Tshitudi mua kuenza patudi ne dibungama

UTUKU udiumvua bibi imue misangu anyi? Utu ukuata tshiji lukasa, ufika munda bikole peshi ubungama anyi? Ntatu itu ikupita makanda anyi? Ntshinyi tshidi mua kukuambuluisha?

Malu aa atu enzekela bantu bonso. Tuetu bakonkonone bimpe mushindu utudi tudiumvua, netuikale ne disanka. Bible udi wamba ne: ‘Muena meji udi wandamuka mupote ku dikengesha didiye nadi.’ (Muambi 7:7) Nnganyi utu kayi udiumvua bibi padiye umona malu a tshikisu ne njiwu idi ikuata bantu muaba udiye musombele? Bible udi wamba kabidi ne: ‘Kakuena bualu buimpe bu bua muntu kusanka mu midimu yende.’ (Muambi 3:22) Bua kuikala ne nsombelu muimpe, bidi bikengela tumanye mushindu utudi mua kupeta disanka. Kadi mmushindu kayi utudi mua kupeta disanka ne kulekela dibungama anyi kanyinganyinga?

Bua kujikija dibungama, bidi bikengela kuenza bualu kampanda. Tshilejilu, bituikala tumvua bibi bua malu adi enzeka kadi katuyi ne mushindu wa kuajikija, kabiakuikalaku bimpe bua kushintulula mudimu anyi muaba utudi basombele pamutu pa kuikala amu ne malu aa mu mutu anyi? Tshilejilu, tuetu baya kuendakana mu miaba milengeja bimpe, bateleje mijiki mimpe, benze kalasisa anyi bambuluishe muntu kampanda, tudi mua kupeta ndambu wa disanka.​—Bienzedi 20:35.

Mushindu mutambe buimpe wa kujikija dibungama nkueyemena Mufuki wetu. Bikala dibungama dietu kadiyi dijika lukasa, tudi ne bua ‘kuteka ntatu yetu yonso kudi Nzambi’ mu disambila. (1 Petelo 5:6, 7) Bible udi utujadikila ne: ‘Yehowa udi pabuipi ne bantu badi ne mitshima itamba kunyingalala. Makenga a muntu muakane adi a bungi; kadi Yehowa udi umusungila ku buonso buawu.’ (Musambu 34:18, 19) Kadi mmunyi mutuafika ku dijadika ne: Nzambi udi ‘Mukuatshishi ne musungidi’ wetu? (Musambu 40:17) Mpatudi tulonga Bible ne bilejilu bimpe bidimu bidi bileja mudi Nzambi uditatshisha bua diakalenga dia basadidi bende.