‘Dinanga dia buonso buenu didi divulangana’

BIPUPU bivule bivua bikuate ditunga dia Japon mu tshidimu tshia 2004. Kuvua bipepele bikole, disapalala dia mâyi ne dikanka dia buloba. Bipupu ebi bivua binyange nsombelu ya bantu ba bungi, ne Bantemu ba Yehowa pabu. (Muambi 9:11) Kadi ntatu eyi yakapetesha Bantemu ba Yehowa mushindu wa kuleja mudibu banange bana babu.​—1 Petelo 1:22.

Tshilejilu, bu muvua mvula miloke bikole mu ngondo wa muanda mutekete, musulu mukuabu wa mu Japon wakuula bikole ke mâyi kumuangalaka mu bantu. Mâyi aa akanyanga nzubu ya Bantemu ba Yehowa mipite pa 20. Mu Nzubu wa Bukalenge kampanda, mâyi akabuela ne kubanda metre umue mujima. Diakamue, Bantemu ba mu bisumbu bivua pabuipi bakalua bua kubambuluisha. Bena budisuile ba bungi bakalua kusukula nzubu ivua miuwule ne bitotshi. Bakasukula ne kulongolola Nzubu wa Bukalenge uvua munyanguke mu mbingu ibidi patupu.

Mu dia matuku 23 ngondo wa dikumi, tshikumina anyi dikanka dia buloba (divua ne bukole bua 6,8 bilondeshile tshipiminu tshia Richter) diakenzeka muaba umue umue eu. Bantu batue ku 40 bakafua, ne bakuabu 100 000 kumuangala nzubu yabu. Mâyi ne nzembu ne kasolonyi kabivuaku to. Nansha muvua dikanka dia buloba edi dienzeke mu tshitupa tshia kilometre 50, Nzubu wa Bukalenge wakalongololabu au kakanyanguka to. Diakamue, bakamuvuija muaba uvua bantu mua kuanji kusombela. Bakulu bakakeba bena Kristo nabu ne lukasa luonso, kadi bakasanka bikole pakumvuabu ne: nansha umue kavua mutapike anyi mufue. Patshiatshia dituku diakalonda, Bantemu basambombo ba ku bavua mâyi avua masapalale mu bantu au manyangile bintu mu ngondo wa muanda mutekete bakalua bua kufila biakudia ne mâyi muaba eu. Kunyima kua mêba makese patupu a dikanka dia buloba edi, bintu bia diambuluisha bikumbane bikavuaku.

Mukulu mukuabu udi wamba ne: “Bana betu bavua disapalala dia mâyi edi dikengesha bakamona kuambuluisha bana babu bavua dikanka dia buloba dinyangile bintu bu mushindu wa kuleja dianyisha bua muvuabu babambuluishe pabu. Bakenza mudimu mukole kutuadijila patshiatshia too ne muakilabu. Bavua ne disanka dia bungi be!”

Nunku disapalala dia mâyi anyi dikanka dia buloba kabivua bipangishe Bantemu ba Yehowa bua kuleja mudibu bana ba muntu to. Kadi padi ntatu eyi ilua, bena Kristo badi bamona tshiakambila Paulo bena Kristo ba mu Tesalonike etshi: ‘Dinanga dia buonso buenu muntu ne muntu dinudi nunangangana nadi didi divulangana.’​—2 Tesalonike 1:3.