Enza bua dilongesha ditambe buimpe dikuambuluishe!

BIBLE udi ubikila Yehowa Nzambi ne: Mufuki wa bantu ne bintu bionso. (Genese 1:27; Buakabuluibua 4:11) Bu mudiye Muyishi Munene, wakalongesha Adama ne Eva ne kubalongololaye bua bikale ne muoyo mu budimi buimpe bua Edene. Dijinga diende divua dia kutungunuka ne kubalongesha ne kubalama bua kashidi ne tshiendelele. (Genese 1:28, 29; 2:15-17; Yeshaya 30:20, 21) Nditekemena kayipu bulenga nunku!

Bia dibungama, Adama ne Eva bakajimija malu malenga onso aa. Bupidia buabu buakakebesha dinyanguka dia bikadilu ne nsombelu wa bantu. (Genese 3:17-19; Lomo 5:12) Bible udi wamba bua bantu bavua ne muoyo bidimu bikese kunyima kua bamane kufuka Adama ne Eva ne: ‘Yehowa wakamona ne: mibi ya bantu idi idiundadiunda munkatshi mua ba pa buloba ne meji adibu bela mu mitshima yabu adi mabi matuku onso.’​—Genese 6:5.

Kukadi kupite bidimu 4 500 katshia Yehowa wamba ne: meji a muntu avua anu matangija ku bubi, ne nsombelu wa bantu udi mpindieu mubi kupita ne kumpala. Bantu ba bungi badi bashima kabayi bumvua bundu, biba ne babunda bakuabu. Dituku dionso edi ntatu idi yenda ivula anu kuvula, eku dinanga dia muntu netu dienda dikepa. Malanda pankatshi pa bantu too ne a bena mu mêku mmanyanguke bikole. Kadi Nzambi ki ngudi ukebesha malu onso mabi adiku aa to, ne ki mmulekele kutangila ntatu idiku lelu nansha. Misangu yonso Yehowa utu ujingila muntu diakalenga, ne udi pabuipi bua kulongesha bantu badi basue bua abalombole bua kuikalabu ne nsombelu wa disanka. Kukadi bidimu bu 2 000, Nzambi wakatuma Muanende Yezu Kristo pa buloba ne wakaleja mudiye musue kulongesha bantu badi basue kuikala ne diakalenga mu nsombelu wabu. Yezu mmushiye tshilejilu tshipuangane tshia dilongesha bualu bavua bamulongeshe pende kudi Muyishi Munene munkatshi mua bidimu kabiyi kubala.

Buena-Kristo bulelela ndilongesha

Yezu Kristo wakajadika Buena-Kristo bulelela budi buikale nsombelu mushindamene pa dinanga. Mu Buena-Kristo bulelela, meji ne bienzedi bionso bidi ne bua kuikala mu diumvuangana ne disua dia Nzambi, bua kutumbisha dîna diende. (Matayo 22:37-39; Ebelu 10:7) Yehowa ke uvua ulombola malongesha a Yezu a njila udi ufikisha ku muoyo. Tudi tubala mu Yone 8:29 bua muvua Nzambi wambuluisha Yezu ne: ‘Wakuntuma udi nanyi; kakunshiya nkayanyi, bualu bua matuku onso ntu ngenza malu adi amusankisha.’ Bulelela, pavua Yezu wenza mudimu wende pa buloba bavua bamuambuluisha ne bamulombola kudi Tatuende. Bayidi ba Yezu ba kumpala kabavua ne bua kutantamena ntatu kabayi babambuluisha nansha. Yehowa uvua ubalongesha ku butuangaji bua Muanende. Dilonda diabu dia malongesha a Yezu ne tshilejilu tshiende biakabavuija bantu ba tshitembu. Ke mudibi kabidi bua bayidi bende lelu eu.​—Tangila kazubu kadi ne tshiena-bualu tshia ne: “Bukole buvua nabu Yezu ne malongesha ende” mu dibeji 6.

Tshimanyinu tshisunguluke tshia Buena-Kristo bulelela ngetshi: malongesha adimu adi alenga meji ne mutshima wa bantu badimu bua kubashintulula. (Efeso 4:23, 24) Tshilejilu, tangila tshivua Yezu mulongeshe bua mushindu udi muntu ne bua kushala mulamate muena dibaka nende, wakamba ne: ‘Nuakumvua dîyi diakambabu ne: Kuendi masandi. Kadi meme  ndi nnuambila ne: muntu yonso udi utangila mukaji ne lukuka lua masandi wakumana kuenda nende masandi mu mutshima wende.’ (Matayo 5:27, 28) Mu mêyi aa, Yezu wakalongesha bayidi bende bua se: bavua ne bua kuikala ne mutshima mukezuke, ne kulekela ngenyi ne majinga mabi, bualu muntu yeye kayi mubilekele bidi mua kupatula bipeta bibi. Ki mmuomu bua se: ngenyi mibi idi mua kufikisha ku bienzedi bidi bibungamija Nzambi ne binyingalaji bakuabu anyi?

Ke bualu kayi Bible udi ufila mubelu eu: ‘Kanudifuanyikiji ku malu a mu tshikondo etshi, kadi nuandamuke ku dikudimuna dia meji enu bu meji mapiamapia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki.’ (Lomo 12:2) Udi mua kudiebeja ne: ‘Kudiku menemene mushindu wa kukudimuna meji ku diambuluisha dia dilongesha anyi?’ Kukudimuna meji kudi kumvuija kuatuma mu disangu dikuabu pa kuwuuja ne mêyi ne mibelu bidi mu Dîyi dia Nzambi. Bualu ebu budi mua kuenzeka patudi tuanyisha dilongesha didi Nzambi ufila mu Dîyi diende.

Basakibue bua kushintuluka

‘Dîyi dia Nzambi didi ne muoyo ne bukole.’ (Ebelu 4:12) Ditshidi ne bukole bua bungi kudi muntu yonso, bua kuleja ne: ki ndianji kuatuka nansha. Didi mua kusaka muntu bua kushintulula bienzedi biende, kuitaba Buena-Kristo bulelela ne kulua muntu wa nsongo. Bilejilu bidi bilonda ebi bidi bileja mushinga wa dilongesha dia mu Bible.

Emilia, utuvua batele mu tshiena-bualu tshia kumpala, udi wamba ne: “Didienzeja nkayanyi bua kulongolola nsombelu wa mu dîku dianyi kadiakakumbana to. Pangakatuadija kulonga Bible ne Bantemu ba Yehowa, ngakamona ne: kuvua ditekemena ke meme kutuadija kushintulula ngikadilu wanyi. Ngakalonga mua kuikala ne lutulu ne mua kubenga kuikala muena bumfika munda. Kunyima kua matuku, bayanyi kutuadijaye pende kulonga Bible. Kabivua bipepele bua yeye kulekela maluvu to, kadi wakalua kualekela. Dilonga edi diakatupetesha mushindu wa kusomba bimpe mu dibaka. Mpindieu tudi bena Kristo ba disanka ne tudi tulongesha bana betu balela mêyi mimpe a mu Bible.”​—Dutelonome 6:7.

Dilongesha didi Buena-Kristo bulelela bufila didi mua kumbusha muntu ku malu mabi ne ku nsombelu wa buenzavi. Manuel * wakitaba mudi bualu ebu bulelela. Pavuaye ne bidimu 13 wakanyema kuabu ne kutuadijaye kunua diamba dia marijuana. Mu bungi bua matuku, yeye kutuadija kunua diamba dia Héroïne. Uvua witaba bua kumuangatabu kudi balume anyi bua yeye kulala ne bakaji bua kumupeshabu mfranga ne muaba wa kulala. Makuabu matuku Manuel uvua wiba bintu bia bantu. Matuku onso uvua anu bu mukuatshike diamba. Misangu ya bungi bavua bamuela mu buloko bua tshikisu tshiende. Musangu mukuabu wakenza bidimu binayi mu buloko, ne pavuaye muinamu wakaditua  mu dienda mushinga wa bingoma. Kunyima kua Manuel mumane kusela, wakatungunuka ne kupeta bipeta bia nsombelu wende. Udi wamba ne: “Tuakafika too ne ku disombela mu nzubu uvua kumpala wa nzolo. Ntshidi muvuluke muvua mukajanyi ulambila pa madioto. Nsombelu wetu kavua muimpe nansha kakese, kufikishabi ne balela banyi ku diambila mukajanyi bua andekele aye.”

Ntshinyi tshiakashintulula nsombelu wende? Manuel udi wandamuna ne: “Muntu mukuabu umvua mumanye wakalua kuanyi bua kutuyisha malu a Nzambi. Ngakitaba bua kuyukila nende anu bua kumuleja ne: Nzambi uvua utabalela bantu katshituku to. Mvua ngangata nsombelu wanyi bu tshijadiki tshia ne: Nzambi kênaku to. Kadi ngakakema bua lutulu ne bukalanga bivua nabi Ntemu eu, ke meme kuitaba bua kubuela mu bisangilu ku Nzubu wa Bukalenge. Nansha muvua bamue Bantemu bavuamu bamanye nsombelu wanyi mubi, bakangela muoyo bimpe. Bakenza bua ndimone anu bu umue wa munkatshi muabu. Muanda eu wakankolesha bikole bitambe. Biakandenga bikole meme kufika ne ku diangata dipangadika dia kulekela kunua diamba bua kukeba mudimu muimpe wa kuenza. Kunyima kua ngondo inayi ya dilonga Bible, ngakatuadija kuyisha, ne ngondo inayi pashishe, ngakatambula meme kulua Ntemu wa Yehowa.”

Buena-Kristo bulelela buvua bumvuija tshinyi bua Manuel ne dîku diende? Udi wamba ne: “Bu kabuyi bua dilongesha dia mu Bible mvua mua kuikala nkadi mufue katshia kuonso aku. Nsombelu uvua Yezu mulongeshe wakapingaja dîku dianyi kundi. Bana banyi babidi kabena ne bua kupitshila mu malu amvua muenze pantshivua nsonga nansha. Ndi ne disanka ne dianyisha dia bungi kudi Yehowa bua malanda mimpe andi nawu mpindieu ne mukajanyi. Bamue bantu bamvua mumanyangane nabu kale bakangela diboko mulu ne kungambilabu ne: njila undi ndonda mpindieu nnjila muimpe mutambe.”

Mu nsombelu wa buena Kristo, bikadilu bilenga bidi bienda pamue ne mankenda a mubidi. John, udi musombele mu tshitupa tshia  bupele bua bungi mu Afrique du Sud, wakafika ku dijingulula bualu ebu. Udi wamba ne: “Muananyi wa bakaji uvua wenza nansha lumingu lujima kayi wowa mâyi to, ne kakuvua muntu uvua umuebeja bualu.” Mukaji wa John udi wamba ne: nzubu wabu uvua ne bukoya bua bungi. Kadi ku diambuluisha dia dilongesha dia Buena-Kristo, malu akashintuluka. John wakalekela kuenda ne dingumba dia bivi ba mashinyi ne kutuadijaye kutabalela bena mu dîku diende. “Tuakalonga ne: tuetu bena Kristo tudi ne bua kulama mubidi wetu ne bilamba bietu ne mankenda. Ntu musue mêyi adi mu 1 Petelo 1:16, adi atulomba bua kuikala ba tshijila, bu mudi Yehowa Nzambi muikale wa tshijila anyi munsantu. Mpindieu tudi kabidi tudienzeja bua kulama nzubu wetu ne mankenda a bungi.”

Udi mua kupeta dilongesha ditambe buimpe

Malu atudi batele kulu eku adi enzeka miaba ya bungi. Bantu ba bungi mbalonge mua kuikala ne nsombelu wa nsongo bu tshipeta tshia dilongesha dia mu Bible. Badi babanyisha bikole kudi bamfumu babu ba mudimu bualu badi bamba malu malelela ne mbenji ba mudimu ba tshisumi. Mbalue bena mutumba ne balunda bimpe, badi bajingila bantu nabu disanka. Mbapangadike bua kuepuka malu mabi ne majinga a mubidi, nunku badi balama bimpe ku mubidi, mu lungenyi ne mu nsombelu wabu. Pamutu pa kunyangabu biuma biabu mu malu mabi, badi badiambuluisha nabi ne bakuatshisha kabidi mêku abu. (1 Kolinto 6:9-11; Kolosai 3:18-23) Kakuyi mpata, bipeta bia ditumikila tshidi Yehowa wamba mu Bible bidi bileja ne: kuikala ne nsombelu umvuangana ne Buena-Kristo bulelela ke njila muimpe mutambe, udi upetesha dilongesha ditambe buimpe didiku. Bible udi wamba bua muntu udi utumikila mikenji ya Nzambi ne: “Malu onso adiye wenza adi atuta diakalengele.”​—Musambu 1:3.

Bidi bienza disanka bua kumanya ne: Yehowa Nzambi Wa-Bukole-Buonso mmusue kutulongesha. Udi wamba bua bualu buende ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu.’ (Yeshaya 48:17) Bulelela, Yehowa mmutuleje njila ku diambuluisha dia tshilejilu ne malongesha a Muanende Yezu Kristo. Malongesha ende akashintulula nsombelu wa bantu ba bungi bavua bamumanye patshivuaye pa buloba, ne ke mudibi kabidi bua bantu bavule badi batumikila malongesha ende lelu eu. Bua tshinyi kubenga kukeba dîba dia bungi dia kulonga malongesha aa? Bantemu ba Yehowa ba muaba uudi musombele nebakuambuluishe ne disanka dionso bua upete dilongesha edi dia mushinga mukole.

[Mêyi adi kuinshi]

[Kazubu/​Tshimfuanyi mu dibeji 6]

Bukole buvua nabu Yezu ne malongesha ende

Bu muvua Zakayo muikale mfumu wa balambuishi ba bitadi, wakalua mubanji mu dinyenga bantu ba tshianana makuta abu. Kadi wakashintulula nsombelu wende pakatumikilaye malongesha a Yezu.​—Luka 19:1-10.

Shaula wa ku Tâso wakalekela kukengesha bena Kristo ne kukudimunaye mutshima wende, kuluaye mupostolo Paulo.​—Bienzedi 22:6-21; Filipoi 3:4-9.

Bamue bena Kristo ba mu Kolinto bavua ‘bena tshiendenda, bena mpingu, bena masandi, balume badi benzelangana malu a bundu, bivi, bena lukuka lua bintu, bakuatshiki ba maluvu, bapendianganyi, ne banyengi ba bintu.’ Kadi pakalongabu malu a mu Buena-Kristo bulelela, ‘bakuvuibua, bakajidibua ne bakabingishibua mu dîna dia Mukalenge Yezu Kristo.’​—1 Kolinto 6:9-11.

[Tshimfuanyi mu dibeji 7]

Bible udi mua kukuleja mua kututa diakalengele