“Muena budimu udi utangila kudiye uya”

MUNTU muena budimu udi ne lungenyi ne mmumanye tshia kuenza, udi ne meji mimpe ne lumvu lutue, udi ne lubatshi ne mmutalame, mmumanye mua kusunguluja malu. Kêna usuika bakuabu ku masele nansha. Nsumuinu 13:16 udi wamba ne: ‘Muntu mudimuke yonso udi wenza malu ende ne lungenyi.’ Eyowa, budimu nngikadilu mulenga.

Mmunyi mutudi mua kuleja budimu mu nsombelu wetu? Mmunyi mudibi mua kumueneka ne: tudi bena budimu mu mapangadika etu, mu mushindu utudi tuangata bakuabu ne utudi tuenza malu mu nsombelu mishilangane? Mbipeta kayi bitu bena budimu bapeta? Mmalu mabi kayi atubu bepuka? Mukalenge Solomo wa mu Isalele wa kale udi wandamuna nkonko eyi bimpe mu Nsumuinu 14:12-25. *

Sungula njila webe ne meji

Bushuwa, kusungula malu mimpe ne kuakumbaja kudi kulomba bukokeshi bua kusunguluja tshidi tshimpe ne tshidi tshibi. Kadi Bible udi udimuija ne: ‘Njila udiku udi mululame ku mêsu kua muntu, kadi nshikidilu wende udi [njila ya] lufu.’ (Nsumuinu 14:12) Ke bualu kayi tudi ne bua kulonga mua kusunguluja tshidi tshimpe bulelela ne etshi tshidi tshimueneka patupu bu tshimpe. Kuamba ne: ‘njila ya lufu’ kudi kuleja ne: kudi njila ya bungi ya mushindu eu idi mua kudinga muntu. Tangila imue ya kudiyi itudi ne bua kudimukila ne kuepuka.

Bantu babanji ne badi bende lumu panu batu bamueneka misangu yonso bu bantu ba kunemeka ne ba kuanyina. Nsombelu wabu ne mfranga yabu bidi mua kuleja ne: ngenzelu wabu wa malu mmuimpe. Kadi tudi mua kuamba tshinyi bua mishindu idi bavule ba kudibu bapeta bubanji ne lumu? Njila yabu mmilulame ne mmimpe anyi? Ku luseke lukuabu, kudi bamue bantu badi baleja lukunukunu lua dikema bua tshitendelelu tshiabu. Kadi muoyo wabu muimpe udiku ujadika ne: malu adibu bitabuja mmalelela anyi?​—Lomo 10:2, 3.

Njila mukuabu udi kabidi mua kumueneka bu mululame bualu tudi tudidinga. Kuangata mapangadika bilondeshile malu atudi tumona nkayetu bu malelela nkulonda tshidi mutshima wetu udi mua kutudinga utusaka bua kuenza. (Yelemiya 17:9) Kondo ka muoyo kakayi kalongesha ne kakayi kibidija bimpe kadi mua kutufikisha ku diela meji ne: tshidi tshibi atshi ke tshimpe. Nunku, ntshinyi tshiatuambuluisha bua kusungula njila mulenga?

Didilongela ne tshisumi dia malu male a mu Dîyi dia Nzambi didi ne mushinga mukole bituikala basue kupeta ‘meji mibidija bua kusunguluja tshidi tshimpe ne tshidi tshibi.’ Tudi kabidi ne bua kuibidija meji aa patudi ‘tuenza nawu mudimu’ mu dilonda mêyi makulu a mu Bible. (Ebelu 5:14) Tudimukayi bua katulekedi njila udi umueneka patupu bu muakane atupambuishe mu ‘njila mubumbakane udi ufikisha bantu ku muoyo.’​—Matayo 7:13, 14.

Dîba didi ‘mutshima mua kuikala ne kanyinganyinga’

Muntu udiku mua kuikala ne disanka yeye kayi ne ditalala mu mutshima anyi? Tuseku tudiku mua kutuyisha kanyinganyinga kakole anyi? Muntu mudimuke udiku mua kujikija tunyinganyinga mu dinua maluvu ne bintu bidi  bikuata, anyi kuteta bua kujimija meji au pa kuditua mu nsombelu mubi anyi? Tòo. Mukalenge wa meji udi wamba ne: “Mu tuseku mene mutshima udi ne kanyinganyinga.”​—Nsumuinu 14:13a.

Tuseku tudi mua kusokoka kanyinganyinga, kadi katuena tukamana to. Bible udi wamba ne: “Tshintu tshionso tshidi ne tshikondo tshiatshi.” Bushuwa, kudi “tshikondo tshia kudila ne tshikondo tshia kuseka; tshikondo tshia kuasa madilu ne tshikondo tshia kuja maja.” (Muambi 3:1, 4) Padi kanyinganyinga katungunuka, tudi ne bua kudienzeja bua kukajikija pa kukeba “lungenyi lua kuenza” biobi ne mushinga. (Nsumuinu 24:6) * Tuseku ne diela bilele bitu ne muaba wabi, kadi bitu anu ne mushinga mukese. Solomo udi udimuija bua imue mishindu ya bilele ne dinekesha mu dijikija lutetuku wamba ne: ‘Nshikidilu wa disanka udi majiya.’​—Nsumuinu 14:13b.

Muntu udi usesuka ne muntu muimpe: mmushindu kayi udibu bukuta bintu?

Mukalenge wa Isalele udi utungunuka wamba ne: ‘Muntu udi usesuka neukute bintu bidiye upuola mu njila yende, ne muntu muimpe neukute bintu bidi bienzedi biende bimutuadila.’ (Nsumuinu 14:14) Mmushindu kayi udi muntu udi usesuka ne muntu muimpe bukuta bintu bidi bifumina ku bienzedi biabu?

Muntu udi usesuka anyi udi kayi ne ditabuja kêna wela meji ne: udi ne bua kubadila Nzambi bintu to. Ke bualu kayi, kuenza malu adi asankisha Yehowa kakuena ne mushinga ku mêsu kuende to. (1 Petelo 4:3-5) Muntu wa nunku udi ukuta ne bipeta bia nsombelu wende wa lukuka lua bintu. (Musambu 144:11-15a) Muntu muimpe yeye udi uditatshisha bua malu a mu nyuma. Mu bionso bidiye wenza, udi ulamata mêyi makane a Nzambi. Muntu wa mushindu eu udi ukuta bintu bidiye upeta bualu Yehowa udi Nzambi wende ne udi upetela disanka dia bungi mu dimukuatshila mudimu.​—Musambu 144:15b.

‘Kuitabuji dîyi dionso’

Solomo udi uleja dishilangana didi pankatshi pa njila ya mutshimbakanyi ne ya muena budimu wamba ne: ‘Mutshimbakanyi udi witabuja dîyi dionso, kadi muena budimu udi utangila kudiye uya.’ (Nsumuinu 14:15) Muena budimu kabatu bamushimakaja bipepele nansha. Kêna tshitaba mvinyingu anyi muntu udi ulonda anu  lungenyi lua bakuabu to, kadi udi utangila ne meji kudiye uya. Udi wenza malu ne lungenyi yeye mumane kusangisha malu onso adi atangila muanda kampanda.

Angata tshilejilu lukonko lua ne: “Nzambi utuku anyi?” Mutshimbakanyi mmufuane kulamata bikole ku tshidi ba bungi bamba anyi tshidi bantu bende lumu bitaba. Kadi muena budimu yeye udi wangata dîba dia kukonkonona malu. Udi welangana meji pa mvese bu mudi Lomo 1:20 ne Ebelu 3:4. Mu malu a mu nyuma, muena budimu kêna witaba patupu tshidi bamfumu ba bitendelelu bamba nansha. Udi ‘uteta malu adibu bamba bua kumona ne: adi afuma kudi Nzambi.’​—1 Yone 4:1.

Bushuwa kulonda mubelu wa kubenga ‘kuitabuja dîyi dionso’ mbualu bua meji! Nangananga bana betu badi ne bujitu bua kupesha bakuabu mibelu mu tshisumbu tshia bena Kristo ke badi ne bua kuangata bualu ebu ne mushinga. Mufidi wa mibelu udi ne tshia kuikala mumanye malu onso avua menzeke. Udi ne bua kuteleja bimpe ne kusangisha malu a nseke yonso bua mibelu yende kayilu kupanga meji anyi kuikala anu mitangija luseke lumue.​—Nsumuinu 18:13; 29:20.

‘Muntu udi upangadija malu udi mukinyibue’

Mukalenge wa Isalele udi uleja dishilangana dikuabu didi pankatshi pa muena meji ne mupote wamba ne: ‘Muena meji udi udimuka, udi wepuka ku bubi, kadi mupote udi ne dikamakama, udi udieyemena. Udi ukuata tshiji lubilu udi wenza malu mapote, kadi [‘muntu udi upangadija malu mabi udi mukinyibue,’ note kuinshi kua dibeji].’​—Nsumuinu 14:16, 17.

Muena meji udi utshina bipeta bia dilonda njila mubi. Ke bua tshinyi mmudimuke ne udi wanyisha mibelu yonso idi imuambuluisha bua kuepuka malu mabi. Muntu mupote yeye kêna ne ditshina dia nunku to. Bu mudiye udieyemena, udi ubenga mibelu ya bakuabu ne diditambisha dionso. Bu mudiye ukuata tshiji lukasa, muntu wa nunku udi wenza malu mapote. Kadi mmunyi mudibu mua kukina muntu udi upangadija malu?

Muaku wa ku ntuadijilu udibu bakudimune ne: ‘bukole bua kupangadija malu’ udi ne ngumvuilu ibidi. Mu ngumvuilu muimpe, udi mua kuleja busunguluji anyi lungenyi. (Nsumuinu 1:4; 2:11; 3:21) Mu ngumvuilu mubi, tshiambilu etshi tshidi mua kuleja lungenyi lubi peshi muoyo mubi.​—Musambu 37:7; Nsumuinu 12:2; 24:8.

Bikala tshiambilu ‘muntu udi upangadija malu’ tshiakula bua muntu udi anu ufuka malu mabi mu lungenyi luende, nanku mbipepele bua kumona bua tshinyi mbamukine. Kadi muntu udi ne busunguluji yeye kabenaku mua kumukina kudi aba badi kabayi nabu anyi? Tshilejilu, aba badi benza mudimu ne busunguluji ne babenga kuikala ‘ba pa buloba’ mbabakine kudi bena panu. (Yone 15:19) Batu baseka bansonga bena Kristo badi benza mudimu ne busunguluji ne badi bakandamena bikadilu bibi bia balunda babu. Bualu budiku mbua se: bena panu badi ku bukokeshi bua Satana Diabolo mbakine batendeledi balelela.​—1 Yone 5:19.

“Bantu babi badi binamina bantu bimpe”

Bantu badimuke mbashilangane ne batshimbakanyi mu mushindu mukuabu kabidi. ‘Batshimbakanyi badi bapiana bupote, kadi badi ne budimu badi ne lungenyi bu tshifulu tshiabu tshia butumbi.’ (Nsumuinu 14:18) Bu mudibu kabayi ne busunguluji, batshimbakanyi badi basungula bupote, ne ke budi bumueneka mu nsombelu wabu mujima. Kadi lungenyi anyi dimanya didi dilengeja badi ne budimu anu mutu tshifulu tshia butumbi tshipesha mukalenge lumu.

Mukalenge wa meji udi wamba ne: “Bantu babi badi binamina bantu bimpe, ne benji ba malu mabi badi binama ku bibi bia bantu bakane.” (Nsumuinu 14:19) Mu mêyi makuabu, ndekelu wa bionso malu mimpe neatshimune malu mabi. Tangila anu mudi bantu ba Nzambi benda bavulangana lelu ne nsombelu mulenga udibu nende. Padi bamue baluishi bamona masanka a basadidi ba Yehowa nebafike ku ‘dinamina’ mukaji wa Yehowa wa mu tshimfuanyi muleja kudi bashadile bela manyi batshidi pa buloba. Patuamba kufika ku Armagedone,  baluishi aba nebitabe ku bukole ne: tshitupa tshia bulongolodi bua Nzambi tshia pa buloba tshidi bushuwa tshileja tshitupa tshia mu diulu.​—Yeshaya 60:1, 14; Galatia 6:16; Buakabuluibua 16:14, 16.

“Udi ufuila bena dikenga luse”

Solomo udi umvuija mutu bantu wamba ne: ‘Mupele udi mukinyibue kudi muena mutumba nende mene, kadi balunda ba muntu mubanji badi ba bungi.’ (Nsumuinu 14:20) Bua bantu bapange bupuangane, bualu ebu mbulelela! Bu mudibu bena budinangi, batu bakeba kusankisha babanji kupita bapele. Kadi nansha mudi balunda ba muntu mubanji bikale ba bungi, badiku anu bua mutantshi mukese anu bu mudi bubanji buende kabidi. Nunku, bidiku bimpe kuvudija balunda ku mfranga anyi ku dilabidila bantu anyi?

Tshia kuenza ntshinyi bituamona ne: tudi tujinga kusankisha babanji ne tupetula bapele? Tumanye ne: Bible kêna wanyisha kusungulula bantu kua mushindu eu to. Udi wamba ne: ‘Udi upetula muena mutumba nende udi wenza bualu bubi, kadi udi ufuila bena dikenga luse udi ne disanka.’​—Nsumuinu 14:21.

Tudi ne bua kuangata aba badi mu ntatu ne mushinga. (Yakobo 1:27) Mu mushindu kayi? Mpatudi tubambuluisha ne ‘bintu bia pa buloba’ bu mudi mfranga, biakudia, muaba wa kulala, bilamba ne patudi tubatabalela. (1 Yone 3:17) Muntu udi wenzela bantu ba mushindu eu bimpe udi ne disanka bualu “disanka dia kupa ndipite dia kupeta.”​—Bienzedi 20:35, MMM.

Ntshinyi tshidi bonso bapeta?

Dîyi dia ne: ‘tshintu tshionso tshidi muntu ukuna, ntshiotshi tshiapuolaye’ ndiakanyine muena budimu ne mutshimbakanyi kabidi. (Galatia 6:7) Muena budimu udi wenza malu mimpe, mutshimbakanyi yeye udi wela meji anu bua kuenza malu mabi. Mukalenge wa meji udi ukonka ne: ‘Badi bapangadija malu mabi kabena bapambuka mu njila anyi?’ Eyowa, badi bapambuka. ‘Kadi badi bapangadija malu mimpe badi basangana luse lujalame ne bulelela.’ (Nsumuinu 14:22) Bantu badi benza malu mimpe badi babanyisha kudi bakuabu ne badi bapeta luse lujalame lua Nzambi.

Solomo udi uleja mudi dienza mudimu mukole dipetesha muntu bintu ne mudi diakula bia bungi kadi dienza mudimu anu mukese difikisha ku bupele wamba ne: ‘Mudimu wonso udi uvudija muntu bintu, kadi tshiakulakula tshia ku mishiku tshidi tshivuija muntu mupele.’ (Nsumuinu 14:23) Dîyi edi ndiakanyine malu a mu nyuma atudi tuenza. Patudi tuenza mudimu wa buambi bikole, tudi tupeta masanka a kumanyisha bantu ba bungi bulelela bua mu Dîyi dia Nzambi budi mua kubapandisha. Patudi tukumbaja ne lulamatu mudimu wonso udi bulongolodi buetu butupesha, tudi tupeta disanka.

Nsumuinu 14:24 udi wamba ne: ‘Tshifulu tshia butumbi tshia bena meji tshidi biuma biabu, kadi tshifulu tshia bapote tshidi bupote buabu.’ Bidi mua kumvuija ne: meji adi bena meji bakeba bua kupeta ke bubanji buabu, ne adi abalengeja. Kadi bapote bobu badi bapeta anu bupote. Bilondeshile mukanda mukuabu, lusumuinu elu ludi kabidi mua kufila lungenyi lua se: “bubanji budi tshilenga bua aba badi benza nabu mudimu bimpe . . . [padi eku] bapote bikale anu ne bupote buabu.” Nansha bia munyi, muntu wa meji udi upeta bintu bimpe kupita mupote.

Mukalenge wa Isalele udi wamba ne: ‘Mumonyi udi wamba mêyi a bushuwa udi upandisha mioyo, kadi wapatula mêyi a mashimi mukana udi udinga bena tshilumbu.’ (Nsumuinu 14:25) Nansha mudi bualu ebu buikale bulelela mu dikosa dia bilumbu, tangila mudibu kabidi butangila mudimu wetu wa buambi. Mudimu wetu wa diyisha Bukalenge ne wa divuija bantu bayidi udi ulomba kumanyisha bulelela bua mu Dîyi dia Nzambi. Mudimu eu udi wambuluisha bantu badi ne mitshima miakane bua kupatuka mu bitendelelu bia dishima ne upandisha mioyo yabu. Tuetu bikale misangu yonso badimuke ku malu etu ne ku diyisha dietu, netudisungile tuetu bine ne aba badi batuteleja kabidi. (1 Timote 4:16) Patudi tutungunuka ne kuenza mudimu eu, tuikalayi ne budimu mu nsombelu wetu mujima.

[Mêyi adi kuinshi]

[Tshimfuanyi mu dibeji 18]

Dilonga malu male a mu Bible ne tshisumi didi ne mushinga mukole bua kufika ku disunguluja tshidi tshimpe ne tshidi tshibi

[Tshimfuanyi mu dibeji 18]

Lukuka lua bintu ludiku mua kututuadila disanka anyi?