Yehowa kakukulekela nansha kakese

BENA Kristo ba mu Yudaya bavua mu buluishi bukole, bavua kabidi ne bua kukandamena lungenyi lua kunanga kua bintu luvuaku. Bua kubakankamija, mupostolo Paulo wakatela mêyi avua Yehowa muambile bena Isalele pavuabu babuela mu Buloba Bulaya. Paulo wakafunda ne: ‘Tshiena nkulekela, nansha kakese, tshiena nkushiya tshianana.’ (Ebelu 13:5; Dutelonome 31:6) Kakuyi mpata, mêyi aa akakolesha bena Kristo ba mu Yudaya bakapeta mukanda wende.

Mêyi aa adi ne bua kutukolesha petu bua kutantamena ntatu itudi tupeta bu mutudi mu tshikondo tshia “malu makole.” (2 Timote 3:1) Tuetu beyemene Yehowa ne benze malu adi aleja dieyemena edi, neatukuatshishe nansha mu ntatu mipite bukole. Bua tuetu kumvua mudi Yehowa mua kukumbaja mêyi aa, tuangatayi tshilejilu tshia bualu ebu: dijimija dia mudimu dituvua katuyi batekemene.

Malu avua kaayi matekemena

Bungi bua balofua budi buenda buvula. Bilondeshile tshimue tshikandakanda tshia mu Pologne, badi bangata bulofua bu “lumue lua ku ntatu mitambe bukole idi mu bantu.” Bulofua budi too ne mu matunga mabanji. Tshilejilu, nansha mu matunga adi enza bulongolodi bunene bua malu a mpetu, mu 2004 bungi bua balofua buvua “bubande bufike ku bantu miliyo 32, bupite ne bungi buvuabu mu tshikondo tshia Dipueka dia mushinga wa mpetu mu bidimu bia 1930.” Mu Pologne, Biro binene bidi bikonkonona bungi bua bintu ne bantu biakatela mêna a balofua miliyo isatu anu bua mu Tshisua-munene 2003, mmumue ne: “bantu 18 pa 100 ba bidimu bikumbane mua kuenza mudimu.” Umue mukanda wakamba ne: bungi bua bantu badi mu bulofua mu ditunga dia Afrique du Sud mbufike ku bantu bapite pa 47 pa 100 mu 2002!

Dijimija dia mudimu diakamue ne dimanyika mudimu divua kadiyi ditekemena nnjiwu milelela bua bantu ba bungi, nansha bua basadidi ba Yehowa. ‘Bikondo bidi malu [kaayi malongolola]’ bitu bitulukila muntu yonso. (Muambi 9:11) Tudi mua kudimona tukadi tuamba mêyi a Davidi mufundi wa Misambu aa: “Tunyinganyinga tua mu mutshima wanyi [ntuvulangane].” (Musambu 25:17) Neukokeshe bua kutantamena ntatu ya buena eyi anyi? Idi mua kukujimijila disanka diebe ne kukuenzela bibi mu nyuma ne ku mubidi. Wewe mushale mulofua, udi mua kujukuluka kabidi anyi?

 Mua kupita ne tunyinganyinga

Mumanyi wa bikadilu bia bantu Janusz Wietrzyński udi umvuija ne: “dijimija mudimu didi ditamba kubungamija bantu balume,” bualu bobu ke batu pa tshibidilu bakebela dîku biakudia. Bulofua budi mua kusaka muntu mulume bua kutuadija “kuluka tubondo ne tubata,” ubanga kufika munda ne pashishe umona ne: lutatu luende kaluena mua kujika to. Tatu wa bana udibu bipate ku mudimu udi mua kudimona kayi ne mushinga, ne udi mua kutuadija “kutanda ne bena mu dîku diende.”

Adam, muena Kristo udi tatu wa bana babidi, udi umvuija tshivuaye mumvue pakajimijaye mudimu: “Ngakalua didimba kabantengeshi; bualu buonso buvua bumfikisha munda. Nansha butuku bilota bimvua ndota bivua anu bua mudimu ne bua mushindu wa kudisha bana banyi ne mukajanyi uvuabu bipate pende ku mudimu diakamue.” Pavua Ryszard ne mukajende Mariola (badi ne muana umue) bajimije midimu yabu, bavua ne dibanza dinene dia banke. Mariola udi ulonda ne: “Dîba dionso mvua ndubakana, kondo kanyi ka muoyo kavua kangambila ne: tuvua benze tshilema patuvua basombe mfranga ku banke. Ngakashala ndiambila ne: tshilema tshivua tshianyi meme.” Tuetu bikale mu nsombelu wa nunku, mbipepele bua kufika munda, kunyingalala anyi kubungama, ne malu aa adi mua kutukokesha. Kadi mmunyi mutudi mua kukanda ngenyi yonso eyi idi mua kujuka munda muetu?

Bible udi ufila mibelu mimpe ya mushindu wa kushala balame meji mimpe. Mupostolo Paulo wakamba ne: ‘Lekelayi kuditatshisha ku bualu nansha bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’ (Filipoi 4:6, 7) Kusambila Yehowa bua kusemena pabuipi nende nekutupeshe “ditalala dia Nzambi,” meji mapole mashindamene pa ditabuja dietu kudiye. Irena mukaji wa Adam udi wamba ne: “Mu masambila etu tuvua tuambila Yehowa bua nsombelu wetu ne bua dijinga dietu dia kukepesha bikole bintu bituvua nabi. Nansha mukavua bayanyi unyingalala nansha bua bualu kayi, wakabanga kumona ne: tuvua anu mua kupatuka mu bualu abu dimue dituku.”

Biwikala mujimije diakamue mudimu webe, edi ke dîba dia wewe kutumikila mubelu wa Yezu eu udi mu Muyuki wende wa pa Mukuna: ‘Kanutambi kuelangana meji bua muoyo wenu ne: Netudie tshinyi? Netunue tshinyi? Kanutambi kuelangana meji bua mibidi yenu ne: Netuluate tshinyi? Kadi diambedi kebayi bukalenge buende ne buakane buende, nunku nebanupe bintu ebi bionso.’ (Matayo 6:25, 33) Ryszard ne Mariola bakatumikila mubelu eu. Mariola udi wamba ne: “Bayanyi uvua misangu yonso unkolesha ku muoyo ne undeja ne: Yehowa kavua mua kutulekela to.” Ryszard udi pende wamba ne: “Tuvua tusambila pamue misangu yonso, ke tshiakatuambuluisha bua kusemena pabuipi ne Nzambi ne bua tuetu kuikala tshintu tshimue, ne abi mbitupeshe disulakana dituvua nadi dijinga.”

Nyuma muimpe wa Nzambi udi mua kutuambuluisha kabidi. Udi mua kutupesha didikanda bua kudilama ne kulama meji etu. (Galatia 5:22, 23) Kabiena mua kuikala bipepele to, kadi bidi mua kuenzeka, bualu  Yezu wakalaya ne: ‘Tatu wenu wa mu diulu neape batu bamulomba nyuma muimpe.’​—Luka 11:13; 1 Yone 5:14, 15.

Kulenguludi majinga ebe a mu nyuma

Dipatshibua ku mudimu divua kadiyi ditekemena didi mua kutekesha nansha muena Kristo uvua menemene ne nkatshinkatshi, kadi katuena ne bua kulengulula majinga etu a mu nyuma nansha. Angata tshilejilu tshia Mose. Pavuaye ne bidimu 40, nsombelu wende wakashintuluka pakumukaye mu dîku dia mfumu wa Ejipitu ne kuluaye mulami wa mikoko, mudimu uvua bena Ejipitu bapetula. (Genese 46:34) Mose uvua ne bua kuibidilangana ne nsombelu wende mupiamupia eu. Mu bidimu 40 biakalonda, wakalekela Yehowa umulongesha ne umulongolola bua midimi ivua mimuindile. (Ekesode 2:11-22; Bienzedi 7:29, 30; Ebelu 11:24-26) Nansha muvuaye ne ntatu, wakashala mutuishile mêsu ku malu a mu nyuma ne wakitaba bua Yehowa amulongeshe. Katulekedi ntatu itufikisha ku dipua malu a Nzambi muoyo!

Nansha mudi dijimija mudimu diakamue mua kutubungamija bikole, edi ke dîba dimpe dia kukolesha malanda etu ne Yehowa ne basadidi bende kabidi. Adam utukadi batele ku ntuadijilu eku wakamona pende ne: bidi nanku. Udi wamba ne: “Patuvua meme ne mukajanyi bajimije midimu yetu, katuvua banji kupeta meji a kushala mu bisangilu bia bena Kristo ne kukepesha mudimu wa buambi. Dimona malu mushindu au diakatuambuluisha bua kubenga kutamba kuelangana meji bua makelela.” Ke tshidi Ryszard wamba pende: “Bu kabiyi bua bisangilu ne bua mudimu wa buambi, katuvua mua kuikala batantamene lutatu elu to; tunyinganyinga tuvua mua kuikala tutushipe. Mayuki a malu a mu nyuma ne bakuabu  adi atukankamija, bualu adi atuma ntema yetu ku majinga abu, kadi ki nku etu tuetu to.”​—Filipoi 2:4.

Pamutu pa kusamisha meji bua mudimu, keba bua kuenza malu a mu nyuma mu dîba divule diudi nadi: kudilongela, kuenza midimu ya tshisumbu anyi kuvudija mudimu webe wa buambi. Pamutu pa kushala anu muvunge maboko, udifile mu ‘mudimu wa Mukalenge wa kuenza misangu yonso,’ wikala mua kunutuadila ditalala, wewe ne bantu bakuabu bonso ba muoyo muimpe badi bitaba mukenji wa Bukalenge bua Nzambi uudi uyisha.​—1 Kolinto 15:58.

Kumbaja majinga a ku mubidi a dîku diebe

Bushuwa, biakudia bia mu nyuma kabiena mua kukutshisha difu didi munda mutupu to. Tudi ne bua kuvuluka dîyi didi dilonda edi: ‘Bikala muntu kayi usubula [wambuluisha] badi bende ne ba mu nzubu muende mene, yeye wakadiula ditabuja diende ne udi mutambe muntu udi upidia kuitabuja bubi.’ (1 Timote 5:8) Adam udi wamba ne: “Nansha mudi bana betu ba mu tshisumbu batuambuluisha ku mubidi ne lukasa, bu mutudi bena Kristo tudi ne bujitu bua kukeba mudimu.” Tudi tutekemena dikuatshisha dia kudi Yehowa ne dia kudi basadidi bende, kadi tudi ne bua kukeba mudimu.

Tudi mua kuenza tshinyi? Adam udi umvuija ne: “Kushadi muvunge maboko muindile bua Nzambi enze tshishima to. Paudi ukeba mudimu, kuelakanyi bua kudimanyisha bu Ntemu wa Yehowa to. Bamfumu ba midimu batu banyisha bualu ebu.” Ryszard udi ufila mubelu eu: “Konka muntu yonso uudi mumanye muaba uudi mua kupeta mudimu, utungunuka ne kukonka ku biro bia malu a midimu, ikala ubala mamanyisha bu mudi a ne: ‘Tudi tukeba mulami wa bana’; anyi ne: ‘Mudimu wa tshitupa tshîpi: Dikosa dia bisuku.’ Tungunuka ne kukeba! Kuikadi usungulula to, nansha biobi bikulomba bua kuenza mudimu wa bianza peshi mukuabu uuvua kuyi muelele meji to.”

Bulelela, ‘Yehowa udi mukuatshishi webe.’ ‘Kakukulekela, nansha kakese, kakukushiya tshianana.’ (Ebelu 13:5, 6) Kutambi kuelangana meji to. Davidi wakamba ne: ‘Uteke njila webe mu bianza bia Yehowa; umueyemene yeye kabidi, ne yeye neenze malu ende.’ (Musambu 37:5) ‘Kuteka njila wetu mu bianza bia Yehowa’ kudi kumvuija kumueyemena ne kuenza bidiye musue, nansha bikala malu etu kaayi enda bimpe.

Adam ne Irena bavua basukula madidishi ne bibandilu bia nzubu ya bisasa ne kabavua batula makuta butulavi to. Bavua kabidi ne tshibidilu tshia kuya ku biro bia malu a midimu. Irena udi wamba ne: “Diambuluisha divua dilua anu patuvua nadi dijinga.” Adam udi wamba pende ne: “Tudi bafike ku dijingulula ne: malu atuvua tukuatshila Yehowa mu masambila kaavua anu apetangana ne disua diende to. Mbitulongeshe bua kueyemena meji ende ne bua kubenga kueyemena meji etu. Mbimpe kuindila diandamuna diafila Nzambi katuyi tudiabakena to.”​—Yakobo 1:4.

Ryszard ne Mariola bakenza midimu mivule ivuabu kabayi batekemene to, eku bikale bayisha miaba ivuabu bakeba bamanyishi ba bungi. Ryszard udi wamba ne: “Tuvua tupeta midimu ituvua tukeba anu dîba dituvua katutshiyi ne tshiakudia to. Tuvua tubenga midimu ya mfranga ya bungi ivua mua kutupangisha bua kuenza midimu yetu ya mu nyuma. Tuvua tuitaba bua kushala bindile Yehowa.” Mbatuishibue ne: Yehowa uvua muenze bua bobu kufutshila nzubu wa mushinga mukese ne bua Ryszard kupetaye mudimu ndekelu wa bionso.

Kujimija mudimu kudi mua kukubungamija bikole, kadi bua tshinyi kubenga kuangata bualu ebu bu mushindu wa wewe kudimuena mudi Yehowa kayi ukulekela? Yehowa udi ukutabalela. (1 Petelo 5:6, 7) Mmulaye mukana mua muprofete Yeshaya ne: ‘Kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe.’ (Yeshaya 41:10) Kulekedi bualu buvua kabuyi butekemena bu mudi dijimija dia mudimu bukutekesha mu mikolo to. Enza tshionso tshiudi mua kuenza, ne ulekele bidi bishala mu bianza bia Yehowa. Windile Yehowa ‘talaaa.’ (Muadi wa Yelemiya 3:26) Neupete mabenesha a bungi.​—Yelemiya 17:7.

[Tshimfuanyi mu dibeji 9]

Fila dîba diudi nadi mu malu a mu nyuma

[Bimfuanyi mu dibeji 10]

Lekela butulavi, kuikadi utamba kusungulula paudi ukeba mudimu to