Nkonko ya babadi

Muaku “bumue” udi mu Sefanya 2:3 udi umvuija ne: basadidi ba Nzambi ki mbajadike bikalabu mua kupeta muoyo wa tshiendelele anyi?

Tudi tubala mvese eu nunku: ‘Kebayi Yehowa, nuenu bena kalolo bonso ba pa buloba, badi batumikila mikenji yende; kebayi buakane, kebayi kalolo; bumue nebanusokoke mu dituku dia tshiji tshia Yehowa.’ Bua tshinyi mvese eu udi wamba ne: “bumue”?

Bua kumvua bimpe tshikala Yehowa ne bua kuenzela bantu badi bamulamate ku Armagedone, mbimpe tuetu kuvuluka tshidi Bible ulongesha pa tshikala Nzambi ne bua kuenzela bantu bafua kumpala kua tshikondo atshi tshia dilumbuluisha. Bamue nebabishibue bua kupeta muoyo kabayi ne bua kufua kabidi bu bifukibua bia mu nyuma bia mu diulu; bakuabu nebabishibue bobu pa buloba apa ne ditekemena dia kuikala ne muoyo wa kashidi mu Mparadizu. (Yone 5:28, 29; 1 Kolinto 15:53, 54) Bikala Yehowa mua kuvuluka bena lulamatu bende bikala bafue kumpala kua Armagedone ne kubapa difutu diabu, bushuwa neenze bia muomumue bua basadidi bende bikala ne muoyo mu dituku adi dia tshiji tshiende.

Mêyi adi mupostolo Petelo mufunde ku nyuma wa Nzambi adi kabidi atukankamija. Wakafunda ne: ‘[Nzambi] wakalama Noa, muambi wa malu mimpe ne bantu bakuabu muanda mutekete pakatumaye mâyi manene pa buloba bua bantu babi; ne wakandamuja misoko ya Sodoma ne Amola butue bua kapia, wakayipisha ne dibutuka, ne wakapandisha Lota, muntu muakane . . . [Yehowa] udi mumanye mua kupandisha bantu bende bimpe mu mateyi abu, ne mua kulama bantu babi too ne palua dituku dia kulumbulula [bua kubabutula].’ (2 Petelo 2:5-9) Nansha muvua Yehowa mubutule bantu babi kale, wakalama basadidi bende ba lulamatu Noa ne Lota. Bia muomumue, Yehowa neasungile bantu badi bamulamate pabutulaye bantu babi ku Armagedone. Bantu bakane bikale “tshisumbu tshinene” nebapande.​—Buakabuluibua 7:9, 14.

Nunku bidi bimueneka ne: ki mbafunde muaku “bumue” mu Sefanya 2:3 bua kuleja mudi bantu badi Nzambi muanyishe kabayi bajadike bikalaye mua kubalama ne muoyo nansha. Tshidibi, muntu udi mua kusokokibua mu dituku dia tshiji tshia Yehowa anu padiye utuadija kukeba buakane ne kalolo anyi bupuekele. Bua kushalaye ne muoyo, udi ne bua kutungunuka ne kukeba bupuekele ne buakane.​—Sefanya 2:3.

[Tshimfuanyi mu dibeji 31]

‘Yehowa udi mumanye mua kupandisha bantu bende bimpe mu mateyi abu’