Udi umona tshimanyinu tshia dilua dia Yezu anyi?

KAKUENA muntu utu musue bua disama dikole dimukuate peshi bua dikenga dimutulukile to. Bua kuepuka ntatu bu nunku, muntu wa meji udi utangila bimanyinu bidi bileja njiwu ne wenza tshidi tshikengedibua. Yezu Kristo wakakula bua tshimanyinu tshia pa buatshi tshitudi ne bua kumona. Tshimanyinu atshi tshivua ne bua kulenga buloba bujima ne bantu bonso nkong. Tshidi tshikutangila wewe pebe ne dîku diebe.

Yezu wakakula bua Bukalenge bua Nzambi, buikala ne bua kumbusha malu mabi pa buloba ne kubukudimuna mparadizu. Bayidi bende bavua basue kumanya bualu ebu ne dîba divua Bukalenge abu ne bua kulua. Bakamulomba ne: ‘Utuambile dituku dialua malu aa; utuambile tshimanyinu tshia pawalua tshiakabidi; ne tshia ku nshikidilu kua tshikondo etshi.’​—Matayo 24:3.

Yezu uvua mumanye bimpe ne: kunyima kua lufu luende ne dibika diende, bidimu bia bungi bivua ne bua kupita kumpala kua kumujadikabu mu nkuasa wa bumfumu mu diulu bu Masiya Mukalenge ku mutu kua bantu bonso. Bu muvua dimuteka mukalenge nunku kadiyi ne bua kumueneka ku mêsu, Yezu wakafila tshimanyinu tshivua mua kuambuluisha bayidi bende bua kujingulula ‘dilua’ anyi dikalaku diende mu bumfumu ne ‘nshikidilu wa tshikondo etshi.’ Tshimanyinu etshi tshidi ne bitupa bivule. Bitupa ebi bionso bisanga bidi bienza tshimanyinu tshidi tshileja dilua anyi dikalaku dia Yezu bu mfumu.

Yonso wa ku bafundi ba Evanjeliyo aba, Matayo, Mâko ne Luka wakafunda diandamuna dia Yezu ne lubatshi luonso. (Matayo, nshapita 24 ne 25; Mâko, nshapita 13; Luka, nshapita 21) Bafundi ba Bible bakuabu bakaleja manga malu adi enza tshimanyinu atshi. (2 Timote 3:1-5; 2 Petelo 3:3, 4; Buakabuluibua 6:1-8; 11:18) Nansha mudi muaba kauyi ukumbana bua kukonkonona malu onso a mu tshimanyinu tshiakafila Yezu, netukonkonone malu manene atanu. Neumone ne: dikonkonona tshimanyinu etshi didi ne mushinga wa bungi kuudi.​—Bala malu adi mu kazubu kadi mu dibeji 6.

“Tshikondo tshidi malu mashintuluke”

‘Tshisamba tshikuabu netshiluangane ne tshinga, bukalenge bukuabu nebuluangane ne bunga.’ (Matayo 24:7) Tshikandakanda tshikuabu tshia mu Allemagne tshidi tshileja ne: kumpala kua 1914, bantu “bavua batekemene  malu mimpe ne budikadidi, dilubuluka dinene ne bubanji bua bungi mu matuku avua alua kumpala.” (Der Spiegel) Pashishe malu onso akashintuluka. Tshikandakanda tshia GEO tshidi tshiamba ne: “Mvita yakatuadija mu Tshimungu 1914 ne kujika mu Kasuabanga 1918 ivua muanda wa dikema. Yakashintulula diakamue nsombelu mu bantu, kutapululayi wa kale ne mupiamupia.” Basalayi bapite pa miliyo 60 ba mu kontina itanu bakaditua mu mvita eyi ya tshikisu tshikole menemene. Badi batshinka ne: bavua bashipa basalayi batue ku 6 000 dituku dionso. Kubangila anu apu, bamanyi ba miyuki ya kale ba tshipungu tshionso tshia bantu ne ba bididi bionso mbamone “bidimu bia kubangila mu 1914 too ne mu 1918 bu tshikondo tshidi malu mashintuluke.”

Mvita ya Kumpala ya Buloba bujima yakashintulula kashidi malu mu bantu ne yakababueja mu matuku a nshikidilu wa tshikondo etshi. Mu bidimu abi bia 1900 biakalonda, mvita ya bungi ne malu a tshinyangu biakenzeka. Malu ki mmalongoloke mu bidimu ebi bia 2000 to. Pa kumbusha mvita, bikuabu bitupa bia tshimanyinu etshi bidi bimueneka.

Nzala, masama ne bikumina

‘Biyole nebikaleku.’ (Matayo 24:7) Nzala yakabuela ku Mputu mu mvita ya kumpala ya buloba bujima, ne katshia anu pinapu mmishipe bantu bavule. Mufundi wa miyuki ya kale Alan Bullock wakafunda ne: Mu 1933, mu Russie ne mu Ukraine, “bantu bisumbu bivule bikale ne nzala mikole bavua benda bawayawaya ku misoko . . . Bitalu bivua biambakaja ku mielelu ya njila.” Mu 1943, kamona-kamba Theodore Harold White wakadimuenena muvua bantu ne nzala mu Henan, provense wa mu Chine. Wakafunda ne: “Patuku tshiyole tshia nzala, bantu batu babanga kudia bintu pabuipi ne bionso ne badi mua kubitua, kubidia ne mubidi kubivuija bintu bidi biudisha. Kadi anu padi muntu utshina lufu ke padiye mua kuela meji bua kudia tshintu tshitu bantu kabayi badia to.” Diakabi, nzala mmilue kutangalaka pabuipi ne miaba yonso mu Afrike bidimu bidi panshi ebi. Nansha mudi buloba bupatula biakudia bikumbane bua bantu bonso, Bulongolodi bua Biakudia ne Madimi bua Matunga Masanga budi butshinka ne: bantu miliyo 840 mu buloba bujima kabena ne biakudia to.

‘Bipupu nebikale ku nseke ne ku nseke.’ (Luka 21:11) Tshikandakanda kampanda tshidi tshiamba ne: “Badi batshinka ne: gripe wa bena Espagne uvua mushipe bantu pankatshi pa miliyo 20 ne 50 mu 1918, bungi bupite bua bavua bafue mu mvita ya kumpala ya buloba bujima.” (Süddeutsche Zeitung) Kubangila anu apu, bantu bungi kabuyi kubala mbapete masama bu mudi dia malaria, dia kantembela, dia tshiadi, dia tuneke ne dia kolera. Bidi kabidi bitonda bantu bikole bua kumona mudi SIDA wenda utangalaka kakuyi udi mua kumuimanyika. Tshidi tshitamba kutonda lelu eu ntshia se: kudi masama adi kaayi ajika nansha mudi malu a luondapu malubuluke  mu mushindu udi ukemesha. Muanda eu udi uleja patoke ne: tudi mu matuku a pa buawu, nansha mudi bantu kabayi bamanye bualu ebu too ne mpindieu.

“Buloba nebukanke.” (Matayo 24:7) Mu bidimu 100 bishale ebi, bikumina mbishipe bantu binunu ne binunu. Bilondeshile mukanda kampanda, bikumina bikale ne bukole bua kupula nzubu minene ne bua kupandulula buloba mbienzeke bitue ku 18 tshidimu tshionso kubangila mu 1914. Bikumina bivua bishipe bantu bavule ne bikumbane bua kupula nzubu ya kulu mbienzeke bu musangu umue ku tshidimu. Nansha mudi malu a biamu maye kumpala, bungi bua bantu badi bafua budi anu buvule bualu bimenga bivule bidi bienda bidiunda ne lukasa bidi bisanganyibua miaba idi bikumina mua kuenzeka.

Lumu luimpe!

Bitupa bivule bia tshimanyinu tshia matuku a ku nshikidilu bidi bibungamija bikole. Kadi Yezu wakakula kabidi bua lumu luimpe.

‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso.’ (Matayo 24:14) Mudimu wa kuyisha lumu luimpe lua Bukalenge wakatuadija Yezu yeye nkayende uvua ne bua kutanta bikole mu matuku a ku nshikidilu. Ke tshidi tshienda tshienzeka mpindieu. Bantemu ba Yehowa badi benda bayisha mukenji wa mu Bible ne badi balongesha bantu badi basue bua kutumikila bidibu balonga mu nsombelu wabu wa dituku dionso. Mpindieu, Bantemu bapite pa miliyo isambombo badi bayisha mu matunga 235 ne mu miakulu mipite pa 400.

Tangila ne: Yezu kakamba bua se: malu onso avua ne bua kuimana bualu nsombelu uvua ne bua kukola pa buloba to. Kakamba nansha ne: tshitupa tshimuepele tshia tshimanyinu tshivua ne bua kukumbana pa buloba bujima. Kadi wakamanyisha mianda ya bungi ivua ne bua kuenza yonso misanga tshimanyinu tshivua bantu ne bua kumona miaba yonso pa buloba.

Pa kumbusha mianda mikese mikese anyi idi yenzeka pale pale, udiku umona tshimanyinu tshidi ne bitupa bia bungi tshidi tshienda tshikumbana pa buloba bujima anyi? Malu adi enda enzeka pa buloba adi akutangila wewe ne dîku diebe. Tudi mua kudikonka ne: Kadi bua tshinyi  anu bantu bakese menemene ke badi bajingulula tshimanyinu etshi?

Bantu mbateke disanka diabu kumpala

“Kowedi muaba eu to!,” “Nzembu mmitambe bukole!,” “Tekesha lubilu.” Ebi mbimue bia ku bimanyinu ne mêyi a didimuija nawu bitutu tumona kadi bitu bantu batamba kulengulula. Bua tshinyi? Batu batukoka bipepele kudi malu atudi tumona mikale atupesha masanka. Tshilejilu, tudi mua kumvua bua kunyema lubilu lukole ne mashinyi kupitshisha mudi mikenji ilomba, anyi tudi mua kuikala ne dijinga dikole dia kuowela muaba udibu bakandike. Kadi kulengulula bimanyinu nkupangila kua meji.

Tshilejilu, mabue a mashika a ku Mikuna ya mu Autriche, mu France, mu Italie ne mu Suisse atu imue misangu ashipa bendakanyi batu balengulula malu atubu babadimuija nawu bua kuenzela manaya a dipulumukila pa mabue a mashika anu miaba idi kayiyi ne njiwu. Bilondeshile tshimue tshikandakanda tshitukadi batele (Süddeutsche Zeitung), bendakanyi bavule batu balengulula mêyi a didimuija a nunku batu bamba ne: “Kutshina njiwu nkupangila bionso.” Bushuwa, dilengulula mêyi adibu batudimuija nawu didi mua kupatula bipeta bibi.

Mbua malu kayi budi bantu balenguluila tshimanyinu tshia Yezu? Badi mua kuikala babafofomije mêsu kudi lukuka lua biuma, babatalaje kudi kalengu, babakuate kudi dielakana, badine mu malu abu a tshibidilu, anyi bakuata kudi buôwa bua kujimija lumu luabu. Kudiku bumue bua ku malu aa budi bukusaka bua kulengulula tshimanyinu tshia dikalaku dia Yezu bu mfumu anyi? Kabienaku bia meji bua kujingulula tshimanyinu etshi ne kuenza malu adi akengedibua anyi?

Muoyo mu mparadizu pa buloba

Bantu bavule badi benda bateya ntema ku tshimanyinu tshia dilua dia Yezu. Kristian, nsongalume ukadi musele wa mu ditunga dia Allemagne udi ufunda wamba ne: “Ebi mbikondo bidi bibungamija be. Kakuyi mpata, tudi mu ‘matuku a ku nshikidilu.’” Yeye ne mukajende badi benza mêba a bungi benda bamanyisha bakuabu malu a Bukalenge bua Masiya. Frank mmusombele pende mu ditunga edi. Yeye ne mukajende badi bakankamija bantu bakuabu ne lumu luimpe lua mu Bible. Frank udi wamba ne: “Bua nsombelu udiku pa buloba, lelu bantu bavule badi basumpakana bua matuku atshilualua. Tudi tubakankamija ne milayi ya mu Bible ya mparadizu wa pa buloba.” Nunku Kristian ne Frank badi bambuluisha bua kukumbaja tshitupa tshimue tshia tshimanyinu tshia Yezu: diyisha lumu luimpe lua Bukalenge.​—Matayo 24:14.

Pafika matuku a nshikidilu ku ndekelu kuawu, Yezu neumbushe malu a kale a tshikondo etshi ne bantu badi baatua nyama ku mikolo. Dîba adi Bukalenge bua Masiya nebulombole malu a pa buloba, buikalabu mua kuvuija Mparadizu bu muvuabi bimanyisha. Bantu nebapikudibue ku masama ne ku lufu, ne bafue nebabike bua kuikala ne muoyo pa buloba. Aa ke masanka adi mindile bantu badi bajingulula tshimanyinu tshia bikondo. Kabienaku bia meji bua kumanya malu makuabu a tshimanyinu etshi ne tshidi muntu yonso ne bua kuenza bua kupanduka ku nshikidilu wa tshikondo etshi anyi? Bulelela, eu mmuanda udi yonso wa kutudi ne bua kuenza ne mitalu yonso.​—Yone 17:3.

[Lungenyi lunene lua mu dibeji 4]

Yezu wakamanyisha mianda ya bungi ivua ne bua kuenza yonso misanga tshimanyinu tshivua bantu ne bua kumona miaba yonso pa buloba

[Lungenyi lunene lua mu dibeji 6]

Udiku umona tshimanyinu tshidi ne bitupa bia bungi ne tshidi tshienda tshikumbana pa buloba bujima anyi?

[Kazubu/​Bimfuanyi mu dibeji 6]

BIMANYINU BIA MATUKU A KU NSHIKIDILU

Mvita ya katshia ne katshia.​—Matayo 24:7; Buakabuluibua 6:4

Biyole bia nzala.​—Matayo 24:7; Buakabuluibua 6:5, 6, 8

Bipupu bia masama.​—Luka 21:11; Buakabuluibua 6:8

Didiunda dia tshishiku.​—Matayo 24:12

Bikumina.​—Matayo 24:7

Malu makole.​—2 Timote 3:1

Dinanga dinekesha dia makuta.​—2 Timote 3:2

Dibenga kutumikila baledi.​—2 Timote 3:2

Dibenga kunanga bana babu.​—2 Timote 3:3

Kunanga masanka pamutu pa Nzambi.​—2 Timote 3:4

Dipanga dia didikanda.​—2 Timote 3:3

Dibenga kunanga malu mimpe.​—2 Timote 3:3

Dipanga kujingulula njiwu ikadi pabuipi.​—Matayo 24:39

Baseki babenga bijadiki bia matuku a nshikidilu.​—2 Petelo 3:3, 4

Diyisha Bukalenge bua Nzambi buloba bujima.​—Matayo 24:14

[Mêyi a dianyisha bua bimfuanyi mu dibeji 5]

Basalayi ba mu Mvita 1: Mu mukanda wa The World War​—A Pictorial History, 1919; dîku dipele: AP Photo/​Aijaz Rahi; muena disama dia tuneke: © WHO/P. Virot