Kandamena ngenyi mibi!

PAVUA Yobo mu lutatu, bakalua kumumona kudi balunda bende basatu aba: Elifaza, Biledada ne Sofâ. Bakalua bua kumusamba. (Yobo 2:11) Elifaza uvua muntu munene ne pamuapa mukuluabu bonso. Yeye ke wakakula wa kumpala ne wakakula bia bungi. Mmalu a mushindu kayi avua Elifaza muakule mu miyuki yende isatu?

Elifaza wakavuluka tshikena-kumona tshiakamonaye musangu mukuabu ne kuamba ne: ‘Mupuya [anyi nyuma] wakapita pa mpala panyi, miosa ya pambidi panyi yakavuayila. Tshintu atshi tshiakimana, kadi meme tshiakamanya mua kumona tshimfuanyi tshiatshi; tshimfuanyi tshiakadi ku mêsu kuanyi. Ngakumvua dîyi ditekete.’ (Yobo 4:15, 16) Kadi nnyuma kayi uvua mulombole lungenyi lua Elifaza? Malu mabi akambaye adi aleja ne: kavua muanjelu wa Nzambi to. (Yobo 4:17, 18) Uvua nyuma mubi. Tshianana, Yehowa kavua mua kuikala mutandishe Elifaza ne balunda bende babidi bua muvuabu bashime to. (Yobo 42:7) Bulelela, demon ke uvua musake Elifaza bua kuakula nunku. Malu akambaye avua abengangana ne a Nzambi.

Nngenyi kayi itudi tumona mu malu akamba Elifaza? Bua tshinyi mbimpe kudilama ku ngenyi mibi? Ntshinyi tshitudi mua kuenza bua kuyikandamena?

‘Kêna mua kueyemena badi bamukuatshila mudimu’

Elifaza udi uleja mu miyuki yende yonso isatu ne: Nzambi udi ne malu makole be, bualu malu onso adi basadidi bende benza kaatu amusankisha to. Elifaza wakambila Yobo ne: ‘Tangila, kêna mua kueyemena ba mu diulu badi bamukuashila mudimu, ne udi ubanda banjelu bende ne: Badi ne mapanga.’ (Yobo 4:18) Pashishe Elifaza wakamba bua Nzambi ne: ‘Nzambi kêna weyemena bende ba tshijila, ne diulu kadiena ditoke too ku mêsu kuende.’ (Yobo 15:15) Ke kuebejaye ne: ‘Biwikala muakane bualu ebu budi bukuatshisha Wa Bukole Buonso anyi?’ (Yobo 22:3) Biledada pende uvua witaba lungenyi luende elu bualu wakamba ne: ‘Ngondo mene mene kêna ne dinkenka, mitoto kayena milengele ku mêsu kua Nzambi.’​—Yobo 25:5.

Tudi ne bua kudimuka bua kubenga kulonda ngenyi ya nunku. Idi mua kutufikisha ku dimona ne: Nzambi udi utulomba bintu bia bungi be! Lungenyi elu ludi lunyanga malanda etu ne Yehowa. Tshikuabu tshintu, tuetu bikale ne ngenyi ya nunku, netuenze tshinyi patupeshabu dinyoka diakanyine? Pamutu pa tuetu kuitaba dinyoka edi ne budipuekeshi, mutshima wetu udi mua ‘kukuatshila Yehowa tshiji,’ ne tudi mua kumusuikila dijita munda muetu. (Nsumuinu 19:3) Bualu ebu budi mua kunyanga malanda etu ne Nzambi.

‘Muntu udi mua kukuatshisha Nzambi ne tshintu anyi?’

Kuamba ne: Nzambi udi ne malu makole kudi kupetangana ne kuamba ne: katu wangata bantu ne mushinga to. Elifaza wakebeja mu muyuki wende muisatu ne: ‘Muntu udi mua kukuatshisha Nzambi ne tshintu anyi? Nansha;  muntu udi ne meji udi udikuatshisha yeye nkayende.’ (Yobo 22:2) Elifaza uvua musue kuleja ne: muntu kêna ne mushinga ku mêsu kua Nzambi to. Biledada wakafila pende lungenyi lua muomumue pakambaye ne: ‘Muntu wa pa buloba udi mua kubingishibua ku mêsu kua Nzambi munyi? Udi muledibue kudi mukaji udi mua kuikala ne mutshima mutoke munyi?’ (Yobo 25:4) Bilondeshile lungenyi elu, bu muvua Yobo, muntu wa pa buloba kavua ne bua kuela meji ne: uvua muakane ku mêsu kua Nzambi to.

Bamue bantu lelu badi ne ngenyi mibi pa bidi bibatangila bobu nkayabu. Malu bu mudi: nkoleshilu wabu, ntatu idibu bapeta anyi dibakengesha anu bua bisa anyi bisamba biabu bidi mua kuikala bibafikishe ku diela meji mabi. Kadi Satana ne bademon bende badi kabidi basanka padibu batshingisha muntu. Bobu bafikishe muntu ku dimona ne: malu onso adiye wenza kaena ne mushinga ku mêsu kua Nzambi Wa-Bukole-Buonso, mbipepele bua muntu au kuteketaye mu mikolo. Ndekelu wa bionso, udi mua kupambuka ne kulekela Nzambi wa muoyo.​—Ebelu 2:1; 3:12.

Bukulakaje ne masama bidi mua kutupangisha mua kuenza malu makuabu. Mudimu wetu wa kuyisha utudi tuenza udi mua kumueneka mukese patudi tuufuanyikija ne utuvua tuenza patutshivua bansonga anyi patuvua ne bukole bua mubidi. Mbimpe tumanye ne: Satana ne bademon bende mbasue tufike ku diela meji ne: mudimu utudi tuenza kawena usankisha Nzambi to. Tudi ne bua kukandamena ngenyi ya nunku.

Mushindu wa kukandamena ngenyi mibi

Nansha muvua Satana Diabolo mukebele Yobo makenga a mishindu yonso, Yobo wakamba ne: ‘Too ne pangafua tshiena ngitabuja bua mutshima wanyi mutoke umuke kundi.’ (Yobo 27:5) Bu muvua Yobo munange Nzambi, uvua mudisuike bua kulama muoyo wende mutoke mu nsombelu yonso, ne kakuvua tshintu tshivua mua kushintulula lungenyi luende to. Ke bualu bua mushinga budi mua kutuambuluisha bua kuluisha ngenyi mibi. Tudi ne bua kumvua bimpe tshidi dinanga dia Nzambi ne tudi ne bua kuikala ne dianyisha bua dinanga edi. Tudi kabidi ne bua kukolesha dinanga dietu dia Nzambi. Tudi mua kudikolesha patudi ne tshibidilu tshia kulonga Bible, kuelangana meji a malu atudi balonge ne kusambila Nzambi bua atuambuluishe.

Tshilejilu, Yone 3:16 udi wamba ne: ‘Nzambi wakatamba kusua ba pa buloba, yeye wakabapa Muanende umuepele mulela.’ Yehowa mmunange bantu bikole ne mmuleje dinanga diende mu malu adiye mubenzele. Dielangana meji pa bilejilu bia kale didi mua kukolesha dianyisha ne dinanga ditudi nadi kudi Yehowa ne nenku kutuambuluisha bua kuluisha ngenyi mibi.

Tshilejilu, tangila muvua Yehowa muyukile ne Abalahama tshikondo tshivuaye ujinga kubutula Sodoma ne Amola. Abalahama wakebeja Yehowa misangu muanda mukulu bua kumanya tshivuaye ukeba kuenza. Yehowa kavua munyingalale anyi mufike munda musangu nansha umue. Kadi mandamuna ende akakolesha Abalahama ku muoyo ne akamusamba. (Genese 18:22-33) Tshilejilu tshikuabu, pavua Nzambi mupandishe Lota ne dîku diende ku kabutu ka Sodoma, Lota wakalomba bua kunyemenaye mu musoko mukuabu uvua pabuipi pamutu pa kuya ku mikuna. Yehowa wakamuandamuna ne: ‘Ngakuitabuja bualu ebu kabidi, tshiena nshipa musoko uwakulombela.’ (Genese 19:18-22) Malu aa adiku aleja Yehowa bu mukalenge wa malu makole, kayi ne dinanga ne udi ulomba bantu bende malu mapite bungi anyi? Tòo. Adi aleja tshidiye menemene: Mukalenge muimpe wa dinanga, wa luse ne udi umvuilangana.

Bilejilu bia bena Isalele ba kale bu mudi: Alona, Davidi ne Manashe bidi bibengangana ne lungenyi lua ne: Nzambi utu ukeba kumona amu bilema bia bantu misangu yonso ne kakuena muntu udi mua kumusankisha. Alona wakenza malu mabi manene asatu: wakenza kana ka ngombe ka or, yeye ne Mîyama bakajana Mose ne pashishe wakabenga kutumbisha Nzambi ku Meliba. Nansha nanku, Yehowa  wakamona malu malenga avua munda muende ke kuanyishaye bua atungunuke ne kumuenzela mudimu bu muakuidi munene too ne pakafuaye.​—Ekesode 32:3, 4; Nomba 12:1, 2; 20:9-13.

Mukalenge Davidi wakenza bilema binene pavuaye ukokesha: wakangata mukaji wa bende, kushipesha muntu uvua kayi ne bualu ne kubala bantu kakuyi dianyisha dia Yehowa. Kadi Yehowa wakamona muvua Davidi munyingalale bua malu mabi aa ke yeye kuanyishaye bua ashale mukalenge too ne ku lufu luende bua kulama tshipungidi tshia Bukalenge.​—2 Samuele 12:9; 1 Kulondolola 21:1-7.

Mukalenge Manashe wa mu Yuda wakibakila Bâla bioshelu, kulambulaye bana bende mu kapia, kujululula malu a nyuma mibi ne kuibaka bioshelu bia nzambi ya dishima mu lubanza lua ntempelo. Kadi pakanyingalalaye ne muoyo umue, Yehowa wakamufuila luse, kumumbusha mu bupika ne kumupingaja mu bukalenge. (2 Kulondolola 33:1-13) Aa mmalu adi Nzambi udi kayi wangata bantu ne mushinga mua kuenza anyi? Nansha kakese!

Mufundianganyi ke udi ne tshilumbu

Kabiena mua kutukemesha to, bualu Satana ke udi ne malu mabi onso adiye ubanda nawu Yehowa. Satana udi ne malu makole ne tshikisu. Bualu ebu budi bumueneka bimpe mu tshilele tshia kale tshia kuosha bana mu ntendelelu wa dishima. Tshilejilu, bena Isalele bavua batombokele Nzambi bakosha bana babu mu kapia: bualu buvua Yehowa kayi muelele nansha meji to.​—Yelemiya 7:31.

Satana ke udi ukeba bilema bia bantu dîba dionso, ki n’Yehowa to. Buakabuluibua 12:10 udi ne: Satana udi ‘mubandi wa bana betu, udi ubabanda kumpala kua Nzambi wetu munya ne butuku.’ Kadi mufundi wa Misambu wakamba bua Yehowa ne: ‘Yehowa, bu wewe mubale dipambuka dia bantu, muntu kayi uvua mua kuimana, Mukalenge? Kadi dibuikidila dia mibi didi kuudi.’​—Musambu 130:3, 4.

Pikala ngenyi mibi kayitshiyiku kabidi

Banjelu bavua ne disanka dia bungi pakipatabu Satana Diabolo ne bademon bende mu diulu. (Buakabuluibua 12:7-9) Kutuadija anu ku tshikondo atshi, banjelu babi aba kabavua kabidi mua kubuelakana mu malu a banjelu ba Yehowa to.​—Danyele 10:13.

Bena pa buloba nebasanke pabu mu katupa kîpi emu. Muanjelu mukuabu neapueke mu diulu muikale ne nsapi ya ku dijimba ne lukanu lunene mu tshianza tshiende bua kusuika Satana ne bademon bende ne kubela mu dijimba mudibu kabayi mua kuenza mudimu. (Buakabuluibua 20:1-3) Bushuwa, netuikale ne disanka dinene pakumbana bualu ebu.

Kadi mpindieu, tudi ne bua kukandamena ngenyi mibi. Dîba dionso ditudi tumona ne: tukadi ne ngenyi mibi, tudi ne bua kushindamija meji etu pa dinanga dia Yehowa. Nunku, ‘ditalala dia Nzambi didi ditamba dijingulula dionso dia bantu nedilame mitshima yetu ne meji etu.’​—Filipoi 4:6, 7.

[Tshimfuanyi mu dibeji 26]

Yobo wakakandamena ngenyi mibi

[Tshimfuanyi mu dibeji 28]

Lota wakamona ne: Yehowa udi Mukalenge udi umvuila bantu bende