluisha benyi mu dienza mudimu bimpe ne kakanda kapiakapia ka Lumu luimpe bua bantu ba bisamba bionso (Mfual.), * kadi ne mukenji mulenga wa mu Bible mufunda mu miakulu ya bungi. (Yone 4:37) Utuku uyisha ne kakanda aka anyi?

Padi bantu babenga kuteleja lumu luimpe

11. Ndutatu kayi lukuabu ludi mu bimue bipapu?

¹¹ Bu mudi malu a Satana enda avulangana pa buloba, lutatu lukuabu lututu tutamba kupeta ndua se: imue miaba bantu badi babenga kuteleja lumu luimpe. Bushuwa, bualu ebu kabuena butukemesha to, bualu Yezu ukavua mumanyishe ne: malu a buena aa avua ne bua kuikalaku. Wakamba bua matuku etu aa ne: ‘Dinanga dia ba bungi nedikepe.’ (Matayo 24:12) Bulelela, kuitabuja Nzambi ne kunemeka Bible mbikepe bikole munkatshi mua bantu ba bungi. (2 Petelo 3:3, 4) Ke bualu kayi mu bimue bitupa bia buloba, anu bantu bakese menemene ke batu balua bayidi bapiabapia ba Kristo. Kadi abi kabiena biumvuija ne: mudimu mukole udibu benza kudi bana betu bena Kristo basuibue balume ne bakaji badi bayisha ne lulamatu mu bipapu bidi bantu babenga kuteleja lumu luimpe mmuye mu mâyi to. (Ebelu 6:10) Bua tshinyi kabiena nanku? Teleja malu adi alonda aa.

12. Mudimu wetu wa diyisha udi ne bipatshila kayi bibidi?

¹² Evanjeliyo wa Matayo udi uleja bipatshila binene bibidi bia midimu yetu ya diyisha. Tshia kumpala ntshia ‘kuvuija bantu ba bisamba bionso bayidi.’ (Matayo 28:19) Tshibidi ntshia se: mukenji wa Bukalenge udi “tshimanyishilu.” (Matayo 24:14) Bionso bibidi bidi ne mushinga, kadi tshia ndekelu etshi tshidi tshiotshi ne mushinga wa pa buawu. Bua tshinyi?

13, 14. (a) Mmuanda kayi wa pa buawu udi mu tshimanyinu dia dikalaku dia Kristo? (b) Ntshinyi tshitudi ne bua kuikala bavuluke, nangananga patudi tuyisha mu bipapu mudi bantu kabayi batamba kuitaba lumu luimpe?

¹³ Matayo umue wa ku bafundi ba Bible wakafunda muvua bapostolo bebeje Yezu ne: ‘Utuambile tshimanyinu tshia pawalua tshiakabidi; ne tshia ku nshikidilu kua tshikondo etshi.’ (Matayo 24:3) Pakandamuna Yezu, wakamba ne: bumue bualu bua pa buabu bua mu tshimanyinu atshi buvua ne bua kuikala mudimu wa kuyisha pa buloba bujima. Bualu abu buvua bua divuija bantu bayidi anyi? Tòo. Wakamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Nunku Yezu wakaleja ne: mudimu wa diyisha Bukalenge nkayawu uvua ne bua kuikala muanda wa mushinga wa mu tshimanyinu atshi.

¹⁴ Bua nanku, patudi tuyisha lumu luimpe lua Bukalenge, tudi tuvuluka ne: nansha tuetu katuyi misangu yonso tukokesha bua kuvuija bantu bayidi, tudi tukokesha bua kufila “tshimanyishilu.” Nansha bantu bobu bitabe anyi babenge, mbamanye tshitudi tuenza, nunku tudi tukumbaja mulayi wa Yezu. (Yeshaya 52:7; Buakabuluibua 14:6, 7) Jordy, nsonga mukuabu Ntemu wa mu dimue ditunga  dia ku Mputu wa ku ouest wakamba ne: “Pandi mmanya ne: Yehowa udi ukuata nanyi mudimu bua kukumbaja Matayo 24:14 bidi bimpesha disanka dia bungi menemene.” (2 Kolinto 2:15-17) Bushuwa, udi umvua pebe disanka dia muomumue.

Padibu baluisha mukenji wetu

15. (a) Mbua bualu kayi buvua Yezu mudianjile kudimuijila bayidi bende? (b) Ntshinyi tshidi tshituambuluisha bua kuyisha nansha batuluisha?

¹⁵ Dituluisha didi difila lutatu lukuabu mu diyisha lumu luimpe lua Bukalenge. Yezu wakadimuija bayidi bende ne: ‘Bisamba bionso nebikale nenu lukuna bua dina dianyi.’ (Matayo 24:9) Anu bu bena Kristo ba kumpala, mbakine bayidi ba Yezu ba lelu, badi babaluisha ne babakengesha. (Bienzedi 5:17, 18, 40; 2 Timote 3:12; Buakabuluibua 12:12, 17) Mu amue matunga, mbulamatadi itu ibakandika bua kuenza midimu yabu. Nansha nanku, bena Kristo balelela ba mu matunga aa badi batumikila Nzambi pa kutungunuka ne kuyisha lumu luimpe lua Bukalenge. (Amosa 3:8; Bienzedi 5:29; 1 Petelo 2:21) Ntshinyi tshidi tshibambuluisha bobu ne Bantemu bakuabu bonso ba buloba bujima bua kuyisha nunku? Yehowa udi ubapesha bukole ku diambuluisha dia nyuma muimpe wende.​—Zekâya 4:6; Efeso 3:16; 2 Timote 4:17.

16. Mmunyi muakaleja Yezu diumvuangana didi pankatshi pa mudimu wa kuyisha ne nyuma wa Nzambi?

¹⁶ Yezu wakaleja diumvuangana dinene didi pankatshi pa nyuma wa Nzambi ne mudimu wa diyisha pakambilaye bayidi bende ne: ‘Nenuangate bukole, panupuekela nyuma muimpe pambidi penu; nenuikale bamanyi banyi too ne kumfudilu kua buloba.’ (Bienzedi 1:8; Buakabuluibua 22:17) Dilondangana dia mianda mu mvese eu didi ne mushinga. Tshia kumpala, bayidi bakapeta nyuma muimpe, ne pashishe bakatuadija mudimu wa diyisha pa buloba bujima. Ku diambuluisha dia nyuma wa Nzambi ke kuvuabu mua kupeta bukole bua kutungunuka ne kufila “tshimanyishilu ku bisamba bionso.” (Matayo 24:13, 14; Yeshaya 61:1, 2) Nenku mbiakanyine pavua Yezu mubikile nyuma muimpe ne: “mukuatshishi.” (Yone 15:26, Muanda Mulenga Lelu) Wakamba ne: nyuma wa Nzambi uvua ne bua kulongesha bayidi bende ne kubalombola.​—Yone 14:16, 26; 16:13.

17. Padibu batuluisha bikole, mmunyi mudi nyuma muimpe utuambuluisha?

¹⁷ Mmu malu kayi mudi nyuma wa Nzambi utuambuluisha lelu padi bantu baluisha mudimu wetu wa kuyisha lumu luimpe? Nyuma wa Nzambi udi utukolesha, ne udi utshiamakana kumpala kua aba badi batukengesha. Bua kumvua bualu ebu bimpe, tangila muanda wakenzeka mu matuku a Mukalenge Shaula.

 Muluisha kudi nyuma wa Nzambi

18. (a) Mmushindu kayi mubi wakashintuluka Shaula? (b) Mmalu kayi akenza Shaula bua kukengesha Davidi?

¹⁸ Shaula uvua mutuadije bimpe pakabangaye kukokesha Isalele, kadi kunyima wakabenga kutumikila Yehowa. (1 Samuele 10:1, 24; 11:14, 15; 15:17-23) Ke bualu kayi nyuma wa Nzambi katshivua ukuatshisha kabidi mukalenge eu nansha. Shaula wakakuatshila Davidi tshiji tshikole, eku bamane kuela Davidi manyi bu mukalenge uvua ne bua kupingana pa muaba wa Shaula ne uvua nyuma wa Nzambi ukuatshisha. (1 Samuele 16:1, 13, 14) Davidi uvua umueneka bu uvua kasonsa ka kunuina ku maluvu. Uvua anu ne tshisanji tshiende tshia lunzenze, kadi Shaula yeye uvua ne difuma. Nunku dimue dituku pavua Davidi wimba tshisanji atshi ‘Shaula wakela difuma diende; bualu bua wakamba ne: Nshipe Davidi, difuma dimusompoka dikuata ku tshimanu tshia nzubu. Kadi Daivid wakapanduka ku mêsu kuende misangu ibidi.’ (1 Samuele 18:10, 11) Kunyima Shaula wakateleja tshiakamuambila muanende Yonatana, uvua mulunda wa Davidi, kuditshipaye ne: ‘Bu mudi Yehowa ne muoyo, kabena bashipa [Davidi].’ Pashishe, Shaula ‘wakakeba kuasa Davidi difuma dimusompoke dikuate mu tshimanu tshia nzubu.’ Davidi ‘wakumuka ku mêsu kua Shaula, difuma diakakuata mu tshimanu.’ Mu tshikondo atshi tshikole, nyuma wakalua muluishi wa Shaula. Mmu mushindu kayi?​—1 Samuele 19:6, 10.

19. Mmunyi muvua nyuma wa Nzambi mukube Davidi?

¹⁹ Davidi wakanyema kuyaye kudi muprofete Samuele, kadi Shaula wakatuma bantu bende bua kukuatabu Davidi. Pakafikabu muabu uvua Davidi musokome, ‘nyuma wa Nzambi wakatulukila bamessager ba Shaula, bobu bakamba dîyi dia Nzambi [bu baprofete] kabidi.’ Bu muvua nyuma wa Nzambi mubabuikile bikole, bakapua tshipatshila tshia mudimu wabu muoyo. Misangu ibidi mikuabu Shaula wakatuma bantu bua kukuatabu Davidi ne kuluabu nende kudiye, kadi bualu bua muomumue buakenzeka musangu wonso. Ndekelu wa bionso, Mukalenge Shaula nkayende wakaya kudi Davidi, kadi Shaula pende kakakokesha bua kutua nyuma wa Nzambi munu. Nyuma muimpe  wakamuimanyika “munya mujima ne butuku bujima,” biobi kupesha Davidi dîba dia bungi dia kunyema.​—1 Samuele 19:20-24.

20. Ndilongesha kayi ditudi mua kupeta mu muyuki wa Shaula wa pavuaye ukengesha Davidi?

²⁰ Mu muyuki eu wa Shaula ne Davidi mudi dilongesha didi dikolesha ku muoyo dia se: Bakengeshi ba basadidi ba Nzambi kabena mua kuenza tshintu nansha tshimue padibu baluisha nyuma wa Nzambi. (Musambu 46:11; 125:2) Yehowa uvua mulongolole bua Davidi kulua mukalenge wa Isalele. Muntu nansha umue kavua mua kushintulula bualu abu to. Bua tshikondo tshietu etshi, Yehowa mmuleje ne: ‘nebambile bantu lumu luimpe lua bukalenge.’ Kakuena muntu udi mua kupumbisha mudimu eu bua kawenzeki.​—Bienzedi 5:40, 42.

21. (a) Ntshinyi tshidi bamue baluishi betu benza? (b) Mbualu kayi butudi bajadike?

²¹ Bamue balombodi ba bitendelelu ne bena tshididi badi batushiminyina malu ne batuenzela malu a tshinyangu bua kutupingaja kunyima. Kadi anu muvua Yehowa mukube Davidi mu nyuma ke muakubaye basadidi Bende lelu. (Malaki 3:6) Nunku tudi tuamba ne dishindika anu muakamba Davidi ne: ‘Mu Nzambi mene mmundi ngeyemena, tshiyi ne buôwa. Bantu badi bamanye mua kungenzela tshinyi?’ (Musambu 56:11; 121:1-8; Lomo 8:31) Ku diambuluisha dia Yehowa, tutungunukayi ne kutantamena ntatu yonso itudi tupeta patudi tuenza mudimu udi Nzambi mutupeshe wa kuyisha lumu luimpe lua Bukalenge kudi bantu ba bisamba bionso.

[Mêyi adi kuinshi]

Udi mua kuvuluka anyi?

• Bua tshinyi tudi tuakaja mishindu yetu ya dilongesha bua ikumbanyine imue nsombelu?

• “Mbunzulule tshibi tshinene” kayi tshidi tshifikisha ku mpunga mipiamipia?

• Mudimu wetu wa diyisha udi ukumbaja muanda kayi nansha mu bitupa bidi bantu kabayi batamba kuteleja?

• Bua tshinyi muluishi nansha umue kêna mua kuimanyika diyisha dia lumu luimpe?

[Nkonko ya dilonga]

[Kazubu mu dibeji 22]

Mbatuishibue mudibu benze bualu bua nsongo

“Badi ne disanka ne benzela Yehowa mudimu mu buobumue.” Mêyi aa adi aleja nsombelu wa mu dîku diakumbuka mu Espagne kuya mu Bolivie. Muana wa balume wa mu dîku edi uvua muyamu bua kuambuluisha kasumbu kavua kule. Disanka divuaye nadi diakakemesha baledi bende bualu diakamue, dîku dijima, pamue ne bana ba balume banayi ba bidimu kubangila pa 14 too ne 25 bakasadila Yehowa mu kasumbu aka. Basatu badi mpindieu bampanda-njila, ne eu uvua munzulule njila mmubuele mu Kalasa ka Dilongesha Mudimu matuku mashale aa.

Angelica wa mu Canada (udi ne bidimu 30) udi wenzela mudimu ku Mputu wa ku Est udi wamba ne: “Ntatu idi ya bungi, kadi ndi mpeta disanka pandi ngambuluisha bantu mu buambi. Bidi bindenga kabidi pandi mmona malu a bungi a dianyisha a kudi Bantemu ba muaba eu batu misangu mivule bangela tuasakidila bua mundi muye kubambuluisha.”

Bana ba bakaji babidi ba muntu umue (ba bidimu 20 ne pa mutu) badi benzela mudimu mu République dominicaine badi bamba ne: “Kuvua bibidilu bipite bungi bivua bikengela kuibidilangana nabi. Kadi tuakananukila mu mudimu wetu, ne mu bantu batudi tulonga nabu Bible, muanda mutekete badi mpindieu babuela mu bisangilu.” Bana ba muntu aba bakambuluisha bua kulongolola kasumbu ka bamanyishi ba Bukalenge mu tshimenga muvua kamuyi tshisumbu.

Muanetu wa bakaji Laura ukadi ne bidimu bu 30 uvua muenze mudimu ku babende bidimu bipite pa binayi. Udi wamba ne: “Ngakabenga kudikutakaja ne bintu bipitepite. Ebi bidi biambuluisha bamanyishi bua kumona ne: kusanka ne bikese biudi nabi ntshilumbu tshia dipangadika dia muntu ne dikala ne meji mimpe, kadi ki tshia bupele to. Kuikala ne mushindu wa kuambuluisha bakuabu, nangananga bansonga, nkumpeteshe disanka divua dipolesha ntatu milelela idi imueneka padi muntu wenzela mudimu ku babende. Tshiena mua kushintakaja mudimu wanyi muaba eu ne nsombelu mukuabu nansha umue, ne nenshale muaba eu too ne panshintulula Yehowa.”

[Kazubu/​Tshimfuanyi mu dibeji 26]

Malu adi mu kakanda ka Une bonne nouvelle pour des gens de toutes nations

Kakanda ka Une bonne nouvelle pour des gens de toutes nations kadi ne mukenji mufunda mu miakulu 96, muakulu wonso mu diawu dibeji. Mukenji au mmufunda mu mêyi adibu bambila muntu buludi. Nenku padi muntu uudi upetangana nende uubala, bidi biumvuika anu bu se: wewe ke udi uyukila nende.

Munda mua tshizubu mudi karte ka buloba. Leja muntu karte aka bua ufike ku dipetangana nende. Pamuapa udi mua kumufunkuina munu pa ditunga diudi musombele ne kumuleja ne: udi musue kumanya muaba udiye mufumine. Wewe muenze nanku, udi mua kumupolesha ne kumufikisha ku didiumvua mupepele ne mudilekelele.

Mêyi a mbangilu a mu kakanda aka adi aleja malu kabukabu atudi ne bua kuenza bua kuambuluisha bimpe bantu badi bakula muakulu utudi katuyi tumvua. Suaku ubale malu aa bimpe bimpe ne ualonde ne muoyo mujima.

Mu tshikebelu mudi miakulu ne tumanyinu tuayi. Bualu ebu budi bukuambuluisha bua kumanya tumanyinu tua miakulu tudi pa trakte yetu ne mu minga mikanda mipatula mu miakulu mishilangane.

[Tshimfuanyi]

Utuku uyisha ne kakanda aka anyi?

[Bimfuanyi mu dibeji 23]

Mikanda yetu ya malu a mu Bible idi mpindieu mu miakulu mipite pa 400

GHANA

LAPONIE (SUÈDE)

PHILIPPINES

[Bimfuanyi mu mabeji 24, 25]

Udiku mua kuenza mudimu muaba udibu dijinga ne bamanyishi ba Bukalenge ba bungi anyi?

ÉQUATEUR

RÉPUBLIQUE DOMINICAINE