Dîyi dia Yehowa didi ditangalaka mu “Buloba bua Mukanku”

“BULOBA bua Mukanku.” Ke mutu bena Albanie babikila ditunga diabu mu muakulu wabu. Nditunga didi pamue ne Mbuu wa Adriatique mu tshitupa tshia buloba tshia Balkan, didi pankatshi pa ditunga dia Grèce ne dia Yougoslavie wa kale. Nansha mudiku mumvuija a bungi bua ntuadijilu wa bena Albanie, bamanyi ba malu a kale ba bungi badi bitaba ne: bena Albanie ne muakulu wabu mbafumine kudi bena Iluliko, ne bilondeshile mukanda kampanda, nkatshia ku tshidimu tshia 2000 kumpala kua bikondo bietu ebi.​—The Encyclopædia Britannica.

Mikuna misongoloke ya ku Nord ne lusenga lutoke lua ku Sud ku Mbuu wa Adriatique bidi bilengeja ditunga dia Albanie. Kadi bantu badimu ke badi balengeja ditunga bikole. Mbantu bena bulunda ne bakididianganyi, bena musangelu ne basue kuakula, balonga malu ne lukasa ne bakula banyungisha mubidi bikole.

Dikumbula dia misionere muende lumu

Musangelu wa bantu ne buimpe bua ditunga diabu ke bivua mua kuikala bikoke ntema ya muenga ngendu kampanda wa pa buende. Bu mu tshidimu tshia 56 bikondo bietu ebi, mupostolo  Paulo muenji wa ngendu munene wakafunda ne: ‘Ngakavudija kuamba kuanyi kua lumu luimpe lua Kristo too ne ku Iluliko.’ (Lomo 15:19) Tshitupa tshia ku Sud kua Iluliko tshidi tshipetangana lelu ne tshitupa tshia munkatshi ne tshia ku Nord kua Albanie. Paulo uvua ufundila mukanda wende mu Kolinto (mu Grèce), ku Sud kua Iluliko. Padiye wamba ne: wakayisha ‘too ne ku Iluliko,’ udi usua kuleja ne: wakayisha pamue ne Iluliko anyi mene kubuelamu. Nansha bikale munyi, uvua mua kuikala muyishe mu tshitupa tshia Albanie tshidi kuinshi lelu. Nanku tudi mua kuamba ne: mudimu wa diyisha Bukalenge wa kumpala mu Albanie bavua bawenze kudi Paulo.

Kunyima kua bidimu bivule, mamfumu manene akajuka pashishe kupuekawu. Mamfumu aa avua akokesha mu Albanie too ne muakapetaye dipanda mu tshidimu tshia 1912. Kunyima kua bidimu bitue ku dikumi, bakayisha kabidi Bukalenge bua Yehowa mu Albanie.

Mbangilu muimpe lelu

Mu bidimu bia 1920 bena Albanie bakese bavua basombele mu États-Unis bavua Balongi ba Bible ba Buloba bujima (muvuabu babikila Bantemu ba Yehowa tshikondo atshi), bakapingana mu Albanie bua kulongesha malu avuabu balonge. Munkatshi muabu muvua Nasho Idrizi. Bamue bena mu ditunga diabu bakitaba lumu luimpe. Bua didiunda divuaku, mu 1924 biro bia mu Roumanie biakabanga kutangila mudimu wa buambi mu Albanie.

Thanas Duli (Athan Doulis) uvua munkatshi mua bantu bakalonga malu a Yehowa mu Albanie mu bidimu abi. Udi wamba ne: “Mu tshidimu tshia 1925 kuvua bisumbu bisatu mu Albanie, kuvua kabidi Balongi ba Bible ne bantu bavua ne dijinga dia kulonga Bible eku ne kuaka mu ditunga dijima. Bavua banangangane bikole bishilanganane ne . . . bantu bakuabu!” *

Bu muvua njila mimpe ya kuendela kayiyiku, bivua bikole bua kuenza ngendu. Kadi bamanyishi ba lumu luimpe ba lukunukunu kabakamona bu bualu to. Tshilejilu, Areti Pina wa ku Sud ku muelelu wa mâyi mu Vlorë, wakatambula mu tshidimu tshia 1928 pavuaye ne bidimu 18. Uvua ubanda ne upueka mu mikuna mile bua kuyisha malu a Nzambi. Uvua mu tshisumbu tshinene kampanda tshia mu Vlorë ku ntuadijilu kua bidimu bia 1930.

Mu bidimu bia 1930 bavua balombola mudimu wa buambi kudi biro bia filiale bia  mu Athènes (mu Grèce). Mu 1932 mutangidi muena ngendu kampanda wa mu Grèce wakakumbula bana betu ba mu Albanie bua kubakankamija ne kubakolesha. Ba bungi ba kubavua balonge bulelela bavua ne ditekemena dia kuya mu diulu. Lumu luabu luimpe bua bienzedi biabu bilenga luakabapetesha kanemu miaba yonso. Mudimu uvua bana betu ba lulamatu aba benze wakapatula bipeta bimpe bia bungi. Mu tshidimu tshia 1935 ne tshia 1936, bakafila mikanda ya malu a Nzambi 6 500 mu ditunga dia Albanie.

Dikuabu dituku mu tshimenga tshia Vlorë, Nasho Idrizi wakela ditadi dia tshisanji tshia fono divua ne miyuki ya muanetu Joseph Rutherford. Bantu bakakanga magazen abu ne kuluabu kuteleja muvua muanetu Idrizi umvuija miyuki eyi mu tshiena-Albanie. Lukunukunu lua bana betu aba bua kuyisha malu a Nzambi luakapatula bipeta bilenga. Mu 1940 kuvua Bantemu 50 mu Albanie.

Dibenga malu a Nzambi mu ditunga

Mu 1939, ba-Fashiste bena Italie bakakuata ditunga. Kubengabu budikadidi buvua nabu Bantemu ba Yehowa ne kukandikabu mudimu wabu wa buambi. Kunyima kua matuku makese, basalayi ba bena Allemagne kukuatabu pabu ditunga. Pakavua Mvita Mibidi ya Buloba bujima iya mitangile ku dijika, Enver Hoxha mfumu wa basalayi muende lumu wakajuka. Tshisumbu tshiende tshia ba-Koministe tshiakapita ku masungula mu 1946 ne yeye kulua kavula-mbedi. Bavua babikila bidimu biakalonda ne: tshikondo tshia budikadidi, kadi bavua bakengesha Bantemu ba Yehowa bikole.

Ku kakese ku kakese mbulamatadi uvua wenda ubenga malu a nzambi. Bu muvua Bantemu ba Yehowa ba mu Albanie kabayi mua kubuelakana mu malu a pa buloba, bakabenga mudimu wa busalayi ne dibuelakana mu malu a tshididi. (Yeshaya 2:2-4; Yone 15:17-19) Bakela ba bungi mu buloko, kabayi ne biakudia anyi bintu bia kudiambuluisha nabi. Mu nsombelu eyi, bana babu ba mu nyuma ba bakaji bavubu kabayi bela mu buloko bavua babasukuila bilamba ne babalambila biakudia.

Uvua ne dikima nansha muvuabu bamukengesha

Ku ntuadijilu kua bidimu bia 1940, Frosina Xheka nsonga uvua mu musoko uvua pabuipi ne Përmet, wakumvua malu avuabu balongesha batutuende kudi Nasho Dori Ntemu wa Yehowa uvua mulongolodi wa bisabata. * Mbulamatadi uvua mukandike malu a Bantemu ba Yehowa, ne baledi ba Frosina bakanyingalala pakamonabu ditabuja dia Frosina dienda dikola. Frosina udi wamba ne: “Bavua basokoka bisabata bianyi ne bankuma pamvua nya mu bisangilu. Bakasua kunselesha kudi mulume uvua kayi muena Kristo. Pangakabenga, bakangipata ku nzubu. Mvula wa neje uvua uloka dituku adi. Muanetu Nasho Dori wakalomba muanetu Gole Flloko wa mu Gjirokastër bua angambuluishe. Ngakaya kusomba ne dîku diende. Bavua bele batutuanyi mu buloko bidimu bibidi bua dibenga kubuelakana diabu mu malu a pa buloba. Pakabapatulabu, ngakaya kusomba nabu mu tshimenga tshia Vlorë.

 “Bampulushi bakangenzeja bua meme kuenza mudimu mu malu a tshididi. Kadi ngakabenga. Bakankuata, kungelabu mu nzubu kampanda, mpindieu kunnyungulukabu. Umue wa kudibu kuntshingisha wamba ne: ‘Udi mumanye tshitudi mua kukuenzela anyi?’ Meme kumuandamuna ne: ‘Nudi mua kuenza anu tshidi Yehowa ulekela bua nuenu kuenza.’ Ke yeye kungamba ne: ‘Udi mupale! Katuka apa!’”

Bana betu ba mu Albanie bavua ne lulamatu lua nunku mu bidimu abi. Mu 1957 bamanyishi ba Bukalenge bakakumbana 75. Ku ntuadijilu kua bidimu bia 1960, biro bia Bantemu ba Yehowa biakatuma muanetu John Marks muena Albanie uvua musombele mu États-Unis bua kukumbula Tiranë ne kulongolola mudimu wa bena Kristo. * Kadi kunyima kua matuku makese, bakakuata Luçi Xheka, Mihal Sveci, Leonidha Pope ne bana betu bakuabu e kubatumabu mu miaba ya dienzejangana midimu mikole.

Ditekemena didi dimueneka

Kumpala kua 1967 kabavua basue malu a nzambi mu ditunga dia Albanie to. Kadi kubangisha mu 1967, kabavua bitaba nansha kakese malu a nzambi to. Kakuvua ni mbena Katolike, ni mbena Ortodokse anyi ba-Mizilma bavua mua kuenza malu a ntendelelu wabu to. Nzubu ya nzambi yonso nansha ya ba-Mizilma bavua bayikanga anyi bavua bayivuija nzubu ya manaya anyi ya ditekela bintu bia kubandila peshi muaba wa kupanyina bintu. Kabavua bitaba bua muntu ikale ne Bible to. Kabavua basue bua muntu akule malu a Nzambi to.

Bivua bikole menemene bua kuyisha ne kubuela mu bisangilu. Ntemu yonso pa nkayende uvua usadila Yehowa, kayi ne bana babu bakuabu nansha. Kubangila mu 1960 too ne 1980, bungi bua Bantemu buakakepela bikole. Tshidibi, bavua anu bakole mu nyuma.

Kunyima kua bidimu bia 1980 malu a tshididi a mu Albanie akatuadija kushintuluka ku kakese ku kakese. Biakudia ne bilamba kabitshivua bimueneka to. Bantu kabatshivua ne disanka to. Dishintuluka diakenzeka ku Mputu wa ku Est diakabuela too ne mu Albanie ku ntuadijilu kua bidimu bia 1990. Kunyima kua bidimu 45 bia bulombodi bua mbulamatadi wa tshikokesha nkaya, mbulamatadi mupiamupia wakanyisha tshiakabidi budikadidi bua bitendelelu.

Kasumbu Kaludiki ka Bantemu ba Yehowa kakalomba biro bia filiale bia mu Autriche ne bia mu Grèce bua kupetangana lukasa ne bana betu ba mu Albanie. Bana betu ba mu Grèce bavua bamanye tshiena-Albanie bakaya ne mikanda mipiamipia mikudimuna mu tshiena-Albanie ku Tiranë ne ku Berat. Mu bidimu abi, bana betu ba mu Albanie bavua ne disanka dia bungi pakapetanganabu kabidi ne Bantemu bavua bafume mu matunga makuabu.

Tshisumi tshia bampanda-njila benyi tshiakayisha mudimu kumpala

Ku ntuadijilu kua tshidimu tshia 1992, Kasumbu Kaludiki kakatuma ba-misionere aba: Michael ne mukajende Linda DiGregorio bena Albanie mu Albanie. Bakapetangana ne bana betu bakulakaje ba lulamatu ne bobu kubambuluisha bua kuenzabu dîku dimue dia pa buloba bujima dia mu nyuma. Bampanda-njila ba pabuabu 16 ba mu Italie ne bampanda-njila banayi ba mu Grèce bakafika mu ngondo wa dikumi ne umue. Bakalongolola bua kulongesha bampanda-njila aba tshiena-Albanie.

Nsombelu wa ku dituku ne ku dituku uvua mukole bua bampanda-njila aba. Nzembu ivua bualu bukole. Kuvua mashika makole. Bantu bavua basa mulongo mu bule bua mêba a bungi  bua kupeta biakudia ne bintu bikuabu. Kadi lutatu lunene luvua lua kupeta nzubu minene ya kudisangishila ne bantu bavua banyisha bulelela!

Bampanda-njila bakamona ne: batu bakula muakulu bua kukumbaja tshintu kampanda. Mulongeshi mukuabu wa malu a Nzambi wakabambila ne: “Bua kusekesha anyi kuakidila bana benu kabiena bikengela kumanya bimpe menemene mikenji ya muakulu to. Bena Albanie nebamone dinanga dienu kudibu, kabena bualu ne dimanya dia mikenji ya muakulu to. Kabinutondi to, bantu nebanuteleje amu.”

Kunyima kua bampanda-njila bamane kulonga malongesha a ntuadijilu a tshiena-Albanie, bakatuadija kuyisha mu Berat, Durres, Gjirokastër, Shkodër, Tiranë, ne mu Vlorë. Mu matuku makese bisumbu kubanga kumena bu buowa mu bimenga ebi. Areti Pina, ukavua ne bidimu 80 ne kayi kabidi ne makanda a mubidi, utshivua anu mu tshimenga tshia Vlorë. Bakatuma bampanda-njila ba pa buabu babidi bua kuyisha ne Areti. Bantu bakakema bikole bua benyi aba bavua bakula tshiena-Albanie, bamba ne: “Ba-misionere ba bitendelelu bikuabu batu batulongesha tuetu Anglais anyi tshiena-Italie bua kutulongesha bualu kampanda. Bidi bimueneka ne: nuenu nudi batunange ne nudi ne mukenji wa nsongo wa kutuambila bualu nudi balonge tshiena-Albanie.” Areti wakafua mu ngondo wa kumpala mu 1994, mufua anu mu diyisha mu ngondo wa kumpala eu. Tshisumi tshiende ne tshia bampanda-njila tshiakapatula bipeta bimpe. Mu 1995 bakenza tshisumbu mu Vlorë. Lelu eu mudi bisumbu binene bisatu bidi biyisha muaba udi dibungu eu.

Bantu bavua bafua ne nzala ya mu nyuma mu ditunga ne kabavua babenga malu a Nzambi menemene to. Bantu bavua bangata mikanda ya Bantemu yonso ne bayibala kabidi. Bansonga ba bungi bavua balonga Bible ne baya kumpala ne lukasa.

Bisumbu bipite pa 90 bidi bitungunuka ‘ne kukoleshibua mu ditabuja ne bidi bienda bivula ku dituku ku dituku’ mu ditunga edi. (Bienzedi 16:5) Bantemu 3 513 badi mu Albanie badi ne mudimu wa bungi wa kuenza. Mu ngondo muisatu wa 2005, bantu 10 144 bakabuela mu Tshivulukilu tshia lufu lua Kristo. Diyukila ne bantu bakididianganyi ba mu Albanie mu buambi ndifikishe Bantemu ku dilombola malonga a Bible mapite pa 6 000. Kakuyi mpata, Bible wa Traduction du monde nouveau mu tshiena-Albanie udi mupatuke matuku adi panshi aa neambuluishe bantu ba bungi. Bushuwa, Dîyi dia Yehowa nditangalake mu “Buloba bua Mukanku,” bionso ebi anu bua butumbi bua Yehowa.

[Mêyi adi kuinshi]

[Kazubu mu dibeji 20]

DILUISHANGANA DIA BISA DIDI DIJIKA MU KOSOVO!

Mu bidimu bia 1990, Kosovo wakalua muaba wa bimvundu ne lukuna pankatshi pa bisa biakakebesha mvita yakaditua matunga a bungi.

Mu tshikondo tshia mvita eyi, Bantemu ba bungi bakanyemena mu matunga a pabuipi. Pakateketa mvita, Bantemu ndambu bakapingana mu Kosovo bua kuyisha. Bampanda-njila ba pabuabu ba mu Albanie ne ba mu Italie bakaya mu Kosovo bua kuyisha bantu 2 350 000 badimu. Kudi bamanyishi batue ku 130 badi benzela Yehowa mudimu mu teritware eu udi ne bisumbu binayi ne tusumbu tusambombo.

Mu 2003 bantu 252 bakabuela mu mpuilu wa pa buende wa dituku dimue uvua muenzeke mu tshimenga tshia Priština. Munkatshi mua bantu aba muvua bena Albanie, bena Allemagne, bena Gitane, bena Italie, ne bena Serbie. Ku ndekelu kua muyuki wa batismo, ngamba-malu wakela nkonko ibidi. Bantu basatu bakajuka bua kuandamuna ne: Eyowa; mu bantu aba muvua, muena Albanie umue, muena Gitane umue ne muena Serbie umue.

Bikashi biakadila kunyima kua bateleji bamane kumvua mandamuna aa: “Va!,” “Da!” ne “Po!” mafila kudi bantu bavua basue kutambula. Bantu basatu aba bakupukilangana. Bavua bajikije bilumbu bivua pankatshi pa bisa bivua binyange matunga abu.

[Karte mu dibeji 17]

(Bua kumona malu bimpe, tangila mu mukanda)

Mbuu wa Mediterane

ITALIE

ALBANIE

GRÈCE

[Tshimfuanyi mu dibeji 18]

Bansonga Bantemu badi bidikija tshisumi tshia bantu bakole

[Tshimfuanyi mu dibeji 18]

Areti Pina wakasadila ne lulamatu kumbukila mu 1928 too ne ku lufu luende mu 1994

[Tshimfuanyi mu dibeji 19]

Bampanda-njila benyi ba kumpala badi balonga tshiena-Albanie

[Mêyi a dianyisha bua tshimfuanyi mu dibeji 16]

Mukanku: © Brian K. Wheeler/​VIREO