Malu mmanyanguke pa buloba!

UTUKU witaba ne: mmalu mmanyanguke pa buloba anyi? Kakuyi mpata, ke muutu wamba. Bualu, nansha tuetu bikale ne dimanya anyi ne meji a mushindu kayi, katuena bashindike ne: netupete bubanji anyi nsombelu muimpe nansha biakudia to. Bitu bitamba kuenzeka anu muvua Solomo Mukalenge wa meji muambe ne: ‘Bena meji kabatu bapeta biakudia bionso; bena lungenyi kabatu bapeta bubanji buonso; badi ne ngenzelu muimpe kabatu bapeta diakalengele dionso.’ Bua tshinyi? Solomo udi wamba ne: bualu ‘buonso buabu badi ne bikondo bidi malu abatulukila.’​—Muambi 9:11.

‘Padi tshikondo tshibi tshilua’

Padi ‘malu atutulukila’ nangananga bualu tudi muaba mubi pa dîba dibi, atu anyanga misangu ya bungi malu atudi balongolole bimpe ne atudi bindile ne muoyo mujima. Bilondeshile Solomo, tudi anu bu ‘mudi minyinyi ya mu mâyi idi ikuatshibua mu kapamba kabi, ne bu mudi nyunyi idi ipia masoka padi tshikondo tshibi tshilua lukasa.’ (Muambi 9:12) Tshilejilu, bantu ba bungi badi badima ne bukole buabu buonso bua kupetela mêku abu biakudia, kadi ‘bikondo bibi’ bidi bilua padi mvula ibenga kuloka ne minanga inyanga bia pa madimi.

Bakuabu batu bateta mua kuambuluisha bantu badi ‘bikondo bibi’ bitulukile, kadi nansha diambuluisha edi kaditu dikumbana to. Tshilejilu, tshisumbu kampanda tshitu tshiambuluisha bantu tshiakamba ne: mu bidimu bidi panshi ebi, bua kuluisha nzala “Afrike mujima mmupete tshia bitanu tshimue tshia bungi bua makuta onso avuabu batule mu mvita ya mu Golfe.” Bivuaku bimpe muvua matunga mabanji matule makuta bungi misangu itanu bua kuluangana mvita mu ditunga dimue kupita ivuabu batule bua kujikija ntatu ivua nzala mikebeshe mu Afrike mujima anyi? Bidiku kabidi bimpe mu tshikondo tshidi ba bungi bikale ne bubanji, bua muntu 1 pa 4 ikale mu bupele bukole anyi bua bana miliyo ne miliyo bafue bua masama adibu mua kuepuka anyi? Ki mbimpe nansha kakese!

Bushuwa, ‘bikondo bibi’ kabiena bilua anu bualu ‘malu adi atulukila’ bantu to. Kudi malu  mabi adi matupite bukole adi akokesha mioyo yetu ne amba tshidi ne bua kutufikila. Kakuyi mpata, ke tshivua tshienzeke mu Beslan (mu Ossétie du Nord) mu 2004, dîba diakafua bantu binunu ne binunu (nangananga balongi ba bungi bavua baya mu kalasa dituku diabu dia kumpala) pavua ba-teroriste baluangane ne basalayi. Bulelela, bantu bakafua ne bakapanduka dituku adi anu mu mpukapuka, kadi tshivua tshikebeshe ‘tshikondo tshibi’ atshi mvita ivua pankatshi pa bantu.

Buloba nebuikale amu nunku anyi?

Padi bakuabu bamona malu mabi batu bamba ne: “Ke mudi malu. Atu amu nunku ne neikale amu nunku.” Buabu buobu, badi ne bukole nebatungunuke ne kudiatshila badi batekete panshi, ne babanji nebatungunuke ne kukengesha bapele. Badi bamba ne: malu aa masangisha ku ‘bikondo bidi malu atulukila bantu’ nebikengeshe bantu matuku onso adibu pa buloba.

Ke mudi malu ne bua kuikala anyi? Nekuikaleku tshikondo tshikala badi ne lungenyi ne meji mua kupeta difutu dimpe bua midimu yabu yonso anyi? Kudiku muntu udi mua kushintulula malu pa buloba ebu musangu umue bua kashidi anyi? Tangila tshidi tshiena-bualu tshidi tshilonda tshiamba.

 [Mêyi a dianyisha bua tshimfuanyi mu dibeji 2]

TSHIZUBU: Tatu ne muana: UN PHOTO 148426/​McCurry/​Stockbower

[Mêyi a dianyisha bua tshimfuanyi mu dibeji 3]

MAXIM MARMUR/​AFP/​Getty Images