Yehowa mmubale ‘nsuki ya ku mitu yenu menemene’

‘Mushamusha umue kawena upona panshi, anu pitabuja Tatu wenu. Nsuki ya ku mitu yenu menemene idi mibala yonso.’​—MATAYO 10:29, 30.

1, 2. (a) Bua tshinyi Yobo wakela meji ne: Nzambi mmumulekele? (b) Mêyi a Yobo adiku umvuija ne: uvua muele Yehowa nyima anyi? Umvuija.

 MUNTU mukuabu wakamba ne: “[Nzambi] wanyi, ndi nkuela lubila, kuyi ungitaba, ndileja kuudi kuyi untangila. Udi muandamuke muena tshikisu ku mesu kuanyi, tshianza tshiebe tshia bukole tshidi tshinkengesha.” Muntu wakamba mêyi aa uvua ne kanyinganyinga kakole. Ne kanyinganyinga kende kakena kakemesha to, bualu uvua mujimije bintu bivuaye udiambuluisha nabi ku mubidi, tshipupu tshikole tshivua tshishipe bana bende ne mpindieu disama divua dimukuate divua dimuyobeshe. Muntu au uvua Yobo, ne dikenga diende dipite bukole ndifunda mu Bible bua kutulongesha.​—Yobo 30:20, 21, MMM.

² Mêyi a Yobo adi mua kumueneka bu adi aleja ne: uvua muele Nzambi nyima, kadi kabivua nanku to. Yobo uvua uleja patupu kanyinganyinga kavua mu mutshima wende. (Yobo 6:2, 3) Kavua mumanye ne: Satana ke uvua mukebeshe ntatu yende, ke bualu kayi wakatupakana pa kuela meji ne: Nzambi uvua mumulekele. Musangu mukuabu, Yobo wakambila Yehowa ne: ‘[Bua] bualu kayi wewe udi usokoka mpala webe kundi, ne udi umbala bu muena lukuna webe?’ *​—Yobo 13:24.

3. Padi makenga atufikila, ntshinyi tshidi mua kutuvuila mu lungenyi?

³ Lelu, bantu ba Yehowa bavule badi mu ntatu miangatangane bua mvita, bimvundu mu malu a tshididi ne a mu nsombelu, bipupu, bukalakaje, masama, bupele bukole ne dikandika mudimu wabu kudi mbulamatadi. Pamuapa wewe pebe udi ne ntatu ya mushindu kampanda anyi kansanga. Udi mua kuela meji imue misangu ne: Yehowa udi usokoka mpala wende kuudi. Udi mumanye bimpe mêyi adi mu Yone 3:16 a ne: ‘Nzambi wakatamba kusua ba pa buloba, yeye wakabapa Muanende umuepele mulela.’ Kadi paudi mu dikenga kuyi umona kua kupetela disulakana, udi mua kudiebeja ne: ‘Bushuwa, Nzambi mmunange anyi? Mmumone dikenga dindi nadi edi anyi? Utuku uditatshisha buanyi meme anyi?’

4. Nnsombelu kayi uvua Paulo ne bua kutantamena, ne mmu mushindu kayi mudi nsombelu wa nunku mua kututekesha?

⁴ Tangila tshiakafikila mupostolo Paulo. Wakafunda ne: ‘Ngakapebua tshintu bu dieba mu mubidi wanyi bu muanjelo wa Satana bua kunkengeshakengesha,’ ne wakasakidila ne: ‘Ngakalomba Mukalenge misangu isatu ne: tshiumuke kundi.’ Yehowa wakumvua kulomba kuende. Nansha nanku, wakaleja Paulo ne: kavua ne bua kujikija bualu abu mu tshishima to. Kadi Paulo uvua ne bua kueyemena bukole bua Nzambi bua bumuambuluishe amone mua kutantamena ‘tshintu [tshivua] bu dieba mu mubidi wende.’ * (2 Kolinto 12:7-9) Anu bu Paulo, udi mua kuikala ne lutatu lua munanunanu. Pamuapa udi udiebeja ne: ‘Mudibi bimueneka ne: Yehowa kêna muenze bualu nansha bumue bua lutatu luanyi, bidiku bileja ne: kêna mumanye nsombelu wanyi anyi kêna uditatshisha bua bualu buanyi anyi?’ Diandamuna didi ne: tòo,  kabiena nanku to! Diditatshisha bikole dia Yehowa bua yonso wa ku basadidi bende ba lulamatu ndileja mu mêyi avua Yezu muambile bapostolo bende patshivuaye ufuma ku dibasungula. Tumonayi mudi mêyi ende mua kutukolesha lelu.

“Kanutshinyi”: bua tshinyi?

5, 6. (a) Mmunyi muakambuluisha Yezu bapostolo bua kabikadi ne buôwa bua malu atshivua ne bua kulua? (b) Mmunyi muakaleja Paulo dieyemena dia se: Yehowa uvua uditatshisha buende?

⁵ Yezu uvua mupeshe bapostolo bukole bua pa buabu, ‘bukole bua kupitabu nabu nyuma ya bukoya, ne bua kuyumushabu munda mua bantu, ne bua kukoleshabu nabu bantu bavua ne masama ne matekete a mishindu yonso.’ Kadi kabivua biumvuija ne: kabakupeta ntatu ne makenga to. Yezu wakumvuija mu bule ne mu butshiama amue malu avua ne bua kubafikila. Tshikole wakababela ne: ‘Kanutshinyi badi bashipa mubidi, kadi kabayi bamanye mua kushipa muoyo; kadi nutshine udi mumanye mua kujimija muoyo ne mubidi kabidi mu Ngena.’​—Matayo 10:1, 16-22, 28.

⁶ Yezu wakapesha bapostolo bende mifuanu idibi bua kubambuluisha bua kumvuabu ne: kabena ne bua kuikala ne buôwa. Wakabambila ne: ‘Kabatu bapana mishamisha ibidi ku dikuta dikese anyi? Mushamusha umue kawena upona panshi, anu pitabuja Tatu wenu. Nsuki ya ku mitu yenu menemene idi mibala yonso. Nunku kanutshinyi, mushinga wenu udi mutambe wa mishamisha ya bungi.’ (Matayo 10:29-31) Manya ne: Yezu wakaleja dipetangana didi pankatshi pa dibenga kuikala ne buôwa patudi tutuilangana ne ntatu ne dikala ne dieyemena dia se: Yehowa udi uditatshisha bua bualu buetu. Bidi bimueneka ne: mupostolo Paulo uvua ne dieyemena dia nunku eu. Wakafunda ne: ‘Bikala Nzambi netu, nganyi udi mumanye mua kutupumbisha? Yeye kakimina Muana wende mene, kadi wakamufila bua buonso buetu, munyi muapidiaye kutupa nende kabidi bintu bionso patupu?’ (Lomo 8:31, 32) Nansha wewe utuilangana ne ntatu kayi, wewe pebe udi mua kuikala mushindike ne: Yehowa udi uditatshisha bua bualu buebe paudi ushala ne lulamatu kudiye. Bualu ebu budi butamba kumvuika bimpe patudi tukonkonona menemene mubelu uvua Yezu mupeshe bapostolo bende.

Mushinga wa mushamusha

7, 8. (a) Mmunyi muvuabu bangata mishamisha mu tshikondo tshia Yezu? (b) Bu mudibi bimueneka, bua tshinyi mu Matayo 10:29, badi batela muaku a tshiena-Gelika udi umvuija “mishamisha” mikese?

⁷ Mifuanu ya Yezu idi yumvuija bimpe mudi Yehowa uditatshisha bua yonso wa ku basadidi Bende. Diambedi tangila tshilumbu tshia mishamisha. Mu tshikondo tshia Yezu, bavua badia mishamisha, kadi bu muvuayi inyanga bia pa madimi, bavua bayimona bu tunyunyu tubi. Ivua ya bungi be ne kayivua ne mushinga, bienza ne: bavua mua kusumba mishamisha ibidi ku sentime mishadile ku itanu (ya mu Amerike)  mu makuta a lelu. Bungi bua makuta au buvudija misangu ibidi buvua mua kusumba mishamisha itanu pamutu pa inayi, muitanu au bausakidila patupu bienze bu ne: kawena ne mushinga nansha mukese!​—Luka 12:6.

⁸ Elabi kabidi meji bua bunene bua kanyunyu aka ka patupu. Pa kufuanyikija mushamusha ne nyunyu mikuabu, nansha wowu mumane kukola munyi udi anu mukese. Pabi muaku wa tshiena-Gelika udibu bakudimune ne: “mishamisha” mu Matayo 10:29 udi wakula nangananga bua mishamisha mikese. Bidi bimueneka ne: Yezu uvua musue bua bapostolo bende bele meji ku kanyunyu kakese menemene.

9. Ndungenyi kayi lua mushinga ludi luleja mu mufuanu wa Yezu wa mishamisha?

⁹ Mufuanu wa Yezu wa mishamisha udi ushindika lungenyi lua mushinga: Tshidi tshimueneka katshiyi ne mushinga ku mêsu kua bantu tshidi ne mushinga ku mêsu kua Yehowa Nzambi. Yezu wakashindika kabidi bulelela ebu pakasakidilaye ne: mushamusha mukese kawena mua ‘kupona panshi’ Yehowa kayi mumanye to. * Dilongesha ndiumvuike bimpe. Bikala Yehowa Nzambi mua kumanya kanyunyu katambe bukese kadi kakayi ne mushinga, kenaku utamba kuditatshisha padi muntu udi umuenzela mudimu ukenga anyi?

10. Tshiambilu etshi: ‘Nsuki ya ku mitu yenu menemene idi mibala yonso’ tshidi ne mushinga kayi?

¹⁰ Pa kumbusha mufuanu wende wa mishamisha, Yezu wakamba kabidi ne: ‘Nsuki ya ku mitu yenu menemene idi mibala yonso.’ (Matayo 10:30) Dîyi edi ndikese, kadi didi diya mu buondoke bua bualu dikolesha lungenyi lua mu mufuanu wa Yezu wa mishamisha. Anji elaku meji: pa tshibidilu mutu wa muntu utu ne nsuki mitue ku 100 000. Bua nsuki ya bungi, lusuki lumue lutu anu lumueneka lufuane lukuabu, ne kakutu lusuki lumue lutu lumueneka lukumbanyine kulutangila mushindu wa pa buawu to. Pabi, Yehowa Nzambi udi utangila ne ubala lusuki ne lusuki. Bu mudibi nanku, kudiku kabualu kampanda ka nsombelu wetu kadi Yehowa kayi mua kumanya anyi? Kakuyi mpata, Yehowa mmujingulule tshidi yonso wa ku basadidi bende. Eyowa, udi “utangila mu mutshima.”​—1 Samuele 16:7.

11. Mmunyi muvua Davidi muleje dieyemena diende bua se: Yehowa uvua uditatshisha buende yeye?

¹¹ Davidi uvua mumone dikenga dia bungi uvua ne dieyemena dia se: Yehowa mmumumanye. Wakafunda ne: ‘Yehowa, wewe wakutangila munda muanyi, wakummanya! Wewe muine udi mumanye pangashikama panshi ne pangajuka; udi ujingulula meji anyi pantshidi kule.’ (Musambu 139:1, 2) Wewe pebe ikala mujadike ne: Yehowa mmukumanye. (Yelemiya 17:10) Kuedi meji lukasa ne: kuena ne mushinga ku mêsu kua Yehowa to, kayi mufuane kukumona ne mêsu ende atu amona bionso nansha!

‘Wele binsonji bianyi mu mulondo webe’

12. Mmunyi mutudi bamanye ne: Yehowa ki mmupange kumanya bimpe makenga a bantu bende?

¹² Yehowa mmumanye basadidi bende bonso muntu ne muntu, ne kabidi mmumanye bimpe ntatu idi yonso upetangana nayi. Tshilejilu, pavua bena Isalele bamona dikenga mu bupika, Yehowa wakambila Mose ne: ‘Ngakutangila dikenga dia bantu banyi badi mu Ejipitu bulelela, ngakumvua muadi wabu bualu bua tupita tuabu; bualu bua ndi mumanye kanyinganyinga kabu.’ (Ekesode 3:7) Bushuwa, bidi bikankamija  pa kujingulula ne: patudi ne lutatu, Yehowa udi umona tshidi tshitufikile ne udi umvua mbila yetu. Bulelela, kêna ulengulula makenga etu nansha.

13. Ntshinyi tshidi tshileja ne: Yehowa udi utata bushuwa padi basadidi bende batata?

¹³ Diditatshisha dia Yehowa bua bantu badi badie nende malanda didi kabidi dimuenekela ku tshivuaye umvua bua bena Isalele. Nansha muvuabu bakenga bua mutu mukole wabu, Yeshaya wakamba bua Yehowa ne: ‘Mu makenga abu onso yeye wakumvua dikenga.’ (Yeshaya 63:9) Nunku bu muudi musadidi wa lulamatu wa Yehowa, ikala mumanye ne: paudi utata, Yehowa pende udi utata. Kabienaku bikusaka bua kuakamangana ne ntatu kuyi utshina ne bua kutungunuka ne kuenza muebe muonso bua kumusadila anyi?​—1 Petelo 5:6, 7.

14. Mmu nsombelu kayi muakafunda Davidi Musambu wa 56?

¹⁴ Dituishibua dia Mukalenge Davidi bua se: Yehowa uvua umutabalela ne utata pavuaye utata ndimueneke mu Musambu wa 56, uvua Davidi mufunde pavuaye unyema Mukalenge Shaula uvua ukeba kumushipa. Davidi wakanyemena ku Gata, kadi wakatshina ne: bavua mua kumukuata pakamumanya bena Peleshete. Wakafunda ne: ‘Badi bangalamina badi bandiatakaja muinshi mua makasa dinda too ne ku dilolo; bualu bua ba bungi badi baluangana nanyi mu dipetu diabu.’ Davidi wakalomba Yehowa dikuatshisha bu muvuaye mu njiwu. Wakamba ne: ‘Dinda too ne ku dilolo badi bakeba kunyanga malu anyi; badi bangelela meji abu onso bua kungenzelabu bibi.’​—Musambu 56:2, 5.

15. (a) Ntshinyi tshivua Davidi usua kuamba pakalombaye Yehowa bua ele binsonji biende mu mulondo anyi abifunde mu mukanda? (b) Patudi mu nsombelu udi uteta ditabuja dietu, ntshinyi tshitudi ne bua kuikala bajadike?

¹⁵ Pashishe, Davidi wakamba mêyi aa adi akemesha adi mu Musambu 56:8 a ne: ‘Wewe udi ubala masumpakana anyi; wele binsonji bianyi mu mulondo webe. Kabiena bifundibua mu mukanda webe anyi?’ Bulelela, edi ndiumvuija didi dilenga ku muoyo dia mudi Yehowa ututabalela ne bulenga. Patudi tusumpakana, tudi mua kuela mbila ne binsonji kudi Yehowa. Nansha muntu mupuangane Yezu wakenza nanku. (Ebelu 5:7) Davidi uvua mutuishibue ne: Yehowa uvua umutangila ne uvua ne bua kuvuluka lutatu luende, bienze bu udi ulama binsonji biende mu mulondo wa tshiseba anyi ubifunda mu mukanda kampanda. * Pamuapa udi wela meji ne: binsonji biebe nebiuwuje tshitupa tshinene tshia mulondo au anyi mabeji a bungi a mukanda au. Bikalabi nanku, kolesha muoyo. Bible udi utujadikila ne: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’​—Musambu 34:18.

Dilua mulunda wa pa muoyo wa Nzambi

16, 17. (a) Mmunyi mutudi bamanye ne: Yehowa kêna ulengulula ntatu idi bantu bende bapeta? (b) Ntshinyi tshidi Yehowa muenze bua bantu bamone mua kudia nende bulunda?

¹⁶ Muanda wa ne: Yehowa udi ubala ‘nsuki ya ku mutu wetu’ udi utuleja mutudi ne diakalenga dia kutendelela Nzambi udi ututangila ne udi ututabalela. Nansha mutudi bashale bindile buloba bupiabupia budibu batulaye bua ntatu yonso ne makenga kujikabi, lelu eu Yehowa udi wenzela tshisamba tshiende bualu bua dikema. Davidi wakafunda ne: ‘Bulunda bujalame bua Yehowa budi kudi badi bamutshina, ne yeye udi ubamanyisha tshipungidi tshiende.’​—Musambu 25:14.

¹⁷ “Bulunda bujalame bua Yehowa.” Mbualu budi mua kumueneka bu budi kabuyi mua kuenzeka bua bantu bapange bupuangane! Pabi, Yehowa udi ubikila aba badi bamutshina bua kumuendela buenyi mu ntenta wende. (Musambu 15:1-5) Ntshinyi tshidi Yehowa wenzela benyi bende? Bilondeshile Davidi, udi ubamanyisha tshipungidi tshiende. Yehowa udi ubakuatshila malu, ‘usokoluela’ baprofete bualu buende bua bamanye malu adiye mulongolole ne tshidibu ne bua kuenza bua kuikala ne nsombelu udi mu diumvuangana nawu.​—Amosa 3:7.

18. Mmunyi mutudi bamanye ne: Yehowa mmusue bua tuikale nende mu malanda mashême?

 ¹⁸ Bushuwa, bidi bienza disanka bua kumanya ne: tuetu bantu bapange bupuangane tudi mua kulua balunda ba pa muoyo ba Yehowa Nzambi Mutambe bunene. Udi utubela bua tuetu kudia nende bulunda bua mushindu eu. Bible udi wamba ne: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:8) Yehowa mmusue bua tuikale nende mu malanda mashême. Bushuwa, ukadi mene mulongolole malu bua bienzeke nanku. Mulambu udi upikula wa Yezu mmutunzuluile njila bua tuetu kudia bulunda ne Nzambi wa Bukole-Buonso. Bible udi wamba ne: “Tuetu tudi ne dinanga, bualu bua yeye wakadianjila kutunanga.”​—1 Yone 4:19.

19. Mmunyi mudi ditantamena makenga mua kukolesha malanda etu ne Yehowa?

¹⁹ Malanda au mashême adi atamba kukola patudi tutantamena makenga. Muyidi Yakobo wakafunda ne: ‘Ditantamana dikale ne mudimu wadi muimpe tshishiki, bua nuenu nuikale bakane tshishiki, bakumbane mu malu onso, kanuyi nupanga mu bualu bumue.’ (Yakobo 1:4) Ditantamena lutatu didi dikumbaja “mudimu” kayi? Vuluka ‘tshintu [tshivua] bu dieba mu mubidi’ wa Paulo. Ntshinyi tshivua ditantamana dikumbaje buende yeye? Paulo wakamba bua ntatu yende ne: ‘Nunku ndi ne disanka pa kuditumbisha mu matekete anyi, bua bukole bua Kristo buikale munda muanyi. Nunku ndi ne disanka mu matekete ne mu bipendu ne mu malu adi angenzeja ku bukole ne mu makenga ne mu kanyinganyinga bua bualu bua Kristo; bua pangikala mutekete, mpandi ne bukole.’ (2 Kolinto 12:9, 10) Paulo uvua mumanye ne: Yehowa uvua mua kumupesha bukole buvua bukengedibua, ‘bukole bupite [bua pa tshibidilu]’ bikalabi bilomba kuenza nanku, bua amone mua kutantamana. Ne bualu ebu pabu buakamusemeja pabuipi ne Kristo ne Yehowa Nzambi.​—2 Kolinto 4:7; Filipoi 4:11-13.

20. Bua tshinyi tudi mua kuikala bajadike ne: Yehowa neatukuatshishe ne neatusambe patudi mu ntatu?

²⁰ Pamuapa Yehowa mmulekele ntatu yebe itungunuka. Bikalabi nanku, vuluke tshidiye mulaye badi bamutshina: ‘Tshiena nkulekela nansha kakese, tshiena nkushiya tshianana.’ (Ebelu 13:5) Udi mua kupeta dikuatshisha ne busambi bu nunku. Yehowa mmubale ‘nsuki ya ku mutu webe menemene.’ Udi umona ditantamana diebe. Udi umvua dikenga diebe. Udi uditatshisha ne muoyo mujima bua bualu buebe. Ne ‘kakupua muoyo mudimu webe ne dinanga diwakaleja bua dîna diende’ nansha.​—Ebelu 6:10.

[Mêyi adi kuinshi]

Udi muvuluke anyi?

• Mmalu kayi adi mua kufikisha muntu ku didiumvua ne: Nzambi mmumulekele?

• Ndilongesha kayi ditudi tupeta mu mufuanu wa Yezu wa mishamisha ne wa mudi nsuki ya ku mitu yetu mibala?

• Diela binsonji bia muntu mu “mulondo” wa Yehowa anyi dibifunda mu “mukanda” wende didi diumvuija tshinyi?

• Mmunyi mutudi mua kufika ku didia ‘bulunda bujalame ne Yehowa’?

[Nkonko ya dilonga]

[Tshimfuanyi mu dibeji 22]

Bua tshinyi Yehowa kakumbusha ‘tshintu [tshivua] bu dieba mu mubidi’ wa Paulo?

[Tshimfuanyi mu dibeji 23]

Ntshinyi tshidi mufuanu wa Yezu wa mishamisha mua kutulongesha?

[Mêyi a dianyisha]

© J. Heidecker/​VIREO

[Tshimfuanyi mu dibeji 25]

Pa kubala Bible pa tshibidilu, tudi mua kujadika ne: Nzambi utu utabalela muntu ne muntu