Diabolo utuku bulelela anyi?

MMUNYI muutu umona Diabolo? Utu umumona bu muntu wa bushuwa utu usaka bantu bua kuenza malu mabi anyi bu bubi bua patupu? Tudi ne bua kutshina Diabolo anyi kumumona anu bu muntu wa mu mianu patupu anyi? Muaku “diabolo” udi uleja bukole kampanda bubi budi kabuyi bumueneka kadi bunyangakaja bintu anyi? Muaku eu udi mua kuikala umvuija anu bubi budi munda mua bantu, bu mutu bena teoloji ba bungi bamba anyi?

Kabiena bikemesha mudi bantu bikale ne ngenyi mishilangane pa bidi bitangila Diabolo to. Anji ela meji mutubi bikole bua kumanya muntu udi mumanye mua kusokoka tshidiye! Bidi bitamba kukola bikalaye mupangadije bua kusokoka tshidiye. Bible udi uleja ne: ke mudi Diabolo nanku. Udi umubikila ne: Satana ne udi wamba ne: ‘Satana mene udi udiandamuna bu muanjelu wa munya.’ (2 Kolinto 11:14) Nansha mudi Diabolo muntu mubi, udi udileja bu muntu muimpe bua kudinga bakuabu. Nunku, udi usanka bikole padiye ufikisha bantu ku ditaba ne: katuku to.

Kadi Diabolo nnganyi menemene? Mmunyi ne ndîba kayi diakatuadijaye? Mmushindu kayi udiye usaka bantu bua kumulonda? Kudiku tshitudi mua kuenza bua kumukandamena anyi? Bible udi wakula bua Diabolo katshia anu ku ntuadijilu kuende ne udi wandamuna nkonko eyi bimpe.

[Tshimfuanyi mu dibeji 3]

Bua kumanya muntu udi mudijike kuisu mbikole be!