‘Muele wa mvita wa Yehowa ne wa Gideona!’

BALUISHI badi bungi anu bu mpasu ya mikumbi, ne badi banyanga madimi mimpe alua maloba matuke. Tudi mu tshikondo tshidi balumbuluishi bakokesha mu Isalele, ne bena Isalele badi mu lutatu lukole. Munkatshi mua bidimu muanda mutekete, dîba didi anu ntete idibu bakune ituadija kutoloka, misumba ya tshikisu ya bena Midiyana, bena Amaleka ne bantu ba ku Est idi ipueka mu ditunga. Bimuna bia baluishi aba bidi bimuangalaka mu buloba bujima bikeba biakudia, bidia dîna tshisonsa tshionso. Kadi bena Isalele kabena ne mpunda, anyi ngombe nansha mukoko to. Bua mushindu udi bena Midiyana bakokesha ne tshikisu, bena Isalele bakadi balue bapele badi basokoka biakudia biabu mu bina bimba mu mikuna, mu mbuebue ne mu miaba mikole bua kufikaku.

Bua tshinyi lutatu lua nunku? Bena Isalele mbatombokele Yehowa ne badi bakuatshila nzambi ya dishima mudimu. Ke bualu kayi Yehowa pende mmubalekele mu bianza bia baluishi babu. Padi bena Isalele kabatshiyi ne mushindu wa kutantamena lutatu alu, badi babikila Yehowa bua abambuluishe. Neateleje anyi? Malu akafikila bena Isalele adi mua kutulongesha tshinyi?​—Balumbuluishi 6:1-6.

Tshidime udi ne budimu anyi “muntu mukole wa bukitu”?

Pa tshibidilu, bidime bia mu Isalele bitu bishipula blé ne ngombe yenda ikoka mitshi ya kushipula nayi muaba mutoke bua lupepele lumbushe bisote, ntete idishadile. Kadi badi batshina bua kushipula blé patoke bua baluishi badi bakeba kushiya buloba munda mutupu. Bua kusokoma bena Midiyana, Gideona udi ushipula blé mu tshikaminu tshia mvinyo, pamuapa mu disoso dinene disokome diumbula mu mabue. (Balumbuluishi 6:11) Emu udi mua kututa anu ntete ndambu ndambu ne mutshi. Mu nsombelu mukole eu, Gideona udi wenza mudimu ne bintu bidi koku.

Elayi meji mudi Gideona ukema padi muanjelu wa Yehowa umumuenekela ne umuambila ne: ‘Yehowa udi nebe, wewe muntu mukole wa bukitu.’ (Balumbuluishi 6:12) Bu mudiye ushipula ntete mu tshikaminu tshia mvinyo kabidi mu musokoko, Gideona kêna mua kudiumvua muntu wa bukole nansha kakese. Kadi mêyi aa adi aleja mudi Nzambi mushindike ne: Gideona udi mua kulua mulombodi munene mu Isalele. Nansha nanku, bidi bikengela kumujadikila bualu ebu.

Padi Yehowa utuma Gideona bua ‘kusungila bena Isalele mu bianza bia bena Midiyana,’ udi umuandamuna ne budipuekeshi buonso ne: ‘Mukalenge, meme nensungile bena Isalele munyi? Mona, ba mu dîku dianyi badi bapita bena Manashe bonso bupele, ne meme ndi mutambe bupuekele mu nzubu wa tatu wanyi.’ Bu mudiye ne budimu, Gideona udi ulomba tshimanyinu tshialeja ne: Nzambi neikale nende bua kutshimuna bena Midiyana, ne Yehowa udi ukumbaja dijinga dilenga dia Gideona edi. Nunku Gideona udi ufila mulambu wa biakudia kudi muanjelu ne mudilu udi ubanda mu dibue, wosha mulambu au. Padi Yehowa ujikija buôwa bua Gideona, Gideona udi wibaka tshioshelu muaba au.​—Balumbuluishi 6:12-24.

‘Bâla adiakuile’

Tshilumbu tshinene tshia bena Isalele ki ndibakengesha dia bena Midiyana to. Mbadifile mu ditendelela dia Bâla. Yehowa udi ‘Nzambi wa mukawu,’ ne kakuena muntu udi mua kumukuatshila mudimu bimpe padiye utendelela nzambi mikuabu to. (Ekesode 34:14) Nunku, Yehowa udi wambila Gideona bua kubutula tshioshelu tshidi tatuende muibakile Bâla ne kushimbula mutshi wa tshijila udi ku luseke luatshi. Bu mudi  Gideona utshina tshienza tatuende ne bantu bakuabu yeye mubutule tshioshelu munda munya, udi utshibutula butuku ne diambuluisha dia basadidi bende dikumi.

Budimu bua Gideona mbukumbanyine, bualu padi batendeledi ba Bâla bamona tshidiye muenze, badi bakeba kumushipa. Kadi Yoasha tatuende wa Gideona udi weleshisha bantu abu meji ne: bikala Bâla n’Nzambi, uvua ne bua kudiakuila. Pashishe, Yoasha udi upesha muanende dîna diakanyine dia Yelubâla, mbuena kuamba ne: ‘Bâla adiakuile.’​—Balumbuluishi 6:25-32.

Nzambi utu ubenesha basadidi bende misangu yonso itubu babingisha ntendelelu mulelela ne dikima. Padi bena Midiyana ne bena diabu balua kabidi mu buloba bua Isalele, ‘nyuma wa Yehowa udi utulukila Gideona.’ (Balumbuluishi 6:34) Gideona udi usangisha biluilu bia bena Manashe, bena Ashê, bena Zebuluna ne bena Nafatale.​—Balumbuluishi 6:35.

Badi badilongolola bua mvita

Nansha mudi Gideona mpindieu ne tshiluilu tshia bantu 32 000, udi ulomba Nzambi tshimanyinu. Bikala miosa ya mikoko mishiya muaba wa dishipuila ntete mibole ne lumuma kadi buloba bushale buume, nebileje ne: Nzambi neasungile Isalele ku butuangaji buende. Yehowa udi wenza tshishima etshi ne Gideona udi ukeba bamushindikile bualu abu ne udi upeta dishindika adi padibu bashintulula tshimanyinu: buloba bubole ne lumuma kadi miosa ishala miume. Gideona udi uditatshisha bipitshidile anyi? Bidi bimueneka ne: kabiena nanku to, bualu Yehowa udi ukumbaja malu adiye umulomba bua kumukolesha. (Balumbuluishi 6:36-40) Katuena tutekemena bishima bia nunku lelu to. Tshidibi, tudi mua kupeta dikolesha ne buludiki bua Yehowa mu Dîyi diende.

Mpindieu, Nzambi udi wamba ne: tshiluilu tshia Gideona ntshipite bunene. Bena Isalele bobu batshimune baluishi babu ne bantu bungi nunku, badi mua kuditumbisha ne: mbadisungile. Kadi badi ne bua kutumbisha Yehowa bua ditshimuna. Tshia kuenza ntshinyi? Gideona udi utumikila tshivua Mikenji ya Mose yamba padiye ulomba badi ne buôwa bua kumbuka. Bantu 22 000 badi bumbuka, bashiya anu bantu 10 000.​—Dutelonome 20:8; Balumbuluishi 7:2, 3.

Ku mêsu kua Nzambi bantu batshidi anu ba bungi menemene. Udi ulomba Gideona bua kupueka nabu ku mâyi. Mufundi wa malu a kale wa bena Yuda Josèphe udi wamba ne: Nzambi wakenza bua Gideona ne tshiluilu tshiende bapueke ku musulu mu munya mukole. Nansha bikale munyi, Gideona udi utangila mudi bantu banua mâyi. Anu bantu 300 ke badi banua mâyi ne tshianza tshimue eku bikale bakenzakana bua kumona bikala baluishi balua. Anu bantu 300 aba batalame ke baya ne Gideona. (Balumbuluishi 7:4-8) Anji difuanyikija mu nsombelu wabu tung. Bu mudi baluishi benu bikale 135 000, udi mua kudiambila ne: nenutshimune anu ku bukole bua Yehowa, ki mbuenu nansha!

Nzambi udi ulomba Gideona bua kuangata muena mudimu ne kuya katentekela tshitudilu tshia bena Midiyana. Padibu bafika, Gideona udi umvua muntu kampanda wawila mukuende tshilota ne kakuyi dielakana, mukuende udi umumvuija ne: Nzambi mmupangadije bua  kufila bena Midiyana mu bianza bia Gideona. Ke dikankamija didi Gideona ukeba edi. Mmushindike mpindieu ne: Yehowa neenze bua yeye ne bantu bende 300 batshimune bena Midiyana.​—Balumbuluishi 7:9-15.

Mayele a mvita

Gideona udi utapulula bantu 300 aba mu bisumbu bisatu bia bantu 100. Muntu yonso udi upeta mpungi ne mulondo munene wa munda mutupu. Badi basokoka tshimunyi mu mulondo wonso. Gideona udi ubambila ne: ‘Nuntangile meme, nuenze bu mungenza. Pangela mpungi, nuenu kabidi nuele mpungi ne nuele mbila ne: “Muele wa mvita wa Yehowa ne wa Gideona!”’​—Balumbuluishi 7:16-18, 20.

Basalayi bena Isalele 300 badi baya mu tshimuma ku mielelu kua tshitudilu tshia baluishi. Tudi mua kuikala dîba dia dikumi wa butuku, padibu bafuma ku dishintulula bansentedi. Edi ke dîba dimpe dia kubundula mvita, bualu mêsu a bansentedi bapiabapia ki manji kuibidilangana ne mîdima to.

Mbuôwa kayipu budi bena Midiyana bumvua mpindieu! Diakamue, badi bumvua mutoyi wa ditayika dia milondo 300 ne wa mpungi 300, ne bumvua kabidi mbila ya bantu 300. Bena Midiyana badi bapapuka, nangananga bua lubila lua ‘muele wa mvita wa Yehowa ne wa Gideona,’ ne badi batuadija pabu kuela mbila. Mu kayumbayumba aku, ki mbamanye mua kusunguluja mulunda ne muluishi to. Bena Isalele 300 mbimane anu miaba yabu padi Nzambi wenza bua baluishi bashipangane ne miele yabu nkayabu. Badi mu tshitudilu badi batuadija kunyemakana, kabayi ne kua kuya; bena Isalele badi balondakaja badi banyema ne babashipa, mikanu ya bena Midiyana ijika kashidi. Bukokeshi buabu bua tshikisu ne bua mutantshi mule budi butua ku tshibungubungu.​—Balumbuluishi 7:19-25; 8:10-12, 28.

Nansha panyima pa ditshimuna edi, Gideona udi ne budipuekeshi. Padi bena Efelayima (badi pamuapa badiumvua bu babapende pavuabu kabayi bababikile bua kuluangana) bamukeba bilumbu, udi wandamuna ne lutulu. Diandamuna diende dia lutulu didi dituyisha tshiji tshia bena Efelayima ne dipuekesha tshilunji tshiabu.​—Balumbuluishi 8:1-3; Nsumuinu 15:1.

Mpindieu padi bena Isalele mu ditalala, badi balomba Gideona bua kulua mukalenge wabu. Nditeta kayipu dinene! Kadi Gideona udi ubenga. Ki mmupue muoyo udi mutshimune bena Midiyana to. Udi wamba ne: ‘Tshiena nnukokesha ne muana wanyi kêna unukokesha; Yehowa neanukokeshe.’​—Balumbuluishi 8:23.

Kadi bu mudi Gideona mupange bupuangane, kêna anu misangu yonso ne busunguluji to. Bua bualu budibu kabayi baleje, udi wenza efoda ne bintu bia mu mvita ne udi umuteka mu musoko wabu. Bible udi uleja ne: bena Isalele bonso badi batuadija ‘kuenda masandi’ ne efoda au. Badi bamutendelela ne udi ulua buteyi nansha bua Gideona ne bua bena mu nzubu wende. Tshidibi kabena bamubala bu mutendeledi wa mpingu, bualu Bible udi umuleja bu muntu udi witabuja Yehowa.​—Balumbuluishi 8:27; Ebelu 11:32-34.

Malu atudi tulongela ku muyuki wa Gideona

Muyuki wa Gideona udi ne malu adi mua kutudimuija ne kutukankamija kabidi. Udi utudimuija ne: bikala Yehowa mumbushe mabenesha ende ne nyuma wende kutudi bualu tudi ne bienzedi bibi, nsombelu wetu wa mu nyuma neikale anu bu wa bantu bapele badi basombe mu buloba bunyanga kudi mpasu ya mikumbi. Tudi mu matuku mabi ne katupu muoyo nansha dituku dimue ne: disanka didi difuma kudi Yehowa ke ‘didi divuija bubanji, ne kêna utenteka kanyinganyinga pa mutu padi.’ (Nsumuinu 10:22) Nzambi udi utubenesha bualu tudi ‘tumukuatshila mudimu ne mutshima mutoke ne didikokela kudiye.’ Tshianana, neatuele nyima.​—1 Kulondolola 28:9.

Muyuki wa Gideona udi utukankamija bualu udi uleja ne: Yehowa udi mua kusungila bantu bende ku njiwu, nansha pa kuenza mudimu ne muntu udi umueneka mutekete anyi kayi ne dikuatshisha. Mushindu uvua Gideona ne bantu bende 300 batshimune bena Midiyana 135 000 ntshijadiki tshia bukole butambe bunene bua Nzambi. Tudi mua kuikala mu lutatu ne bimueneka bu ne: baluishi betu mbatupite bukole. Kadi muyuki wa Gideona udi utukankamija bua kueyemena Yehowa, wikala mua kubenesha ne kusungila bonso badi bamuitabuja.