Mmuntu anyi n’Nzambi?

‘NDI munya wa ba pa buloba; wandonda kêna wendakana mu mîdima, kadi neikale ne munya wa muoyo.’ (Yone 8:12) Yezu Kristo ke wakamba mêyi aa. Muntu mukuabu uvua mulonge tulasa tua bungi mu bidimu lukama bia kumpala wakafunda bua bualu buende ne: ‘Munda muende mudi musokoka bibutshilu bionso bia meji ne bia lungenyi.’ (Kolosai 2:3) Bible udi wamba kabidi ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo.’ (Yone 17:3) Kumanya Yezu bimpe kudi ne mushinga bua tuetu kukumbaja majinga etu a mu nyuma.

Pa buloba bujima, bantu bakadi bumvue bakula bua Yezu Kristo. Kakuena muntu udi mua kubenga ne: mmushintulule nsombelu wa bantu. Nansha kalandriye ka matunga a bungi nkashindamene pa tshidimu tshidibu bela meji ne: ke tshivuabu balele Yezu. Ke bualu kayi bantu ba bungi batu babikila bidimu bia kumpala kua tshidimu atshi ne: kumpala kua diledibua dia Yezu ne bia panyima pa tshidimu atshi ne: kunyima kua diledibua dia Yezu.

Tshidibi, bantu kabena bapetangana pa tshivua Yezu muikale to. Bua bamue, uvua anu muntu wa pa buende uvua mushintulule malu a bantu. Bakuabu pabu badi bamutendelela bu Nzambi Wa-Bukole-Buonso. Bena Hindu bakuabu badi bafuanyikija Yezu Kristo ne nzambi wabu Krishna, udi ba bungi bamba ne: nzambi muvuale mubidi wa muntu. Kadi Yezu uvua anu muntu wetu wa tshianana eu anyi bavua mua kumutendelela? Uvua nganyi menemene? Uvua mufumine penyi? Uvua muntu wa mushindu kayi? Kadi mpindieu udi kuepi? Anu mutuabimona mu tshiena-bualu tshidi tshilonda, mukanda udi wakula bikole bua Yezu udi wandamuna nkonko eyi bimpe.