Enda anu bu muakenda Yezu Kristo

‘Yeye udi wamba ne: Ndi muikale mu buobumue ne Nzambi, budiye nabu mbua kuenda bu muakenda Yezu mene.’​—1 YONE 2:6.

1, 2. Kutangila Yezu bimpe kudi kumvuija tshinyi?

 MUPOSTOLO Paulo wakafunda ne: ‘Tuidikije ne kutantamana tshidikijilu tshia lubilu tshidi tshitekibua kumpala kuetu, batangile kudi Yezu, mubangi ne mushikiji wa ditabuja dietu.’ (Ebelu 12:1, 2) Bua tuetu kushala ne ditabuja, tudi ne bua kutangila bimpe Yezu Kristo.

² Muaku “batangile” mu tshiena-Greke udi umvuija “kuteya ntema kuyi ne ditanaji,” “kumusha mêsu pa tshintu tshimue bua kutangila tshikuabu,” “kutuishila mêsu pa tshintu kampanda.” Umue mukanda udi wamba ne: “Anu dîba didi munyemi wa lubilu muena Greke udi mu tshipalu umusha lungenyi ku lubilu ne ku tshipatshila tshiende bua kutangila bantu, lubilu luende ludi luteketa. Ke mudibi bienzekela kabidi muena Kristo.” Ditanaji didi mua kutupangisha bua kuya kumpala mu nyuma. Tudi ne bua kutangila Yezu Kristo bimpe. Kadi ntshinyi tshitudi tukeba kudi Mubangi ne Mushikiji wa ditabuja eu? Muaku wa tshiena-Greke udibu bakudimune “mubangi ne mushikiji” udi umvuija “mulombodi munene anyi ntunga-mulongo udi ufila tshilejilu mu malu onso.” Kutangila Yezu bimpe kudi kumvuija kulonda tshilejilu tshiende.

3, 4. (a) Kuenda bu muakenda Yezu kudi kutulomba tshinyi? (b) Nnkonko kayi itudi mua kudiela?

³ Bible udi wamba ne: ‘Yeye udi wamba ne: Ndi muikale mu buobumue ne Nzambi, budiye nabu mbua kuenda bu muakenda Yezu mene.’ (1 Yone 2:6) Tudi tushala mu buobumue ne Nzambi patudi tutumikila mikenji ya Yezu bu muvuaye mutumikile pende ya Tatuende.​—Yone 15:10.

⁴ Nunku, kuenda bu Yezu kudi kulomba kumutangila bimpe bu Mulombodi wetu Munene ne kulonda dikasa diende bimpe. Lukonko lunene lutudi mua kudiela ndolu elu: Yezu udi utulombola lelu’eu mushindu kayi? Mmunyi mudi kuenda bu muakenda Yezu kutuambuluisha? Mmasanka kayi atudi tupeta patudi tulonda tshilejilu tshia Yezu Kristo?

Mushindu udi Kristo ulombola bayidi bende

5. Yezu wakalaya bayidi bende tshinyi kumpala kua kuyaye mu diulu?

⁵ Pakavua Yezu mubike ku lufu, wakamuenekela bayidi bende e kubapesha mudimu munene mu mêyi aa: ‘Yayi bienu, nuvuije ba bisamba bionso bayidi.’ Wakabalaya bua kubakuatshisha mu mudimu eu ne mêyi aa: ‘Monayi, ndi nenu matuku onso too ne ku nshikidilu kua tshikondo etshi.’ (Matayo 28:19, 20) Mmushindu kayi udi Yezu Kristo muikale  ne bayidi bende mu matuku a ku nshikidilu wa tshikondo etshi?

6, 7. Mmunyi mudi Yezu utulombola ne nyuma muimpe?

⁶ Yezu wakamba ne: ‘Musambi, nyuma muimpe mene, watumabu kudi Tatu mu dîna dianyi, yeye neanuyishe malu onso, neanuvuluije mêyi onso angakanuambila.’ (Yone 14:26) Nyuma muimpe udi Nzambi utuma mu dîna dia Yezu udi utulombola ne utukolesha lelu’eu. Udi ututokeshila malu a mu nyuma ne utuambuluisha bua kumanya too ne “malu male a Nzambi.” (1 Kolinto 2:10) Ngikadilu milenga bu mudi: ‘dinanga, disanka, ditalala, muoyo-mule, bulenga, buimpe, ditabuja, lutulu, didikanda’ ‘mmamuma a nyuma.’ (Galatia 5:22, 23) Nyuma muimpe udi mua kutuambuluisha bua kupeta ngikadilu eyi.

⁷ Patudi tulonga Bible ne tuditatshisha bua kuenza malu atudi tulonga au, nyuma wa Yehowa neatuambuluishe bua kuvudija lungenyi ne meji, dijingulula dia malu ne dimanya. (Nsumuinu 2:1-11) Nyuma muimpe udi kabidi utuambuluisha bua kukandamena mateta. (1 Kolinto 10:13; 2 Kolinto 4:7; Filipoi 4:13) Bible udi ulomba bena Kristo bua ‘kudilengeja ku manyanu onso a mubidi ne a nyuma ne kukumbaja tshijila tshiabu.’ (2 Kolinto 7:1) Kadi tudiku mua kukumbaja malu adi Nzambi utulomba bikala nyuma muimpe kayi mutuambuluishe anyi? Umue mushindu udi Yezu utulombola nawu lelu ke nyuma muimpe udi Yehowa mumuanyishile bua kuenza nende mudimu.​—Matayo 28:18.

8, 9. Mmunyi mudi Yezu wenza mudimu ne “mupika wa lulamatu ne wa budimu” bua kulombola bayidi bende?

⁸ Tangila mushindu mukuabu udi Yezu ulombola nawu tshisumbu lelu. Yezu wakamba bua dikalaku diende ne bua nshikidilu wa tshikondo etshi ne: ‘Nnganyi udi bushuwa mupika wa lulamatu ne wa budimu udi mfumuende muteke ku mutu kua bena mudimu bende bua kubapesha biakudia pa dîba? Mupika au neikale ne diakalenga padi mfumuende ufika umusangana wenza nunku. Bulelela ndi nnuambila ne: Neamuteke ku mutu kua bintu biende bionso.’​—Matayo 24:3, 45-47, NW.

⁹ “Mfumu” n’Yezu Kristo. “Mupika” nkasumbu ka bena Kristo bela manyi badi pa buloba. Mupika eu udi ne mudimu wa kutangila bintu bia Yezu bidi pa buloba ne kufila biakudia bia mu nyuma pa dîba. Kudi bakulu bapiluke ba mu kasumbu ka “mupika wa lulamatu ne wa budimu” badi baleja mpala wa kasumbu aka; badi benza kasumbu kadibu babikila ne: Kasumbu Kaludiki. Badi balombola mudimu wa diyisha ne wa difila biakudia bia mu nyuma pa dîba. Nunku Yezu udi ulombola bayidi bende ne diambuluisha dia kasumbu ka “mupika wa lulamatu ne wa budimu” ne Kasumbu kende Kaludiki.

10. Mmunyi mutudi ne bua kumona bakulu, ne mbua tshinyi?

¹⁰ Yezu udi kabidi ulombola bayidi bende ku butuangaji bua ‘bantu badi bu mapa’ anyi bakulu peshi batangidi. Mbabateka bua ‘kulengejabu bansantu tshishiki bua bobu benze mudimu wa kukuatshisha bakuabu, bua kudiundishabu ekeleziya udi mubidi wa Kristo.’ (Efeso 4:8, 11, 12) Ebelu 13:7 udi wamba bua bakulu ne: ‘Nuvuluke bantu bakanukokesha, bakanuambila dîyi dia Nzambi; nuele meji a nshikidilu wa tshikadilu tshimpe tshia mioyo yabu, nuidikije ditabuja diabu.’ Bakulu badi balombola tshisumbu. Bu mudibu bidikija Yezu, tudi ne bua kuidikija ditabuja diabu. (1 Kolinto 11:1) Tudi tuleja dianyisha dietu bua bakulu patudi tubatumikila.​—Ebelu 13:17.

11. Yezu udi ulombola bayidi bende mushindu kayi lelu, ne kuenda bu muakendaye kudi kumvuija tshinyi?

¹¹ Nunku, Yezu Kristo udi ulombola bayidi bende ku diambuluisha dia nyuma muimpe, dia “mupika wa lulamatu ne wa budimu” ne dia bakulu. Bua kuenda bu Yezu, tudi ne bua kumanya mushindu udiye ulombola bayidi  bende ne kumutumikila. Tudi kabidi ne bua kuidikija nsombelu wende. Mupostolo Petelo wakafunda ne: ‘Bua nuakabikidibua bua muanda eu, bualu bua Kristo wakakenga bua bualu buenu, wakanushila tshilejilu bua nuenu numulonde mu makasa ende.’ (1 Petelo 2:21) Kulonda Yezu kudi mua kutulenga mu mushindu kayi?

Ikala ne nkatshinkatshi paudi ne bukokeshi

12. Bakulu badi ne bua kuidikija Yezu mu bualu kayi nangananga?

¹² Nansha mudi Nzambi mupeshe Yezu bukokeshi bua bungi, Yezu udi ne nkatshinkatshi padiye wenza mudimu. ‘Dienza malu ne nkatshinkatshi dia [bonso badi mu tshisumbu ne nangananga bakulu] didi ne bua kumanyika kudi bantu bonso.’ (Filipoi 4:5, NW; 1 Timote 3:2, 3) Bu mudi bakulu ne bukokeshi kampanda mu tshisumbu, badi ne bua kulonda tshilejilu tshia Kristo mu mudimu wabu.

13, 14. Mmunyi mudi bakulu mua kuidikija Yezu padibu bakankamija bakuabu bua kukuatshila Nzambi mudimu?

¹³ Yezu uvua uvuluka mikalu ivua nayi bayidi bende. Kavua ubalomba malu avuabu kabayi mua kuenza to. (Yone 16:12) Yezu uvua ulomba bayidi bende bua kudienzeja bikole bua kuenza disua dia Nzambi pamutu pa kubenzeja malu ku bukole. (Luka 13:24) Ke bua tshinyi uvua ufila tshilejilu ne ulenga mitshima yabu. Bakulu kabena benzeja bayidi bakuabu bua kuenzela Nzambi mudimu ku bukole to, kadi batu babakankamija bua kumuenzela mudimu bualu mbamunange, banange Yezu ne bantu nabu.​—Matayo 22:37-39.

¹⁴ Yezu kavua ukeba kulombola nsombelu wa bantu mu malu onso anu bualu uvua ne bukokeshi to. Kavua muele mikenji mikole ne mipitepite bungi to. Uvua ujinga kulenga mitshima ya bantu ne mêyi manene a mu Mikenji ya Mose. (Matayo 5:27, 28) Bu mudi bakulu bidikija Yezu Kristo, kabena belela bantu mikenji yabu bobu anyi bakeba amu ne: bantu balonde wabu mmuenenu to. Tshilejilu, bu mudi mu malu a mvuadilu ne ndengejilu wa mubidi ne nsuki anyi dijikija lutetuku, bakulu badi mua kulenga mitshima ya bantu ne mêyi a Bible bu mudi adi mu mvese idi ilonda eyi: Mika 6:8; 1 Kolinto 10:31-33; ne 1 Timote 2:9, 10.

Dileja bakuabu bulenga ne dibafuila luse

15. Yezu wakenza tshinyi bua bilema bia bayidi bende?

¹⁵ Yezu mmutushile tshilejilu mu mushindu uvuaye wenza bua bilema bia bayidi bende. Tuangatabi malu abidi akenzeka butuku bua kumpala kua kufuaye. Pakafika Yezu ku Getesemane, ‘wakangata Petelo, Yakobo ne Yone’ ne kubambila ne: “Nuikale batabale.” Pashishe ‘wakenda katantshi kîpi, kutuaye mpala panshi, kusambila.’ Padiye upingana, ‘wakabasangana balale tulu.’ Yezu wakenza tshinyi? Wakamba ne: “Muoyo mmusue kuenza, kadi mubidi tshiawu mbutekete.” (Mâko 14:32-38, MMM) Nunku, pamutu pa kutandisha bikole Petelo ne Yakobo ne Yone, wakabaleja bulenga! Kabidi, anu buine butuku abu, Petelo wakavila Yezu misangu isatu. (Mâko 14:66-72) Yezu wakalua kuenzela Petelo tshinyi pashishe? ‘Mukalenge wakabika ku lufu bulelela, wakamueneka kudi Simona Petelo.’ (Luka 24:34) Bible udi wamba ne: Yezu  ‘wakamueneka kudi Kefa, ne kunyima kudi bapostolo dikumi ne babidi.’ (1 Kolinto 15:5) Pamutu pa kushalaye mufikile Petelo munda, wakamufuila luse ne kumukolesha mu mikolo. Yezu wakalua kabidi kupesha Petelo bukokeshi bua bungi.​—Bienzedi 2:14; 8:14-17; 10:44, 45.

16. Mmunyi mutudi mua kuenda bu Yezu padi bena Kristo netu batuenzela bibi?

¹⁶ Padi bena Kristo netu batuenzela bibi bua dipanga bupuangane, katuenaku petu mua kubaleja bulenga ne kubafuila luse anu bu Yezu anyi? Petelo wakalomba bena Kristo ne: ‘Nuikale buonso buenu ne mutshima umue, nusambangane, nunangangane bu bana babu ba mu Kristo, nuikale ne mitshima ya luse ne mitshima mipuekele; kanushintakaji bubi ku bubi anyi tshipendu ku tshipendu; kadi nushintakajangane nabu disanka.’ (1 Petelo 3:8, 9) Kadi muntu yeye kayi mutuenzele malu bu Kristo, kayi utuleja bulenga ne utufuila luse? Tudi anu ne bua kuidikija Yezu ne kuenza anu bu muvuaye mua kuikala muenze.​—1 Yone 3:16.

Teka malu a Bukalenge bua Nzambi pa muaba wa kumpala

17. Ntshinyi tshidi tshileja ne: Yezu uvua muteke dienza disua dia Nzambi pa muaba wa kumpala?

¹⁷ Tudi kabidi mua kuenda bu Yezu mu mukuabu mushindu. Yezu uvua muteke kuyisha lumu luimpe lua Bukalenge bua Nzambi pa muaba wa kumpala. Ke bualu kayi yeye mumane kuyisha mukaji muena Samalea (pabuipi ne musoko wa Suka), wakambila bayidi bende ne: ‘Biakudia bianyi bidi kuenza mudi wakantuma musue ne kujikija mudimu wende.’ (Yone 4:34) Kuenza disua dia Tatuende kuakambuluisha Yezu; kuvua kuenze anu bu biakudia bivua bimupesha disanka ne bukole. Kadi kuipatshila bua kuenza disua dia Nzambi anu bu Yezu kudi mua kutupangisha mua kuikala ne nsombelu mulenga anyi?

18. Kuambila bana bua kuenza mudimu wa ku dîba ne ku dîba kudi ne masanka kayi?

¹⁸ Padi baledi bambila bana babu bua kuenza mudimu wa ku dîba ne ku dîba, bobu ne bana babu badi bapeta masanka. Tshilejilu, tatu kampanda wakambila bana bende ba mapasa ba balume katshia ku buana buabu bua kuluabu bampanda-njila. Pakajikija bana aba tulasa tuabu, bakalua bampanda-njila. Tatu eu udi ufunda ne disanka dionso ne: “Bana betu ki mbatuele mâyi ku makasa to. Tudi tuamba ne disanka dionso ne: ‘Bana badi bumpianyi bufume kudi Yehowa.’” (Musambu 127:3) Mmunyi mutu mudimu wa ku dîba ne ku dîba wambuluisha bana? Mamu mukuabu wa bana batanu udi wamba ne: “Bumpanda-njila mbuambuluishe bana banyi bua kudiabu malanda mimpe ne Yehowa, bua kudilongela Bible bimpe, bua kuenza malu ne programe ne mua kuteka malu a mu nyuma pa muaba wa kumpala. Nansha muvuabu bonso ne bua kushintulula malu a bungi, kakuena nansha umue udi munyingalale bua njila udiye musungule to.”

19. Mbipatshila bimpe kayi bidi bansonga mua kudifundila?

¹⁹ Bansonga wetu, nudi badifundile bipatshila kayi? Nudi basue kumanya bimpe mudimu wa bianza kampanda anyi peshi nudi nukeba kuenza mudimu wa Nzambi wa ku dîba ne ku dîba? Paulo udi unubela ne: ‘Nudimuke bu munudi nuenda; kanuendi bu badi kabayi ne meji, kadi nuende bu bena meji; nudisumbile tshikondo  patshiditshiku tshia kuenza malu mimpe, bualu bua matuku adi mabi.’ Wakasakidila kabidi ne: ‘Nunku kanuikadi bu bapote, kadi nujingulule mudi disua dia Mukalenge.’​—Efeso 5:15-17.

Ikala ne lulamatu

20, 21. Mmunyi muvua Yezu muleje lulamatu? Mmunyi mutudi mua kumuidikija mu muanda eu?

²⁰ Bua kuenda bu Yezu, tudi ne bua kuidikija lulamatu luende. Bible udi wamba bua lulamatu lua Yezu ne: ‘Nuikale ne meji aa munda muenu avua kabidi munda mua Kristo Yezu. Yeye uvua muikale ne bunzambi, kadi kakabala buobumue buende ne Nzambi bu tshintu tshia kulaminyina bikole; kadi yeye wakadiumushila bimanyinu bia butumbi buende, pakangateye mubidi wa mupika, pakalueye mu tshifuanyikiji tshia muntu. Ne pakamuenekaye mu tshifuanyikiji tshia muntu, yeye wakadipuekesha, wakalua mutumikidi too ne ku lufu, lufu mene lua pa mutshi wa makenga.’ Yezu wakakokela bumfumu bua Yehowa bua kuleja lulamatu luende. Wakatumikila Nzambi too ne ku lufu pa mutshi wa makenga. Tudi ne bua ‘kuikala ne meji aa’ ne kudifila bua kuenza disua dia Nzambi ne lulamatu luonso.​—Filipoi 2:5-8.

²¹ Yezu wakaleja bapostolo bende lulamatu bualu wakabananga ‘too ne ku ndekelu’ nansha muvuabu benza bilema. (Yone 13:1) Katuena petu mua kulekela bilema bia bena Kristo netu bitusaka bua kubajana to.

Londa tshilejilu tshia Yezu

22, 23. Kulonda bimpe tshilejilu tshivua Yezu mushiye kudi kutupetesha masanka kayi?

²² Eyowa, bu mutudi katuyi bapuangane, katuena mua kulonda dikasa dia Yezu ne mu katoba to. Kadi, tudi anu mua kuluangana bua kulonda dikasa diende bimpe. Bua kumulonda bimpe, tudi ne bua kumvua mushindu udiye ulombola ne kumukokela ne kuidikija bikole tshilejilu tshivuaye mushiye.

²³ Kuidikija Yezu kudi kutupetesha masanka a bungi. Nsombelu wetu udi ulengela patudi tudifila bua kuenza amu disua dia Nzambi pamutu pa disua dietu. (Yone 5:30; 6:38) Tudi ne kondo ka muoyo kimpe ne nsombelu wetu udi ulua wa tshitembu. Yezu wakabikila bonso bavua batata ne bashikile bua bapete disulakana. (Matayo 11:28-30) Tuetu tulonda tshilejilu tshia Yezu, bakuabu nebadiumvue bimpe padibu ku luseke luetu. Nunku, tutungunukayi ne kuenda anu bu muakenda Yezu.

Udi muvuluke anyi?

• Mmunyi mudi Yezu ulombola bayidi bende lelu?

• Mmunyi mudi bakulu mua kulonda tshilejilu tshia Yezu padibu bakuata mudimu ne bukokeshi budi Nzambi mubapeshe?

• Mmunyi mutudi mua kulonda tshilejilu tshia Yezu padi bakuabu batuenzela bibi?

• Mmunyi mudi bansonga mua kuteka malu a Bukalenge bua Nzambi pa muaba wa kumpala?

[Nkonko ya dilonga]

[Tshimfuanyi mu dibeji 23]

Bakulu badi batuambuluisha bua kutumikila dîyi dia Yezu

[Bimfuanyi mu mabeji 24, 25]

Bansonga wetu, mbipatshila kayi binudi nabi bua kuikala bena Kristo ba tshitembu?