Buebe wewe, Diabolo utuku anyi?

BIBLE udi uleja ne: Diabolo mmuntu mulelela. Katuena mua kumumona anu bu mutudi katuyi mua kumona Nzambi. Bible udi wamba ne: “Nzambi udi Nyuma.” (Yone 4:24) Diabolo ntshifukibua tshia mu nyuma. Tshidibi, mmushilangane ne Nzambi bualu yeye udi ne ntuadijilu.

Kale kumpala kua Yehowa Nzambi kufuka bantu, wakafuka bifukibua bia mu nyuma bia bungi menemene. (Yobo 38:4, 7) Bible udi ubikila bifukibua ebi ne: banjelu. (Ebelu 1:13, 14) Nzambi wakafuka banjelu bonso bapuangane, kakuvua nansha umue uvua diabolo anyi uvua ne bubi. Kadi Diabolo mmufumine kuepi? Muaku “diabolo” udi umvuija “mushiminyinyanganyi” ne udi umvuija muntu udi ushiminyina bakuabu malu. “Satana” udi umvuija “Ntomboji” anyi muluishi. Anu bu mudi muntu muimpe mua kudienza muivi padiye wiba, ke muvua umue wa ku banjelu ba Nzambi mulonde dijinga diende dibi ne kudienzaye Satana Diabolo. Bible udi umvuija mushindu utu muntu udinyanga; udi wamba ne: ‘Muntu yonso udi uteyibua kudi lukuka luende pamukokalu ne pamulobeshalu. Pashishe lukuka, pimitalu, ludi lulela bubi: ne bubi, pakolabu, budi bulela lufu.’​—Yakobo 1:14, 15.

Ke tshivua tshienzeke. Pavua Yehowa Nzambi mufuke Adama ne Eva, muanjelu wakalua kumutombokela eu uvua mutangile. Muanjelu eu uvua mumanye ne: Yehowa uvua muambile Adama ne Eva bua kuuja buloba ntente ne bantu bakane, bavua ne bua kutendelela Yehowa. (Genese 1:28) Muanjelu eu wakamona ne: kuvua mushindu wa kupeta butumbi ne lumu. Lukuka luakamusaka bua kujinga bikole ditendelela dia bantu anyi tshintu tshivua tshiakanyine anu Mufuki nkayende. Pamutu pa kumbusha dijinga dibi edi, muanjelu eu wakadikolesha too ne pakamusakadi bua kushima ne kutombokela Nzambi. Tangila tshiakenzaye.

Muanjelu eu wakangata nyoka bua kuakula ne Eva. Nyoka wakakonka Eva ne: ‘Nzambi wakamba ne: Kanudi mamuma a mitshi yonso idi mu budimi anyi?’ Eva wakamuambila mukenji  uvua Nzambi mubelele ne tshivua ne bua kubafikila bu bobu mua kubenga kuutumikila. Ke nyoka kumuambila ne: ‘Kanuena nufua bulelela; bualu bua Nzambi udi mumanye ne: Panuadia mamuma au, mêsu enu neabululuke, nenuikale bu Nzambi, nenumanye malu mimpe ne malu mabi.’ (Genese 3:1-5) Satana uvua musue kuamba ne: Nzambi uvua mushime Adama ne Eva. Bu Eva mua kudia tshimuma tshia ku mutshi au, uvua mua kulua bu Nzambi, muikale ne bukokeshi bua kusungula tshivua tshimpe ne tshivua tshibi. Ke muakatuadija mafi nanku. Pakamba muanjelu au bualu ebu, wakalua mushiminyinyanganyi wa malu. Wakalua kabidi muluishi wa Nzambi. Ke bualu kayi Bible udi ubikila muluishi wa Nzambi eu ne: ‘Nyoka wa kale, yeye udi muidikibue ne: Diabolo ne Satana.’​—Buakabuluibua 12:9.

‘Nutabale’

Mafi aa akafikisha Eva ku dienza anu tshivua Satana ujinga. Bible udi wamba ne: ‘Pakamona mukaji ne: Mutshi au udi muimpe wa kudia ne muimpe ku mêsu ne udi mua kupa muntu lungenyi, yeye wakangata tshimuma, wakadia, wakapesha mulume wende kabidi, ne yeye wakadia.’ (Genese 3:6) Eva wakitaba Satana ne kutombokela Nzambi. Wakafikisha bayende pende ku dishipa mukenji wa Nzambi. Ke muvua Satana mufikishe bantu ba kumpala ku ditombokela Nzambi nanku. Katshia anu pinapu, Satana ke utu munyima mua malu atu enzeka pa buloba. Udi ne kipatshila kayi? Udi ukeba kusaka bantu bua bamutendelele yeye pamutu pa kutendelela Nzambi mulelela. (Matayo 4:8, 9) Ke bualu kayi Dîyi dia Nzambi didi ditudimuija ne: ‘Nuikale bapole, nutabale; muena lukuna wenu, Diabolo mene, udi wendakana bu nyama wa ntambue udi ukungula, ukeba bantu ba kudiaye.’​—1 Petelo 5:8.

Bible udi uleja patoke ne: Diabolo mmuntu mulelela wa mu nyuma, mmuanjelu wakalua kunyanguka ne kulua muanjelu mubi. Bualu bua kumpala bua tuetu kushala badimuke nkuitaba ne: Diabolo utuku. Kadi kushala bapole ne batabale kudi kumvuija malu a bungi. Mbimpe kabidi kumanya “madimu” a Satana ne mushindu utuye udinga bantu. (2 Kolinto 2:11) Kadi madimu ende atu bishi? Mmunyi mutudi mua kuakandamena?

Diabolo utu ukuata mudimu ne majinga a bantu a mu mashi

Diabolo mmumanye bantu katshia babafuka. Mmumanye bantu bimpe menemene; mmumanye majinga abu ne malu atubu basue. Tshilejilu, Satana mmumanye bimpe ne: bantu batu ne dijinga dia kutendelela ne utu ubuelela mu dijinga edi. Mushindu kayi? Satana udi udinga bantu ne malongesha a dishima a bitendelelu. (Yone 8:44) Bitendelelu bitu bilongesha malu a Nzambi mashilangane ne mikale abengangana. Udi wela meji ne: malongesha aa adi asankisha nganyi? Malongesha adi abengangana kaena mua kuikala onso malelela to. Nunku, kuenaku umona ne: malongesha mavule a mu bitendelelu mmenza kudi Satana bua kudinga nawu bantu anyi? Bible udi umubikila ne: “nzambi wa tshikondo etshi,” udi ufofomija meji a bantu.​—2 Kolinto 4:4.

Bulelela budi bufumina kudi Nzambi budi bulama bantu ku malongesha a dishima. Bible udi ufuanyikija bulelela budi mu Dîyi dia Nzambi ne mukaba munene uvua basalayi ba kale bavuala bua kulama bifuka biabu. (Efeso 6:14) Wewe mulonge Bible ne mulonde malu adimu anu bu udi muavuale mukaba, Bible neakuambuluishe bua kubenga kuitaba malongesha a dishima ne bilema bidi mu bitendelelu bia bungi.

 Dijinga dia bantu dia kutendelela ndibafikishe ku dikeba malu adi kaayi mamanyike. Bualu ebu mbubafikishe ku tshintu tshikuabu tshidi Satana ukuata natshi mudimu. Bu mudi Satana mumanye dijinga dia bantu dia kumanya malu adi kaayi a pa tshibidilu ne adi akemesha, utu wenza mudimu ne malu a midîma bua kukoka ba bungi. Anu bu mutu tshilembi wenza mudimu ne tshintu kampanda bua kukuata nyama, Satana pende udi wenza mudimu ne malu bu mudi: kuamba malu adi alua, kumanya malu ku diambuluisha dia mitoto, kujimija bantu lungenyi, buloji, dibala malu mu tshianza ne majimbu bua kukuata bantu pa buloba bujima.​—Lewitiki 19:31; Musambu 119:110.

Mmushindu kayi uudi mua kudilama bua kubenga kubuelakana mu malu a bademon? Dutelonome 18:10-12 udi wamba ne: ‘Muntu kikadi munkatshi muenu udi utambisha muanende mulume anyi muanende mukaji mu kapia, nansha mutempi wa mbuku, nansha muena dijimbu nansha muena bilengulengu, nansha muena buloji, nansha musesuishi wa bantu ne milowu yende, nansha mutendeledi wa bakishi, nansha muena mupongo, nansha muena lubuku lua muzangu. Muntu yonso utu wenza malu au udi bu tshintu tshibi ku mêsu kua Yehowa; bualu bua malu au mabi Yehowa, Nzambi wenu, udi wipata bantu ku mêsu kuenu.’

Bible udi utubela patoke ne: katubuelakanyi nansha kakese mu malu a nyuma mibi to. Kadi newenze tshinyi biwikala uvua mu malu a midîma kumpala ne mpindieu udi ukeba kualekela? Londa tshilejilu tshia bena Kristo ba kumpala ba mu tshimenga tshia Efeso. Bible udi wamba ne: pakitababu dîyi dia Nzambi, ‘bena majimbu bavule kutuala mikanda yabu, kuyosha kumpala kua bantu bonso.’ Mikanda ayi ivua ne mushinga wa mpalata 50 000, makuta a bungi be! (Bienzedi 19:19, 20) Nansha nanku, bena Kristo ba mu Efeso kabakelakana bua kuyosha to.

Satana utu ubuelela pa mateketa a bantu

Muanjelu mupuangane eu wakalua Satana Diabolo bualu wakapeta dijinga dia kuditumbisha. Wakajula kabidi munda mua Eva lutambishi ne dijinga dia kuikala bu Nzambi. Lelu’eu, Satana udi ukuata bantu ba bungi pa kujula lutambishi munda muabu. Tshilejilu, bamue badi bamona ne: dikoba diabu, tshisamba tshiabu anyi ditunga diabu ndipite dia bakuabu. Kadi ki ntshidi Bible ulongesha to. (Bienzedi 10:34, 35) Bible udi wamba patoke ne: ‘Nzambi wakafuka bisamba bionso bia bantu, bafuma mu muntu umue.’​—Bienzedi 17:26.

Bua kukandamena lutambishi ludi Satana ujinga kujula munda muetu, tudi ne bua kuikala ne budipuekeshi. Bible udi utubela bua “katudiangatshi ne mushinga mupite utudi nawu.” (Lomo 12:3, MMM) Udi wamba kabidi ne: ‘Nzambi udi upidia badi badisue, kadi udi upa badi badipuekesha ngasa.’ (Yakobo 4:6)  Mushindu muimpe wa kukandamena Satana nkuikala ne budipuekeshi ne ngikadilu mikuabu idi Nzambi wanyisha.

Diabolo udi kabidi ubuelela pa butekete budi nabu bantu bua kudifila mu majinga mabi a mubidi. Yehowa Nzambi uvua musue bua bantu bikale ne disanka. Padi bantu bakumbaja majinga abu bilondeshile disua dia Nzambi, badi bapeta disanka dia bushuwa. Kadi Satana yeye udi usaka bantu bua kukumbaja majinga abu mu mishindu mibi. (1 Kolinto 6:9, 10) Mbimpe kuteka meji etu ku malu adi makane ne adi ne lumu luimpe. (Filipoi 4:8) Tuetu benze nunku, nebituambuluishe bua kukanda meji ne majinga etu.

Tungunuka ne kukandamena Diabolo

Udi mua kukandamena Diabolo anyi? Eyowa. Bible udi wamba ne: ‘Nukandamene Diabolo ne yeye neanunyeme.’ (Yakobo 4:7) Nansha wewe mukandamene Satana, kakupuekesha maboko diakamue to, neakukebele ntatu paudi wenda ulonga malu a Nzambi. Diabolo nealue kukuteta kabidi ‘tshikondo tshikuabu’ tshiakanyine. (Luka 4:13) Tshidibi, kumutshinyi to. Wewe utungunuka ne kumukandamena, kakukulamuna kudi Nzambi mulelela to.

Kadi kukandamena Diabolo kudi kulomba kumumanya ne kumanya kabidi mutuye udinga bantu ne tshiudi mua kuenza bua kubenga kukuatshika mu mateyi ende. Udi mua kupeta dimanya edi anu mu Bible. Nunku, angata dipangadika dikole dia kulonga Bible ne ikala utumikila malu audi ulonga. Bantemu ba Yehowa ba muaba uudi musombele mbasue kukuambuluisha bua kulonga Bible pa dîba diudi musue, kuyi ufuta makuta to. Kuelakanyi bua kubakeba anyi kubafundila to.

Wewe mutuadije kulonga Bible, umanye ne: Satana udi mua kuenza bua bakuluishe anyi bakukengeshe bua ulekele kulonga bulelela. Bamue balela anyi balunda bebe badi mua kukufiikila munda bualu udi ulonga Bible, pamuapa anu bualu ki mbamanye malu mimpe audi ulonga to. Bakuabu pabu badi mua kukuseka. Kadi wewe mutekete mu mikolo bua malu aa, Nzambi neasanke anyi? Diabolo mmusue kukutekesha ku muoyo bua ulekele kulonga malu malelela a Nzambi. Udi ulekela Satana ukutshimuna anyi? (Matayo 10:34-39) Kuena ne dibanza diende to. Kadi udi ne dibanza dia Yehowa bualu yeye ke udi mukupeshe muoyo uudi nawu. Nunku, udisuike bua kukandamena Diabolo ne bua ‘kusankisha mutshima wa Yehowa.’​—Nsumuinu 27:11.

[Tshimfuanyi mu dibeji 6]

Bantu bakalua bena Kristo bakuosha mikanda yabu ya majimbu

[Tshimfuanyi mu dibeji 7]

Angata dipangadika dia kulonga Bible