‘Bakapueka ku mâyi manene mu matu’

KUMPALA kua dibungu dia mu Gloucester (mu Massachusetts, mu États-Unis) kudi lupingu lua tshiamu tshikunze ludi luleja muntu wendesha buatu mu tshipepele tshikole. Lupingu elu lutu luvuluija bantu ba bungi ba mu Gloucester balobi bavua bafue mu mbuu. Muaba udi lupingu elu udi tshilata tshikale ne mêyi a mu Musambu wa 107:23 ne 24 aa: ‘Bakapueka ku mâyi manene mu matu, benduluka mushinga pa mâyi manene, bakamona biabu bienzedi bia Yehowa, ne malu ende a kukema mu mâyi a ndondo.’

Kuloba muaba muimpe mu Mbuu wa Atlantike mmudimu udi ne njiwu ya bungi. Tshimenga tshia Gloucester tshidi mpindieu ne bantu bapite pa 30 000, kadi bantu batue ku 5 368 bakadi bajimije mioyo yabu mu mbuu pavuabu baloba. Mbafunde ne: “Bamue bavua bafue bua mpepele mikole ne mavuala a ku Nord-Est. Bakuabu bavua bangulangane ne lufu pavua tumatu tuabu tutuka ku buatu bunene muaba uvuabu balobela. Amue matu akatutangana bua mpepele mikole ne mpindieu wowu kudina mu mâyi. Makuabu bavua baakulule kudi matu a motere.”

Lupingu elu ludi luleja ntatu ne njiwu ivua balobi bapete munkatshi mua bidimu bia bungi. Elabi meji bua bungi bua balume, batatu ne bana ba balume bakadi bafue mu mâyi! Kadi Yehowa Nzambi kêna mua kupua muoyo bakaji ba mu lufuila, bana ba nshiya anyi aba bavua bafue mu mbuu to. Mupostolo Yone wakaleja bualu buenzeka mu matuku atshilualua wamba ne: ‘Mâyi manene akapatula bafue bakadimu, ne lufu ne Muaba wa bafue biakapatula bafue bakadimu.’ (Buakabuluibua 20:13) Bantu ‘bakapueka ku mâyi manene mu matu’ nebamone bushuwa “bienzedi bia Yehowa” bidi bikemesha pajukabu ku lufu.