“Dikuatshisha dianyi didi difuma kudi Yehowa”

Bantu ba bungi badi balua kutendelela Yehowa

MILAYI ya mu Bible ivua yakula bua matuku etu aa yakaleja muvua bantu ba mu bisamba bionso mua kulua bua kutendelela Yehowa. Tshilejilu, ku butuangaji bua muprofete Hagai, Yehowa Nzambi wakamba ne: ‘Nenzakaje bisamba bionso, bintu bilenga bia mu bukua bisamba nebipuile munemu, nenguuje Nzubu wa tshijila eu ne lumu.’ (Hagai 2:7, MMM) Yeshaya ne Mika bakamanyisha pabu ne: mu matuku etu aa (“matuku atshidi alua”) bantu ba mu bisamba bia bungi bavua ne bua kutendelela Yehowa mu mushindu udiye wanyisha.​—Yeshaya 2:2-4; Mika 4:1-4.

Milayi eyi idiku ikumbana lelu anyi? Tukonkononayi mudi malu enzeka. Munkatshi mua bidimu dikumi bishale ebi, bantu bapite pa 3 110 000 mbadilambule kudi Yehowa mu matunga mapite pa 230. Nunku, pa Bantemu ba Yehowa 10 badi pa buloba lelu’eu, 6 mbatambule mu bidimu dikumi bishale ebi. Mu tshidimu tshia 2004, bivua bienze anu bu ne: ku minite ibidi yonso muntu uvua ubuela mu tshisumbu tshia bena Kristo! *

Anu bu mu bidimu lukama bia kumpala, lelu ‘bantu ba bungi mbitabuje, bakudimune mitshima yabu kudi Mukalenge.’ Nansha mudi divulangana dia bantu edi nkayadi kadiyi dileja ne: Nzambi ke udi wenzeja malu, kadi didi dileja ne: “Tshianza tshia Nzambi” tshidi ne basadidi bende. (Bienzedi 11:21) Ntshinyi tshidi tshikoka bantu bungi nunku bua kutendelela Yehowa? Mmunyi mudi didiunda edi dikulenga wewe?

Badi bakoka bantu ba muoyo muimpe

Yezu wakamba ne dishindika dionso ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’ (Yone 6:44) Nunku, Yehowa ke udi ukoka bantu badi ne mitshima mimpe ‘bua kubapaye muoyo wa tshiendelele.’ (Bienzedi 13:48) Nyuma wa Nzambi udi mua kujula muntu dijinga dia kumanya malu a mu nyuma. (Matayo 5:3) Ntatu mikole, kondo ka muoyo kadi kapisha muntu anyi dikeba malu mimpe bidi mua kufikisha muntu ku dikeba Nzambi ne kulonga malu adiye mulongoluele bantu.​—Mâko 7:26-30; Luka 19:2-10.

Bantu ba bungi badi balua kutendelela Yehowa bualu malongesha adi mu tshisumbu tshia bena Kristo adi andamuna nkonko idi ibatatshisha.

“Bikala Nzambi udiku, bua tshinyi bantu badi batungunuka ne kukenga?” Lukonko elu luvua lutatshisha Davide, mupanyishi wa diamba wa mu ditunga dia Italie. Bu muvua malu a Nzambi kaayi atamba kumusankisha, wakela Ntemu wa Yehowa kampanda lukonko elu anu bua kumulembakaja patupu. Davide udi wamba ne: “Tshivua ngela meji ne: mvua mua kupeta diandamuna dilenga divua mua kuntuisha to. Kadi Ntemu utuvua tuakula nende uvua ne lutulu lua bungi ne uvua ufila mvese ya mu Bible bua kushindika malu avuaye wamba. Muyuki au wakandenga ku muoyo bikole.” Lelu, Davide ukadi mushintulule nsombelu wende ne udi wenzela Yehowa mudimu.

Bakuabu pabu badi balua mu bulongolodi bua Yehowa bualu badi bakeba kumanya bua tshinyi  badi ne muoyo. Tshilejilu, pavua munganga kampanda wa masama a mitu wa mu Zagreb (ditunga dia Croatie) musame bua malu avua amutatshisha, wakaya kutangila munganga nende uvua wondopangana bikole. Wakakema bikole pakamupesha munganga au nomba wa telefone wa ku biro bia Bantemu ba Yehowa mu Zagreb, pamue ne dîna dia Ntemu kampanda uvuaye mumanye. Wakamuambila ne: “Tangila, ndi ngela meji ne: bantu aba nebakuambuluishe. Meme mukutume ku nzubu wa Mvidi Mukulu, neusangane anu mpingu, kakuyi wa kukuela dîsu ne kamuena bua nsongo. Tshiena ngela meji ne: nzubu wa Mvidi Mukulu udi mua kukuambuluisha to. Ndi mutume babedi bakuabu kudi Bantemu ba Yehowa ne ndi ngela meji ne: mbimpe uya pebe kudibu.” Bantemu bakalua kumutangila, ne kutuadijabu kulonga nende Bible. Mu mbingu mikese patupu, munganga au wakamba ne disanka dionso ne: dimanya dia malu adi Nzambi mulongolole ndindeje mushinga udi nawu muoyo.​—Muambi 12:13.

Bantu ba bungi mbamone ne: padi dikenga dibakuata, anu Bible ke udi mua kubasamba bimpe. Tshilejilu, mu ditunga dia Grèce, nsongalume wa bidimu muanda mutekete wakakuluka ku malata a mu kalasa ne kufuaye. Ngondo mikese pashishe, Bantemu babidi bakapetangana ne mamuende, kukebabu bua kumusamba pa kumuambila ne: Nzambi neabishe bantu ku lufu. (Yone 5:28, 29) Mamu kutuadija kudila. Bana betu ba bakaji aba kumuebeja ne: “Wewe musue kumanya malu a bungi a mu Bible, ndîba kayi ditudi mua kulua kukutangila?” Kubandamunaye ne: “Anu mpindieu.” Mamu kuya nabu kuende ne kutuadijabu kulonga Bible. Lelu, dîku diende dijima didi dikuatshila Yehowa mudimu.

Udi pebe uyisha anyi?

Bilejilu ebi bidi bileja malu atu enzeka pa buloba bujima. Yehowa udi usangisha batendeledi balelela ba mu matunga onso bua kubalongesha. Tshisumbu etshi ntshindile bua kupanduka ku nshikidilu wa tshikondo etshi tshibi ne kusomba mu bulongolodi bupiabupia.​—2 Petelo 3:13.

Mudimu wa pa buawu wa kusangisha bantu eu udi wenda uya ku ndekelu kuawu ne dikuatshisha dia Yehowa. (Yeshaya 55:10, 11; Matayo 24:3, 14) Udiku pebe wenza mudimu wa kuyisha Bukalenge bua Nzambi eu anyi? Biwikala uwenza, ikala mushindike ne: Nzambi udi ukuambuluisha ne udi pebe mua kuambulula mêyi a mufundi wa Misambu aa: “Dikuatshisha dianyi didi difuma kudi Yehowa.”​—Musambu 121:2.

[Mêyi adi kuinshi]

[Lungenyi lunene lua mu dibeji 9]

Kakuena muntu udi mumanye mua kudivuila kundi, bikala Tatu wakuntuma kayi mumukoke.’​—YONE 6:44

[Kazubu mu dibeji 8]

NNGANYI UDI UKOKA BANTU ABA?

‘Bikala Yehowa kayi wasa nzubu, badi bamuasa badi bakuata mudimu eu patupu.’​—Musambu 127:1.

‘Nzambi wakabidiundisha. Nunku muntu udi ukuna bintu kêna bualu bunene, anyi udi ubimiamina mâyi, kadi anu Nzambi udi ubidiundisha.’​—1 Kolinto 3:6, 7.