Nkonko ya babadi

Mu Isalele wa kale, butoke bua mu tshishima buvuabu babikila imue misangu ne: Shekina, buvua bumueneka mu muaba Mutambe Bunsantu wa nzubu wa tshitendelelu ne wa ntempelo, buvua bumvuija tshinyi?

Yehowa Tatu wa dinanga ne Mulami wa bantu bende wakenza bua dikala diende mu tshisamba tshia Isalele dikale dimueneke patoke. Wakakumbaja muanda eu ku diambuluisha dia ditutu divua diengelela, divua dimueneka muaba wa ntendelelu wende.

Butoke ebu bukole buvua buleja dikalaku dia Yehowa mu nyuma muaba au. Butoke ebu buvua bumueneka mu muaba Mutambe Bunsantu mu nzubu wa tshitendelelu ne mu ntempelo uvua Solomo muase. Butoke abu bua mu tshishima kabuvua buleja ne: Yehowa uvua muaba au mu mubidi nansha. Nzambi kêna mua kusomba mu nzubu nansha umue muenza kudi bantu to. (2 Kulondolola 6:18; Bienzedi 17:24) Butoke ebu bua kudi Nzambi buvua mu muaba Mutambe Bunsantu buvua bujadikila muakuidi munene ne bena Isalele bonso ne: Yehowa uvua ubakuba ne ubakumbajila majinga abu.

Mu tshiena-Alama tshia kunyima kua bamane kufunda Bible, bavua babikila butoke ebu ne: Shekina (shekhi·nahʹ), muaku udi umvuija “tshidi tshisombele” anyi “tshisombelu.” Muaku eu kawena mu Bible to, kadi udi mu nkudimuinu ya mu tshiena-Alama mu Mifundu ya tshiena-Ebelu, itubu babikila kabidi ne: Targoums.

Pavua Yehowa uleja Mose mushindu wa kuibaka nzubu wa tshitendelelu, wakamuambila ne: ‘Wewe neuteke tshibuikilu pa mutu pa mushete; neubueje mabue a dipungila andi nkupa mu mushete. Meme nensangakene nebe apa, nensombe nebe pa mutu pa tshibuikilu tshia mushete, pankatshi pa bakeluba badi pa mutu pa mushete.’ (Ekesode 25:21, 22) Mushete udibu batele muaba eu uvua mulaba ngolo pambidi wa mu muaba Mutambe Bunsantu. Kuvua bakeluba babidi ba ngolo pa tshibuikilu tshia Mushete.

Kadi Yehowa uvua wakuila penyi? Wakandamuna lukonko elu pakambilaye Mose ne: “Meme nemmueneke mu ditutu ku mutu kua tshibuikilu tshia mushete.” (Lewitiki 16:2) Ditutu edi divua mulu pa mutu pa mushete wa tshijila pankatshi pa bakeluba babidi ba ngolo. Bible kêna uleja bule bua ntanta uvua pankatshi pa ditutu edi ne mushete peshi ne bakeluba to.

Ditutu edi ditoke divua dikenkesha mu Mutambe Bunsantu. Bushuwa, diodi ke divua ditokesha muaba au. Butoke ebu buvua buambuluisha muakuidi munene bua kumona bimpe pavuaye ubuela mu nzubu wa munda menemene mu Dituku dia Dibuikidila. Uvua wimana kumpala kua Yehowa.

Butoke ebu bua mu tshishima budiku ne diumvuija kampanda bua bena Kristo anyi? Mupostolo Yone wakamona musoko kampanda mu tshikena-kumona udi ‘butuku kabuyi buikalamu.’ Musoko eu n’Yelushalema mupiamupia muenza ne bena Kristo bela manyi babishibua bua kukokesha ne Yezu. Butoke bua musoko eu wa mu tshimfuanyi kabuena bufumina ku dîba anyi ngondo to. Butumbi bua Yehowa Nzambi budi butokesha buludiludi bulongolodi ebu anu muvua ditutu dia Shekina dikenkesha mu Mutambe Bunsantu. Kabidi, Yezu Kristo Muana wa mukoko ke “muinda” wa musoko eu. Pashishe, “musoko” eu udi umuangalaja butoke buawu bua mu nyuma ne bulenga pa buloba kudi bantu badibu bapikule mu bisamba bionso bua kubaludika.​—Buakabuluibua 21:22-25.

Bu mudi batendeledi ba Yehowa bapeta mabenesha aa mavule adi afumina mu diulu, mbajadike ne: Yehowa ke Mulami wabu udi ubakuba ne Tatu wabu wa dinanga.