Bible wa kale wa tshiena-Allemagne udi utela dîna dia Nzambi
Bible wa kale wa tshiena-Allemagne udi utela dîna dia Nzambi
DÎNA dia Nzambi, Yehowa, didi disanganyibua misangu mipite pa 7 000 mu nkudimuinu wa Les Saintes Écritures—Traduction du monde nouveau mupatula mu tshiena-Allemagne mu 1971. * Kadi, Bible eu kavua wa kumpala wa mu tshiena-Allemagne uvua utela dîna dia Nzambi to. Bidi bimueneka ne: Bible wa kumpala wa muakulu eu uvua utela dîna dia Yehowa uvua mupatula kukadi bidimu bu 500 kudi Johann Eck, muena teoloji munene wa bena Katolike.
Johann Eck uvua muledibue mu 1486 ku sud kua ditunga dia Allemagne. Wakalua mulongeshi wa teoloji mu iniversite wa Ingolstadt ne bidimu 24, mudimu wakenzaye too ne ku lufu luende mu 1543. Eck uvua ne muoyo mu tshikondo tshimue ne Martin Luther, ne bavua balunda bua tshikondo kampanda. Kadi Luther wakalua pashishe mulombodi munene wa bena Mishonyi, ne Eck uvua yeye ubingisha Ekeleziya Katolike.
Mfumu wa buloba bua Bavière wakapesha Eck mudimu wa kukudimuna Bible mu tshiena-Allemagne, ne nkudimuinu au wakapatuka mu 1537. Bilondeshile mukanda kampanda, nkudimuinu wende wakalonda bimpe menemene mifundu ya ku ntuadijilu ne “mmuakanyine kumutumbisha bikole kupita mudibu bamutumbishe too ne mpindieu.” Ekesode 6:3 mmukudimunamu ne: “Ndi Mukalenge, wakamuenekela Abalama, Isaka ne Yakoba bu Nzambi Wa-Bukole-Buonso: ne dîna dianyi dia Adonai, tshiakadisokolola kudibu.” Eck wakasakidila diumvuija ku luseke lua dibeji pa mvese eu diamba ne: “Dîna dia Adonai Yehowa.” (Kirchliches Handlexikon) Bamanyi ba Bible ba bungi batu bitaba ne: au uvua musangu wa kumpala uvua dîna dia Nzambi ditela mu Bible wa tshiena-Allemagne.
Kadi, dîna dia Nzambi ndimanyike, ne mbakuate nadi mudimu bidimu binunu ne binunu. Musangu wa kale menemene wakaditelabu uvua mu tshiena-Ebelu, mudi “Yehowa” muikale uleja Nzambi umuepele mulelela. (Dutelonome 6:4) Kukadi bidimu bu 2 000, dîyi dia Yezu dia se: uvua mumanyishe dîna dia Nzambi diakafundibua mu muakulu wa tshiena-Gelika. (Yone 17:6) Kubangila ku tshikondo atshi, mbamanyishe dîna adi mu miakulu bungi kabuyi kubala, ne mu katupa emu, pakumbana Musambu 83:18, bantu bonso nebamanye ne: muena dîna dia Yehowa udi Mutambe Bunene pa buloba bujima.
[Mêyi adi kuinshi]
^ tshik. 2 Mupatula kudi Bantemu ba Yehowa, kumpala mu Anglais mu 1961. Udi mpindieu mujima anyi tshitupa mu miakulu mipite pa 50.
[Tshimfuanyi mu dibeji 32]
Bible wa Eck wa mu 1558, ne diumvuija difunda ku luseke pa Ekesode 6:3 bua dîna dia Yehowa