Nkonko ya babadi

Kunaya manaya a mvita a ku ordinatere kudi mua kunyanga malanda etu ne Yehowa anyi?

Mukalenge Davidi wakafunda ne: ‘Yehowa udi uteta muakane ne mubi. Muoyo wende mmukine munangi wa mvita.’ (Musambu 11:5, MMM) Muaku wa mu tshiena-Ebelu “kukina” udi umvuija kuikala “muluishi.” Nunku, muntu yonso udi unanga tshikisu, udi muluishi wa Nzambi. Ke bualu kayi tudi ne bua kudiebeja ne: Kunaya amue manaya a ku ordinatere kudiku mua kutufikisha ku dinanga mvita ne tshikisu anyi?

Manaya a tshikisu a ku ordinatere adi asaka bantu ku dienza mudimu ne bia mvita. Adi kabidi alongesha eu udi uanaya mvita. Tshikandakanda kampanda tshidi tshiamba ne: “Basalayi ba mu Amérique batu badibidija ne manaya a ku ordinatere bua kulonga mua kuluangana. Amue a ku manaya aa mbaangatshile ku atu bantu bonso ba tshianana aba banaya pabu.”​—The Economist.

Bushuwa, bantu batu banaya manaya a mvita a ku ordinatere kabatu benzela bantu betu ba bushuwa aba bibi to. Kadi mushindu udibu bajikija lutetuku eu udi uleja tshinyi pa bidi bitangila tshidi mu mutshima wabu? (Matayo 5:21, 22; Luka 6:45) Ntshinyi tshiudi mua kuamba bua muntu udi musue kudibidija ne mishindu ya dituangana tuela, diasangana bingoma, ditshibulangana ne dishipangana? Netuambe kabidi tshinyi bua muntu udi upitshisha mêba a bungi ku manaya aa, ushala mupika wa manaya aa? Mu mishindu yonso, muntu eu mmulekele dinanga dia malu a mvita dienda dikola munda muende anu bu mudi muntu udi utangila bindidimbi bia bantu kabayi ne bilamba uvudija majinga a tshiendenda.​—Matayo 5:27-29.

Mmu mushindu kayi mudi Yehowa ukina muntu udi munange malu a tshikisu? Davidi udi wamba ne: Yehowa udi ‘umukina’ ne muoyo wende mujima. Tshilejilu, mu matuku a Noa, Yehowa wakaleja muvuaye mukine ne muoyo mujima bantu badi banange tshikisu pakambaye ne: ‘Nshikidilu wa bantu bonso wakufika kumpala kuanyi, bualu bua buloba budi buule tente ne mayoyo [anyi tshikisu] bualu buabu; mona, nembajimije ne buloba pamue.’ (Genese 6:13) Yehowa wakabutula bantu bonso bavua pa buloba bualu bavua bena tshikisu. Wakalama anu Noa ne dîku diende, tuamba ne: bantu muanda mukulu bavua kabayi banange tshikisu to.​—2 Petelo 2:5.

Bantu badi basue kuikala balunda ba Yehowa badi ne bua ‘kutshibula miele yabu ya mvita, bayenza bikasu; nebatshibule mafuma abu, baenze miele ya kudima nayi.’ Pamutu pa kulongabu malu a mvita, ‘kabakulonga mua kuluangana mvita kabidi.’ (Yeshaya 2:4, MMM) Bua tuetu kushala anu balunda ba Nzambi ne kubenga kulua baluishi bende, tudi ne bua ‘kudimuka ku malu mabi, kuenza malu mimpe.’ Tudi ne bua ‘kukeba ditalala, kudilonda.’​—1 Petelo 3:11.

Kadi ntshinyi tshiudi mua kuenza biwikala ne tshibidilu tshia kunaya manaya a tshikisu a ku ordinatere? Bidi bikengela wenze muebe muonso bua kusankisha anu Yehowa pa kubenga kuenza malu adiye mukina. Bushuwa, udi ne bua kulomba Nzambi nyuma wende bua akuambuluishe bua kulekela ngenzelu mubi eu. Ngikadilu bu mudi: ditalala, buimpe ne kudikanda ke idi mua kukuambuluisha bua kulekela manaya aa.​—Luka 11:13; Galatia 5:22, 23.