Malongesha malelela: Nkuepi kuudi mua kuapeta?

MU DITUNGA dia Tibet, muntu kampanda udi unyungulula kalukata kadi ne masambila mafunda, wela meji ne: misangu yonso idiku kanyunguluka, badi bambulula masambila ende. Mu nzubu mukuabu mualabale mu ditunga dia Inde, mbateke kazubu ku luseke bua kuenzelamu puja, anyi dilambula dia musenga wa manananshi, bilongo ne bikuabu bintu kudi bimfuanyi bia nzambi milume ne mikaji. Kumbuka kuine aku, mutantshi wa kilometre binunu ne binunu mu ditunga dia Italie, mu umue nzubu wa Mvidi Mukulu mulengeja, mukaji kampanda mmutue binu kumpala kua lupingu lua Mariya mamuende wa Yezu, usambila ne lunzadi mu bianza.

Pamuapa ukadi mudimuene bukole budi nabu tshitendelelu mu nsombelu wa bantu. Mukanda kampanda udi wamba ne: “Tshitendelelu . . . tshivua ne tshitshidi anu tshintu tshia mushinga mukole bua bantu ba pa buloba bujima.” (The World’s Religions​—Understanding the Living Faiths) John Bowker udi wamba mu mukanda mukuabu ne: “Kakutu kuanji kuikala nsangilu wa bantu udi Nzambi kayi ne muaba, muikale nangananga mufuki ne mutangidi wa malu onso. Bidi kabidi nanku bua bantu badi batuadija kubenga malu a Nzambi.”​—God—​A Brief History.

Bushuwa, bitendelelu mbishintulule nsombelu ya bantu ba bungi menemene. Kabienaku bileja ne: muntu udi ne dijinga dikole dia malu a mu nyuma anyi? Mu mukanda wende mukuabu, doktere munene wa masama a mitu diende Carl Jung, udi wakula bua dijinga dia bantu dia kutendelela bukole bubandile wamba ne: “Ndidimuenekele mu malu onso akadi bantu benzenze mu bule bua bikondo.”​—The Undiscovered Self.

Kadi kudi bantu ba bungi badi kabayi bitaba dikalaku dia Nzambi anyi kabayi banange malu a Nzambi to. Bamue badi belesha dikalaku dia Nzambi mpata anyi badibenga nangananga  bualu bitendelelu bidibu bibidile ki mbikumbaje majinga abu a mu nyuma to. Batu bumvuija tshitendelelu bu “dilamata ku dîyi kampanda didi ditulombola; lulamatu lukole; muoyo umue muololoke; dinanga dia malu mimpe anyi dialamata.” Bilondeshile diumvuija edi, bantu pa kuamba bonso batu batendelela mu mushindu kampanda anyi kansanga. Nansha bantu batu babenga dikalaku dia Nzambi batu anu pabu batendelela.

Munkatshi mua bidimu binunu ne binunu bia mianda ya bantu, dikeba kukumbaja dijinga dia malu a mu nyuma ndifikishe bantu ku diteta bitendelelu bishilashilangane. Ke bualu kayi kudi malongesha a bungi mu bitendelelu pa buloba bujima. Tshilejilu, nansha mudi bitendelelu pa kuamba bionso bisaka bantu bua kuitabuja bukole kampanda bubandile, bidi ne diumvuija dishilangane pa tshidi bukole ebu. Bitendelelu bia bungi bidi kabidi bishindamena pa mushinga wa lupandu anyi disungidibua. Kadi malongesha abi mmashilangane pa tshidi kusungidibua kumvuija ne mushindu muine wa kusungidibua. Bu mudiku malongesha a bungi nunku, mmunyi mutudi mua kumanya malongesha malelela adi asankisha Nzambi?