Yehowa udi “mufutshi wa badi bamukeba”

‘Muntu udi ulua kudi Nzambi budiye nabu mbua kuitabuja ne: Yeye udiku, ne udi mufutshi wa badi bamukeba.’​—EBELU 11:6.

1, 2. Bua tshinyi bamue ba ku basadidi ba Yehowa badi baluangana ne meji mabi adibu badielela?

 BARBARA * udi wamba ne: “Ndi Ntemu wa Yehowa kukadi bidimu bitue ku 30, kadi tshitu ndiumvua mukumbanyine bua bambikile nanku to. Nansha mundi muenze bumpanda-njila ne mupete midimu mikuabu ya pa buayi, nansha umue wa kudiyi kawena mukumbane bua kungitabijija mu mutshima wanyi ne: ndi muakanyine kubikidibua Ntemu to.” Keith udi uleja lungenyi lua muomumue, wamba ne: “Misangu mikuabu mvua ndiumvua tshiyi mukumbane bualu basadidi ba Yehowa badi ne malu a bungi a kusankila, kadi meme tshivua ne disanka to. Nunku mvua ndiumvua mupile, ne meji aa kaakalengeja nsombelu nansha.”

² Basadidi ba Yehowa bavule ba kale ne ba lelu batu baluangana ne meji a muomumue. Bikadiku bikufikile pebe anyi? Udi mua kuikala ne malu makupite mutu kadi bena kuitabuja nebe bamueneka bikale ne nsombelu muimpe, basanka ne kabayi ne lutatu. Ebi bidi mua kukufikisha ku diela meji ne: Yehowa ki mmukuanyishe anyi kuena muakanyine ntema yende. Kuedi meji lukasa ne: bidi nanku nansha. Bible udi utujadikila ne: ‘[Yehowa] kakapetula ne kakakenuka makenga a wakadi mu dikenga; kakasokoka mêsu ende kudiye, kadi wakamumvuila pakadilaye kudiye.’ (Musambu 22:24) Mêyi aa a  mulayi adi atangila Masiya adi aleja ne: Yehowa udi uteleja badi ne lulamatu kudiye ne udi ubafuta kabidi.

3. Bua tshinyi katuena basala ku makenga a panu?

³ Kakuena muntu udi musala ku makenga a panu, nansha mene bantu ba Yehowa. Tudi pa buloba budi bukokesha kudi Satana Diabolo muluishi munene wa Yehowa. (2 Kolinto 4:4; 1 Yone 5:19) Basadidi ba Yehowa ki mbakubibue mu tshishima ne bobu mene ke ba kumpala badi Satana uluisha. (Yobo 1:7-12; Buakabuluibua 2:10) Nunku too ne pakumbana tshikondo tshidi Nzambi mujadike, tudi ne bua ‘kutantamana mu makenga’ ne ‘kunanukila mu kutendelela’ bamanye ne: Yehowa udi uditatshisha buetu. (Lomo 12:12) Katuena ne bua kulekela ntatu ya panu itufikisha ku diela meji ne: Yehowa Nzambi wetu ki mmutunange to.

Bilejilu bia kale bia ditantamana

4. Fila bilejilu bia bamue basadidi ba Yehowa ba lulamatu bavua mu nsombelu ivua ibatatshisha.

⁴ Basadidi ba Yehowa ba kale ba bungi bavua ne bua kutantamena nsomblelu ivua ibatatshisha. Tshilejilu, ‘mutshima wa Hana wakatamba kunyingalala’ bualu kavua mulele, bua nanku uvua umona bu se: Nzambi uvua mumupue muoyo. (1 Samuele 1:9-11) Eliya wakumvua buôwa pavua Mukalenge mukaji Izebele umukeba bua kumushipa ne wakasambila Yehowa ne: ‘Kuakujika mpindieu, Yehowa angate muoyo wanyi, bualu bua meme tshiena mupite batatu banyi buakane.’ (1 Bakelenge 19:4) Mupostolo Paulo uvua ne bua kuikala mumvue bujitu bunene bua dipanga bupuangane pakatondaye ne: “Pandi musue kuenza bualu buimpe, amu bubi ke budi bumvuila.” Wakasakidila ne: “Ndi wa diakabi!”​—Lomo 7:21-24, MMM.

5. (a) Mmunyi muvua Hana, Eliya ne Paulo bafutshibue? (b) Mbusambi kayi butudi mua kupeta mu Dîyi dia Nzambi bituikala tuluangana ne meji mabi atudi tudielela munda?

⁵ Bushuwa, tudi bamanye ne: Hana, Eliya ne Paulo buonso buabu bakatantamena ntatu eku basadila Yehowa, ne Wakabafuta bimpe be. (1 Samuele 1:20; 2:21; 1 Bakelenge 19:5-18; 2 Timote 4:8) Nansha nanku, bakaluangana ne meji a munda a mishindu yonso: kanyinganyinga, dishikila dia muoyo ne buôwa. Nunku kabiena ne bua kutukemesha bituikala imue misangu tudielela meji mabi. Kadi tshiudi mua kuenza tshinyi padi tunyinganyinga tua mu nsombelu tukufikisha ku didiebeja ni Yehowa mukunange bushuwa? Udi mua kupeta busambi mu Dîyi dia Nzambi. Tshilejilu, mu tshiena-bualu tshishale tuvua bakule bua mêyi akamba Yezu a ne: Yehowa mmubale ‘nsuki ya ku mitu yenu menemene.’ (Matayo 10:30) Mêyi aa adi akankamija adi aleja ne: Yehowa udi utabalela bikole yonso wa ku basadidi bende. Vuluka kabidi mufuanu wa Yezu wa mishamisha. Bikala Yehowa umona dipona dia kamue ka ku tunyunyu etu, kênaku mua kutangila nsombelu wa lutatu uudi nende anyi?

6. Mmunyi mudi Bible mua kusamba badi baluangana ne meji mabi adibu badielela?

⁶ Bidiku bushuwa mua kuenzeka bua tuetu bantu bapange bupuangane tuikale ne mushinga ku mêsu kua Yehowa Nzambi, Mufuki wa bukole buonso anyi? Eyowa, kudi mvese mipite bungi mu Bible idi itujadikila bualu ebu. Tuetu bayilame mu mutshima wetu, netufike petu ku diamba bu muakamba mufundi wa Misambu ne: “Mu ntatu mipite bungi idi imvuila, dinsamba diebe didi disankisha muoyo wanyi.” (Musambu 94:19, MMM) Tukonkononayi amue a ku mêyi aa a mu Dîyi dia Nzambi adi akolesha bua atuambuluishe tujingulule bimpe menemene ne: Nzambi udi utuangata ne mushinga ne neatufute patudi tutungunuka ne kuenza disua diende.

Bantu ba Yehowa nkayende

7. Mmulayi kayi udi ukankamija uvua Yehowa mupeshe tshisamba tshibipe ku butuangaji bua Malaki?

⁷ Mu bidimu bia 400 kumpala kua bikondo bietu ebi, nsombelu mubi uvua munkatshi mua bena Yuda. Bakuidi bavua bitaba nyama ivua kayiyi mikumbanyine ne bavua bayilambula pa tshioshelu tshia Yehowa. Banzuji bavua ne kansungasunga. Buloji, dishima, diibila ne tshiendenda tshia masandi bivua bitangalake. (Malaki 1:8; 2:9; 3:5) Malaki wakambila tshisamba etshi tshivua tshinyanguke bikole mulayi udi ukemesha. Panyima pa bidimu, Yehowa uvua ne bua kuanyisha tshisamba  tshiende tshiakabidi. Tudi tubala ne: ‘Yehowa wa misumba udi wamba ne: Bobu nebikale banyi, mu dituku dindi ngenza malu aa, nebikale bantu banyi nkayanyi mene; meme nembafuile luse bu mudi muntu ufuila muanende mulume udi umukuatshila mudimu luse.’​—Malaki 3:17.

8. Bua tshinyi mu ngumvuilu mualabale, Malaki 3:17 udi ukumbanyina musumba munene?

⁸ Mulayi wa Malaki udi ukumbanyina lelu bena Kristo bela manyi, badi tshisamba tshia mu nyuma tshia bantu 144 000. Bushuwa, ntshisamba tshia ‘bantu ba [Yehowa] nkayende’ anyi “bantu badi bikale ba Nzambi muine.” (1 Petelo 2:9) Mulayi wa Malaki udi kabidi mua kukankamija bena mu ‘musumba munene’ badi ‘bimane kumpala kua nkuasa wa butumbi ne kumpala kua Muana wa mukoko, baluatshishibue mayeka matoke.’ (Buakabuluibua 7:4, 9) Badi balua tshisumbu tshimue ne bela manyi ku bulombodi bua Mulami umue Yezu Kristo.​—Yone 10:16.

9. Bua tshinyi bantu ba Yehowa badi ‘bantu bende nkayende’?

⁹ Mmunyi mudi Yehowa umona aba badi basungula bua kumusadila? Anu bu mudibi biamba mu Malaki 3:17, udi ubamona bu mutu tatu wa dinanga umona muanende wa balume. Tangila mudiye utua bantu bende makumbu ubabikila ne: “bantu banyi nkayanyi.” Nkudimuinu mikuabu idi ikudimuna tshiambilu etshi ne: “wanyi meme,” “tshindi natshi tshia mushinga mutambe bukole” anyi “mabue a mushinga mukole.” Bua tshinyi Yehowa udi wangata aba badi bamusadila ne mushinga nanku? Bualu udi Nzambi utu ne dianyisha. (Ebelu 6:10) Udi usemena pabuipi ne bantu badi bamusadila ne muoyo wabu mujima ne ubamona bu bantu ba mushinga wa pa buawu.

10. Mmunyi mudi Yehowa ukuba bantu bende?

¹⁰ Utuku ne tshintu tshiebe wewe tshia mushinga tshiutu wangata bu tshintu tshia pa buatshi anyi? Kutuku udienzeja bua kutshikuba anyi? Yehowa udi wenza bia muomumue ne ‘bantu bende nkayende.’ Bushuwa, kêna wepula bantu bende ku ntatu ne makenga onso a mu nsombelu to. (Muambi 9:11) Kadi Yehowa udi mua kukuba ne neakube basadidi bende ba lulamatu mu nyuma. Udi ubapesha bukole budibu nabu dijinga bua kutantamena lutatu luonso. (1 Kolinto 10:13) Ke bualu kayi Mose wakambila bantu ba Nzambi ba kale bena Isalele ne: ‘Nuikale ne bukole ne mitshima ya dikima. Yehowa, Nzambi wenu, yeye mene uyaya nenu; yeye kêna unupanga, kêna unulekela.’ (Dutelonome 31:6) Yehowa utu wenzela bantu bende malu a disanka. Badi ‘bantu bende nkayende’ ku mêsu kuende.

Yehowa udi “Mufutshi”

11, 12. Mmunyi mudi kujingulula Yehowa bu Mutufutshi kutuambuluisha bua kuluangana ne dielakana ditudi nadi munda?

¹¹ Tshijadiki tshikuabu tshia ne: Yehowa udi wangata basadidi bende ne mushinga ntshia se: udi ubafuta. Wakambila bena Isalele ne: ‘Yehowa wa misumba udi wamba ne: Nuntete mpindieu ne muanda eu, numone bingikala tshiyi mununzuluile bibi bia mu diulu, munulokeshile masanka, kanuyi nukengela bintu bikuabu kabidi.’ (Malaki 3:10) Bulelela, ndekelu wa bionso Yehowa neafute basadidi bende muoyo wa tshiendelele. (Yone 5:24; Buakabuluibua 21:4) Difutu edi dia mushinga kauyi bubadi didi dileja bunene bua dinanga dia Yehowa ne kalolo kende. Didi kabidi dileja ne: udi bulelela wangata ne mushinga aba badi basungula bua kumusadila. Kulonga mua kumona Yehowa bu Mufutshi muena kalolo kudi mua kutuambuluisha bua kuluisha dielakana dionso ditudi nadi bua mudi Nzambi utumona. Bulelela, Yehowa udi utulomba bua tumuangate bu Mufutshi wa bantu bende! Paulo wakafunda ne: ‘Muntu udi ulua kudi Nzambi budiye nabu mbua kuitabuja  ne: yeye udiku, ne udi mufutshi wa badi bamukeba.’​—Ebelu 11:6.

¹² Bushuwa, tudi tusadila Yehowa bualu tudi bamunange, ki nganu bualu udi ulaya bua kutufuta to. Kadi kulama mu mutshima wetu ditekemena dia difutu ki nkubi anyi ki nkuleja budinangi to. (Kolosai 3:23, 24) Bua dinanga didi nadi Yehowa kudi bantu badi bamukeba ne muoyo mujima ne bua mushinga udiye ubangata nawu, udi musue kubafuta yeye nkayende.

13. Bua tshinyi mulambu wa tshia bupikudi udi tshijadiki tshitambe bunene tshia dinanga dia Yehowa kutudi?

¹³ Mulambu wa tshia bupikudi ntshijadiki tshitambe bunene bua kuleja ne: bantu badi ne mushinga ku mêsu kua Yehowa. Mupostolo Yone wakafunda ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Mulambu udi upikula wa Yezu Kristo kawena upetangana ne lungenyi lua se: katuena ne mushinga ku mêsu kua Yehowa anyi lua ne: ki mmutunange to. Bushuwa, bu mudi Yehowa mufute mushinga mukole nunku eu, mufile Muanende umuepele mulela bua bualu buetu, udi ne bua kuikala mutunange bikole.

14. Ntshinyi tshidi tshileja muvua Paulo wangata mulambu wa tshia bupikudi?

¹⁴ Nunku, bikala meji mabi mua kukuvuila munda, ela meji bua mulambu udi upikula. Eyowa, angata mulambu eu bu tshintu tshidi Yehowa mukupeshe yeye nkayende. Ke muakawangata mupostolo Paulo. Vuluka muakambaye ne: “Ndi wa diakabi!” Kadi pashishe kuluaye kuamba ne: ‘Ndi nsakidila Nzambi bua Yezu Kristo Mukalenge wetu,’ ‘wakannanga ne wakadifila bua bualu buanyi.’ (Lomo 7:24, 25; Galatia 2:20) Paulo kakamba mêyi aa bua kudiela mulu to. Uvua amu mumanye ne: Yehowa uvua umuangata ne mushinga. Anu bu Paulo, wewe pebe udi ne bua kulonga mua kuangata mulambu wa tshia bupikudi bu tshintu tshidi Nzambi nkayende mukupeshe. Yehowa udi Musungidi wa bukole ne Mufutshi wa dinanga.

Dimukila mayele a Satana

15-17. (a) Mmunyi mudi Diabolo ukuata mudimu ne meji mabi atudi tudielela munda? (b) Ndikankamija kayi ditudi tupeta mu malu avua menzekele Yobo?

¹⁵ Kadi pamuapa udi mua kumona bikole bua kuitaba ne: mêyi a busambi mafundisha ku nyuma adi mu Dîyi dia Nzambi adi bushuwa ne dikuatshisha kuudi. Udi mua kumona muoyo wa tshiendelele mu buloba bupiabupia bua Nzambi bu mulongoluela bakuabu, bienze bu se: wewe kuena mukumbane mua kuupeta to. Biwikala umvua nanku, tshia kuenza tshinyi?

¹⁶ Kakuyi mpata, udi mumanye bimpe mubelu eu uvua Paulo mupeshe bena Efeso: ‘Luatayi bintu bionso bia mvita bia Nzambi, bua nuenu numanye mua kuimana bakandamana kumpala kua mateyi [anyi mayele] a Diabolo.’ (Efeso 6:11) Patudi tuela meji bua mateyi a Satana, malu bu mudi lukuka lua bintu ne tshiendenda tshia masandi bidi mua kutuvuila diakamue mu lungenyi, ne mbiumvuike bua kutuma meji ku malu aa. Mateta aa mmakulule bantu ba Nzambi ba bungi mu bikondo bia kale nansha lelu kabidi. Kadi katuena ne bua kulengulula mayele makuabu a Satana: udi udienzeja bua kutuisha bantu ne: Yehowa Nzambi ki mmubanange to.

¹⁷ Diabolo mmumanye bimpe mua kukuata mudimu ne meji aa bua kupambuisha bantu kudi Nzambi. Vuluka mêyi avua Biledada muambile Yobo: ‘Nunku muntu wa pa buloba udi mua kubingishibua ku mêsu kua Nzambi munyi? Udi muledibue kudi mukaji udi mua kuikala ne mutshima mutoke munyi? Ngondo mene kêna ne dinkenke, mitoto kayena milengele ku mêsu kuende. Monayi mudi muntu mutambe kukepeshibua, udi bu tshikusu, ne mudi muana wa muntu mukepeshibue, udi bu musanda!’ (Yobo 25:4-6; Yone 8:44) Udiku mua kufuanyikija muvua mêyi au ne mua kuikala matekeshe Yobo mu maboko anyi? Nunku kulekedi Satana ukutekesha mu maboko nansha. Ku lukuabu luseke, dimukila mayele a Satana bua umone mua kupeta dikima ne bukole bua kuluangana bikole bua kuenza tshidi tshimpe. (2 Kolinto 2:11) Nansha muvua Yehowa ne bua kululamija Yobo, wakamufuta bua  ditantamana diende pa kumupingajila bionso bivuaye mujimije ne kubivudija misangu ibidi.​—Yobo 42:10.

Yehowa ‘mmupite mitshima yetu bunene’

18, 19. Mmushindu kayi udi Nzambi ‘upita mitshima yetu bunene’ ne mmunyi mudiye ‘mumanye malu onso?

¹⁸ Mbulelela bua ne: bidi mua kuikala bikole bua kutshimuna diteketa mu maboko bikala meji mabi au mele miji munda muetu. Kadi nyuma wa Yehowa udi mua kukuambuluisha ku kakese ku kakese bua kushimbula ‘ngumbu ya mvita ne tshintu tshionso tshidi tshibandishibua bua kupumbisha natshi lungenyi lua Nzambi.’ (2 Kolinto 10:4, 5) Padi meji mabi asua kukutshimuna, elangana meji pa mêyi a mupostolo Yone aa: ‘Mu muanda eu netumanye ne: tudi ba bulelela, netupoleshe mitshima yetu ku mêsu kuende; bua bikala mitshima yetu itupisha, Nzambi udi upita mitshima yetu bunene, ne udi mumanye malu onso.’​—1 Yone 3:19, 20.

¹⁹ Tshiambilu ‘Nzambi udi upita mitshima yetu bunene’ tshidi tshiumvuija tshinyi? Minga misangu, mutshima wetu udi mua kutupisha, nangananga patudi tumanya menemene mapanga etu ne bilema bietu. Anyi pamuapa bua nsombelu wetu wa kale tudi ne tshibidilu tshia kudielela meji mabi kunekesha, tumona ne: tshintu nansha tshimue tshitudi tuenza katshiena mua kusankisha Yehowa. Mêyi a mupostolo Yone adi atujadikila ne: Yehowa mmupite bionso abi! Kêna wimanyina amu pa bilema bietu to, kadi udi umona tshitudi mua kukokesha bulelela. Mmumanye kabidi meji ne ngenyi bitudi nabi munda. Davidi wakafunda ne: ‘Yeye udi mumanye buntu buetu, udi uvuluka ne: tudi dimfuenkenya.’ (Musambu 103:14) Eyowa, Yehowa mmutumanye kupita mutudi badimanye tuetu bine!

“Tshifulu tshia bulengele” ne ‘tshifulu tshia bukalenge’

20. Ntshinyi tshidi mulayi wa Yeshaya wa dijadika tshiakabidi tshisamba tshia Nzambi uleja bua mudi Yehowa wangata basadidi bende?

²⁰ Ku butuangaji bua muprofete Yeshaya, Yehowa wakapesha bantu bende ba kale ditekemena dia kubajadika tshiakabidi pa muaba wabu. Bu muvuabu baye nabu mu bupika ku Babulona, mêyi au a busambi ne adi akankamija ke avua nawu bantu bavua ne malu mabatonde dijinga. Bu muvua Yehowa mudianjile kumona tshikondo tshivuabu ne bua kupingana mu buloba buabu wakamba ne: ‘Newikale tshifulu tshia bulengele mu tshianza tshia Yehowa, ne tshifulu tshia bukalenge mu tshianza tshia Nzambi webe.’ (Yeshaya 62:3) Yehowa wakapesha bantu bende bunême ne butumbi mu mêyi aa. Mmuenze bia muomumue lelu ne tshisamba tshiende tshia Isalele wa mu nyuma. Mbienze bu ne: uvua mubabandishe mulu bua bantu bonso babatangile.

21. Mmunyi muudi mua kuikala ne dishindika dia se: Yehowa neafute ditantamana diebe dia lulamatu?

²¹ Nansha mudi mulayi eu ukumbanyina diambedi bela manyi, udi tshilejilu tshia mudi Yehowa wambika bonso badi bamusadila bunême. Nunku paudi ne dielakana munda muebe, vuluka ne: nansha muudi muntu mupange bupuangane, udi ne mushinga bu wa “tshifulu tshia bulengele” ne ‘tshifulu tshia bukalenge’ ku mêsu kua Yehowa. Nunku tungunuka ne kusankisha mutshima wende pa kukeba ne muoyo mujima bua kuenza disua diende. (Nsumuinu 27:11) Biwenza nunku, udi mua kushindika ne: Yehowa neafute ditantamana diebe dia lulamatu!

[Mêyi adi kuinshi]

Udi muvuluke anyi?

• Mmunyi mutudi ‘bantu ba Yehowa nkayende’?

• Bua tshinyi mbia mushinga bua kumona Yehowa bu Mufutshi?

• Mmayele kayi a Satana atudi ne bua kudimukila?

• Mmushindu kayi udi Nzambi ‘upita mitshima yetu bunene’?

[Nkonko ya dilonga]

[Tshimfuanyi mu dibeji 26]

Paulo

[Tshimfuanyi mu dibeji 26]

Eliya

[Tshimfuanyi mu dibeji 26]

Hana

[Tshimfuanyi mu dibeji 28]

Dîyi dia Nzambi didi ne ngenyi ya bungi idi isamba