Udi ‘mubanji ku mêsu kua Nzambi’ anyi?

LUSUMUINU lua muntu mubanji ngumue wa ku mifuanu ya Yezu idi yelesha meji bikole. Bu muvua muntu mubanji au ne tshipatshila tshia kudilongoluela bintu bua kuikalaye bimpe matuku avua alua, wakapangadika bua kuasa mayeba manene menemene. Kadi, mu mufuanu wa Yezu eu, badi babikila mubanji eu ne: ‘mupote.’ (Luka 12:16-21) Mu imue Bible mbamubikile ne: “mutatakane.” Bua tshinyi kumubikila bibi nunku?

Bidi bimueneka ne: mubanji eu kavua muangate Nzambi ne mushinga mu malu avuaye mulongolole bua kuenza, ne kavua mumutumbishe bua muvuaye mukuamishishe bintu bia bungi mu budimi buende to. (Matayo 5:45) Kadi wakaditambisha wamba ne: ‘Mutshima, wewe udi ne bintu bia bungi bibuta bia bidimu bia bungi; wikishe, udie; unue, usanke biebe.’ Bushuwa, uvua wela meji ne: bintu bivuaye mupete mu mudimu wende bivua ne bua kulua bu “lumbu lule” kudiye.​—Nsumuinu 18:11.

Muyidi Yakobo wakadimuija bena Kristo bua kuepuka lutambishi lua nunku e kufunda ne: ‘Apu nuenu badi bamba ne: Lelu anyi makelela netuye ku musoko mukuabu, netuikaleku tshidimu tshijima, netuenduluke mushinga, netupete bintu; kadi kanuena bamanye malu kayi neikaleku makelela. Muoyo wenu udi tshinyi? Nudi bu dibungi, didiku tshitupa tshipi, pashishe didi dijimina.’​—Yakobo 4:13, 14.

Mêyi aa akakumbana, bakambila muntu mubanji wa mu mufuanu wa Yezu au ne: ‘Wewe udi mupote, butuku ebu mene badi balomba muoyo webe; bintu biwakulongolola nebikale kudi nganyi?’ Anu bu dibungi didi dijimina, muntu mubanji eu uvua mua kufua kumpala kua kumonaye malu avuaye ujinga akumbana. Tudi bumvue dilongesha edi anyi? Yezu wakamba ne: ‘Muntu udi udibutshila bintu biende, kayi mubanji ku mêsu kua Nzambi, udi nunku.’ Kadi wewe udi ‘mubanji ku mêsu kua Nzambi’ anyi?