“Kabakanyanga ditabuja diabu”

YEZU KRISTO wakambila bayidi bende ne: ‘Panupendabu ne panukengeshabu ne panushiminyinabu mashimi onso bua bualu buanyi, nenuikale ne disanka.’ (Matayo 5:11) Bantemu ba Yehowa badi ne disanka lelu bualu, mu diumvuangana ne dilongesha dia Kristo ne tshilejilu tshiende, kabatu babuelakana mu malu a ‘pa buloba’ ne a tshididi ne badi balamata anu Nzambi mu nsombelu yonso.​—Yone 17:14; Matayo 4:8-10.

Toomas Paul, muena teoloji wa Ekeleziya wa Luther ne mukudimunyi wa Bible mmuleje mu mukanda wende kampanda muvua Bantemu ba Yehowa ba mu Union soviétique wa kale ne ba mu ditunga dia Estonie babenge kubuelakana mu malu a tshididi. Udi wamba ne: “Bantu bakese tshianana ke badi bamanye tshiakenzeka mu dia 1 Tshisanga 1951 mu mêba a dinda. Bavua balongolole bua kuipata Bantemu ba Yehowa ne bantu bonso bavua batua ku tshiabu. Bakakuata bantu 279 ne kubatumabu mu Sibérie . . . Bakabambila ne: bu bobu mua kutua tshiala pa dibeji dimana kufundapu bua kulekela tshitendelelu tshiabu, kabavua mua kubipata anyi kubela mu buloko to. . . . Bakela bantu 353 mu buloko, kusangisha ne bakavuabu bakuate kumpala ne bantu bapite pa 171 bavua badisangisha nabu patupu mu bisumbu biabu. Kabakanyanga ditabuja diabu, nansha mu Sibérie muine. . . . Kakuvua bena Ekeleziya [wa Luther ba mu Estonie] bavule bavua ne ditabuja dia buina dia Bantemu ba Yehowa to.”​—Kirik keset küla (Ekeleziya munkatshi mua musoko).

Bantemu ba Yehowa ba buloba bujima badi beyemena Nzambi bua abambuluishe bua bashale ne lulamatu ne bamutumikila nansha babakengesha. Badi basanka bualu mbamanye ne: difutu dia lulamatu luabu ndinene.​—Matayo 5:12.