Neuleje butumbi bua Nzambi anyi?
Neuleje butumbi bua Nzambi anyi?
‘Tudi tukenkesha butumbi bua Mukalenge bu mudi muntu ukenkesha tshintu mu lumuenu.’—2 KOLINTO 3:18, MMM.
1. Ntshinyi tshiakamona Mose, ne ntshinyi tshiakenzeka pashishe?
MOSE wakamona tshimue tshia ku bikena-kumona bia dikema. Bakamuandamuna pavuaye nkayende ku Mukuna wa Sinai bua tshintu tshia pa buatshi tshivuaye ulomba. Bakamuleja tshintu tshitu muntu mukuabu kayi muanji kumona katshia, wakamona butumbi bua Yehowa; kadi kakamona Yehowa to. Yehowa utu ne mubidi wa dikema, muntu kêna mua kumumona ne kushala ne muoyo. Ke bualu kayi Yehowa wakabuikila Mose “tshianza” bua kumulama too ne pakapitaye: kakuyi mpata, uvua mutume muanjelu wende. Pashishe Yehowa wakitabila Mose bua kumona bukenke buvua bushale kunyima kua dileja butumbi buende. Yehowa wakayikila kabidi ne Mose ku butuangaji bua muanjelu. Tangila mudi Bible umvuija tshiakenzeka kunyima: ‘Pakumuka Mose ku mukuna wa Sinai musunya wa pa mpala pende wakakenka bualu bua yeye wakadi usomba ne Yehowa.’—Ekesode 33:18–34:7, 29.
2. Ntshinyi tshiakafunda mupostolo Paulo bua butumbi budi bena Kristo bakenkesha?
2 Ela meji ne: nuvua babande ku mukuna au ne Mose. Mubidi uvua mua kukuvuayila bua kumona tshikena-kumona tshia pa buatshi tshia Nzambi Wa-Bukole-Buonso ne kumvua dîyi diende. Kutuluka ku Mukuna wa Sinai pamue ne Mose (mutuangaji wa tshipungidi tshia Mikenji) kuvua diakalenga dinene be! Kadi uvuaku mumanye ne: bena Kristo balelela badi bakenkesha butumbi bua Nzambi kupita Mose anyi? Bualu bunene ebu mbuleja mu umue wa ku mikanda ivua Paulo mufunde. Wakafunda ne: bena Kristo bela manyi ‘badi bakenkesha butumbi bua Mukalenge bu mudi muntu ukenkesha tshintu mu lumuenu.’ (2 Kolinto 3:7, 8, 18, MMM) Bena Kristo bikala mua kupeta muoyo pa buloba badi pabu bakenkesha butumbi bua Nzambi mu ngumvuilu kampanda.
Mudi bena Kristo bakenkesha butumbi bua Nzambi
3. Mmunyi mutudi bamanye Yehowa mu mushindu uvua Mose kayi mua kumumanya to?
3 Mmunyi mutudi mua kukenkesha butumbi bua Nzambi? Katuena banji kumona Yehowa anyi bumvue dîyi diende bu Mose to. Kadi tudi bapete dimanya divua Mose kayi nadi nansha. Yezu wakalua bu Masiya bidimu bitue ku 1 500 kunyima kua Mose mumane kufua. Nunku, Mose kavua mua kuikala mumanye muvua Mikenji ne bua kukumbanyina Yezu to. Yezu wakafua bua kupikula bantu ku bupika bua bubi ne lufu. (Lomo 5:20, 21; Galatia 3:19) Mose uvua kabidi mujingulule anu kakese bunene bua dijinga dia Yehowa didi ditangila Bukalenge bua Masiya ne Mparadizu. Nunku tudi tumona butumbi bua Yehowa ne mêsu a ditabuja didi dishindamene pa malongesha a mu Bible, ki nne mêsu etu aa to. Kadi tuetu tudi bumvue dîyi dia Yehowa ku diambuluisha dia Bible ne nangananga dia mikanda inayi ya mu Bible idi yumvuija bimpe bitambe malongesha ne mudimu wa Yezu, ki nku butuangaji bua muanjelu to.
4. (a) Mmunyi mudi bena Kristo bela manyi bakenkesha butumbi bua Nzambi? (b) Mmunyi mudi bantu bashala pa buloba mua kukenkesha butumbi bua Nzambi?
4 Nansha mudi bena Kristo kabayi baleja butumbi bua Nzambi ne nsense pa mpala yabu, mpala yabu idi ibalakana bimpe padibu bambila bantu nabu ngikadilu mimpe ya Yehowa ne malu malenga adiye mulongolole bua kuenza. Muprofete Yeshaya wakamanyisha bua tshikondo tshietu etshi ne: bantu ba Nzambi ‘nebambe butumbi bua Yehowa munkatshi mua bisamba bia bantu.’ (Yeshaya 66:19)Tudi tubala kabidi mu 2 Kolinto 4:1, 2 ne: ‘Tuetu tudi ne mudimu eu, tuakapidia malu masokome a bundu, katuena tuendakana ne budimu, katuena tudinga bantu ne dîyi dia Nzambi, kadi tudi tudianyisha ku dimuenesha dia bulelela ku kondo ka muoyo ka muntu yonso ku mêsu kua Nzambi.’ Paulo uvua wakula nangananga bua bena Kristo bela manyi, badi ‘bena mudimu ba tshipungidi tshipiatshipia.’ (2 Kolinto 3:6) Kadi mudimu wabu mmuambuluishe bantu bapite bungi bua bapete muoyo wa tshiendelele pa buloba. Mudimu wa baya mu diulu ne bashala pa buloba ngwa kukenkesha butumbi bua Yehowa ku bidibu balongesha, ne ku bienzedi biabu kabidi. Tudi ne diakalenga ne bujitu bua kumuenesha butumbi bua Nzambi Mutambe Bunene.
5. Didiunda dietu dia mu nyuma didi dileja tshinyi?
5 Badi bayisha lelu’eu lumu luimpe lua butumbi lua Bukalenge bua Nzambi pa buloba bujima anu bu muakamanyisha Yezu. (Matayo 24:14) Bantu ba mu matunga, bisamba, bisa ne miakulu yonso badi bitaba lumu luimpe ne disanka ne bashintulula nsombelu wabu bua kuenza disua dia Nzambi. (Lomo 12:2; Buakabuluibua 7:9) Anu bu bena Kristo ba kumpala, kabena mua kulekela kuakula bua malu adibu bamone ne bumvue to. (Bienzedi 4:20) Bungi bua katshia ne katshia bua bantu bapite pa miliyo isambombo badi baleja butumbi bua Nzambi lelu. Udi pebe munkatshi muabu anyi? Didiunda dia mu nyuma dia bantu ba Nzambi didi dileja ne: Yehowa udi ubalama ne ubabenesha. Bu mudiku baluishi ba bukole bua bungi badi batuluisha, bidi bituleja ne: nyuma wa Yehowa udi netu. Tumonayi mpindieu bua tshinyi nyuma wa Yehowa udi netu.
Kabakupuwisha bantu ba Nzambi to
6. Bua tshinyi bidi bilomba ditabuja ne muoyo mukole bua kutua ku tshia Yehowa?
6 Fuanyikija ne: mbakubikile ku kabadi bua kujadika malu a kanka munene. Udi mumanye ne: kanka eu udi ne dingumba dinene dia bantu ne neenze muende muonso bua akupangishe mua kumuela patoke. Nebikulombe muoyo mukole ne ditekemena dikole dia se: mbulamatadi neakulame bimpe, ki mmuomu anyi? Tudi mu nsombelu wa muomumue. Kumanyisha malu a Yehowa ne disua diende nkujadika mudi Satana Diabolo muntu mubi, kuleja patoke mudiye mushipianganyi ne muena dishima udi upambuisha buloba bujima. (Yone 8:44; Buakabuluibua 12:9) Bua wewe kutua ku tshia Yehowa ne kupisha Diabolo, mbimpe kuikala ne ditabuja ne muoyo mukole.
7. Mbukokeshi kayi budi nabu Satana? Ntshinyi tshidiye ukeba kuenza?
7 Yehowa udi ku mutu kua bionso. Udi ne bukole bupite bua Satana kule ne kule. Tumanyayi ne: Yehowa udi ne bukole ne kabidi mmusue kutulama patudi tumukuatshila mudimu ne lulamatu. (2 Kulondolola 16:9) Nansha nanku, Satana udi mfumu wa bademon ne wa bantu bonso badi babenga Nzambi. (Matayo 12:24, 26; Yone 14:30) Bu mudi Satana muikale pabuipi ne buloba ne muikale ne ‘tshiji tshikole,’ udi uluisha bena mudimu ba Yehowa bikole ne kabidi udi ukuata mudimu ne bulongolodi ebu budiye ukokesha bua kukeba bua kupuwisha bonso badi bayisha lumu luimpe. (Buakabuluibua 12:7-9, 12, 17) Udi ubaluisha mushindu kayi? Mu mishindu mipite pa isatu.
8, 9. Mmunyi mudi Satana ukuata mudimu ne dinanga dibi? Bua tshinyi tudi ne bua kuela meji kumpala kua kusungula bantu ba kusomba nabu?
8 Mushindu umue udi Satana uteta kutubueja mu ditanaji nku malu a mu nsombelu. Mu matuku a ku nshikidilu aa, bantu mbanange mfranga, masanka ne mbadinange. Ki mbanange Nzambi to. (2 Timote 3:1-4) Bantu ba bungi ‘kabena bamanya bualu’ bua lumu luimpe lutudi tubatuadila bualu mbadine ne kasuki mu malu abu a buatshia buila. Kabena basue kulonga bulelela budi mu Bible to. (Matayo 24:37-39) Nsombelu eu udi mua kutuambulukila, kutusaka ku dilengulula malu a mu nyuma. Dinanga ditudi banange Nzambi nedikepele bituikale banange bintu ne masanka.—Matayo 24:12.
9 Bua bualu ebu, bena Kristo badi basungula ne meji onso bantu ba kusomba nabu. Mukalenge Solomo wakafunda ne: ‘Udi wenda ne bena meji udi ulua muena meji, kadi udi ubuelakana ne bapote neakenge bua bualu ebu.’ (Nsumuinu 13:20) ‘Tuendayi’ ne aba badi baleja butumbi bua Nzambi. Kuenda nabu nkuimpe be! Patudi tupetangana nabu mu bisangilu bietu ne mu bikondo bikuabu, dinanga diabu, ditabuja diabu, disanka ne meji abu bidi bitukolesha mu mikolo. Dipetangana dimpe dia nunku didi dikolesha dipangadika dietu dia kutungunuka ne kuyisha.
10. Mmunyi mudi Satana uluisha badi bakenkesha butumbi bua Nzambi ku dibaseka?
10 Mushindu muibidi udi Satana uteta kupangisha bena Kristo bonso bua kukenkesha butumbi bua Nzambi nku dibaseka. Nunku kabiena mua kutukemesha padi bantu batuseka to. Bualu, nansha Yezu Kristo pende bakamuseka pavuaye uyisha: bakamupepeja, bakamunayila, bakamupotela ne bakamuela mene mate. (Mâko 5:40; Luka 16:14; 18:32) Bavua kabidi baseka bena Kristo ba kumpala. (Bienzedi 2:13; 17:32) Ke mudibu benza kabidi bena mudimu ba Yehowa ba lelu. Mupostolo Petelo udi wamba ne: bavua mene ne bua kubabikila ne: “baprofete ba dishima.” Wakafunda ne: ‘Palua ku nshikidilu kua matuku, baseki nebalue ne tuseku tuabu, benda bu mudi nkuka yabu mene, bamba kabidi ne: Mulayi wa dilua diende udi penyi? Malu onso mmashale muomumue bu muvuawu ku tshibangidilu tshia bufuki.’ (2 Petelo 3:3, 4) Batu baseka basadidi ba Nzambi babamba ne: kabena bamanye malu to. Tshilejilu, batu bamona ngikadilu idi Bible ulomba bu malu a kale. Ba bungi batu bamona malu atutu tubambila bu malu adi kaayi mutu. (1 Kolinto 1:18, 19) Tuetu bena Kristo batu batuseka mu tulasa, ku mudimu ne too ne mu mêku etu. Anu bu Yezu, tudi tutungunuka ne kukenkesha butumbi bua Nzambi patudi tuyisha katuyi tulekela, bamanye ne: Dîyi dia Nzambi didi bulelela.—Yone 17:17.
11. Mmunyi mudi Satana mukengeshe bena Kristo bua kuteta bua kubapuwisha?
11 Ngenzelu muisatu wa Diabolo bua kuteta kutupuwisha ndituluisha anyi ditukengesha. Yezu wakambila bayidi bende ne: ‘Nebanufile mu dikenga, nebanushipe; bisamba bionso nebikale nenu lukuna bua dîna dianyi.’ (Matayo 24:9) Bushuwa, mbakengeshe Bantemu ba Yehowa bikole miaba mivule. Tudi bamanye ne: Yehowa uvua mumanyishe ku kale ne: lukuna neluikaleku pankatshi pa bantu badi benzela Nzambi mudimu ne bantu badi benzela Satana mudimu. (Genese 3:15) Tudi bamanye kabidi ne: patudi tushala ne lulamatu mu mateta, tudi tuleja mudi Yehowa mukumbanyine kuikala Mfumu wa bionso. Tuetu bavuluke bualu ebu netupete bukole nansha patudi mu nsombelu mikole menemene. Tuetu bikale badisuike bua kukenkesha butumbi bua Nzambi, ditukengesha kadiakutupuwisha bua kashidi to.
12. Bua tshinyi tudi ne tshia kusanka patudi tushala ne lulamatu nansha padi Satana utuluisha?
12 Utu ushala ne lulamatu nansha padibu bakuseka anyi bakuluisha anyi? Wewe wenza nanku, sanka; bualu Yezu wakambila bantu bavua mua kulua bayidi bende ne: ‘Panupendabu ne panukengeshabu ne panushiminyinabu mashimi onso, bua bualu buanyi, nenuikale ne disanka. Nusanke, nuikale ne disanka dia bungi, bualu bua difutu dienu didi mu diulu ndinene; bakakengesha baprofete nunku bavua kumpala kuenu.’ (Matayo 5:11, 12) Paudi ushala ne lulamatu mu nsombelu eyi bidi bileja ne: udi ne nyuma wa Nzambi, ne nyuma eu udi ukupesha bukole bua wewe kukenkesha butumbi bua Nzambi.—2 Kolinto 12:9.
Yehowa ke udi utuambuluisha bua kunanukila
13. Tutu tuyisha katuyi tulekela bua bualu kayi menemene?
13 Bualu bunene butu butusaka bua tuetu kushala ne lulamatu mu mudimu ndinanga dietu dia Yehowa ne disanka ditudi nadi dia kukenkesha butumbi buende. Bantu batu bidikija nangananga bantu badibu banange ne badibu banemeka; kadi kakuena muntu mukuabu utudi ne bua kuidikija bu Yehowa Nzambi nansha. Bualu Yehowa wakatuma Muanende pa buloba bua kumanyisha bulelela ne kusungila bantu badi bamutumikila anu bua dinanga diende dikole. (Yone 3:16; 18:37) Tutu tuyisha bualu tudi basue ne: bantu ba mishindu yonso bafike ku dishintuluka ne ku lupandu anu bu mudi Nzambi musue. (2 Petelo 3:9) Dijinga edi ne dipangadika dietu dia kuidikija Nzambi bidi bitusaka bua kutungunuka ne kukenkesha butumbi buende mu mudimu wa buambi.
14. Mmunyi mudi Yehowa utuambuluisha bua tuetu kutungunuka ne mudimu wa buambi?
14 Kadi bukole bua kutungunuka ne mudimu wa diyisha budi bufumina nangananga kudi Yehowa. Udi utukuatshisha ne utukolesha ne nyuma wende, bulongolodi buende ne Dîyi diende kabidi. Yehowa udi wambuluisha badi basue kukenkesha butumbi buende bua bamanye mua ‘kunanukila.’ Udi wandamuna masambila etu ne udi utupesha meji bua kupita bimpe ne ntatu. (Lomo 15:5; Yakobo 1:5) Yehowa kêna kabidi wanyisha bua kutulekela mu lutatu ludi lutupite makanda to, tuetu tumueyemena neatulongoluele mushindu wa kupatuka mu ntatu bua tuetu kutungunuka ne kukenkesha butumbi buende.—1 Kolinto 10:13.
15. Ntshinyi tshidi tshituambuluisha bua kutungunuka ne kuenza mudimu wetu?
15 Patudi tutungunuka ne mudimu wetu, bidi bileja mutudi ne nyuma wa Nzambi. Tshilejilu: Fuanyikija ne: muntu kampanda udi ukulomba bua kuabanya mampa ku nzubu ne ku nzubu kuyi ulomba makuta. Udi ukuambila ne: mudimu eu neukudie dîba ne mfranga. Kadi paudi utuadija mudimu eu udi umona ne: bantu ba bungi ki mbasue mampa aa to; bamue mene badi bakukandika bua kuabanya. Udi wela meji ne: newenze mudimu eu matuku a bungi anyi? Tòo, imue misangu neuulekele. Pabi udi mua kuikala wenza mudimu wa kuamba lumu luimpe, mudimu eu ukadi mukuangate dîba diebe ne makuta ebe munkatshi mua bidimu bia bungi. Kadi udi utungunuka ne kuwenza bua tshinyi? Ki mbualu udi munange Yehowa ne yeye mene mmukubeneshe bualu udi ukupesha nyuma wende bua kutungunuka ne mudimu eu anyi? Eyowa, bidi nanku.
Mudimu wa kubenga kupua muoyo
16. Dinanukila mu mudimu wetu didi diumvuija tshinyi buetu tuetu ne bua aba badi batuteleja?
16 Mudimu wa tshipungidi tshipiatshipia ndipa dia mushinga mukole be! (2 Kolinto 4:7) Bia muomumue, mudimu wa bena Kristo udi mikoko mikuabu yenza pa buloba bujima mmudimu wa mushinga mukole. Paudi utungunuka ne mudimu webe, ‘neudisungile wewe ne kabidi badi bumvua mêyi ebe’ anu bu muvua Paulo mufundile Timote. (1 Timote 4:16) Anji elabi meji. Lumu luimpe luudi uyisha elu ludi lupetesha bakuabu mushindu wa kupeta muoyo wa tshiendelele. Udi mua kudia bulunda bukole ne bantu aba. Kabidi, ndisankapu kayi bunene dia kuikala ne muoyo wa tshiendelele mu Mparadizu ne bantu bauvua muambuluishe bua kumanya Nzambi! Bantu aba kabakupua muoyo muuvua mubambuluishe to! Ki mbualu bua disanka anyi?
17. Bua tshinyi tshikondo tshietu etshi ntshia pa buatshi?
17 Udi ne muoyo mu tshikondo tshia pa buatshi. Kabakuyisha kabidi lumu luimpe munkatshi mua bantu badi kabayi ne malanda ne Nzambi nansha. Noa uvua mu tshikondo tshia nunku ne wakamona muakajimina bantu. Wakasanka bikole pakamanyaye ne: uvua mukumbaje disua dia Nzambi anu muvuabi bikengela pakenzaye buatu, ne kumuambuluishabi bua kudipandisha yeye ne dîku diende. (Ebelu 11:7) Udi pebe mua kupeta disanka dia mushindu eu. Ela meji muudi mua kumvua mu bulongolodi bupiabupia pawikale utangila panyima ne uvuluka mudimu uuvua muenze mu matuku aa, umona ne: uvua muenze muebe muonso bua kuyisha malu a Bukalenge bua Nzambi kumpala!
18. Ntshinyi tshidi Yehowa ujadikila basadidi bende? Mmunyi mudiye ubakolesha mu maboko?
18 Nunku, tutungunukayi ne kukenkesha butumbi bua Nzambi, katuakupua bualu ebu muoyo to! Yehowa pende utu uvuluka midimu yetu. Bible udi utukolesha ku muoyo ne mêyi aa: ‘Nzambi kêna upanga buakane bua kupuaye muoyo mudimu wenu ne dinanga dinuakaleja bua dîna diende, panuakakuatshila bansantu mudimu ne panutshidi nubakuatshilawu. Tudi basue muntu ne muntu wa munkatshi muenu aleje disuminyina diodimue bua kupeta tshiuwidi tshia ditekemena too ne ku nshikidilu, bua kanulu penu bapungile, kadi nulue bidikiji ba badi bapiana milayi bua ditabuja ne lutulu.’—Ebelu 6:10-12.
Udi mua kumvuija anyi?
• Mmunyi mudi bena Kristo bakenkesha butumbi bua Nzambi?
• Mmishindu kayi idi Satana ukuata nayi mudimu bua kupuwisha bantu ba Nzambi?
• Ntshinyi tshidi tshijadika ne: tudi ne nyuma wa Nzambi?
[Nkonko ya dilonga]
[Tshimfuanyi mu dibeji 15]
Mpala wa Mose uvua ukenka ne butumbi
[Bimfuanyi mu mabeji 16, 17]
Tudi tukekensha butumbi bua Nzambi mu mudimu wetu