Udi ne lulamatu mu malu onso anyi?

‘Udi ne lulamatu mu bintu bikese, udi nalu kabidi ne mu bivule.’​—LUKA 16:10, MMM.

1. Mmu mushindu kayi umue mudi Yehowa muikale muena lulamatu?

 UKADIKU mumone mudi mundidimbi wa mutshi wenza panshi padi dîba dienda diya anyi? Eyowa, mundidimbi udi anu ushintuluka ku bunene ne ku luseke ludiwu uya! Malu adi bantu baditatshisha bua kuenza ne adibu balaya atu pawu ashintuluka anu bu mundidimbi. Kadi Yehowa Nzambi yeye katu ushintuluka to. Muyidi Yakobo udi ubikila Nzambi ne: “Tatu wa munya,” wamba ne: ‘Kudiye kakuena dikudimuka anyi mundidimbi wa tshintu tshidi tshinyunguluka.’ (Yakobo 1:17) Yehowa katu ushintuluka to, ngua kueyemena nansha mu tu-malu tukese. Udi ‘Nzambi muena lulamatu.’​—Dutelonome 32:4, MMM.

2. (a) Bua tshinyi tudi ne bua kudikonkonona bua kumanya ni tudi ne lulamatu? (b) Nnkonko kayi idi itangila lulamatu ituamona?

² Mmunyi mutu Yehowa umona lulamatu lua batendeledi bende? Mushindu wa muomumue ne Davidi wakamba bua bualu buabu ne: ‘Mêsu anyi neikale kudi badi mua kueyemenyibua mu buloba, bua kushikamabu nanyi muaba umue. Muntu udi wenda mu njila udi mululame tshishiki neankuatshile biende mudimu.’ (Musambu 101:6) Bulelela, Yehowa udi usanka bua lulamatu lua basadidi bende. Mupostolo Paulo wakambilamu pakafundaye ne: “Tshidibo balomba kudi muntu udibo bapeshe bulami, nkuikala muena lulamatu.” (1 Kolinto 4:2, Muanda Mulenga Lelu [MML]) Kuikala muena lulamatu kudi kumvuija tshinyi? Mmu nsombelu kayi mutudi mua kuleja lulamatu?  Mmasanka kayi adi muntu ‘udi wenda mu njila udi mululame tshishiki’ mua kupeta?

Tshidi kuikala muena lulamatu kumvuija

3. Ntshinyi tshidi tshijadika ne: tudi ne lulamatu?

³ Ebelu 3:5 udi wamba ne: ‘Mose wakadi muena mudimu muena lulamatu.’ (MML) Ntshinyi tshiakavuija muprofete Mose muena lulamatu? Mu dienza ne mu dishimika ntenta wa kusambakena, “Mose wakenza nunku; wakenza malu onso akamuambila Yehowa.” (Ekesode 40:16) Tuetu batendeledi ba Yehowa tudi tuleja lulamatu luetu patudi tumutumikila mu malu onso. Bidi biumvuija kushala anu balamate Yehowa nansha mu ntatu minene anyi mateta makole. Kadi lulamatu luetu kaluena lumueneka anu patudi kumpala kua bilumbu binene nansha. Yezu wakamba ne: ‘Udi ne lulamatu mu bintu bikese, udi nalu kabidi ne mu bivule; udi ne buivi mu bintu bikese, udi nabu ne mu bivule.’ (Luka 16:10, MMM) Tudi ne bua kushala ne lulamatu nansha mu malu adi amueneka bu makese.

4, 5. Ntshinyi tshidi lulamatu luetu mu “bintu bikese” luleja?

⁴ Ditumikila Nzambi dituku dionso mu “bintu bikese” didi ne mushinga bua malu abidi. Bualu bua kumpala, didi dileja mutudi tuangata bumfumu butambe bunene bua Yehowa. Ela meji bua diteta dia lulamatu divuabu bele Adama ne Eva. Kabavua babalombe bualu bukole to. Nansha muvuabu babanyishile bua kudia bintu bia mishindu yonso bia mu budimi bua Edene, bavua ne bua kudikanda bua kubenga kudia mamuma a mutshi anu umue, “mutshi wa lungenyi lua kujingulula malu mimpe ne malu mabi.” (Genese 2:16, 17) Bu mulume eu ne mukajende bashale ne lulamatu mu ditumikila dîyi adi dipepele bavua mua kuleja ne: bavua banyishe bukokeshi bua Yehowa. Kulonda mêyi a Yehowa mu nsombelu wetu wa ku dituku ne ku dituku kudi kuleja ne: tudi balamate luseke lua bumfumu buende butambe bunene.

⁵ Bualu buibidi, bitudi tuenza mu “bintu bikese” bidi ne bukole mu bituikala ne bua kuenza “kabidi ne mu bivule,” mmumue ne: patutulukila bilumbu binene. Bua bualu ebu, tangila tshiakafikila Danyele ne balunda bende basatu bena Ebelu ba lulamatu aba: Hananiya, Mishaele ne Azaliya. Bakaya nabu ku bupika mu Babulona mu 617 kumpala kua bikondo bietu ebi. Patshivua bansongalume banayi aba bikale pamuapa anu ne bidimu dikumi ne bia pa mutu, bakabatuma mu lupangu lua Mukalenge Nebukadenesâ. Kuine aku ‘mukalenge wakabatekela tshitupa tshia biakudia biende bisheme bia buatshia-buatshia ne tshia mvinyo wakadiye unua, bua bobu bakoleshibue nunku bidimu bisatu; bua ku ndekelu kua bidimu ebi bamanye mua kuimana kumpala kua mukalenge.’​—Danyele 1:3-5.

6. Nditeta kayi diakapeta Danyele ne balunda bende basatu mu lupangu lua mukalenge wa bena Babulona?

⁶ Kadi kudia biakudia bia mukalenge wa bena Babulona kuvua ne lutatu bua bansongalume banayi aba. Mu biakudia bisheme bia mukalenge ebi muvua mua kuikala ebi bivuabu bakandike mu Mikenji ya Mose. (Dutelonome 14:3-20) Nyama ivua mua kuikala kayiyi mishipa bimpe, ne kudia minyinyi ya nunku kuvua kushipa Mikenji ya Nzambi. (Dutelonome 12:23-25) Biakudia ebi bivua kabidi mua kuikala bilambula mpingu, bu muvua tshilele tshia batendeledi bena Babulona kumpala kua kudiabu biakudia pamue.

7. Ntshinyi tshivua ditumikila dia Danyele ne balunda bende basatu dileje?

⁷ Kakuyi mpata, bena mu nzubu wa mukalenge wa Babulona kabavua bamona mikandu mu malu a biakudia bu bualu to. Kadi Danyele ne balunda bende bavua bapangadije mu mitshima yabu bua kubenga kudinyanga ne biakudia bikandika mu Mikenji ivua Nzambi mupeshe bena Isalele. Ebu mbualu buvua bulenga lulamatu luabu kudi Nzambi ne ku mikenji yende. Nunku bakalomba bua bikale babapesha anu bisekiseki ne mâyi a kunua, ne bakabanyishila. (Danyele 1:9-14) Bua bamue bantu lelu eu, bualu buakenza bansongalume banayi abu budi mua kumueneka bu buvua kabuyi ne mushinga. Kadi bu muvuabu batumikile Yehowa, bakaleja luseke luabu mu tshilumbu tshia bumfumu buende butambe bunene.

8. (a) Nditeta kayi dikole dia lulamatu diakapeta bena Ebelu basatu? (b) Diteta adi diakajika bishi, ne ntshinyi tshidi bualu ebu butuleja?

⁸ Dishala ne lulamatu mu malu avua amueneka bu makese diakalongolola balunda basatu ba  Danyele bua kuimana kumpala kua diteta dinene. Bala Bible webe mu Danyele nshapita 3, ne umone muvua bena Ebelu basatu abu bapete tshibawu tshia lufu bualu bavua babenge kutendelela lupingu lua or luvua Mukalenge Nebukadenesâ muenze. Pakaluabu nabu kumpala kua mukalenge, bakamba tshivuabu bapangadije ne dishindika dionso ne: ‘Biasua Nzambi wetu utudi tukuatshila mudimu kutusungila, yeye neatupandishe ku tshikutu tshia kapia kakole ne mu tshianza tshiebe kabidi, mukalenge. Kadi bikaleye kayi musue kuenza nunku, umanye biebe, mukalenge, ne: katuena tukuatshila nzambi yebe mudimu, katuena tutendelela lupingu lua or luwakuimanyika.’ (Danyele 3:17, 18) Yehowa wakabasungila anyi? Eyowa, anu basalayi bakela bansongalume abu mu tshikutu tshia kapia kakole ke bakafua, kadi bena Ebelu basatu ba lulamatu abu bakashala ne muoyo, nansha luya lukole lua mu tshikutu atshi kaluakabosha to! Lulamatu luabu lushindame bimpe luakabambuluisha bua kushala amu ne lulamatu pakalua diteta dikole. Bualu ebu kabuenaku butuleja mushinga wa kuikala ne lulamatu mu malu adi makese anyi?

Lulamatu pa bidi bitangila “mamona a malu mabi”

9. Mmalu kayi makuabu avua Yezu muambe pamue ne mêyi adi mu Luka 16:10?

⁹ Kumpala kua Yezu kuambaye dîyi dia ne: muntu udi ne lulamatu mu malu adi amueneka bu makese udi kabidi ne lulamatu mu malu manene, wakapesha bateleji bende mubelu eu: ‘Nudiangatshile bulunda ku mamona a malu mabi; pajikawu, nebanuitabuje bua nuenu kubuela mu nzubu ya tshiendelele.’ Ke kuluaye kuakula bua lulamatu mu malu adi makese. Pashishe Yezu kuambaye ne: ‘Binuikala kanuyi bikale mua kueyemenyibua panuakadi ne mamona mabi, wateka biuma bilelela mu bianza bienu nganyi? Muena mudimu kêna mumanye mua kukuatshila bamfumu babidi mudimu diakamue; yeye neikale ne mukuabu lukuna ne mukuabu dinanga, anyi nealamate mukuabu neapidie mukuabu. Kanuena bamanye mua kukuatshila Nzambi mudimu ne Mamona diakamue.’​—Luka 16:9-13.

10. Mmunyi mutudi mua kuleja lulamatu mu mushindu utudi tukuata mudimu ne “mamona a malu mabi”?

¹⁰ Bilondeshile mêyi adi kumpala ne panyima pa Luka 16:10, tshidi Yezu wamba mu mvese eu tshivua bangabanga tshitangila dikuata mudimu ne “mamona a malu mabi,” mbuena kuamba ne: bubanji buetu anyi bintu bitudi nabi. Badi babibikila ne: mbibi bualu bintu ebi, ne nangananga mfranga, bidi ku bukokeshi bua bantu babi. Kabidi, dijinga dia kupeta bubanji didi mua kufikisha ku bienzedi bibi. Tudi tuleja lulamatu patudi bikale ne meji mu mushindu utudi tukuata mudimu ne bintu bietu. Pamutu pa kukuata nabi mudimu anu bua malu adi atusankisha nkayetu, tudi mua kuenza nabi mudimu bua kuyisha malu a Bukalenge kumpala ne kuambuluisha badi mu dikenga. Tuetu bikale ne lulamatu lua mushindu eu, netudie bulunda ne Yehowa Nzambi ne Yezu Kristo, bena ‘nzubu ya tshiendelele.’ Nebatubueje mu nzubu eyi, pa kutupesha muoyo wa tshiendelele mu diulu anyi mu Mparadizu pa buloba.

11. Bua tshinyi tudi ne bua kumvuija bantu ne: tudi tuanyisha mapa adi ambuluisha mudimu udi Bantemu ba Yehowa benza pa buloba bujima?

¹¹ Tangila kabidi tshitudi tupetesha bantu batudi tushila Bible ne mikanda ya kumulonga nayi patudi tumanyisha mukenji wa Bukalenge ne tubumvuija ne: tudi tuitaba mapa adi ambuluisha mudimu udi basadidi ba Yehowa benza pa buloba bujima. Katuenaku tubapetesha mushindu wa kukuatabu pabu mudimu bimpe ne bintu biabu anyi? Nansha mudi mêyi adi mu Luka 16:10 atangila bangabanga mushindu wa kukuata mudimu ne bintu, dîyi dinene didimu didi kabidi ditangila nsombelu mikuabu.

Bululame budi ne mushinga

12, 13. Mmu malu kayi mutudi ne bua kuleja bululame?

¹² Mupostolo Paulo wakafunda ne: ‘Tudi tuitabujibua ne: tudi ne mioyo-mikese mimpe, tudi basue kuenda bimpe mu malu onso.’ (Ebelu 13:18) Bushuwa “malu onso” adi akonga ne aa adi atangila malu a mfranga. Katuena tujingakana bua kufuta mabanza ne bitadi ne katuena tuibila to. Bua tshinyi tudi tuenza nanku? Bualu  tudi basue kuikala ne kondo ka muoyo kimpe ne nangananga bualu tudi banange Nzambi ne tutumikila mêyi ende. (Lomo 13:5, 6) Tutu tuenza tshinyi patudi tuangula tshintu tshidi katshiyi tshietu? Tudi tutshipingajila muenatshi. Kumvuija muntu tshivua tshitusake bua kumupingajila tshintu tshiende kutu kupetesha mushindu muimpe wa kuyisha bulelela.

¹³ Kuikala ne lulamatu ne kuenda bimpe mu malu onso kudi kulomba kuikala muena bululame ku mudimu. Bululame mu ngenzelu wetu wa mudimu budi bukoka ntema ya bantu kudi Nzambi utudi tutendelela. Katuena ‘tuiba’ dîba pa kuikala ne lulengu. Kadi, tudi tuenza mudimu bikole anu bu badi benzela Yehowa. (Efeso 4:28; Kolosai 3:23) Mu dimue ditunga dia ku Mputu badi batshinka ne: muena mudimu umue pa basatu utu ulomba mukanda wa kudi munganga bua kushala kumbelu utu ushima disama. Basadidi balelela ba Nzambi kabatu badinga bua kupumbisha ku mudimu nansha. Imue misangu, batu babandisha Bantemu ba Yehowa mianzu bualu bamfumu babu ba mudimu batu bamona bululame buabu ne mudimu mukole utubu benza.​—Nsumuinu 10:4.

Lulamatu mu mudimu wetu wa buambi

14, 15. Ngimue mishindu kayi itudi mua kuleja ne: tudi ne lulamatu mu mudimu wetu wa buambi?

¹⁴ Mmunyi mutudi tuleja ne: tudi ne lulamatu mu mudimu udibu batupeshe? Bible udi wamba ne: ‘Tufilafile kudi Nzambi mulambu wa kumutumbisha nawu, udi biawu mamuma a mishiku idi ijukula ditabuja dia dîna diende.’ (Ebelu 13:15) Mushindu wa kumpala utudi mua kuleja ne: tudi ne lulamatu mu mudimu wa buambi mpatudi tuwenza pa tshibidilu. Kudiku bualu budi mua kutupangisha ngondo mujima bua kuakula bua Yehowa ne bua malu adiye mulongolole anyi? Kudifila pa tshibidilu mu mudimu wa buambi kudi kuambuluisha bua kulengeja mudimu wetu ne kupatula bipeta bimpe.

¹⁵ Mushindu mukuabu muimpe wa kuleja ne: tudi ne lulamatu mu mudimu wa buambi mpa kulonda mibelu idi mu Tshibumba tshia Nsentedi ne mu Mudimu wetu wa Bukalenge. Patudi tudilongolola ne tukuata mudimu ne ngenyi milenga idimu, katuenaku tumona ne: mudimu wetu udi utamba kupatula bipeta bimpe anyi? Patudi tupeta muntu udi ne dijinga dia kuteleja mukenji wa Bukalenge, tutuku tulondakaja lukasa dijinga edi anyi? Netuambe tshinyi bua malonga a Bible atudi mua kutuadija ne bantu badi basankidila bulelela? Tudiku bantu ba kueyemena ne badi ne lulamatu mu dilombola malonga aa pa tshibidilu anyi? Tuetu bikale ne lulamatu mu buambi tudi mua kupeta muoyo tuetu bine ne badi batuteleja kabidi.​—1 Timote 4:15, 16.

Tudilame ku malu a pa buloba

16, 17. Mmu malu kayi mutudi mua kuleja ne: tudi batapuluke ne bena panu?

¹⁶ Yezu wakasambila bua bayidi bende ne:  ‘Ngakubapa dîyi diebe, ba pa buloba badi nabu lukuna, bualu bua bobu kabena ba pa buloba, bu mundi meme tshiyi wa pa buloba. Tshiena nkulomba ne: Ubumushe pa buloba; ndi nkulomba ne: Ubasungile kudi mubi. Bobu kabena ba pa buloba, bu mundi meme tshîyi wa pa buloba.’ (Yone 17:14-16) Tudi mua kuikala badisuike bua kushala batapuluke ne ba pa buloba mu malu manene, bu mudi dibenga kubuelakana mu malu a tshididi, mu mafesto ne bilele bia bitendelelu ne mu tshiendenda. Kadi netuambe tshinyi bua malu makese? Tudiku mua kuikala bamane kubuela mu njila ya bena panu katuyi bamanye anyi? Tshilejilu, tuetu katuyi batangile bimpe, mvuadilu wetu udi mua kulua katshiyi wa kanemu ne kayi muakanyine. Kuikala ne lulamatu kudi kulomba kuikala ‘ne kalolo ne bupuekele’ mu mvuadilu ne ndengejilu wa mubidi. (1 Timote 2:9, 10) Bulelela, “katuena tulenduisha muntu mu bualu, bua mudimu wetu kaubandibu. Kadi mu malu onso tudi tudimanyisha bu bena mudimu ba Nzambi.”​—2 Kolinto 6:3, 4.

¹⁷ Bu mutudi basue kutumbisha Yehowa, tudi tuvuala bilamba ne kanemu patudi tuya mu bisangilu bia tshisumbu, nansha patudi tudisangisha bantu ba bungi mu mpuilu ne mu mpungilu. Mvuadilu wetu udi ne bua kuikala muakane ne wa tshitembu. Udi wambuluisha bua kuyisha bantu badi batumona. Nansha banjelu badi bamona mudimu wetu, anu muvuabu bamona wa Paulo ne wa bena Kristo nende. (1 Kolinto 4:9) Bushuwa, tudi ne bua kuikala misangu yonso ne mvuadilu muakanyine. Bua bamue bantu, kuikala ne lulamatu mu disungula bilamba kudi mua kumueneka bu muanda mukese, kadi ku mêsu kua Nzambi mbualu bua mushinga mukole.

Masanka adi afumina ku dishala ne lulamatu

18, 19. Mmasanka kayi adi afumina ku dikala ne lulamatu?

¹⁸ Badi babikila bena Kristo balelela ne: “balami bimpe ba ngasa muvulangane wa Nzambi.” Ke bualu kayi badi benza malu bilondeshile ‘bukole budi Nzambi ubapa.’ (1 Petelo 4:10, 11) Bu mutudi balami, mbatupeshe kabidi bintu bidi kabiyi bietu: mishindu mishilangane ya ngasa peshi bulenga bua Nzambi budi kabuyi butuakanyine, pamue ne mudimu wa buambi. Patudi tushala balami bimpe, tudi tueyemena “bukole ebu bupite” budi Nzambi ufila. (2 Kolinto 4:7, MMM) Bushuwa edi ndilongesha dilenga diatuambuluisha bua kutantamena nansha ntatu ya mushindu kayi mu matuku atshilualua!

¹⁹ Mufundi wa misambu wakafunda ne: ‘Nangayi Yehowa, nuenu bansantu bende bonso. Yehowa udi ulama badi bananukila kumueyemena.’ (Musambu 31:23) Tudisuikayi bua kuikala bena lulamatu, beyemene tshishiki Yehowa udi ‘Musungidi wa bantu bonso, nangananga wa badi bamuitabuja.’​—1 Timote 4:10.

Udi muvuluke anyi?

• Bua tshinyi tudi ne bua kuikala ‘ne lulamatu mu bintu bikese’?

• Mmushindu kayi utudi mua kuleja lulamatu

mu malu adi atangila bululame?

mu buambi?

mu dishala batapuluke ne bena panu?

[Nkonko ya dilonga]

[Bimfuanyi mu dibeji 26]

Muntu udi ne lulamatu mu malu makese, udi kabidi ne lulamatu mu a bungi

[Tshimfuanyi mu dibeji 29]

‘Endayi mu bululame mu malu onso’

[Tshimfuanyi mu dibeji 29]

Mushindu muimpe wa kuleja lulamatu mpa kudilongolola bimpe bua mudimu wa buambi

[Tshimfuanyi mu dibeji 30]

Ikala ne bupuekele mu mvuadilu ne mu ndengejilu webe wa mubidi