Nkonko ya babadi
Nkonko ya babadi
Dutelonome 14:21 udi wamba ne: “Kanudi tshintu tshidifuile.” Mvese eu udiku ubengangana ne Lewitiki 11:40, udi wamba ne: ‘Muntu udi udia munyinyi [watshi] neuvuwe bilulu, neikale ne bukoya too ne dilolo’ anyi?
Mvese ibidi eyi kayena ibengangana to. Mvese wa kumpala udi wambulula mukenji udi ukandika didia nyama uvuabu basangana mudifuile, uvuabu pamuapa bashipe kudi nyama ya lonji. (Ekesode 22:31; Lewitiki 22:8) Mvese muibidi udi umvuija tshivua muena Isalele ne bua kuenza pavuaye ushipa mukenji au, pamuapa ku mpukapuka.
Pavua Mikenji ikandika tshintu kampanda, kabivua biumvuija ne: bantu kabavua imue misangu mua kupanga kutshienza nansha. Tshilejilu, kuvua mikenji ivua ikandika buivi, dishipangana, dijadikila muntu bualu bua dishima ne bikuabu. Kuvua kabidi manyoka mafundila aba bavua bashipa mikenji ayi mifila kudi Nzambi. Manyoka au avua akolesha mikenji ne avua aleja muvuayi kayiyi malu a bilele.
Muntu uvua ushipa mukenji uvua ukandika didia munyinyi wa nyama uvuabu basangana mudifuile uvua ne bua kuikala mukoya ku mêsu kua Yehowa ne uvua ne bua kuenza tshivua tshikengedibua bua kudilengeja. Pavuaye ubenga kudilengeja, uvua ne bua ‘kudituadila bubi buende.’—Lewitiki 17:15, 16.