“Dikuatshisha dianyi didi difuma kudi Yehowa”

Yehowa udi utubenesha patudi tudifila mu mudimu wende

TANGILA bilejilu bisatu bidi bifuanangane ebi. Muntu kampanda udi wenza luendu pa dikalu mu ditu dinene dia mu Cameroun. Udi wendesha dikalu munkatshi mua mêba a bungi mu njila minyanguke ne mâyi ne bitotshi, upeta njiwu ya bungi anu bua kuya kakankamija bakuabu. Bana betu babidi ba balume ba mu Zimbabwe badi benda kilometre 15 mu misulu miule ne mâyi, bateke bilamba ne bisabata biabu pa mutu bua kabibodi, bionso abi anu bua kuya kalongesha kasumbu kadi pa nkayaku. Muaba mukuabu, muntu mukaji kampanda udi ujuka pa dîba inayi wa patshiatshia anu bua kuya kalongesha munganga mukuabu udi ne dîba anu mu dinda menemene.

Mmunyi mudi bilejilu bisatu ebi bifuanangane? Bantu bonso aba m’Bantemu ba Yehowa ne mbamanyishi ba ku dîba ne ku dîba badi ne mudimu wa kulongesha Bible. Munkatshi mua bamanyishi ba ku dîba ne ku dîba aba, tudi ne bampanda-njila ba pa tshibidilu ne ba pa buabu, bamisionere, batangidi bena ngendu ne bena budisuile badi benza mudimu ku nzubu ya Betele pa buloba bujima. Bonso badi ne tshimanyinu tshimue: mbadifile mu mudimu wa Yehowa. *

Lungenyi luimpe

Bantemu ba Yehowa batu balonda mubelu uvua Paulo mupeshe Timote eu: ‘Unanukile bua kudifila mujalame, bu muena mudimu udi kayi ne bua kufua bundu, uludikile bantu njila mululame mu dîyi dia Nzambi dia bushuwa.’ (2 Timote 2:15) Kadi ntshinyi tshitu tshisaka Bantemu ba bungi bua kuenza mudimu wa ku dîba ne ku dîba?

Patubu bebeja bamanyishi ba ku dîba ne ku dîba aba bua tshinyi batu badifila mu mudimu wa Yehowa, batu bamba ne: ndinanga dia Nzambi ne dia bantu nabu. (Matayo 22:37-39) Mbikumbanyine, bualu bobu kabayi ne dinanga, malu onso adibu mua kuenza adi alua tshianana.​—1 Kolinto 13:1-3.

Mudimu udi ulomba kudifila

Bena Kristo bonso badi badilambule kudi Nzambi badi batumikila mêyi a Yezu aa: ‘Biasua muntu kundonda, adipidie, ambule mutshi wende wa makenga, andonde.’ (Matayo 16:24) Kudipidia kudi kumvuija kudifila ku budisuile bua kuikala bantu ba Yehowa Nzambi ne ba Yezu Kristo ne kubatumikila. Bua ba bungi, didilambula edi ndibafikishe bua kudifila ne muabu muonso mu mudimu wa ku dîba ne ku dîba.

Bantemu ba bungi badi benza muabu muonso bua kuvudija mudimu udibu benzela Yehowa. Angata tshilejilu tshia Júlia, mpanda-njila wa pa tshidilu wa mu São Paulo (mu Brésil), udi ne bidimu 56. Udi wamba ne: “Muanetu wa balume muena Chine wakangela nshinga bua kungebeja ni mvua musue kulonga tshiena-Chine. Tshivua muele meji bua kulonga muakulu mupiamupia to, bualu nkavua ne bidimu bia bungi. Kadi panyima pa matuku makese, ngakitaba bua kulonga. Lelu’eu, ndi mua kuyisha mu tshiena-Chine.”

 Biro bia Bantemu ba Yehowa bia mu ditunga dia Pérou mbifunde ne: “Bidimu bidi panshi ebi, bampanda-njila ba bungi mbaye mu teritware ivua kayiyi miabanya, badi ne muoyo mukole ne lungenyi lua didifila. Badi baya miaba ya kule idi kayiyi mitambe kushidimuka ne bikale bikole bua kupeta mudimu. Bana betu ba balume ne ba bakaji aba mbadifile bua kuenza tshionso tshidibu mua kuenza bua kushala miaba idibu baye. Kadi bualu bua mushinga mukole mbua se: mudimu wabu wa diyisha udi upatula bipeta bilenga miaba ya bungi. Batangidi bena-ngendu mbaleje ne: ku diambuluisha dia bampanda-njila badi badifila aba, nkuenzeke tusumbu tupiatupia.”

Bamue bena Kristo bavua bamba kufua anu bua kuambuluisha bena Kristo nabu. (Lomo 16:3, 4) Mutangidi wa tshijengu kampanda wa mu dimue ditunga dia mu Afrike didi mu mvita wakafunda ne: “Kumpala kua kufika muaba wa ndekelu uvua basalayi bimane pankatshi pa tshitupa tshia bantomboji ne tshia mbulamatadi, banene banayi ba basalayi ba bantomboji ne balami babu bakatunyunguluka meme ne mukajanyi bua kutulomba mikanda yetu ya bumuntu. Bakamona pa mikanda yetu ne: tuvua bena mu tshitupa tshivua mu bianza bia mbulamatadi ne bakafiika munda. Bakamba mumvua mutentekedi. Ke bobu kuangata dipangadika dia kungela mu tshina. Ngakabumvuija tshituvua, ke bobu kutulekela.” Bena mu tshisumbu bakumvua disanka dia bungi bua muvua bana betu aba badifile ne balue anu bua kubakumbula.

Nansha mudi bamanyishi ba ku dîba ne ku dîba bapeta ntatu ya bungi, bungi buabu budi anu buenda buvula pa buloba bujima. (Yeshaya 6:8) Bantu aba badi banyisha diakalenga dia pa buadi edi dia kuenzela Yehowa mudimu. Bantu bakuabu miliyo mivule badi batumbisha Yehowa ne lungenyi lua muomumue lua didifila. Yehowa pende udi ubabenesha bikole. (Nsumuinu 10:22) Bamanyishi aba mbashindike ne: Yehowa neatungunuke ne kubabenesha ne kubambuluisha ne badi ne lungenyi lua muomumue ne lua mufundi wa Misambu elu: “Dikuatshisha dianyi didi difuma kudi Yehowa.”​—Musambu 121:2.

[Mêyi adi kuinshi]

[Lungenyi lunene lua mu dibeji 9]

‘Bantu bebe badi badifila kuudi ne disanka mu dituku diudi ukunguija misumba ya masalayi ebe.’​—MUSAMBU 110:3

[Kazubu mu dibeji 8]

YEHOWA MMUNANGE BASADIDI BENDE BADI BADIFILA BIKOLE

‘Nunku, bana betu bananga, nuikale bakole, nutantamane, nukumbaje mudimu wa Mukalenge misangu yonso, bualu bua nudi bamanye ne: Mudimu unudi nuenza mu Mukalenge kawena patupu.’​—1 Kolinto 15:58.

‘Nzambi kêna upanga buakane bua kupuaye muoyo mudimu wenu ne dinanga dinuakaleja bua dîna diende.’​—Ebelu 6:10.