Nkonko ya babadi

Mbua bualu kayi butudi mua kuamba ne: biambilu bu mudi ‘yeye udi kayi mua kufua’ ne ‘udi muntu kayi muanji kumona ne udiye kayi mumanye mua kumona kabidi’ bidi biakula bua Yezu kadi ki mbua Yehowa Nzambi to?

Mupostolo Paulo wakafunda ne: ‘[Dimueneka diende edi] didiye ulua kuleja mu bikondo biadi mene. Yeye udi Muena Bukole umuepele mutumbishibue, udi biende Mukalenge wa Bakalenge ne Mfumu wa bamfumu, anu yeye udi kayi mua kufua, udi wikala mu munya udi bantu kabayi bamanye mua kufika kudiwu, udi muntu kayi muanji kumona, ne udiye kayi mumanye mua kumona kabidi.’​—1 Timote 6:15, 16.

Pa tshibidilu bumvuiji ba Bible batu bela meji ne: “Mmunyi mudi biambilu bu mudi ‘anu yeye udi kayi mua kufua,’ ‘Muena Bukole umuepele’ ne ‘udi muntu kayi muanji kumona, ne udiye kayi mumanye mua kumona kabidi’ mua kuakula bua muntu mukuabu udi kayi Wa-Bukole-Buonso?” Tudi mua kuitaba ne: biambilu bu ebi badi mua kubitela bua kumvuija tshidi Yehowa. Kadi, mvese idi kumpala kua 1 Timote 6:15, 16 idi ileja ne: Paulo uvua wakula anu bua Yezu.

Ku ndekelu kua mvese wa 14, Paulo udi utela ‘dimueneka dia Mukalenge wetu Yezu Kristo.’ (1 Timote 6:14) Nunku padi Paulo ulua kuamba mu mvese wa 15 ne: ‘dimueneka diende didiye ulua kuleja mu bikondo biadi mene; yeye udi Muena Bukole umuepele mutumbishibue,’ udi wakula bua dimueneka dia Yezu, ki ndia Yehowa Nzambi to. Nanku, nnganyi udi ‘Muena Bukole umuepele’? Bidi bimueneka bijalame bua kuamba ne: Yezu ke Muena Bukole udi Paulo utela. Bua tshinyi? Mvese idi kumpala idi ileja patoke ne: Paulo uvua ufuanyikija Yezu ne bakokeshi ba pa buloba. Bu muakafunda Paulo, Yezu udi bulelela ‘Mukalenge wa [bantu badi] bakalenge ne Mfumu wa [bantu badi] bamfumu.’ * Eyowa, pa kumufuanyikija nabu, Yezu udi ‘Muena Bukole umuepele.’ Bakapa Yezu ‘bukokeshi, butumbi ne bukalenge, bua bantu bonso, ba bisamba bionso ne ba miaku yonso bamukuatshile mudimu.’ (Danyele 7:14) Kakuena mukokeshi wa pa buloba nansha umue udi mua kuamba mudiye ne bukokeshi bua mushindu eu to!

Netuambe tshinyi bua tshiambilu etshi: ‘anu yeye udi kayi mua kufua’? Nansha apa, badi bafuanyikija Yezu ne bakalenge ba pa buloba. Kakuena mukokeshi wa pa buloba udi mua kuamba ne: mbamupeshe muoyo, ne kêna mua kufua to, kadi Yezu udi mua kuamba nanku. Paulo wakafunda ne: ‘Tudi bamanye ne: Kristo wakabishibua ku lufu kêna ufua kabidi; lufu kaluena mua kumukokesha kabidi.’ (Lomo 6:9) Nunku, Yezu ke muntu wa kumpala udi Bible wamba ne: mbamupeshe muoyo ne kakufua kabidi to. Bushuwa, tshikondo tshiakafunda Paulo mêyi aa, anu Yezu nkayende ke uvuabu bapeshe muoyo udi kauyi mua kubutuka.

Kabidi, tudi ne bua kumanya ne: kabivua mua kuikala bilelela bua Paulo kuamba ne: Yehowa Nzambi nkayende ke uvua ne muoyo wa kayi mua kufua, bualu tshikondo tshiakafundaye mêyi aa Yezu pende kavua mua kufua to. Kadi Paulo uvua mua kuamba ne: Yezu nkayende kêna mua kufua pa kumufuanyikija ne bakokeshi ba pa buloba.

Kabidi, mbualu bulelela bua se: kunyima kua dibika ne dibanda dia Yezu mu diulu, badi mua kuamba bua bualu buende ne: nyeye ‘udi muntu kayi muanji kumona, ne udiye kayi mumanye mua kumona kabidi.’ Bushuwa, bayidi bela manyi ba Yezu nebamumone kunyima kua lufu luabu ne dibishibua bua kuya mu diulu bu bifukibua bia mu nyuma. (Yone 17:24) Kadi muntu nansha umue udi pa buloba kakumona Yezu mutumbishibue to. Nunku, mbulelela bua kuamba se: katshia Yezu wabika ku lufu ne wabanda mu diulu, ‘muntu’ nansha umue kêna mumumone bushuwa.

Bidi mua kumueneka patudi tutangila katuyi ne ntema ne: mêyi adi mu 1 Timote 6:15, 16 adi akula bua Nzambi. Kadi mvese idi kumpala kua mêyi au a Paulo, pamue ne mvese mikuabu idi yajadika, idi ileja ne: Paulo uvua wakula bua Yezu.

[Mêyi adi kuinshi]