Badi babanyisha bua mudibu banange Bible

MARIANNA Ntemu wa Yehowa wa bidimu 18 udi musombele ku sud kua ditunga dia Italie, ne udi mu tshidimu tshia ndekelu tshia tulasa tua bikadilu. Mu tshilongelu tshidiye amu mudi bakuabu bansonga Bantemu ba Yehowa.

Marianna udi wamba ne: “Kukadi bidimu ndambu mpindieu, bamue ba munkatshi muetu tutu tubala mvese wa ku dituku wa mu kakanda ka Tukonkononayi Mifundu dituku dionso mu dîba dia dikisha. Muaba umuepele utudi mua kubadila mvese eu udi anu mu njila wa munda mua nzubu pabuipi ne biro bia balongeshi. Kauvua muaba wa ditalala to, muvua ndambu wa mutoyi. Balongeshi ba bungi bavua batumona pavuabu bapitakana, ne bamue bavua banji kuimana bua kumona tshituvua tuenza. Dimana diabu edi divua misangu mivule ditupesha mpunga bua kuandamuna nkonko yabu. Bushuwa, kakuvua kupita dituku kakuyi umue wa ku balongeshi bavua bapita uvua kayi wimana muaba utuvua. Ba bungi bavua bashale bimane bua kuteleja mutuvua tukonkonona mvese wa mu Bible ne batu baleje dianyisha bua mutudi tuetu Bantemu banange malu a mu nyuma. Umue musangu, tshindondi tshia mulombodi wa tulasa tshiakatubikila bua tuetu kuyukidila mu biro bia balongeshi.

“Panyima pa mulongeshi wetu mumane kumona muaba utuvua tubadila mvese wa ku dituku, wakalomba mulombodi wa tulasa bua tuetu kuikala tubadila mvese eu munda mua kalasa kampanda mudi kamuyi mutoyi. Ke mulombodi eu kuitaba, nunku mulongeshi wetu wakatuanyisha kumpala kua balongi bonso bua tshilejilu tshimpe tshitudi tufila. Tuetu bonso tudi ne disanka dia bungi bua diakalenga dinene didi Yehowa mutupeshe.”